A 4 soabã:
Tũusd-y y zo-rãmbã ne yam
BÕE LA BIIBLÃ YETA? “Ned sã n tũud yam dãmba, a na n lebga yam soaba.”—Yelbũna 13:20.
BÕE N KƖT TƖ PA NANA? D zo-rãmbã tõe n paasa d sũ-noogã wala b sẽn tõe n boog-a wã. B manesmã la b no-goamã tõe n kɩtame tɩ d sẽn tagsd to-to vɩɩmã zugã yɩ sõma wall kɛgre.—1 Korẽnt dãmba 15:33.
Wala makre, tẽeg-y Biiblã kibar ning sẽn gomd rap 12 wã b sẽn da tʋm Kanaã wã yelle. B fãa la bal sẽn lebg n wa togs koɛɛg ningã sãama nebã sũur wʋsgo. La baasgo, b sʋkã neb a yiib n pẽg Kanaã soolmã b sẽn tɩ gesã, n yeel t’a yaa “sõma wʋsgo.” La neb 12 wã sẽn togs kibar ningã yɛɛsa kʋʋngã. Kibarã pʋgẽ, b wilgame tɩ ‘nebã fãa zẽka b koeese, la tɩ Israɛll nebã fãa yẽgmame.’—Sõdbo 13:30–14:9.
Rũndã-rũndã me, neb wʋsg yaa “sũ-sãoong rãmba, sẽn yẽgemd wakat fãa ne bãmb yɛlã.” (Ziid 16) D sã n tar zo-rãmb sẽn yẽgemd wakat fãa b yɛlã poorẽ n pa tol n tar sũ-noogo, boogda d me sũ-noogã.
BÕE LA Y SEGD N MAANE? Fees-y sõss nins y sẽn nong n sõsd ne y zo-rãmbã neere. Rẽ yĩnga, b wae n wukda b mens b tarmã poorẽ, bɩ b yẽgemda wakat fãa bũmb nins b sẽn pa tarã yĩnga? Bãmb yẽ getame tɩ yãmb yaa zo-bʋg buudu? Rẽ yĩnga, yãmb maanda y sẽn tõe fãa sẽn na yɩl tɩ y zo-rãmbã tʋlg y tarmã bɩ, bɩ y goamã la y manesmã wilgd-b lame tɩ b segd n mao n nanda b sẽn tarã?
Tẽeg-y-yã a Davɩɩd sẽn da segd n wa lebg rĩmã, ne rĩm a Sayull biig a Zonatã sẽn kõ mak-sõng ningã yelle. A Davɩɩd ra wa n tɩ bee rasempʋɩɩgẽ n zoet n soond n baood a yõore. Rĩm a Sayull ra baood-a lame n na n kʋ, bala a ra yɛɛsda a Davɩɩd na n wa ledg yẽ n lebg rĩma. Baa ne a Zonatã sẽn da segd n wa led a ba wã zĩigẽ n yɩ rĩmã, a lebga a Davɩɩd zo-nongre. A Zonatã sak n deegame tɩ yaa Wẽnnaam n yãk a Davɩɩd t’a na n wa lebg rĩma, n da sak n be a Davɩɩd poorẽ.—1 Sãmwɛll 19:1, 2; 20:30-33; 23:14-18.
Yaa zo-rãmb a woto buud la y segd n bao, rat n yeel tɩ zo-rãmb sẽn nand b sẽn tarã, la sẽn dat y neer ne b sũur fãa. (Yelbũna 17:17) La yaa vẽeneg tɩ y sã n dat zo-rãmb a woto buudu, yãmb me segd n maoome n talla zʋg-sõma kãensã.—Filip rãmba 2:3, 4.
[Foto, seb-neng a 7]
Y zo-rãmbã paasda y sũ-noogã bɩ, bɩ b boogd-a lame?