A 2 soabã:

Modg-y n da makd y meng ne y taabã ye

BÕE LA BIIBLÃ YETA? “Bɩ ned kam fãa ges a meng tʋʋmd sẽn yaa to-to, la woto, a na maan sũ-noog ne a meng tʋʋma, la a ka tog n makd a rẽndã ne neb a taabã rẽnd n maand sũ-noog ye.”—Galat dãmba 6:4, Kãab-paalgã Koe-noogo.

BÕE N KƖT TƖ PA NANA? D mi n nong n makda d meng ne d taabã. Wakat ninga d makda d tarmã ne neb nins tarem sẽn pa ta tõnd rẽndã. La naoor wʋsgo, d makda d pãngã, d paoongã wall d minimã la d bãngrã ne neb nins sẽn tar bõn-kãensã n yɩɩd tõndã rẽnda. La sẽn yaa a soab fãa, woto pa nafd ned ye. D wae n tudgdame n tagsdẽ tɩ yaa ned tarem wall a sẽn tõe n maan bũmb ninsã n kɩtd t’a tar yõodo. Woto kɩtdame tɩ ned lebg sũ-ki-neda, la a rat n wags ne a taabã.—Koɛɛg Soaba 4:4.

BÕE LA Y SEGD N MAANE? Modg-y n get y mengã wa Wẽnnaam sẽn get-y to-to wã. Bao-y n bãng-y bũmb ning sẽn kɩtd tɩ ned tar yõod Wẽnnaam nifẽ wã la y tũud rẽ. Biiblã yeelame tɩ “ninsaal geta nin sẽn ne, la Wẽnnaam geta sũuri.” (1 Sãmwɛll 16:7) Wẽnnaam a Zeovaa pa makd yãmb ne y taabã sẽn na yɩl n bãng y yõodã ye. A geta y sũurã, y tagsa wã, la y sẽn baood bũmb ninsã. (Hebre dãmba 4:12, 13) A Zeova mii y pãn-komsmã, la a rat tɩ yãmb me sak n deeg tɩ y sɩd yaa pãn-komsem soaba. Y sã n nong n makd y mengã ne y taabã, y sã n pa lebg wuk-m-meng soaba, y na n lebga sũ-ki-neda. Woto yĩnga, segdame tɩ y sik y meng n sak n deeg tɩ yɛl kẽer wɛɛngẽ, y pa tõe n sãoog y taabã ye.—Yelbũna 11:2.

La yaa bõe takɩ la y segd n maan n tõog n tall yõod Wẽnnaam nifẽ? Wẽnnaam vẽnega no-rɛɛs a Mika t’a yeel woto: “Ninsaalba, Zusoabã wilga yãmb sẽn yaa neere. Yaa bõe la bãmb baood yãmb nengẽ, sã n ka tɩ y maan sẽn yaa tɩrga, n wilg nonglem daar fãa la y sik y mens n sak bãmb bala.” (Miise 6:8) Y sã n tũ sagl-kãngã, Wẽnnaam na n geta y yelle. (1 Pɩɛɛr 5:6, 7) Rẽ yĩnga bũmb beeme n tõe n kõ ned sũ-noog n yɩɩd yãoã sɩda?

[Tẽngr note]

[Foto, seb-neng a 5]

Yaa bũmb ning sẽn be d sũurẽ wã la a Zeova get n bãng d sã n tara yõodo