Bõe la a Zeova baood tɩ tõnd maane?
“Yaa bõe la [a Zeova] baood yãmb nengẽ, sã n ka tɩ y maan sẽn yaa tɩrga n wilg [sõmblem] daar fãa la y sik y mens n sak bãmb bala?”—MIISE 6:8.
1, 2. Bõe yĩng t’a Zeova sõgen dãmb kẽer tõe n koms raoodo, la yaa bõe n na n sõng-ba?
A VERA yaa kiris-nin-poak sẽn yaa wẽn-sakd sẽn tar yʋʋm 75 t’a yĩnsã pa noom wʋsg ye. A yeelame: “Wakat ninga, m geta m fenetrẽ wã n ne m tẽebã pʋgẽ saam-biisã la saam-bi-pogsã sẽn moond zak-zaka. M nintãmã rat n daagame, bala m dat n maana wa bãmba, la m bãaga kɩtame tɩ m pa tõe n tʋm a Zeova tʋʋmdã wʋsg ye.”
2 Yãmb me zoe n tagsa woto bɩ? Yaa sɩd tɩ neb nins fãa sẽn nong a Zeova wã rat n kẽna a yʋʋr yĩng la b maan bũmb nins a sẽn baood tɩ b maana. La yaa wãn to, tõnd yĩnsã laafɩ sã n boogdẽ, tɩ d yʋʋmã vẽsgdẽ, bɩ d tara zak pʋgẽ zɩɩbo? D tõe n komsa raood bilfu, bala yel-kãensa buud tõe n gɩdga tõnd tɩ d pa maan d sẽn datã fãa Wẽnnaam tʋʋmdã pʋgẽ ye. Sã n yaa woto ne tõndo, Miise sak a 6 la a 7 wã vaeesg na n kenga d raood wʋsgo. Sag-kãensã wilgdame tɩ d tõe n maana bũmb nins a Zeova sẽn baood tɩ d maana.
Wẽnnaam sẽn tar manesem ning ne a nin-buiidã
3. A Zeova manesem yɩɩ wãn to ne Israɛll nebã sẽn yaa tõatbã?
3 Pipi, bɩ d ges Miise 6:3-5, la d ges a Zeova sẽn tar manesem ning ne a nin-buiidã. Tẽeg-y t’a Miise wakatã, Israɛll nebã ra yaa tõatba. Baa ne rẽ fãa, a Zeova zoea b nimbãaneg n yeel-b tɩ: “Mam neba.” A bõos-b-la woto: ‘Mam neba, tẽeg-y-yã.’ A pa sãbg-b ye, a makame n na n gom tɩ kẽ b sũyã n soke: “Mam maana yãmb bõe?” A pʋd n kenga b raood n yeel-b tɩ ‘b leok-a.’
4. Wẽnnaam sẽn kõ mak-sõng nimbãan-zoeerã wɛɛngẽ wã segd n kɩtame tɩ d maan bõe?
4 Ad sɩd yaa mak-sõng la Wẽnnaam kõt tõnd fãa! Ne nimbãan-zoeere, a boola Israɛll la Zida nebã sẽn da be a Miise wakatã neb b sẽn da yaa tõdba meng tɩ “mam neba,” la a tol n bõos-ba. Rẽnd sɩd-sɩda, d segd n talla nimbãan-zoeer la sõmblem ne tigingã neba. Yaa sɩd tɩ kẽer pẽnegr tõeeme n pa nana ye, bɩ tõe tɩ b pa keem tẽebã wɛɛngẽ ye. La b sã n nong a Zeova, d rat n sõng-b lame la d zoe b nimbãanega.
5. Yel-kãseng bʋg la Miise 6:6, 7 wilgda?
5 Rẽ poore, bɩ d ges Miise 6:6, 7. A Miise maana sogsg wʋsg n yeele: “Mam sã n dat n kolg Zusoab a Wẽnnaam sẽn be saasẽ wã, mam na n zãa bõe n kẽng n tɩ wõgemd bãmb taoore? Maand sẽn yõogd bugum bɩ, bɩ nag-bi? Mam sã n kõ bãmb pe-raad tus wʋsg ne kaam sẽn yaa wʋsg wa ko-zoetem sẽn ka tõe n sõd n sɛ, bãmb sũur na n yɩɩ noog bɩ? Mam tog n kõo m bi-kãseng m yel-wẽna yĩng bɩ? M dɩk m biig n yao m kongrã?” Ayo, d pa tõe n ta a Zeova yam ne “pe-raad tus wʋsg ne kaam sẽn yaa wʋsg wa ko-zoetem sẽn ka tõe n sõd n sɛ” ye. La bũmb n be sẽn na n ta a yam. Bõn-kãng yaa bõe?
D segd n maana sẽn yaa tɩrga
6. Yɛl a tãab bʋs Wẽnnaam sẽn baood tɩ d maan la b togs Miise 6:8 pʋgẽ?
6 Miise 6:8 wilgda tõnd bũmb ning a Zeova sẽn baood tɩ d maana. A Miise sokame: “Yaa bõe la [a Zeova] baood yãmb nengẽ, sã n ka tɩ y maan sẽn yaa tɩrga n wilg [sõmblem] daar fãa la y sik y mens n sak bãmb bala.” Bõn-kãensã b tãabã tɩ loee ne tõnd sũurã, d tagsgã la d tʋʋmã. D segdame n tʋll n puk zʋg-kãensã, n tags d sẽn na n puk-b to-to, la d modg n sɩd puk-ba. D ges bõn-kãensã b tãabã b sẽn baood tɩ d maana ball-balle.
7, 8. a) “Maan sẽn yaa tɩrga” rat n yeelame tɩ bõe? b) Yel-kɛg bʋs n da piuug a Miise wakatã?
7 “Maan sẽn yaa tɩrga” rat n yeelame tɩ f tũ sẽn yaa tɩrga. Yaa Wẽnnaam sẽn maand yɛlã to-to wã la tɩrlmã tikri. La a Miise wakatẽ nebã pa maan sẽn yaa tɩrg ye, la yaa yel-kɛg la b maan-yã. Wãn to? Ges-y Miise 6:10. Verse kãngã baasgẽ, b wilgame tɩ lɛɛbdbã ‘tara zãmb peoogo,’ sẽn dat n yeel tɩ koosmã magb peoog sẽn yaa kɩdg tɩ loog nugu. Verse 11 paasdame tɩ b tũnugda ne “zãmb kɩlo.” Sã n yaa ne verse 12, “b noy gomda belgr bala.” Rẽnd zãmb petã, zãmb kɩlo rãmbã la belgr goamã ra piuuga a Miise wakatẽ lɛɛbdbã sʋka.
8 Yel-kɛgã maaneg ra pa tek raasẽ wã bal ye. B ra leb n wɛɛ bʋʋdã zĩigẽ. Miise 7:3 wilgdame tɩ “nanambs ne bʋ-kaoodb baooda kũuni.” Neba ra kõta bʋ-kaoodbã kũun sẽn na yɩl tɩ b kao bʋʋdã kɛgr n mong bʋʋm soab bʋʋm. ‘Nin-kãsemsã’ bɩ nin-bɛdã ra naagd n maanda tʋʋm-wẽnsã. Sɩda, a Miise yeelame tɩ nanambsã, bʋ-kaoodbã la nin-kãsemsã ra ‘sɩɩga taab noore,’ bɩ b ra siginda b tʋʋm-wẽnsã.
9. Wãn to la yel-kɛg nins nin-wẽnsã sẽn maana tall pãn-tusdg Zida la Israɛll zutu?
9 Taoor dãmb nins sẽn yaa wẽnsã yel-kɛg kẽe Zida la Israɛll fãa. Miise 7:5 wilgdame tɩ tɩrlmã kaalem kɩtame tɩ bas-yard ra kae tũud-n-taase, zo-nongds la kẽed-n-taas sʋk meng ye. Verse a 6 wilgdame tɩ rẽ kɩtame tɩ baa neb sẽn kĩ ne taab wala komdibli ne b ba rãmba, kompugli ne b ma-rãmb kis taaba.
10. Dũni kãngã sẽn pid ne yel-kɛgã pʋgẽ, kiris-nebã tara yel-manesem bʋgo?
10 Yaa wãn to rũndã-rũndã? D pa ne yel-kãens buud sɩda? Wala a Miise, zĩig fãa d nee yel-kɛgã, neba sẽn pa tar bas-yard ne taabã, la neba yel-manesem ne taabã la zak pʋgẽ vɩɩmã sãoongo. La d sẽn yaa Wẽnnaam sõgen dãmb dũni kãngã pʋgẽ tɩrlem sẽn ka be wã, d pa basd t’a manesmã la a tagsgã kẽ kiris-neb tigingã pʋgẽ ye. D maoodame n na n sak noy nins sẽn tɩ loe ne pʋ-peelmã la burkĩndã daar fãa. Sɩda, d ‘maanda bũmb fãa tɩ zemse.’ (Hebre dãmba 13:18) Rẽ yĩnga, y pa sak tɩ d sã n maan sẽn yaa tɩrga, d paamda bark wʋsgo, d sẽn tar saam-biis sẽn sɩd tar bas-yard ne taabã sɩda?
Wãn to la nebã wʋmd a Zeova koɛɛgã?
11. Wãn to la Miise 7:12 paamd pidsgu?
11 A Miise togsa bãngr-gomd pʋgẽ tɩ baa ne yel-kɛgã, neb buud fãa na n dɩɩ tɩrlmã nafa. No-rɛɛsã reng n togsame tɩ nebã na n tigma ‘sẽn sɩng ne ko-kãseng a yembr n tɩ ta ko-kãseng a to, la sẽn sɩng ne tãng a yembr hal n tɩ ta tãng a to,’ sẽn na yɩl n lebg a Zeova balemdba. (Miise 7:12) Rũndã-rũndã, bãngr-gom-kãngã yaoolem pidsg pʋgẽ, pa bu-yɛng bala, la yaa buudã fãa neb n dɩt Wẽnnaam sẽn pa welsd nebã tɩrlem nafa. (Ezai 42:1) Wãn to la rẽ pidsda?
12. Wãn to la nebã wʋmd ‘a Zeova koɛɛgã’ rũndã-rũndã?
12 Sẽn na yɩl n bãng leokrã, ges-y a Miise sẽn deng n togs goam ninsã. Miise 6:9 yetame: “[A Zeova] koɛɛg moonda tẽnga pʋgẽ. Neb sẽn tar yam zoeta bãmb yʋʋrã.” Wãn to la tẽnsã fãa neb wʋmd a Zeova koɛɛgã, la wãn to la rẽ tɩ loe ne tõnd sẽn maand sẽn yaa tɩrgã? Sɩda, rũndã-rũndã, neba pa wʋmd Wẽnnaam koɛɛg sɩd-sɩd ye. La ne tõnd moonegã dũniyã gill zugã, buud fãa neb la neb paoong sen yaa toor-toor wʋmda a Zeova koɛɛgã. Rẽ kɩtame tɩ neb nins sẽn kelgdã ‘zoet Wẽnnaam yʋʋrã,’ n wa sɩng a yʋʋrã waoogre. D sã n yaa Rĩungã koe-moondb sẽn tar yẽesem, d tʋmda ne tɩrlem la nonglem. D sã n kɩtdẽ tɩ neba fãa bãngd Wẽnnaam yʋʋrã n pa maand welsgo, ‘d maanda sẽn yaa tɩrga.’
D segd n nonga sõmblem
13. Welg-bʋg n be sõmblem sẽn pid ne nonglem la nonglem sʋka?
13 Bɩ d gom bũmb a yiib-n-soab Wẽnnaam sẽn baood tɩ d maan tɩ be Miise 6:8 (NW ) pʋgẽ wã. A Zeova baoodame tɩ d “nong sõmblem.” Hebre gom-biig ning b sẽn lebg tɩ “sõmblmã” tõeeme me n lebg tɩ “sõmblem sẽn pid ne nonglem,” bɩ “nonglem sẽn pa vaande.” Sõmblem sẽn pid ne nonglmã yaa bũmb d sẽn wilgd neb a taabã ne d tʋʋma, d sẽn na n tagsd b yell ne nimbãan-zoeere. Sõmblem sẽn pid ne nonglem yaa toor ne nonglem. Wãn to? Nonglem yaa gom-biig sẽn tɩ loe ne yɛl wʋsg n yɩɩda, n tõe n tɩ loe ne yɛl la tagsa menga. Wala makre, Gʋlsg Sõamyã gomda ned sẽn ‘nong rãam ne kaam,’ la ned sẽn “nong yam” yelle. (Yelbũna 21:17; 29:3) La sõmblem sẽn pid ne nonglem pukda ne neb bala, sẽn yɩɩd fãa neb nins sẽn maand Wẽnnaam daabã. Yaa rẽ yĩng la Miise 7:20 (NW ) sẽn gomd “sõmblem sẽn pid ne nonglem b sẽn tall ne a Abraham” sẽn yɩ ned sẽn maan Wẽnnaam a Zeova raabã yellã.
14, 15. Wãn to la d wilgd sõmblem sẽn pid ne nonglmã, la kaset bʋg n wilgd rẽ?
14 Sã n yaa ne Miise 7:18 (NW ), no-rɛɛsã yeelame tɩ Wẽnnaam “nonga sõmblem sẽn pid ne nonglem.” Miise 6:8 (NW ) pʋgẽ, b pa yet tõnd tɩ d wilg sõmblem sẽn pid ne nonglem bal ye, la b yetame tɩ d nong rẽ wʋsg me. Yaa bõe la verse kãensã zãmsd tõndo? Tɩ yaa ne yamleoog la d wilgd sõmblem sẽn pid ne nonglmã, bala tõnd mengã n sɩd rat n maan dẽ. Wala a Zeova, yaa ne yamleoog la d wilgd sõmblem sẽn pid ne nonglem ne neb nins sẽn be raab pʋgẽ wã.
15 Rũndã-rũndã, Wẽnnaam nin-buiidã pukda sõmblem sẽn pid ne nonglem woto. Ges-y makr a yembr bala. Yʋʋmd 2001, sigr kiuugu, saag ne seb-kãseng n kɩt tɩ koom lim Tɛgzas sẽn be Etazĩni wã, n sãam rot sõor sẽn na ta 70 000, t’a Zeova Kaset rãmbã rot sẽn yɩɩd 700 naage. A Zeova Kaset rãmb sẽn na ta 10 000 sakame n dɩk b sẽkã n tɩ sõng b saam-biisã sẽn be raab pʋgẽ wã zaalem. Yamleoog tʋm-tʋmdbã tʋma sẽn yɩɩd yʋʋmd pʋɩ-sʋk n pa bas ye. B tʋma wĩndga, yʋndo, la wɩkɛn dãmb n me Rĩung Rot a 8, la b me rot sẽn yɩɩd 700 b saam-biisã yĩnga. Neb nins sẽn da pa tõe n tʋm tʋʋm kãngã wã kõo rɩɩbo, teed la ligdi. Bõe yĩng t’a Zeova Kaset rãmb tusa kãensã fãa wa sõng b saam-biisã? Yaa b sẽn “nong sõmblmã” yĩnga. La ad sɩd noogda sũuri, d sẽn mi tɩ d saam-biisã sẽn be dũniyã gill zugã maanda sõmblem sẽn pid ne nonglem tʋʋm woto wã. N-ye, d sã n “nong sõmblmã,” pa zɩɩb ye, yaa sũ-noogo!
Sik-y y mens n kẽn ne Wẽnnaam
16. Mak-bʋg n wilgd sõma tɩ d segd n sika d mens n kẽn ne Wẽnnaam?
16 Bũmb a tãab-n-soab b sẽn baood tɩ d maan tɩ be Miise 6:8 pʋgẽ yaa d ‘sik d mens n sak Wẽnnaam bala.’ Rẽ rat n yeelame tɩ d sak n deeg tɩ yɛl n be tɩ d pa tõe n maane, la d teeg Wẽnnaam. D rɩk makre: Mams-y bipugl kɩdg sẽn na n gãd a ba nug kãn-kãe, n kẽnd seb-kẽeng pʋgẽ. Bipuglã mii vẽeneg t’a pãngã paoodame, la a basa yard ne a ba wã. Tõnd me segd n bãngame tɩ yɛl n be tɩ d pa tõe n maan ye, la d basa yard ne d saasẽ Ba wã. Wãn to la d tõogd n tall bas-yard kãngã? Yaa d sẽn tẽr bũmb ning sẽn kɩt tɩ d segd n ket n pẽnegd Wẽnnaamã. A Miise tẽegda tõnd bũmb a tãabo: A Zeova yaa tõnd Fãagda, d Sorwilgda, la d Kogenda.
17. Wãn to la a Zeova fãag a nin-buiidã tẽn-kʋdem wẽndẽ wã, n wilg-b sor la a kogl-ba?
17 Sã n yaa ne Miise 6:4, 5, Wẽnnaam yeelame: “Mam yiisa yãmb Ezipt.” N-ye, a Zeova ra yaa Israɛll Fãagda. A Zeova yeela woto n paase: “Mam tʋma a Moiiz ne a Aarõ la a [Miryam] tɩ b lʋɩ yãmb taoore.” Wẽnnaam tũnuga ne a Moiiz la a Aarõ n wilg buudã sore, la a Miryam lʋɩɩ Israɛll pagbã taoor tɩ b sao, b sẽn wa n tõog b bɛɛbã. (Yikri 7:1, 2; 15:1, 19-21; Tõodo 34:10) A Zeova tũnuga ne a sõgen dãmbã n kõ sor-wilgri. Verse a 5 wã pʋgẽ, a Zeova tẽegda Israɛll buudã t’a kogl-b-la ne a Balak la a Balaam, la t’a kogla Israɛll nebã b so-toakã yaoolem babgẽ, b sẽn wa n yi Sitim sẽn be Moaabã n digd Gilgall sẽn be Kãabg Tẽngẽ wã.
18. Wãn to la Wẽnnaam yaa tõnd Fãagda, d Sorwilgda, la d Kogend rũndã-rũndã?
18 D sẽn kẽnd ne Wẽnnaamã, a fãagda tõnd ne a Sʋɩtãan dũniyã, n tũnugd ne a Gomdã la a siglgã n wilgd tõnd sore, la a kogend tõnd sẽn ya a sõgen dãmbã sulli, bɛɛb sã n wa zabd ne-do. Rẽnd d tara bʋʋm n na n gãd d saasẽ Ba wã nug sõma, d so-toakã yaoolem babg sẽn pa nana wã sasa, d sẽn digd zĩig sẽn yaa kãseng wʋsg n yɩɩd pĩnd Kãabg Tẽngã, sẽn yaa Wẽnnaam dũni paalgã sẽn yaa tɩrgã.
19. Wãn to la sik-m-mengã tɩ loe ne yɛl d sẽn pa tõe n maane?
19 Sik d mens n kẽn ne Wẽnnaamã sõngda tõnd tɩ d tall tagsg sẽn zems ne d yɛlã sẽn yaa to-to wã. Yaa woto, bala sik-m-mengã tallg rat n yeelame me tɩ d miime tɩ yɛl n be tɩ d pa tõe n maan ye. Yʋʋm sẽn vẽsg bɩ yĩns sẽn ka laafɩ tõe n kɩtame tɩ d pa tõe n tʋm a Zeova tʋʋmdã wʋsg yɛs ye. La d pa na n bas tɩ rẽ koms d raood ye, d segd n tẽegame tɩ Wẽnnaam sakda tõnd sẽn modgd n maandẽ wã, ‘sẽn zems d sẽn tara, la ka bũmb ning d sẽn ka tara ye.’ (2 Korẽnt dãmba 8:12) Sɩda, a Zeova baoodame tɩ d maan a raabã ne d sũur fãa, n maand d sẽn tõe tɛk wa sẽn zems ne d yɛlã sẽn yaa to-to. (Kolos rãmba 3:23) Tõnd sã n tʋmd Wẽnnaam tʋʋmdã ne d sũur fãa la ne yẽesem, Wẽnnaam ningda tõnd bark wʋsgo.—Yelbũna 10:22.
Gũub wata ne barka
20. Yaa d sẽn na n mi bõe n na n sõng-d tɩ d gũ wala a Miise?
20 D sẽn paamd a Zeova barkã kɩtdame tɩ d tags wa a Miise. A togsame: “Mam na n gũu Wẽnnaam, bãmb yaa mam fãagda.” (Miise 7:7) Wãn to la gom-kãensã tɩ loe ne tõnd sẽn sikd d mens n kẽnd ne Wẽnnaamã? Tõnd sã n gũudẽ bɩ d sã n tar sũ-mare, sõngda tõnd tɩ d ra sãam d sũuri, a Zeova daarã sẽn nan pa wa wã yĩng ye. (Yelbũna 13:12) Sɩd-sɩda, tõnd fãa gũuda dũni wẽng-kãngã saabã ne d sũy fãa. La semen fãa, neb tusa n sɩngd n kẽnd ne Wẽnnaam. D sẽn mi rẽ wã kõt-d-la bʋʋm tɩ d na n gũ. Ned sẽn yaa Kaset soab hal sẽn kaoos yeela woto rẽ wɛɛngẽ: “M sã n lebg n ges yʋʋm 55 sẽn loogã moonegã, m nee vẽeneg tɩ m sẽn gũ a Zeova wã pa yɩ bõn ye. Sẽn yaa lebende, kɩtame tɩ m põs tood wʋsgo.” Yãmb me vɩɩmda yel-kãngã buud bɩ?
21, 22. Wãn to la Miise 7:14 paamd pidsg rũndã-rũndã?
21 Sãmbg ka be tɩ kẽn ne a Zeova nafda tõnd ye. D sã n karem Miise 7:14, d yãtame t’a Miise rɩkda Wẽnnaam nin-buiidã n makd ne piis sẽn be ne b pe-kɩɩm bãan pʋgẽ. Bãngr-gom-kãngã pids-kãsengã pʋgẽ, rũndã-rũndã tẽeb Israɛllã neb sẽn ket tẽngã zugã ne ‘piis a taabã’ paamda bãan sẽn yit b Pekɩɩm a Zeova b sẽn teegã nengẽ. B zĩi “weoog sẽn yaa tẽn-sõng pʋgẽ,” tɩ tẽebã wɛɛngẽ bɩ b paamd koglg dũniyã sẽn gudgd n paasdẽ la sẽn yaa yellã pʋgẽ.—Zã 10:16; Tõodo 33:28; Zeremi 49:31; Galat dãmba 6:16.
22 A Zeova nin-buiidã tara yidgri, wala Miise 7:14 me sẽn deng n togsã. A Miise yeta Wẽnnaam piisã bɩ a nin-buiidã wɛɛngẽ: “Bas-y tɩ b kẽng n tɩ zĩnd Basã ne Galaad.” Wala piis nins sẽn be Basã la Galaadã sẽn da wãbd yamd wãbeneg zĩ-sõma zĩisẽ wã, rũndã-rũndã me, Wẽnnaam nin-buiidã yidgda tẽebã wɛɛngẽ, tɩ woto yaa bark a to n kõ neb nins sẽn sikd b mens n kẽnd ne Wẽnnaamã.—Sõdbo 32:1; Tõodo 32:14.
23. Miise 7:18, 19 wã vaeesg tõe n zãma tõnd bõe?
23 Miise 7:18, 19 pʋgẽ, no-rɛɛsã wilgdame t’a Zeova tʋllame n kõ neb nins sẽn tekd yama sugri. Verse 18 wã yetame t’a Zeova “kõta sugri,” la t’a ‘basda taale.’ Sã n yaa ne verse 19 wã, a ‘na n loba b kongra fãa ko-kãsenga zĩ-zulums pʋsẽ.’ Woto tõe n zãmsa tõnd bõe? D tõe n soka d mens n gese d sã n dɩkda a Zeova togs-n-taar yel-kãngã wɛɛngẽ. Tõnd kõta neb nins sẽn beegd tõndã sugr bɩ? Nin-kãens sã n tek yam n kos sugr n baood n na n maneg yellã, sɩd-sɩda d na n datame n maan wala a Zeova n kõ sugr zãng-zãng la wakat fãa yĩngã.
24. Wãn to la a Miise bãngr-gomdã naf yãmba?
24 D sẽn vaees a Miise bãngr-gom-kãngã wã, nafa bʋs la d paam-yã? A tẽega tõnd t’a Zeova kõta neb nins sẽn pẽnegd-a wã saagr hakɩka. (Miise 2:1-13) B sagla tõnd tɩ d maan d sẽn tõe fãa n sõng tɩ baleng hakɩkã kẽng taoore, sẽn na yɩl tɩ d tõog n kẽn Wẽnnaam yʋʋr yĩng wakat sẽn pa sate. (Miise 4:1-5) La b kõo tõnd bas-m-yam tɩ baa tõnd yɛlã sẽn yaa to-to, d tõe n maana bũmb nins a Zeova sẽn baood tɩ d maanã. N-ye, a Miise bãngr-gomdã sɩd sõngda tõnd tɩ d kẽn a Zeova yʋʋr yĩnga.
Wãn to la y na n leoke?
• Sã n yaa ne Miise 6:8, bõe la a Zeova baood tɩ tõnd maane?
• Bõe n yaa tɩlae, d sã n dat n ‘maan sẽn yaa tɩrga’?
• Wãn to la d tõe n wilg tɩ d “nonga sõmblem”?
• ‘Sik d mens n kẽn ne Wẽnnaamã’ baoodame tɩ d maan bõe?
[Foto rãmba, seb-neng 18]
Baa ne a Miise wakatẽ wẽnemã, a kell n maana bũmb nins a Zeova sẽn baood t’a maanã. Rẽnd yãmb me tõeeme
[Foto, seb-neng 20]
Maan-y sẽn yaa tɩrg n moon neb buud fãa
[Foto rãmba, seb-neng 20]
Wilg-y tɩ y nonga sõmblem, n sõng neb a taabã
[Foto, seb-neng 20]
Maan-y y sẽn tõe, la y sak ne sik-m-meng tɩ yɛl n be tɩ y pa tõe n maan ye