Watchtower SƐB VAEESG ZĨIGA
Watchtower
SƐB VAEESG ZĨIGA
Moore
  • BIIBLE
  • SƐBA
  • TIGISSÃ
  • w13 11/1 s.n. 12-16
  • Wãn to la d tõe n kell n ‘gũ Wẽnnaam’?

Video pa be zĩ-kãngã ye.

Video wã pa tõog n yi ye.

  • Wãn to la d tõe n kell n ‘gũ Wẽnnaam’?
  • Gũusg Gasgã moonda a Zeova Rĩungã​—⁠2013
  • Gom-zu-bõonesã
  • Bũmb sẽn wõnd woto
  • MAK-SÕNG BƲG LA A MIISE KÕ TÕNDO?
  • BÕE N NA N MAAN TƖ WILG TƖ SAABÃ TA N SAAME?
  • WÃN TO LA D WILGD TƖ WẼNNAAM SẼN MAAND SŨ-MARÃ NOOM-D LAME?
  • Tõnd na n kẽna a Zeova yʋʋr yĩng wakat fãa!
    Gũusg Gasgã moonda a Zeova Rĩungã—2003
  • A Zeova sõgen dãmbã tara saagr hakɩka
    Gũusg Gasgã moonda a Zeova Rĩungã—2003
  • Bõe la a Zeova baood tɩ tõnd maane?
    Gũusg Gasgã moonda a Zeova Rĩungã—2003
  • D rɩk no-rɛɛsdbã togs-n-taare: A Miise
    Yʋʋmd 2014 Rĩungã tʋʋmde
Bũmb a taaba
Gũusg Gasgã moonda a Zeova Rĩungã​—⁠2013
w13 11/1 s.n. 12-16

Wãn to la d tõe n kell n ‘gũ Wẽnnaam’?

“Mam na n gũu Wẽnnaam.”—MII. 7:7.

Y NA N LEOKAME TƖ BÕE?

  • Mak-sõng bʋg la no-rɛɛs a Miise kõ tõndo?

  • Bõe ne bõe n wat tɩ d gũudẽ?

  • Wãn to la d tõe n wilg t’a Zeova sẽn maand sũ-marã noom-d lame?

1. Bõe n tõe n kɩt tɩ d getẽ tɩ dũniyã saab kaoosdame?

KIRISTÃ sɩnga a naamã rɩɩb saasẽ yʋʋmd 1914, tɩ dũni-kãngã yaoolem wakatã me sɩnge. Yʋʋm-kãnga, zabr n zĩnd saasẽ, t’a Zezi rig a Sʋɩtãan ne a zĩn-dãmbã tɩ b sig tẽngã zugu. (Karm-y Wilgr 12:7-9.) A Sʋɩtãan miime t’a ‘wakatã yaa bilfu.’ (Wil. 12:12) La baa b sẽn yeel t’a “wakat yaa bilfã,” kolga yʋʋm koabg masã, tɩ saabã ket n nan pa ta ye. Rẽ tõe n kɩtame tɩ kẽer tagsdẽ tɩ yaoolem wakatã kaoosda saabo. Tõnd sẽn gũud t’a Zeova wa sãam dũni-kãngã wã, d sã n pa gũusi, d tõe n wa yãgdame, n getẽ t’a basame tɩ kaoosdẽ.

2. Sõs-kãngã na n leoka sogs-bʋse?

2 D sã n pa maag-m-meng soaba, tõe n waa ne yelle. Bala, d tõe n wa yɩɩ yãg-yãg n maan bũmb n pa reng n tags ye. La bõe n tõe n sõng-d tɩ d gũ Wẽnnaam? Sõs-kãngã na n sõng-d lame. A na n leoka sogs-kãensã: 1) Mak-sõng bʋg la no-rɛɛs a Miise kõ tõnd maag-m-mengã wɛɛngẽ? 2) Bõe n na n maan tɩ wilg tɩ saabã ta n saame? 3) Wãn to la d tõe n wilg t’a Zeova sẽn maand sũ-marã noom-d lame?

MAK-SÕNG BƲG LA A MIISE KÕ TÕNDO?

3. A Miise wakatẽ wã, Israyɛll nebã manesem da yaa wãna?

3 Karm-y Miise 7:2-6. No-rɛɛs a Miise wakatẽ wã, Israyɛll nebã ra kɩɩsda a Zeova, tɩ b kɩɩsgã tar paasgo. Rĩm-wẽng a Akaaz wakatẽ wã la yɛlã maneg n zẽne. A Miise maka nin-kãensã sẽn da yaa wẽn-kɩɩsdbã ne “gõose.” Ned sã n kẽnd gõos sʋka, kõsd-a lame tɩ zabdẽ. Woto me, Israyɛll nebã ra maanda b taabã wẽng tɩ zabd-ba. Wẽnemã ra paama pãnga, tɩ neb sẽn kĩ ne taab meng ra maand taab wẽnga. A Miise ra miime t’a pa tar yellã tɩɩm ye. Rẽ n so t’a pʋʋs a Zeova ne a sũur fãa, n da maag a yĩng n gũudẽ t’a wa maneg yellã. A ra kɩsa sɩd t’a Zeova wakatã sã n ta, na n manegame.

4. Zu-loe-bʋs la tõnd segda?

4 Wa a Miise, tõnd me vɩɩ ne neb sẽn yaa ratem-m-ye rãmba. Neb wʋsg yaa “zɩ-beoog rãmba, nin-zaalse, neb sẽn ka tar nimbãan-zoeere.” (2 Tɩm. 3:2, 3) D tʋmd-n-taase, d karen-bi-taas wall d yags sã n yaa ratem-m-ye rãmba, sãamda sũur wʋsgo. La tõnd sʋka, kẽer n segd zu-loɛɛg wẽnem sẽn yɩɩd rẽ. A Zezi yeelame tɩ ned sã n sak yẽ, a zak rãmb tõe n kisg-a lame. A sẽn yeel bũmb ningã wõnda Miise 7:6 goamã. A yeela woto: “Mam waame n na n welg rao ne a ba, la bi-pugl ne a ma, la pag ne a sɩd ma. La ned meng yir dãmb na n yɩɩ a bɛɛba.” (Mat. 10:35, 36) Y zakã neb sẽn pa tũud a Zeova sã n yaand-y wall b namsd-y-yã, tõe n yɩɩ toog wʋsgo. Sã n wa yaa woto bɩ y ra koms raood n maan b sẽn datã ye. Kell-y n sak-y-yã a Zeova, la y maag y yĩng n gũ t’a wa maneg yellã. Y sã n pʋʋsd-a wakat fãa n kot sõngre, a na n kõ-y-la pãng la yam tɩ y tõog n kell n sak-a.

5, 6. Wãn to la a Zeova keoa a Miise, la bõe la a Miise pa paam n yã?

5 A Zeova keoa a Miise a maag-m-mengã yĩnga. Rĩm-wẽng a Akaaz kiime, t’a biig a Ezekɩas sẽn yɩ rĩm-sõngã ledg-a. A Ezekɩas sõnga Israyɛll nebã tɩ b lebs n tũ a Zeova. A Miise yãa bõn-kãensã fãa. Sẽn paase, a Zeova bʋ-kaoorã koees nins a Miise sẽn taas Samari nebã pidsa wakat ning Asiiri sodaasã sẽn wa n sãam Israyɛll rɩtg soolmã.—Mii. 1:6.

6 La a Miise kiime n pa yã bãngr-goam nins a Zeova sẽn kɩt t’a togsã fãa pidsg ye. Wala makre, a ra yeela woto: “Wakat watame tɩ Zu-soabã roogã tãng na n zẽk n yɩɩg tãensã fãa. La buud wʋsg na n maga taab n kẽng be. Buud wʋsg na n waame n wa yeele: ‘Wa-y tɩ d rʋ Zu-soabã tãng zug n kẽng a Zakoob Wẽnnaam doogẽ wã tɩ b zãms tõnd d sẽn tog n maan bũmb ninsi, la d tũ bãmb sore.’” (Mii. 4:1, 2) A Miise kiime tɩ bãngr-gom-kãngã nan pa pids ye. Baasgo, a ra yãka yam tɩ baa neb a taabã sẽn maandg fãa, yẽ na n kell n saka a Zeova n tãag a kũum. Rẽ n so t’a yeel yaa: “Baa buudã fãa sã n waoog b mens wẽnnaam-dãmba, tõnd na n waooga Zu-soab a Wẽnnaam la d sak bãmb wakat fãa.” (Mii. 4:5) A Miise tõog n maaga a yĩng n gũ a Zeova zu-loeesã pʋgẽ. Bala, a ra kɩsa sɩd t’a Zeova na n pidsa a pʋlemsã fãa. A ra teega a Zeova zãng-zãnga.

7, 8. a) Bõe yĩng tɩ d segd n kɩs a Zeova sɩda? b) Bõe la d tõe n maan tɩ sõng-d tɩ d ra getẽ tɩ saabã kaoosdame?

7 Tõnd me kɩsa a Zeova sɩd zãng-zãng wa a Miise bɩ? Bʋʋm wʋsg n wilgd tɩ d segd n kɩs-a-la sɩda. D ne a Miise bãngr-gomdã sẽn pidsdi. Rũndã-rũndã sẽn yaa yaoolem wakatã, neb milyõ-rãmb sẽn yaa buud toor-toor neb n wat ‘Zu-soabã tãng zugu.’ Baa b tẽnsã sẽn mi n zabd taabã, bãmb “dɩka b sʋʋsã n kud wãgse,” n pa ‘le zãmsd zabr yɛs ye.’ (Mii. 4:3) Y sẽn paam n naag a Zeova nin-buiidã sẽn nong laafɩ wã pa noom-y sɩda?

8 Tõnd fãa ratame t’a Zeova sãam dũni-kãngã tao-tao. La d sã n dat n maag d yĩng n gũ a Zeova, d segd n gesa yɛlã wa a sẽn get-b to-to wã. A yãka raare, t’a Zezi Kirist sẽn yaa ‘rao ning a sẽn yãkã’ na n kao ãdem-biisã bʋʋdo. (Tʋʋ. 17:31) La nand tɩ ra-kãng ta, Wẽnnaam kõo nebã fãa weer tɩ b tõe n “bãng sẽn yaa sɩdã,” n tũ rẽ n wa paam fãagre. Yaa yõor yelle. (Karm-y 1 Tɩmote 2:3, 4.) D sã n maand d sẽn tõe fãa n sõngd d taabã tɩ b bãngd a Zeova, na n yaa wa wakatã loogda tao-tao. Ka la bilfu, bʋ-kaoorã daar na n taame. Wakat kãnga, d sũur na n yɩɩ noog d sẽn modg wʋsg koɛɛgã mooneg pʋgẽ wã.

BÕE N NA N MAAN TƖ WILG TƖ SAABÃ TA N SAAME?

9-11. Pipi Tesalonik rãmb 5:3 bãngr-gomdã zoe n pidsame bɩ? Wilg-y y leoorã võore.

9 Karm-y 1 Tesalonik rãmb 5:1-3. Ka la bilfu, nebã na n yeelame tɩ ‘laafɩ la yĩn-maasem.’ D sã n pa rat tɩ gom-kãensã tudg-du, d segd n ‘gũusame, la d tall yam sẽn vẽen sõma.’ (1 Tes. 5:6, MN) Sẽn na yɩl tɩ d ra wa gũs Wẽnnaam daabã maaneg wɛɛngẽ, d na n goma bũmb kẽer yelle. Yaa yɛl sẽn maande, n na n pak sor tɩ b wa tõog n yeel tɩ “laafɩ la yĩn-maasmã.”

10 Dũni gill pipi zabrã ne zabr a yiib-n-soabã poore, tẽnsã taoor dãmb ra baooda laafɩ wã ne b sũy fãa. Pipi zabrã loogr poore, b lugla Sosiete dɛ nasiõ wã, n tẽed t’a na n tõogame tɩ laafɩ zĩndi. Zabr a yiib-n-soabã poore, b lugla Nasiõzĩni wã me rẽ yĩnga. Tẽnsã taoor dãmb ne tũudmã taoor dãmb ra kɩsa sɩd tɩ sigl-kãensã na n tõogame tɩ laafɩ zĩnd dũniyã zugu. Wala makre, Nasiõzini wã wilgame tɩ yʋʋmd 1986 soabã, tẽnsã fãa segd n naaga taab n bao laafɩ. Yʋʋm-kãnga, Papã sẽn yaa Katolik tũudmã taoor soabã tigma tẽns wʋsg taoor dãmba, ne tũudum a taabã taoor dãmb Asiiz sẽn be Itali soolmẽ wã, tɩ b pʋʋs laafɩ wã yĩnga.

11 La bõn-kãens baa a ye pa yɩ 1 Tesalonik rãmb 5:3 bãngr-gomdã pidsg ye. Bõe yĩng tɩ d yet woto? Bala, toog pa paam-b zĩig pʋgẽ wa bãngr-gomdã sẽn wilgã ye.

12. Bõe la tõnd mi “laafɩ la yĩn-maasmã” yeelg wɛɛngẽ?

12 Ãnd dãmb la sẽn na n wa yeel tɩ “laafɩ la yĩn-maasmã”? Bõe la kiris-neb ne yʋʋrã taoor dãmb la tũudum a taabã taoor dãmb na n maan wakat kãnga? La tẽnsã taoor dãmb yẽ? Biiblã pa leok sogs-kãensã ye. D sẽn mi bal yaa tɩ baa “laafɩ la yĩn-maasmã” yeelg sẽn na n yɩ to-to, la baa sã n wa wõnd b sɩd tõogame tɩ laafɩ zĩndi, pa na n yɩ laafɩ hakɩk ye. Dũniyã na n ket n bee a Sʋɩtãan nugẽ. Dũni-kãngã yaa wẽng wʋsgo, n na n kell n yɩ wẽnga. Rẽnd d sã n tẽ gom-kãensã sẽn yaa belgrã n kẽes d toog politikã pʋgẽ, na n yɩɩ kaeto.

13. Bõe yĩng tɩ malɛgsã yõk sobd nins sẽn na n wa ne sãoongã?

13 Karm-y Wilgr 7:1-4. D sẽn gũud 1 Tesalonik rãmb 5:3 bãngr-gomdã pidsgã, malɛgs n yõk sobd nins sẽn na n kɩt tɩ to-kãsengã sɩngã. Bõe yĩnga? Tʋm-tʋmd a Zã wilgame tɩ yaa sẽn na yɩl tɩ “Wẽnnaam nonglem yembsã” sẽn yaa kiris-neb nins sẽn paam zaeebã paam b yaoolem bãndã.a B fãa sã n wa paam yaoolem bãndã, malɛgsã na n basa sãoong sobdã. Rẽ na n waa ne bõe?

14. Bõe n wilgd tɩ Babilon-kãsengã sãoong ta n saame?

14 Babilon-kãsengã sẽn yaa ziri tũudum toor-toorã na n paama bũmb ning a sẽn segd ne wã. B na n sãam-a lame. A sãoongã wakate, ned baa a ye pa na n tõog n sõng-a ye. Rũndã-rũndã menga, bũmb wʋsg n wilgd t’a sãoongã ta n saame. (Wil. 16:12; 17:15-18; 18:7, 8, 21) Sɩd me, kiba-kɩtbã wae n kõta kibay sẽn wilgd neb sẽn wɩt tũudmã la tũudmã taoor dãmba. Woto yaa kaset tɩ Babilon-kãsengã tɛɛndbã sõor tara boogre. Baa ne rẽ, tũudmã taoor dãmb pa tẽed tɩ yell n yegd-b ye. Ad b sɩd belgda b mense! Nebã sã n wa yeel tɩ ‘laafɩ la yĩn-maasem,’ tẽnsã taoor dãmb na n yika zĩig pʋgẽ n zab ne ziri tũudmã, n sãam-a zãnga. Babilon-kãsengã na n menema wakat fãa yĩnga. Yãmb pa tagsd tɩ bõn-kãensã fãa seka d na maag d yĩng n gũ sɩda?—Wil. 18:8, 10.

WÃN TO LA D WILGD TƖ WẼNNAAM SẼN MAAND SŨ-MARÃ NOOM-D LAME?

15. Bõe yĩng t’a Zeova maand sũ-mare?

15 Baa nebã sẽn sãamd a Zeova yʋʋrã, a maanda sũ-mare, n gũud wakat ning sẽn zemsã n na n maneg yellã. A pa rat tɩ pʋ-peelem soab baa a ye sãam ye. (2 Pɩɛ. 3:9, 10) Yaa woto ne yãmb me bɩ? Nand t’a Zeova daarã ta, bũmb kẽer n be d sẽn tõe n maan n wilg t’a sẽn maand sũ-marã noom-d lame.

16, 17. a) Bõe yĩng tɩ d rat n sõng neb nins tẽeb sẽn maagã? b) Bõe yĩng tɩ sẽn bas-b a Zeova wã segd n lebg n wa a nengẽ tao-tao?

16 D sõng neb nins tẽeb sẽn maagã. A Zezi yeelame tɩ ned sẽn da zãag ne a Zeova sã n lebg n wa, sũ-noog bee saasẽ. (Mat. 18:14; Luk 15:3-7) Rẽnd baa ned sã n da wilg t’a nonga a Zeova n pa le tũud-a ne yẽesem, a Zeova ket n nong-a lame. D sã n sõng ned sẽn da bas tigingã t’a lebg n wa, d noogda a Zeova la malɛgsã sũuri.

17 Yãmb basa Wẽnnaam raabã maaneg bɩ? Tõe tɩ tigingã ned n maan-y bũmb n sãam y sũuri, tɩ y zãag ne a Zeova siglgã. Tõe tɩ kaoosa bilfu. Rẽnd yɩta sõma tɩ y sok y meng woto: ‘Mam vɩɩmã yaa sõma masã, tɩ m sũurã noom n yɩɩd pĩndã bɩ? Yaa a Zeova n beeg maam bɩ, bɩ ned sẽn pa zems zãng n beeg-ma? A Zeova zoe n maana bũmb n sãam m sũur sɩda?’ A Zeova maand-d-la neer wakat fãa. Baa rũndã-rũndã, d sã n pa tũud-a wa d sẽn pʋlm-a wã, a basame tɩ d ket n tõe n dɩ bõn-sõma nins a sẽn kõt-dã nafa. (Zak 1:16, 17) A Zeova raarã ta n saame. Yaa masã la d segd n lebg n wa d Ba a Zeova sẽn nong-dã nengẽ, la d le wa tigingã pʋgẽ. Yaa be bal la d tõe n paam koglg yaoolem wakatã pʋgẽ.—Tõo. 33:27; Heb. 10:24, 25.

18. Bõe yĩng tɩ d segd n teend sẽn lʋɩt-b tõnd taoorã?

18 D teel d taoor lʋɩtbã ne d sũy fãa. A Zeova wilgda tõnd sor la a kogend-d wa pe-kɩɩm-sõng sẽn get a piis yell to-to wã. A yãka a Bi-riblã t’a yaa a pe-kɩɩmbã kãsma. (1 Pɩɛ. 5:4) Tõnd tigimsã tus koabg la zakã pʋsẽ, kãsem-dãmbã geta d ned kam fãa yelle. (Tʋʋ. 20:28) D sã n teend sẽn lʋɩt-b tõnd taoorã, d wilgda a Zeova ne a Zezi tɩ d sũur nooma ne bũmb nins b sẽn maand tõnd yĩngã.

19. Bõe yĩng tɩ d segd n baood d tẽed-n-taasã zĩigẽ?

19 D bao d tẽed-n-taasã zĩigẽ. Rẽ baooda bõe maanego? Pĩnd wẽndẽ wã, bɛɛb sã n wat n na n zab ne sodaas sẽn mi zabr sõma, sodaasã sersdame n kolg taaba, n seg-ba. B sã n teeg taab woto, b pãngã paasdame. Bala, bɛɛbã pa tõogd n kẽ b sʋk ye. Rũndã-rũndã, a Sʋɩtãan maneg n zabda ne Wẽnnaam nin-buiidã. Pa masã la d segd n zabd ne d tẽed-n-taasã ye. D segd n baooda b zĩigẽ, n pa get b kong-bõonesã ye. Sẽn paase, d segd n kɩsa a Zeova sɩda.

20. Bõe la d segd n maan masã tɛka?

20 Bɩ d fãa modg n kell n gũ Wẽnnaam, la d ra gũs a raabã maaneg wɛɛngẽ ye. D gũ wakat ning nebã sẽn na n wa yeel tɩ “laafɩ la yĩn-maasmã,” la sẽn paam-b zaeebã yaoolem bãndã ningri. Rẽ poore, malɛgs a naasã na n basa sobd nins sẽn na n wa ne sãoongã, tɩ tẽnsã taoor dãmbã sãam Babilon-kãsengã. La nand tɩ bõn-kãens maane, yɩta sõma tɩ d sakd sẽn lʋɩt-b tõnd taoor a Zeova siglgã pʋgẽ wã. D baood d tẽed-n-taasã zĩigẽ, la d kɩɩsd a Sʋɩtãan ne a zĩn-dãmbã. Segdame me tɩ d tũ yɩɩl-gʋlsdã sagl-kãngã: “Yãmb fãa sẽn tẽed Zu-soabã, bɩ y maan daood n keng y sũyã.”—Yɩɩl 31:25.

a Y sã n dat n bãng welgr ning sẽn be pipi bãndã ne yaoolem bãndã sʋkã, y tõe n gesa yʋʋmd 2007 yʋʋm-vẽkr kiuug pipi daar Gũusg Gasgã (ne farẽndã) seb-neng 30-31.

    Moorã Sɛba (1991-2025)
    Pag-y
    Pak-y
    • Moore
    • Toole
    • Y sẽn date
    • Copyright © 2025 Watch Tower Bible and Tract Society of Pennsylvania
    • Y sẽn segd n sake
    • Noy d sẽn tũudi
    • Paramètres de confidentialité
    • JW.ORG
    • Pak-y
    Toole