D rɩk no-rɛɛsdbã togs-n-taare: A Miise
1. Bõe yĩng tɩ d tõe n kɩs sɩd t’a Zeova na n sãama dũni-kãngã wakat ning a sẽn yãkã bal kɛpɩ?
1 Neb wʋsg sokda b mens dũni-kãngã sẽn na n sa wakat ninga. Tõe tɩ no-rɛɛs a Miise me sẽn wa n taasd Israyɛll ne Zida nebã a Zeova bʋ-kaoor koeesã, a ra sokda a meng gom-kãens sẽn na n pids wakat ningã. Baasgo, a Miise tẽeme tɩ bãngr-goamã na n pidsame, la a tẽebã pa yɩ zaalem ye. Sɩd me, yʋʋmd 740 sẽn deng a Zezi rogmã, a Miise yãa bãngr-gomd ning a Zeova sẽn da kɩt t’a togs Samari wɛɛngẽ wã pidsgu. (Mii. 1:6, 7) Kaoosg zugẽ, b sãama Zerizalɛm yʋʋmd 607 soabã pʋgẽ. (Mii. 3:12) Tõnd me gũudame t’a Zeova wa sãam dũni-kãngã. Woto wã, wãn-wãn la d tõe n dɩk a Miise togs-n-taare?
2. Wãn to la d wilgd tɩ d gũuda a Zeova daarã ne sũ-mare, la bõe yĩng tɩ d segd n tall sũ-mare?
2 Tall-y sũ-mare: A Miise yeela woto: “Ne maam, mam na n gesa Zu-soabã. Mam na n gũu Wẽnnaam, bãmb yaa mam fãagda.” (Mii. 7:7) La no-rɛɛs a Miise ra pa zĩ n gũudẽ bal t’a Zeova goamã pids ye. A kell n wɩnga ne tʋʋmd ning a Zeova sẽn bobl-a wã. Tõnd me sẽn gũud a Zeova raarã, d segd n mao n talla “yel-manesem sẽn yaa sõma” la d yɩ neb sẽn “sakd Wẽnnaam.” (2 Pɩɛ. 3:11, 12) A Zeova maanda sũ-mare, n dat tɩ neb wʋsg tek yam n kos sugri. (2 Pɩɛ. 3:9) Woto yĩnga, bɩ d rɩk no-rɛɛsdbã togs-n-taar n tall sũ-mare, wa Biiblã sẽn sagend-dã.—Zak 5:10.
3. Bõe yĩng tɩ d segd n pʋʋsd a Zeova n kot a vʋʋsem sõngã?
3 Teeg-y-yã a Zeova n paam pãnga: Baa a Miise tʋʋmdã sẽn pa yɩ nana wã, a kell n teega a Zeova n paam pãng n tõog tʋʋmdã. (Mii. 3:8) Dẽnd Biiblã sẽn sagend-d tɩ d teeg a Zeova wã zemsame. Sɩd me, a kõta neb nins sẽn ya wã pãnga, tɩ b tõe n tʋm tʋʋm nins a sẽn bobl-bã. (Yɩɩl 84:6, 8; Ezai 40:28-31) A Zeova zoe n sõnga yãmb a tʋʋmdã pʋgẽ bɩ? Y pʋʋsda a Zeova wakat fãa n kot a vʋʋsem sõngã sẽn yaa pãn-kãsengã bɩ?—Luk 11:13.
4. Wãn to la d tõe n wilg daar fãa tɩ d tũuda a Zeova?
4 Wẽnnaam daabã maaneg n da tar yõod n yɩɩd ne a Miise. Baa a sẽn da vɩ wẽn-kɩɩsdb sʋkã, a ra yãka yam n na n kell n sak a Zeova ne a sũur fãa. Daar ne a to fãa, yɛl toor-toor n dat n sãam tõnd ne a Zeova zoodã. Woto yĩnga, bɩ d mao n ket n sakd a Zeova, n wilgdẽ t’a yaa tõnd Wẽnnaam.—Mii. 4:5.