Sak-y Rĩm ning vʋʋsem sõngã sẽn wilgd sorã n paam barka!
‘A Zeova sɩɩgã na n paa yẽ zugu.’—EZAI 11:2.
1. Bõe la neb kẽer yeel dũni kãngã yɛlã wɛɛngẽ?
YƲƲMD 2006 soabã pʋgẽ, bãngd a ye yʋʋr sẽn boond t’a Stephen Hawking soka woto: “Dũni kãngã politikã sẽn pa tol n tar neng baa bilfã, nebã sẽn sãamd tẽn-gãongã la weoogã n paas yɛl a taabã, ãdem-biisã tõe n le paama yʋʋm 100 tẽngã zug n paas sɩda?” Zʋrnall a ye (New Statesman) pʋgẽ me, b yeela woto: “Tõnd pa tol n tõog n menes naongã dũniyã zug ye. D pa tõog me n wa ne laafɩ la bãan hakɩk ye. D pʋd n yɩɩ sabab tɩ naongã la zabã maneg n paam pãnga. La pa tõnd n pa mao ye. Sɩd me, d maoa d sẽn tõe tɛka. D tagsame tɩ yaa kominismã wall kapitalismã n na n menes naongã. La baa a ye pa yãk neng ye. D lugla Société des Nations wã la d bao zab-te-toos toɛy-toɛy n gũnug d mense. D zaba zab wʋsg me n tẽ tɩ rẽ la zabã na n sa tɩ laafɩ la bãan hakɩk zĩndi. La fãa pa yãk neng ye.”
2. Ka la bilfu, bõe la a Zeova na n maan n wilg tɩ yẽ n segd n yɩ yĩngr la tẽng naaba?
2 Gom-kãensã pa ling a Zeova nin-buiidã ye. Bala, Biiblã pʋgẽ, b wilgame tɩ Wẽnnaam pa naan ninsaalbã n kõ-b tõog tɩ b soog taab ye. (Yel. 20:24) Yaa a Zeova a ye bal n segd n yɩ tõnd naaba, n soog-do. Rẽnd a tara sor n na n kõ-d noy. A tara sor me n na n wilg tõnd a sẽn naan tõnd bũmb ning yĩngã, la a sõng-d tɩ d vɩɩmd tɩ zems ne rẽnda. Sẽn paase, ka la bilfu, a na n menesa ãdem-biisã goosneema rãmbã sẽn makd nin-buiidã zãab n kongdẽ wã. Wakat kãng me, a na n menesa neb nins fãa sẽn pa sakd a naamã, n yaa sabab tɩ b taabã ket n yaa yel-wẽnã la b pãn-komsmã yembse, la b yaa a Sʋɩtãan sẽn yaa “dũni kãngã wẽnnaamã” yembsã.—2 Kor. 4:4.
3. Bõe la a Ezai ra pĩnd n togs Mesi wã zugu?
3 Dũni paalgã sẽn na n yɩ arzãnã pʋgẽ, a Zeova na n dɩɩ naam ãdem-biisã zug ne Mesi wã Rĩung maasem, n wilg-b a nonglem. (Dan. 7:13, 14) A Ezai ra pĩnd n goma Rĩung kãng rĩmã yelle, n yeel woto: “A [Zese] tɩ-viukã na n ninga yesre, la a yẽgrã na n tobame. Zusoabã sɩɩgã na n paa bãmb zugu, yaa yam ne yẽesem sɩɩga, la saglg ne pãng sɩɩga, la bãngr la Zusoabã zoees sɩɩga.” (Ezai 11:1, 2) Bõe yĩng tɩ d tõe n yeel tɩ Wẽnnaam kõo a “Zese tɩ-viukã” sẽn yaa a Zezi Kiristã tõog ne vʋʋsem sõngã maasem sẽn na yɩl t’a yɩ ãdem-biisã naaba? A naamã na n waa ne bark bʋse? La bõe la d segd n maan n paam bark kãense?
Yaa Wẽnnaam meng n kõ a Zezi tõogã
4-6. Bõe la a Zezi mi tɩ kɩt t’a na n tõog n yɩ rĩm sẽn yaa yam soab la nimbãan-zoɛta, maan-kʋʋdb kãsma, la bʋ-kaooda?
4 A Zeova sẽn dat t’a nin-buiidã wa tõog n lebg neb sẽn zems zãngã yĩnga, a yãka rĩm sẽn tar yam hakɩka, n yaa nimbãan-zoɛta, maan-kʋʋdb kãsem la bʋ-kaooda, t’a na n ges-b yelle. Rĩm kãng yaa a Zezi Kirist a sẽn zae ne a vʋʋsem sõngã, t’a na n tõog n tʋm tʋʋm-kãensã fãa wã. D ges bʋʋm kẽer sẽn kɩt tɩ d tõe n yeel t’a Zezi na n tõog n pidsa tʋʋm nins Wẽnnaam sẽn bobl-a wã tɩ zems kɛpɩ.
5 Yaa a Zezi bal n mi Wẽnnaam sõma. Yaa Wẽnnaam bi-yendã bal n mi Ba wã sõma n yɩɩda, bala a zĩnda ne-a n maan yʋʋm milyaar dãmba. Wakat kãng fãa pʋgẽ, a Zezi paamame n bãng a Zeova hal sõma, tɩ kɩt meng tɩ b tõog n yeel t’a yaa ‘Wẽnnaam d sẽn ka tõe n yã wã wẽnego.’ (Kol. 1:15) A Zezi meng yeela woto: “Ned ninga sẽn yã maam, a yãa m Ba.”—Zã 14:9.
6 A Zeova sẽn yãk a toogo, yaa a Zezi a ye bal n mi bõn-naandsã fãa, la hal baa ninsaalbã sõma. Wala makre, Sebr Sõng pʋgẽ wã, b yeta Kolos rãmb 1:16, 17 wã pʋgẽ woto: “Tũu ne bãmba, tɩ Wẽnd naan bũmb fãa, sẽn be-b yĩngri, sẽn be-b tẽng zugu, sẽn tõe n yã la sẽn pa tõe n yã . . . Bãmb meng n deng fãa n beẽ, la bãmb n ket n zãad bũmb fãa.” Hakɩka, d sɩd tõe n boola Kiristã tɩ yam soaba.—Yel. 8:12, 22, 30, 31.
7, 8. Wãn to la Wẽnnaam vʋʋsem sõngã sõng a Zezi a koe-moonegã pʋgẽ?
7 Wẽnnaam zaeya a Zezi ne a vʋʋsem sõngã. A Zezi meng ra yeela woto: “Zusoabã Sɩɩg bee mam zugu. Tɩ bõe, bãmb kõo maam pãng tɩ m moon koe-noog naong rãmb sʋka. Bãmb tʋma maam tɩ m bels sũ-sãoong rãmba, la m moon koɛɛgã tɩ yembs paam fãagre, tɩ zoens paam b nini, la m kõ namsdbã lohorem, la m moon Zusoabã bark wakat koɛɛga.” (Luk 4:18, 19) A Zezi lisgẽ wã, wõnda vʋʋsem sõngã kɩtame t’a lebs n tẽeg yɛl a sẽn da zãms nand t’a wa tẽngã zugu, la tʋʋm nins Wẽnnaam sẽn tʋm-a t’a wa tʋme, a sẽn yaa Mesi wã yĩngã.—Karm-y Ezai 42:1; Luk 3:21, 22; Zã 12:50.
8 Wẽnnaam sẽn kõ a Zezi vʋʋsem sõngã, n paas a sẽn pa tall yel-wẽndã yĩnga, a pa yɩ nin-kãseng sẽn pa tall to bal ye. A yɩɩ karen-saam-kãseng me. Sɩd me, a kɛlgdbã ‘yɛɛsa a karengã yĩnga.’ (Mat. 7:28) Sẽn paase, a Zezi tõog n wilga bũmb ning sẽn wa ne ãdem-biisã zu-loeesã, rat n yeel tɩ yel-wẽndã, b pãn-komsmã, la b sẽn pa mi Wẽnnaam sõma wã. A leb n da mii nebã sũy la b tagsgo, tɩ kɩt t’a ra mi a sẽn segd n tall manesem ning ne-ba.—Mat. 9:4; Zã 1:47.
9. Y sã n tags a Zezi vɩɩmã sẽn yɩ to-to tẽng zugã yelle, wãn to la kɩtd tɩ y maneg n kɩs sɩd t’a na n yɩɩ rĩm-sõngo?
9 A Zezi yɩɩ ninsaal n zĩnd tẽngã zugu. A meng sẽn yɩ ninsaalã, n paas a sẽn vɩɩmd koangdb sʋkã yĩng kɩtame t’a na n tõog n yɩ rĩm-sõngo. Tʋm-tʋmd a Poll yeelame tɩ ‘yɩɩ tɩlae t’a Zezi lebg wa a ba-biisã ne bũmb fãa la a yɩ maan-kʋʋdb kãsem sẽn yaa nimbãan-zoeta, la sẽn maan Wẽnnaam tʋʋmd ne sɩda, n yiis nebã yel-wẽnã, la a yiis yell ninga sẽn da be bãmb ne Wẽnnaam sʋkã. Tɩ bõe, yẽ mengã sẽn paam makr n namsã, a tõe n sõnga neb nins sẽn tar makrã.’ (Heb. 2:17, 18) A Zezi meng sẽn “paam makrã” yĩnga, kɩtame t’a tõe n kʋm neb nins sẽn tar makr n namsdẽ wã. A koe-moonegã sasa, a sɩd ra wilgda vẽeneg t’a kʋmda nebã nimbãanega. Bãad rãmbã, koms-rãmbã, neb nins b sẽn da pa nandã, la baa kambã meng ra kolgd-a-la nana-nana. (Mark 5:22-24, 38-42; 10:14-16) Sik-m-mens rãmbã la neb nins sẽn da rat n bãng Wẽnnaam ne b sũur fãa wã me ra nonga a zĩigẽ. La wuk-m-mens rãmbã ne tɩtaam dãmbã, n paas neb nins sẽn da “ka nong Wẽnnaamã” ra pa kelgd-a ye. B ra kis-a lame, la b kɩɩsd-a.—Zã 5:40-42; 11:47-53.
10. Sẽn yɩɩd fãa, bõe la a Zezi maan n wilg t’a nonga tõndo?
10 A Zezi sak n kõo a vɩɩmã tõnd yĩnga. Tõe tɩ bũmb ning sẽn wilgd n yɩɩd t’a Zezi yaa rĩm-sõng sẽn ka to wã, yaa a sẽn sak n ki tõnd yĩngã. (Karm-y Yɩɩl Sõamyã 40:7-11.) Ad Kiristã meng sẽn da yeele: “Nonglem ka be sẽn yɩɩd woto ye, tɩ ned sak kũum a zo-rãmb yĩnga.” (Zã 15:13) A Zezi sɩd pa wõnd koangdbã sẽn dɩt naamã, n wae n namsd b taabã la b wẽgd-b n baood b mens nafrã ye. A sak n kii ãdem-biisã yĩnga.—Mat. 20:28.
Yaa a Zezi n na n kɩt tɩ d rɩ rondã yõod zãnga
11. Bõe yĩng tɩ d tõe n kɩs sɩd zãng-zãng t’a Zezi sɩd yaa d fãagda?
11 Wẽnnaam sẽn kɩt tɩ yaa a Zezi sẽn yaa maan-kʋʋdb kãsmã n na n kɩt tɩ d rɩ rondã yõod tɩ pidã sɩd zemsame! Sɩd me, a Zezi sẽn wa n be tẽng zugã, a maana yɛl toor-toor n wilg a sẽn na n wa maan bũmb ninsi, a naamã sẽn na n kaoos yʋʋm tusrã sasa, a sẽn yaa d fãagdã yĩnga, tɩ d sã n yɩ sakdba, bɩ d na n wa rɩ rẽ yõodo. Wala makre, a sãooga bãad rãmb la koms-rãmba, a vʋʋga kũum, a rɩlga kʋʋngo, la a kɩt meng tɩ sebg sẽn da rãmbd mogr yõke. (Mat. 8:26; 14:14-21; Luk 7:14, 15) Sẽn paase, a sẽn maan woto fãa wã pa sẽn na n yɩl n wuk a meng n wilg t’a tara tõog ye. Yaa sẽn na n wilg t’a nonga nebã la a zoet b nimbãanega. Rao a ye sẽn da yaa wãoor sẽn wa n yeel-a t’a sã n data, a tõe n sãooga yẽ wãoodã, a leok-a-la woto: “Mam datame.” (Mark 1:40, 41) A naamã sẽn na n kaoos yʋʋm tusrã sasa me, a na n le wilga ãdem-biisã a nimbãan-zoeer woto, la na n yɩɩ dũniyã gill zugu.
12. Wãn to la Ezai 11:9 goamã na n pidsi?
12 Kiristã naam sasa, yẽ ne a na-rɩt-n-taasã na n gesame me tɩ b kell n tʋm tʋʋmd ning a sẽn sɩng hal na maan yʋʋm 2 000 masã wã, rat n yeel tɩ b na n kell n zãmsa nebã tɩ b bãng Wẽnnaam la a raabã. Rẽ, goam nins sẽn be Ezai 11:9 wã na n pidsa kɛpɩ. Be, b yeta woto: “Dũniyã na n pida ne Zusoabã bãngr wa koom sẽn pid mogre.” Wakat kãnga, zãmsg ning nebã sẽn na n paamã pʋgẽ, yaa vẽeneg tɩ b na n wilg-b-la b sẽn segd n ges tẽngã la bũmb nins fãa sẽn be a zugã yell to-to, wa b sẽn da wilg a Ãdem t’a maanã. A Zezi naamã sẽn na n kaoos yʋʋm tusrã ne a na n sa, tɩ Wẽnnaam sẽn da kãab bũmb ning Sɩngr 1:28 wã pidsame, tɩ ãdem-biisã rɩt rondã yõod zãng-zãnga.
Yaa a Zezi n na n kao bʋʋdã
13. Wãn to la a Zezi wilg t’a nonga tɩrlem?
13 Yaa Kiristã ‘la Wẽnnaam yãk t’a na n yɩ nin-vɩɩs la kũum bʋ-kaooda.’ (Tʋʋ. 10:42) Ad d sẽn mi t’a Zezi pa na n sak kɛgr baa bilfu, la tɩ tɩrlem la sɩd na n yɩɩ wa a kurg sẽbdgã sɩd kengda raoodo! (Ezai 11:5) A wilgame t’a kisa yão-beedo, pʋ-lika, zãmb la zʋg-wẽns a taaba, la a wilg neb nins sẽn da pa kʋmd b taabã nimbãanegã tɩ b sẽn maandã pa segd ye. (Mat. 23:1-8, 25-28; Mark 3:5) Sẽn paase, a Zezi wilga vẽeneg tɩ ned pa tõe n maan sɩlem n kɩt t’a pa bãng a sẽn yaa ned ning buudã ye. Bala, a “mengã mii sẽn be ninsaal pʋgẽ.”—Zã 2:25.
14. Bõe la a Zezi maand tɩ wilgdẽ t’a nonga tɩrlem la sɩda, la sogs-bʋs la d segd n sok d mense?
14 Hal ne masã, a Zezi ket n geta koɛɛgã mooneg la karen-biisã maanegã yell dũniyã gill zugu, tɩ wilgdẽ t’a nonga tɩrlem la sɩda. Ned wall goosneema, pa rẽ bɩ malɛg-wẽng baa a ye pa tõe n gɩdg tʋʋm-kãngã tɩ b pa tʋm-a n baas wa Wẽnnaam sẽn datã ye. Dẽnd d tõe n kɩsa sɩd zãng-zãng tɩ Armagedõ ne a na n sa tɩ Wẽnnaam kaoa nin-wẽnsã bʋʋd n wilg a tɩrlmã. (Karm-y Ezai 11:4; Matɩe 16:27.) Bɩ y sok y mens woto: “Rẽ yĩnga mam manesmã ne nebã koe-moonegã pʋgẽ wõnda a Zezi rẽndã bɩ? Baa m laafɩ wã wall m yɛlã sã n kɩt tɩ m pa le tõe n maan yɛl kẽere, m modgda m sẽn tõe tɛk a Zeova yʋʋrã yĩng bɩ?”
15. D sã n tẽegd bõe yell la na n sõng-d tɩ d tũ Wẽnnaam ne d sũur fãa?
15 D sã n tẽegdẽ tɩ koe-moonegã yaa Wẽnnaam tʋʋmd a sẽn bobl tõndo, na n sõng-d lame tɩ d tũ-a ne d sũur fãa. Yaa yẽ n kõ-d noor tɩ d moon koɛɛgã, la a get tʋʋmdã yell ne a Biigã maasem, n kõt neb nins sẽn moond koɛɛgã a vʋʋsem sõngã tɩ b paamd pãnga. Rẽ yĩnga, yãmb nanda y sẽn paam n yaa Wẽnnaam tʋmd-n-taaga, n tʋmd ne a Biigã a vʋʋsem sõngã sẽn wilgd sorã bɩ? Sã n pa a Zeova a ye bala, ned kae n tõe n kɩt tɩ neb sẽn yɩɩd milyõ a yopoe, tɩ b sʋkã wʋsg “yaa nin-tals sẽn ka paam zãmsg” moond Rĩungã koɛɛg sẽn na maan tẽns 236 pʋgẽ ye.—Tʋʋ. 4:13.
Sak-y Kiristã n paam barka!
16. Sɩngr 22:18 goamã wilgda bõe?
16 A Zeova ra yeela a Abrahaam woto: ‘Yaa fo yagengã yĩng la dũniyã buud fãa na n paam barka, fo sẽn sak mam noorã yĩnga.’ (Sɩng. 22:18) Gom-kãensã wilgdame tɩ neb nins sẽn get tɩ b sẽn paam n maand Wẽnnaam ne a Biigã raabã yaa zu-zẽkr bũmbã tõe n kɩsa sɩd tɩ b na n wa paama bark nins Mesi wã ne a na-rɩt-n-taasã sẽn na n wa ne wã. Rũndã-rũndã, nin-kãensã tʋmda Wẽnnaam tʋʋmdã ne b sũur fãa n miẽ tɩ b na n wa paama bark kãense.
17, 18. Bõe la a Zeova yeel Tõod 28:2 wã pʋgẽ, la rẽ baoodame tɩ d maan bõe?
17 Wẽnnaam da yeela Israɛll nebã fãa b sẽn da bool me t’a Abrahaam yagensã woto: “Yãmb sã n sak Zusoab a Wẽnnaam koɛɛgã, yaa bark kãensã, [rat n yeel tɩ bark nins Tõogã sẽn sõdgã] la y na n paame.” (Tõo. 28:2) B tõe n yeela Wẽnnaam rũndã-rũndã nin-buiidã me woto. Dẽnd y sã n dat n paam a Zeova barkã, y segd n ket n ‘sakda’ a koɛɛgã. Y sã n maand woto, y sɩd ‘na n paama’ Wẽnnaam bark toor-toorã. La Wẽnnaam koɛɛgã sakrã baooda bõe maanego?
18 Sak Wẽnnaam koɛɛgã rat n yeelame tɩ d tũud sagls nins sẽn be a Gomdã pʋgẽ wã, la d tũud sɛb nins a sẽn kɩtd t’a tʋm-tʋmdã yiisdẽ wã saglsã me ne d sũur fãa. (Mat. 24:45) Rat n yeelame me tɩ d sakd Wẽnnaam ne a Biigã. Bala a Zezi yeela woto: ‘Ka neb nins fãa sẽn boond maam tɩ Zusoaba, Zusoaba! n na n kẽ saasẽ soolmẽ wã ye. Yaa ned ning sẽn maand mam Ba sẽn be saasẽ wã raabã bala.’ (Mat. 7:21) Sak Wẽnnaam leb n dat n yeelame tɩ f sak kãsem dãmbã b sẽn boond tɩ “kũun sẽn yaa nebã” sẽn lʋɩt tigingã taoorã.—Ef. 4:8, NW.
19. Bõe me la d segd n maan n wa tõog n paam barka?
19 Siglgã taoor lʋɩtb Sullã neb sẽn tʋmd kiris-neb tigingã yʋʋr yĩngã naaga b sẽn bool-b rãmb tɩ “kũun sẽn yaa nebã” sʋka. (Tʋʋ. 15:2, 6) Sɩd me, sẽn yɩɩd fãa, b sẽn na n kao tõnd ned kam fãa bʋʋd to-to to-kãsengã sẽn watã sasa wã bee ne d manesem sẽn yaa a soab ne Kiristã ba-biisã. (Mat. 25:34-40) Woto yĩnga, bũmb d sẽn segd n maan me n wa paam barka, yaa d sẽn na n teend neb nins Wẽnnaam sẽn zae ne a vʋʋsem sõngã.
20. a) B sẽn bool-b rãmb tɩ “kũun sẽn yaa nebã” pipi tʋʋmd yaa bõe? b) Wãn to la d tõe n wilg tɩ d nanda saam-bi-kãensã?
20 Filiyall dãmbã taoor lʋɩtb sulã nebã, tigims sul yel-gɛtbã, la tigimsã kãsem dãmbã Wẽnnaam sẽn yãk ne a vʋʋsem sõngã maasmã fãa me naaga b sẽn bool-b b rãmb tɩ “kũun sẽn yaa nebã” sʋka. (Tʋʋ. 20:28) Saam-bi-kãensã pipi tʋʋmd yaa sõng Wẽnnaam nin-buiidã, “hal tɩ . . . fãa paam tẽeb a yembre, la yam vẽnegre, n bãng Wẽnnaam Biigã, tɩ tõnd bɩ zãng n zems wa Kirist sẽn zems zãngã.” (Ef. 4:13) Yaa sɩd tɩ nin-kãensã fãa me yaa koangdb wa tõndo. La d sã n sakd b saglsã la d wilgd d mi-beoog b sẽn get d yell ne nonglmã yĩnga, d paamda barka.—Heb. 13:7, 17.
21. Bõe yĩng tɩ d segd n modg n sak Wẽnnaam Biigã masã tɛka?
21 Ka la bilfu, Kiristã na n menesa a Sʋɩtãan dũniyã. Wakat kãnga, tõnd põsbã bee ne a Zezi, bala yaa yẽ la Wẽnnaam yãk t’a na n lʋɩ “kʋʋn-kãseng” ning a sẽn da pĩnd n wilg tɩ na n põsame wã taoore, n tall-b n ta “vɩɩm ko-bundum zĩigẽ.” (Wil. 7:9, 16, 17) Woto yĩnga, bɩ d maand d sẽn tõe fãa masã tɛka, n sak rĩm ning a Zeova sẽn zaeyã ne yamleoogo, la d wilgd-a d mi-beoogo.
Vɛrse nins sẽn pʋgdã wilgda bõe?
• Ezai 11:1-5.
• Tʋʋm 10:42.
• Sɩngr 22:18.
[Foto, seb-neng 25]
A Zezi sẽn vʋʋg a Zairus bi-puglã, wilgdame t’a yaa nimbãan-zoɛta