A goamã ket n tara yõodo
“Yãmb goamã yaa mam naoã fɩtla, la m sor vẽenem.”—YƖƖL SÕAMYÃ 119:105.
BIIBLÃ SƖD YAA TOOR BƖ? Sɛb n be tɩ nebã pẽgd b sẽn gʋls-b to-to wã, la pa sɛb sẽn tõe n wilg ned a sẽn segd n vɩɩmd to-to ye. Sẽn paase, b yiisda seb-paal n demsd sagls nins b sẽn kõt sɛbã pʋsẽ wã. La Biiblã yẽ yetame t’a goamã bɩ bũmb nins “fãa sẽn gʋls pĩndã gʋlsa tõnd zãmsg yĩnga.”—Rom dãmba 15:4.
WALA MAKRE: Baa Biiblã sẽn pa logtoeemd sebrã, a tara sagls sẽn tõe n paas ned yĩns laafɩ. Sɩd me, a yeelame tɩ “ned sũur sã n noomẽ, kõta a yĩns laafɩ.” (Yelbũna 14:30) A paasa woto: “Sẽn ka rat n naag-a neb baooda sẽn noom a menga. Yẽ kɩɩsda yam-sõma fãa.” (Yelbũna 18:1) A paasame me tɩ “sẽn kõt-a sũ-noog yɩɩda sẽn deegd-a.”—Tʋʋma 20:35, Sebr Sõngo.
BÃNGDBÃ SẼN YETE: Y sã n tar sũur pʋgẽ bãane, zo-rãmb hakɩk la y yaa kõta, paasda y yĩnsã laafɩ. Sebr a yembr (The Journal of the American Medical Association) yeela woto: “Tãnsiõ wã wae n yõkda rap nins sũy sẽn yikd tao-tao wã n yɩɩd sẽn pa basd-b tɩ b sũy yikdẽ wã.” Ostrali tẽngẽ wã, b sẽn dɩk yʋʋm piig n maan vaeesg poore, b wilgame tɩ sẽn kʋʋl-bã sʋka, sẽn “tar-b zo-rãmb hakɩk la neb b sẽn tõe n togs b pʋsã” wae n kaoosdame n yɩɩd b taabã. Sẽn paase, yʋʋmd 2008 soabã pʋgẽ, b maana vaeesg Kanada la Etazĩni, n mik tɩ d sã n “yãk d ligd n da bũmb n kõ neda, d paamda sũ-noog n yɩɩd d sẽn na n get d meng yell bala.”
YÃMB TAGSG YAA WÃNA? Sebr a to b sẽn gʋls n baas na maan yʋʋm 2 000 sã n kõ sagls laafɩ wã koglg wɛɛngẽ, y na sak n tũ sɩda? Vẽenega, Biiblã yaa sebr sẽn pa wõnd a taaba.
[Goam sẽn tar pãnga seb-neng a 8]
“Mam nonga Biiblã wʋsgo, . . . bala a kõta sagls sẽn yaa sõma laafɩ wã koglgã wɛɛngẽ.”—HOWARD KELLY, M.D., FOUNDING FACULTY MEMBER OF THE JOHNS HOPKINS UNIVERSITY SCHOOL OF MEDICINE