Yãmb ra miime bɩ?

Bõe yĩng tɩ b bool Niniiv tɩ “tẽng ning neb sẽn yaa nin-kʋʋdbã”?

Niniiv ra yaa Asiiri na-tẽnga. Ra yaa tẽn-bedr n tar ro-neeba, wẽnd-doto, so-kõaada, la lal-bɛda. No-rɛɛs a Nahũm boola Niniiv tɩ “tẽng ning neb sẽn yaa nin-kʋʋdbã.”—Nahũm 3:1.

Woto zemsame. Bala, a Senakeriib ra-boogẽ wã, b yãa desẽ-rãmb b sẽn maan lalg zugu, sẽn bilgd Asiiri nebã wẽnemã. A ye n bilgd b sẽn dĩ ned b sẽn yõk zabr zĩigẽ n dat n yãk a zɩlemdã. B gʋlsame n wilg tɩ b sã n da yõk neda, b poogda a yõorã wall a no-bɩmsã n loe wĩir n tatẽ. B ra wae n fiuuda nanambsã zut n ning wĩy n pid b kug-zĩidbã.

Bãngd a ye (Archibald Henry Sayce) bilga Asiiri nebã sẽn da mi n zab n deeg tẽng n tʋmd wẽnem ningã n yeel woto: “B sẽn ta zĩig ning fãa, b firsda nebã zut n zame. B yõogda kom-dibli wã la kom-pugli wã vɩɩse, wall b kʋ-b ne wẽnem sẽn pa tõe n bãng n bilgi. B kaada rap kẽer raad zutu, n sɩɩd sãnda vɩɩse, n pusd kẽer nini, wall b fiuus b nusã la b naoã, pa rẽ bɩ b tʋbã la b yõyã.”

Bõe yĩng tɩ zʋɩf-rãmbã sã n da me roog bɩ b ningd a zugã kogre?

Wẽnnaam da yeela zʋɩf-rãmbã woto: ‘Yãmb sã n me ro-paalga, bɩ y ning a zug kogre, tɩ ned sã n dʋ a zug n lʋɩ, bɩ ra yɩ yãmb yell ye.” (Tõodo 22:8) Woto ra yaa tɩlae, bala zʋɩf-rãmbã ra nong n maanda bũmb toor-toor b rotã zutu.

Israyɛll nebã wʋsg rotã zut ra yaa paklse. B ra wae n dʋʋda b rotã zut n woot sõore, n kokd pemsem, wall b tʋmd tʋʋm kẽere. Tʋʋlg sasa me, b rʋʋda be n gãe. (1 Sãmwɛll 9:26) Koaadbã ra kʋɩɩsda b koodã b rotã zutu, n yaool n were. Be me la b ra kʋɩɩsd kankamã wall viyn biisã.—Zozue 2:6.

B ra rʋʋda b rotã zut me n pʋʋsd a Zeova wall wẽnnaam-dãmb a taaba. (Nehemi 8:16-18; Zeremi 19:13) Wala makre, tʋm-tʋmd a Pɩɛɛr dʋʋ roog zug wĩnto-sʋk n na n pʋʋse. (Tʋʋma 10:9-16) B ra tõe n tii zãnd roog zug n pil ne viyn vãad wall koms vãado, n dʋʋd be n vʋʋsdẽ.

Sebr a ye (La terre et le Livre [ãngil.]) yeelame tɩ Israyɛll nebã ra ningda b rotã rʋʋdse, wall b teeg radgo, la tɩ “b ningda rʋʋdsã wall radgã roogã lalg zug zakã pʋgẽ.” Woto, ned sẽn be roog zug tõe n sigame n pa kẽ a pʋgẽ ye. Tõe tɩ yaa rẽ la a Zezi sẽn wa n dat n wilg a karen-biisã tɩ b segd n zoe n yii Zerizalɛm tao-tao, n yeel tɩ “ned sã n be roog zugu, bɩ a ra sig n dɩk bũmb a roogẽ” wã.—Matɩe 24:17.