“M pa le tagsd tɩ m segd n toeema dũniyã ye”

M KIBARÃ:

Hal m yãadmẽ, m da nonga tɩɩsã la kʋɩlsã wʋsgo. Tõnd zakã rãmb ra bee Zivaskila sẽn yaa tẽng sẽn be Finland Sãntral. We-raoog la kʋɩls wʋsg n da be beenẽ, tɩ tõnd da mi n kẽnd be n kokd pemsem. Mam nonga rũmsã me. M sẽn wa n yaa yãagã, m sã n da yã yũug wall baaga, m yam la m dɩk-a. Mam sẽn wa n bɩtẽ n neẽ tɩ nebã namsda rũmsã, ra sãamda m sũur wʋsgo. Kaoosg zugẽ, m tɩ naaga siglg b sẽn da lugl rũmsã koglg yĩnga. Beenẽ, m yãa neb sẽn da tagsd wa maam.

D ra tʋmda wʋsg rũmsã koglg yĩnga. Wala makre, d ra tũnugda ne manesem buud toor-toor n na n sõng nebã tɩ b bãng tɩ b segd n kogla rũmsã. D ra yitame n wilgd d sũ-pa-noaang ne rũmsã b sẽn kʋʋd n yãkd b gãndã, la logtoɛɛmbã sẽn mi n maan tɩɩm n deng n dɩk n tɩp rũmsã n na n ges tɩɩmã sã n yaa sõma bɩ pa sõma wã. D pʋd n lugla siglg-paalle, n na n zab n kogl rũmsã. D sẽn da rat ne d sũur fãa n pids d raabã yĩnga, kɩtame tɩ naoor wʋsgo, tõnd ne tẽnsã taoor dãmb ra pa wʋmd taab ye. B yõka maam naoor wʋsg n tall n kẽng bʋ-kaoodb taoore.

M sẽn da rat ne m sũur fãa n kogl rũmsã sẽn yãk a toogo, yɛl kẽer sẽn maand dũniyã gill zug n da namsd maam. Mam wa n tɩ naaga sigls kẽere, wala makre, Amnesty International la Greenpeace. M da tʋmda ne m sũur fãa n teend sigls-kãensã. Mam da zabd n sõngda naong rãmbã, kom sẽn tar-b rãmbã, la nimbãan-dãmbã, n na n sõng tɩ b vɩɩmã toeeme.

Bilf-bilfã, mam wa n bãngame tɩ m pa tõe n toeem dũniyã ye. Baa ne sigls-kãensã sẽn da tõogd n welgd yel-bõones kẽerã, zu-loe-kãsemsã rat ket n tara kengr bala. Ra yaa wa tʋʋm-wẽnsã pida dũniyã zĩig fãa, tɩ ned baa a ye toog kae ye. M da getame tɩ sẽn maand kae ye.

BIIBLÃ SẼN TOEEM MAAM TO-TO:

M sẽn da pa tõe n maan faa fʋɩ yel-kãensã wɛɛngẽ tɩ ra sãamd m sũurã yĩnga, m sɩngame n tagsd Wẽnnaam la Biiblã yelle. Mam da zoe n zãmsa Biiblã ne a Zeova Kaset rãmbã. M sũur da nooma b sẽn da wilgd tɩ b nonga maam la tɩ m yell pak-b lame wã. La m da nan pa segl n sa n na n toeem yɛl kẽer m vɩɩmã pʋgẽ ye. La so-kãngã wã, m sakame n na n toeeme.

M dɩka m Biiblã n na n sɩng a karengo. Kɩtame tɩ m paam raood la belsg wʋsgo. Mam yãa vɛrse-rãmb wʋsg Biiblã pʋgẽ, sẽn wilgd tɩ d segd n gesa rũmsã yell neere. Wala makre, Yel-bũn 12:10 yetame tɩ “nin-sõng zoeta a rũms nimbãanega.” (Wẽnnaam Sebre, 1983) M bãngame me tɩ pa Wẽnnaam n kɩt tɩ zu-loeesã be dũniyã pʋgẽ, la tɩ zu-loeesã sẽn tar paasgã yaa neb wʋsg sẽn pa rat n tũ Wẽnnaam raabã yĩnga. M sẽn bãng t’a Zeova yaa Wẽnnaam sẽn yaa nonglem la sũ-mar soabã yɩ-m-la noog wʋsgo.—Yɩɩn-sõamyã 103:8-14.

Wakat kãnga, mam yãa seb-vãoog f sẽn tõe n tũnug ne rẽ n kos Biiblã sɩd yetame tɩ bõe? sebrã. La m sɩd tũnuga ne rẽ n kos sebrã. Pa kaoos la pag a ye ne a sɩd sẽn yaa a Zeova Kaset rãmb wa kogs mam kʋɩlengã n na n zãms maam Biiblã, la m sakame. M sɩnga b tigissã me kẽnde, Rĩungã roogẽ. M wa n nonga bũmb nins m sẽn da zãmsd Biiblã pʋgẽ wã.

Biiblã sõng-m lame tɩ m tõog n toeem bũmb wʋsg m vɩɩmã pʋgẽ. Mam tõog n basa sɩgaarã yũubu, la rãamã yũ tɩ loogã. M manega m mengã, la m no-goamã me. Mam toeema m manesmã sẽn da yaa to-to ne nanambsã. (Rom dãmbã 13:1) M tõogame me n bas yoobã. Sɩd-sɩdã, yel-kãng wɛɛngẽ m da pa tar yõk-m-meng baa bilfu.

Yɩl n toeem m tagsg sẽn yaa to-to ne sigls nins sẽn get ninsaalbã la rũmsã koglg yellã n yɩ toog ne maam n tɩ yɩɩda. Kaoosame tɩ m yaool n tõog n toeeme. Sɩngrẽ wã m da tagsdame tɩ m sã n yi n bas sigls-kãensã, na n yɩɩ wa m zãmb-b lame. La m wa n bãngame tɩ yaa Wẽnnaam Rĩungã bal n yaa dũniyã zu-loeesã fãa tɩɩm. Rẽ kɩtame tɩ m yãk yam n na n teel Wẽnnaam Rĩungã ne m sũur fãa, la m sõng neb a taabã tɩ b bãng-a.—Matiye 6:33.

BIIBLÃ ZÃMSG SẼN NAF MAAM TO-TO:

Mam sẽn wa n be siglsã pʋsẽ wã, tao-tao bala m da welgda nebã zĩis a yiibu, nin-sõma la nin-wẽnse, n da rat n zab ne neb nins m sẽn get tɩ b yaa nin-wẽnsã. La Biiblã sõnga maam tɩ m pa le kis ned ye. M pʋd n modgdame n na n nong ned buud fãa. (Matiye 5:44) Bũmb me m sẽn maand n wilgdẽ tɩ m nonga m taabã yaa m sẽn taasd-b Wẽnnaam Rĩungã koe-noogã. M sẽn ne tɩ koɛɛgã mooneg sõngda nebã tɩ b zemsd taaba, n tar sũ-noog la b saagdẽ tɩ beoog na n yɩɩ neerã noogda m sũuri.

Masã m sũur keemame, bala m basa yɛlã fãa ne a Zeova. M kɩsa sɩd tɩ d Naandã pa na n bas tɩ b nams rũmsã la ninsaalbã wakat fãa yĩnga, la t’a pa na n bas tɩ b sãam tẽngã a sẽn naan tɩ yaa neer wʋsgã ye. Ka la bilfu, a na n tũnuga ne a Rĩungã n maneg bũmb nins fãa b sẽn sãamã. (Ezayi 11:1-9) M sẽn bãng rẽ wã kõt-m-la sũ-no-kãsenga. La pa rẽ bal ye. M sẽn sõngd nebã tɩ b bãngd rẽ wã me noom-m-la wʋsgo. M pa le tagsd tɩ m segd n toeema dũniyã ye.