A Zezi Kirist: Fo tagsdame t’a yaa wãn-wãna?

Yʋʋm-sar kiuugã sã n ta, zĩig fãa d nong n yãta imaaz la fot-rãmb sẽn wilgd a Zezi sẽn yaa bi-pɛɛlga. Kẽer mi n maaname t’a be rũms rɩɩb koglg pʋgẽ. La rẽ yĩnga, a Zezi ket n yaa bi-pɛɛlg bal bɩ?—a Bũmb n maan daar a ye, tɩ tõe n sõng tõnd tɩ d bãng a Zezi sẽn yaa a soab rũndã-rũndã. Rẽ tɩ pe-kɩɩmb n da be zĩig sẽn pẽ Betlehɛm n gũud b piis ne yʋngo. Bɩ d ges bũmb ning sẽn maanã.

Malɛk n wa pe-kɩɩmbã nengẽ, n yeel-b woto: “Fãagdã sẽn yaa Zu-soabã sẽn yaa Kirist doga yãmb yĩng rũndã.” Malɛkã yeel-b lame me tɩ b na n yãa a Zezi “sẽn vil ne peende n gãe rũms rɩɩb koglgẽ.” Zĩig pʋgẽ, malɛgs wʋsg wa n paasa malɛkã, tɩ b sɩng n ‘pẽgd Wẽnnaam.’

Fo sã n wʋm malɛgs sẽn pẽgd Wẽnnaam, f maanda wãna?— Pe-kɩɩmbã sũy yɩɩ noogo. B yeela taab yaa: “Wa-y tɩ d kẽng Betlehɛm n tɩ ges bũmb ning sẽn maanã.” B sẽn kẽngã, b ‘yã a Maari ne a Zozɛfe, la b yã bi-bilfã sẽn gãe rũms rɩɩb koglg pʋgẽ.’

Sẽn yɩ bilfu, neb a taab n wa Betlehɛm, a Maari ne a Zozɛf nengẽ. Pe-kɩɩmbã sẽn togs-b bũmb ning bãmb sẽn yã wã, b fãa sũy yɩɩ noogo. Fo sẽn paam n bãng woto fãa a Zezi zugã pa noom foo sɩda?— Nooma neb nins fãa sẽn nong a Zeova wã. La bõe yĩng t’a Zezi rogmã yɩ neb wʋsg noogo? Sẽn na yɩl n bãng rẽ, bɩ d tẽeg bũmb ning sẽn maan nand t’a Maari lebg a Zozɛf paga.

Daar a yembre, malɛk n wa a Maari nengẽ. Malɛkã yʋʋr la a Gabriyɛll. A yeela a Maari t’a na n doga biiga, la tɩ biigã “na n yɩɩ nin-kãsenga, la b na n boond-a lame tɩ Sẽn-ka-to Biiga.” A Gabriyɛll paasame tɩ biigã na n yɩɩ naaba, la t’a naamã ka na n sɛ abada.

A Maari sokame n na n bãng sẽn na n yɩ to-to t’a tõog n doge, bala a ra pa mi rao ye. Rẽ n so t’a Gabriyɛll yeel-a woto: “Sɩɩg Sõng na n waa fo zugu, la Sẽn-ka-to pãng na n buii foom. Woto yĩnga, bi-sõng ning fo sẽn na n dogã, b na n boonda yẽ tɩ Wẽnnaam Biiga.” A Zeova rɩka a Zezi vɩɩmã n ning a Maari pʋgẽ wã tɩ lebg bi-pɛɛlga. Ad yɩɩ yel-solemde!

Fo zoe n yãa imaaz sẽn wilgd “yam dãmb” a tãab sẽn wa n na n ges bi-pɛɛlg a Zezi, tɩ pe-kɩɩmbã me be be bɩ?— Nowɛllã sã n wa kolgdẽ, d nong n yãta imaaz-kãense. La togs sɩda, pa yɩ woto ye. “Yam dãmbã” ra yaa bagba. Wẽnnaam yaool n kisa bagre. B sẽn wa n ta wã, bõe n maane? Biiblã yeelame tɩ ‘b kẽe roogẽ, la b yãa biigã ne a ma a Maari.’ Dẽnd a Zezi ra pa ket n yaa bi-pɛɛlg n be rũms rɩɩb koglg pʋgẽ ye. A ra lebga bedr bilfu, n be roog pʋgẽ ne a Zozɛf la a Maari.

Bagbã maana wãn n bãng a Zezi zĩiga?— Yaa ãdg n wilg-b sore. Ãdgã reng n tall-b lame n kẽng Zerizalɛm, rĩm a Herood nengẽ, n yaool n tall-b n kẽng Betlehɛm. Biiblã yeelame t’a Herood ra rat n bãnga a Zezi zĩiga, n paam n kʋ-a. Woto wã, fo tagsdame tɩ yaa ãnd n kɩt tɩ ãdgã puki, n tall bagbã n kẽng a Herood nengẽ?— Pa Wẽnnaam a Zeova ye. Yaa a Sʋɩtãan sẽn yaa a bɛ wã.

A Sʋɩtãan ratame tɩ nebã tags t’a Zezi yaa wa bi-pɛɛlg bala, n pa tõe n maan baa fʋɩ ye. La tẽeg tɩ malɛk a Gabriyɛll ra yeela a Maari t’a Zezi na n yɩɩ naaba, la t’a naamã ka na n sɛ abada. Masã menga a Zezi rɩta naam saasẽ. Ka la bilfu, a na n wa sãama Wẽnnaam bɛɛbã fãa. D segd n togsa neb a taabã tɩ bãmb me bãnge.