Ninsaalbã baooda kũumã tɩɩm

Kũumã yaa tõnd bɛ meng-menga. D maanda d sẽn tõe fãa bala d pa rat n ki ye. D ned sã n maan kaalem, tõe n yɩɩ toog tɩ d sak n deeg tɩ yaa sɩda. D sã n yaa bi-bɩɩg me n tar keelem, d tõe n wa tagsdame tɩ bi-bɩɩg pa kiid ye. La yaool n yaa belgre.

Pĩnd wẽndẽ Faraõ-rãmbã maana bũmb wʋsgo, b sẽn da rat n tõog tɩ ninsaal vɩ n pa kiidẽ wã yĩnga. B vɩɩmã tõre, b modga sẽn na yɩl tɩ rẽ tõoge. B kɩtame tɩ b tʋm-tʋmdb tusa me tʋm b yõor tɛk rẽ yĩnga. Rot nins b sẽn me tɩ b boond tɩ Piramiid-rãmbã wilgda b sẽn da ratã, la wilgdẽ me tɩ b pa tõog ye.

Sɩnoaambã nanambsã kẽer me makame. Bãmb sẽn maan bũmb ningã yaa toore. B baoome n na n paam tɩ-koom buud sẽn tõe n kɩt tɩ ninsaal vɩ n pa kiidẽ ye. Wala makre, a Qin Shi Huang yeela a bãngdbã tɩ b maan tɩ-koom sẽn na n kɩt tɩ ned vɩ n pa kiidẽ ye. B tɩt wʋsg pʋgẽ, b kalma bõn-yood tɩ wa lebg zẽnem. La wõnda yaa b tɩɩm a yembr n kʋ-a.

A Juan Ponce de León sẽn yɩ Ɛspayn bãngdã ra tẽedame tɩ ko-bũndum n be tɩ ned sã n yũud bɩ a pa kʋʋndẽ ye. Yʋʋmd 1513 wã, a saaga Karayiib tẽnsã n na n bao ko-kãng zĩiga. A wa n tɩ tuka tẽng b sẽn boond rũndã-rũndã tɩ Floriid. La a kii yʋʋm a wãn poor bala. B zaba ne Amerik buudã neb kẽere, t’a ki zabrã poore. La hal ne rũndã, b zɩ n yã ko-bũndum sẽn kɩtd tɩ ned pa kʋʋndẽ ye.

Faraõ-rãmbã, nanambs a taab la bãngdb modga sẽn na yɩl tɩ ninsaalbã vɩ n pa kiidẽ ye. Baa b sẽn bao kũumã tɩɩm to-to wã pa noom-do, d tõe n yeelame tɩ b sẽn bao rẽ wã pa sõma bɩ? Togs sɩdã, ninsaal fãa ratame n vɩ n pa kiidẽ ye.

NINSAAL TÕE N VƖƖME N PA KIIDẼ BƖ?

Bõe yĩng tɩ ninsaal pa rat n ki? Biiblã wilgda a võore. A yetame tɩ Wẽnnaam a Zeovaa sẽn yaa d Naandã “maana bũmb fãa sõma n zems a wakate. Bãmb ninga wakat sẽn ka sɛt tagsg ninsaal sũur pʋgẽ.” (Koɛɛg Soaba 3:11) Tẽngã bee yamleoogo, tɩ d rat n vɩɩmd a zug wakat fãa. D pa rat n vɩɩmd yʋʋm 80 la zak bal ye. (Yɩɩl Sõamyã 90:10) Ninsaal fãa rat n vɩɩmda wakat sẽn kõn sa.

Bõe yĩng tɩ Wẽnnaam naan ninsaal t’a rat n vɩɩmd wakat sẽn ka sate? Yaa sẽn na yɩl tɩ d sũyã sãamd d sẽn pa tõe n paam rẽ wã yĩng bɩ? Abada. Wẽnnaam pʋd n yeelame t’a na n wa kɩtame tɩ kũum pa le zĩnd ye. Biiblã zĩis wʋsg gomda kũum sẽn pa na n le wa zĩndã yelle, la Wẽnnaam sẽn pʋlem tõnd vɩɩm sẽn kõn sa wã me yelle.—Ges-y zĩ-gũbrã sẽn yet tɩ “kũum ka na n le zĩnd ye.”

A Zezi meng yeela vẽeneg tɩ “vɩɩm sẽn ka sɛtã yaa woto, tɩ bãmb na bãng yãmb sẽn yaa sɩd Wẽnnaam sẽn ka to, la a Zezi Kirist yãmb sẽn tʋm a soabã.” (Zã 17:3) Wilgdame tɩ d na n wa tõog n vɩɩme n pa kiidẽ ye. La a Zezi yeelame tɩ yaa Wẽnnaam bal n na n tõog tɩ kũum pa le zĩndi.