A Zeova “mii bãmb mengã neba”

1. Wãn to la neb sẽn da tũud a Zeova belg b mense? (Ges-y fotã sẽn be yĩngrã.)

DAAR a ye yibeoogo, maan-kʋʋdb kãsem a Aarõ ra yasa a Zeova sɛk-roogã noor ne wisd yõogr laaga, t’a Koore ne rap 250 me yasẽ. B ned kam fãa ra zãada wisd yõogr laaga. (Sõd. 16:16-18) Nif gesg pʋgẽ, nin-kãensã fãa wõnda neb sẽn tũud a Zeova ne b sũy fãa. La a Koore ne a poorẽ dãmbã ra yaa wuk-m-mens rãmb la kɩɩsdb sẽn da rat n deeg maan-kʋʋrã n bas a Aarõ. (Sõd. 16:1-11) B ra belgda b mense, n tẽed tɩ b tata a Zeova yam. B sẽn da tagsd woto wã, b paoogda a Zeova sẽn mi nebã sũy tagsgã. A ra miime tɩ nin-kãensã yaa pʋ-lik rãmba.—Zer. 17:10.

2. Bõe la a Moiiz reng n togse, la wãn to la a goamã pids-yã?

² Daar-n-kãng ket tɩ beoogo, a Moiiz yeela woto: “Zu-soabã na n wilga sẽn ya a bãmb neda.” (Sõd. 16:5) Bõe la a Zeova maan n wilg tɩ yẽ mii neb nins sẽn tũud-a ne b sũy fãa wã ne pʋ-lik rãmbã n bake? A kɩtame tɩ bugum yi yĩngr n wa rɩ a Koore ne neb 250 wã. (Sõd. 16:35; 26:10, MN) A Aarõ bal n põse. A Zeova sẽn maan woto wã, a wilgame t’a Aarõ n sɩd yaa maan-kʋʋda, n tũud yẽ ne a sũur fãa.—Karm-y 1 Korẽnt dãmb 8:3.

3. a) A Poll wakate wã, yel-bʋg n da be kiris-nebã sʋka? b) A Zeova sẽn maan a Moiiz wakatẽ kɩɩsdbã bũmb ningã wilgda bõe?

³ Na maan yʋʋm 1500 poore, yell a woto n zĩnd kiris-nebã sʋka. Tʋm-tʋmd a Poll yeelame tɩ neb sẽn yet tɩ b yaa kiris-neb n zãmsd b taabã sẽn pa sɩda. Nif gesg pʋgẽ, nin-kãensã sẽn yaa sɩdã kɩɩsdbã wõnda tigingã neb a taabã. La b goamã ra tõe n wãa wẽn-sakdbã. Nin-kãensã yaa wẽns wa kata, n ‘sãamd kẽer tẽebo.’ (2 Tɩm. 2:16-18) A Poll sẽn da mi a Zeova sẽn maan a Koore ne a poorẽ dãmbã bũmb ningã, kɩtame t’a kɩs sɩd t’a nee yɛlã sẽn yaa to-to tigingã pʋgẽ wã. Tõnd me tõe n kɩsa a Zeova sɩda. Bɩ d ges a Poll sẽn yeel a Tɩmote bũmb ningã sẽn tõe n sõng-d to-to zĩ-kãng wɛɛngẽ.

“MAM YAA ZU-SOABA, MAM KA TEK YE”

4. A Poll ra kɩsa sɩd ne bõe, la wãn to la a sẽn yeel a Tɩmote bũmb ningã wilgd rẽ?

⁴ A Poll ra kɩsa sɩd t’a Zeova mii neb nins sẽn tũud yẽ ne pʋ-peelmã, la sẽn tũud-b yẽ ne pʋ-likã n bake. Wẽnnaam sẽn vẽneg a Poll t’a gʋls a Tɩmote bũmb ningã wilgda rẽ. A reng n goma sɩdã kɩɩsdb sẽn da sãamd tigingã neb kẽer tẽebã yelle, n yaool n yeel woto: “La baasgo, Wẽnnaam yẽbgr yalsda kãn-kãe ne gom-kãens sẽn yaa wa bãnd sẽn yeta: ‘Zu-soabã mii bãmb mengã neba,’ la: ‘Ned ning fãa sẽn yet tɩ yẽ yaa Zu-soabã rẽnda, bɩ a bas tʋʋm-wẽnse.’ ”—2 Tɩm. 2:18, 19.

5, 6. Bõe la d tõe n yeel a Poll sẽn gom ‘Wẽnnaam yẽbgr sẽn yalsd kãn-kãe’ wã yellã wɛɛngẽ? Wãn to la a goamã naf a Tɩmote?

⁵ Biiblã pʋgẽ, b sã n gomd yẽbgr yelle, tõe n makda bũmb toor-toore. Wala makre, b goma Zerizalɛm sẽn yaa Israyɛll na-tẽngã yẽbgr yelle. B maka tʋʋmd ning a Zezi sẽn tar a Zeova raabã pidsg pʋgẽ wã me ne yẽbgre. (Yɩɩl 87:1, 2; 1 Kor. 3:11; 1 Pɩɛ. 2:6) La yaa vugr bal la b gom ‘Wẽnnaam yẽbgr sẽn yalsd kãn-kãe’ wã yelle. Kiba-bʋg la a Poll tik n gom rẽ yelle?

⁶ A Poll sẽn gom ‘Wẽnnaam yẽbgr sẽn yalsd kãn-kãe’ wã yellã poore, a lebs n togsa goam nins sẽn be Sõdb 16:5 pʋgẽ wã. Yɩɩ bũmb ning a Moiiz sẽn da yeel a Koore ne a poorẽ dãmbã. A Poll sẽn gom rẽ yellã, a tẽega a Tɩmote t’a Zeova mi bũmb ning sẽn da maand tigingã pʋgẽ wã. Wẽnnaam pa na n bas sɩdã kɩɩsdb tɩ b sãam tigingã neb tẽeb ye. Wa a Koore sẽn pa tõog n toeem a Zeova raabã, sɩdã kɩɩsdb sẽn be tigingã pʋgẽ wã me pa na n toeem a Zeova raabã ye. A Poll pa wilg ‘Wẽnnaam yẽbgr sẽn yalsd kãn-kãe’ wã sẽn yaa bũmb ningã takɩ ye. La a goamã sõnga a Tɩmote t’a kɩs a Zeova sɩda.

7. Bõe yĩng tɩ d tõe n kɩs sɩd t’a Zeova na n kell n yɩɩ tɩrlem la sɩd soaba?

⁷ A Zeova noyã pa toeemd ye. Yɩɩl Sõamyã 33:11 yeela woto: “Zu-soabã raab na n zĩnda wakat fãa. Bãmb sũur tagsg na n paa zãmaan fãa.” Biiblã vɛrse-rãmb a taab wilgdame t’a Zeova naamã, a nonglmã, la a tɩrlmã paada wakat fãa, la t’a yaa sɩd soab wakat fãa. (Yik. 15:18; Yɩɩl 106:1; 112:9; 117:2) Malaki 3:6 yeelame: “Mam yaa Zu-soaba, mam ka tek ye.” Sẽn paase, Zak 1:17 wilgame t’a Zeova “ka tedgd baa bilf ye.”

“BÃND” SẼN WILGD TƖ D TÕE N KƖSA A ZEOVA SƖDA

8, 9. Bũmb ning sẽn gʋls ‘Wẽnnaam yẽbgr sẽn yalsd kãn-kae’ wã zugã zãmsda tõnd bõe?

⁸ A Poll yeela 2 Tɩmote 2:19 pʋgẽ tɩ gʋlsem n be Wẽnnaam yẽbgrã zugu. Pĩnd wẽndẽ wã, nebã mi n gʋlsa goam roog yẽbgr zug sẽn na yɩl n wilg roogã met wall a soabã sẽn yaa ned ninga. A Poll n yɩ pipi n gom minun-kãng yell Biiblã pʋgẽ.a Gʋlsem ning sẽn be ‘Wẽnnaam yẽbgr sẽn yalsd kãn-kãe’ wã zugã tara babs a yiibu: 1) “Zu-soabã mii bãmb mengã neba.” 2) “Ned ning fãa sẽn yet tɩ yẽ yaa Zu-soabã rẽnda, bɩ a bas tʋʋm-wẽnse.” Woto tẽegda tõnd bũmb ning sẽn be Sõdb 16:5 pʋgẽ wã.—Karm-y-yã.

⁹ Bũmb ning sẽn gʋls ‘Wẽnnaam yẽbgr sẽn yalsd kãn-kãe’ wã zugã zãmsda tõnd bõe? Pipi, a Zeova nonga neb nins sẽn sakd-a wã, la yiibu, a Zeova kisa tʋʋm-wẽnse. A noyã tika bõn-kãense. Bõe yĩng t’a Poll gom rẽ yell a sẽn wa n gomd sɩdã kɩɩsdb yellã sasa?

10. A Poll wakatẽ wã, wãn to la sɩdã kɩɩsdb manesem ra namsd tigingã neba?

¹⁰ Sɩdã kɩɩsdb manesem da sãamda a Tɩmote la tigingã neb a taabã sũuri. Kiris-neb kẽer ra tõe n getame tɩ b sẽn bas nin-kãensã tɩ b ket tigingã pʋgẽ wã pa zems ye. Tõe meng tɩ b ra maanda sãmb-sãmb ne a Zeova sã n sɩd mii sẽn sakd-b yẽ ne b sũur fãa wã, la sẽn tũud-b yẽ ne pʋ-likã n bake.—Tʋʋ. 20:29, 30.

11, 12. Wãn to la a Poll lɛtrã keng a Tɩmote tẽebã?

¹¹ Sãmbg sẽn kae, a Poll lɛtrã kenga a Tɩmote tẽebo. A tẽeg-a-la bũmb ning a Zeova sẽn maan n wilg t’a Koore ne a poorẽ dãmbã yaa pʋ-lik rãmbã. A Zeova sãam-b lame, tɩ wilg tɩ yaa a Aarõ la a yãk-yã. Woto me, baa a Poll wakatẽ wã neb kẽer sẽn da yet tɩ b yaa kiris-neb n yaool n yaa sɩdã kɩɩsdbã, a Zeova ra na n wilgame t’a mi a meng nebã n bake.

¹² A Zeova pa toeemd ye. Dẽnd, d tõe n teeg-a-la wakat fãa. A kisa tʋʋm-wẽnsã, la a na n sɩbga sẽn maand-b wẽng n pa rat n tek yam n kos sugrã. A Poll tẽega a Tɩmote t’a segd n gũusa a meng ne sɩdã kɩɩsdba, bala ‘ned ning fãa sẽn yet t’a yaa Zu-soabã rẽnd’ segd n kisga tʋʋm-wẽnse.b

NED ZƖ N TŨ A ZEOVA NE A SŨUR FÃA TƖ YƖ ZAALEM YE

13. D tõe n kɩsa sɩd ne bõe?

¹³ A Poll sẽn yeel a Tɩmote bũmb ningã tõe n kenga tõnd me raoodo. Bõe yĩnga? Wilgdame t’a Zeova miime tɩ d sakd-a-la ne d sũur fãa. La rẽ toor sẽn ka be, a Zeova wilgdame tɩ d yell pak-a lame. Biiblã yeta woto: “Zu-soabã nif geta dũniyã zĩigã fãa n dat n sõng neb nins sẽn dat Wẽnnaam ne b sũyã fãa wã.” (2 Kib. 16:9) Dẽnd, d tõe n kɩsa sɩd tɩ d sẽn tũud a Zeova ne d sũur fãa wã pa na n yɩ zaalem ye.—1 Tɩm. 1:5; 1 Kor. 15:58.

14. Nin-bʋs buud la a Zeova kisa?

¹⁴ A Poll gomdã wilgdame me t’a Zeova kisa neb sẽn na n tũud-a ne pʋ-lika. A tõe n bãnga bũmb ning sẽn be ned kam fãa sũurẽ. Rẽnd a mii “neb nins sẽn dat Wẽnnaam ne b sũyã fãa wã” n bake. Ned sã n maand wa a yaa wẽn-sakd n yaool n solgd n maand yel-wẽna, a Zeova kis-a lame. (Yel. 3:32) Nin-kãngã tõe n belga ninsaalbã, la a pa tõe n belg a Zeova ye. Bala a Zeova sẽn yaa pãng sẽn ka to la tɩrlem soabã yeelame tɩ “sẽn solgd-a a yel-wẽn ka na n tõog ye.”—Yel. 28:13; karm-y 1 Tɩmote 5:24; Hebre dãmb 4:13.

15. Manesem-bʋg la d pa segd n talle, la bõe yĩnga?

¹⁵ Rũndã-rũndã, a Zeova Kaset rãmbã fãa la bal nong-a-la ne b sũy fãa. B sʋkã, neb sẽn yãk yam n tũud Wẽnnaam ne pʋ-lik pa waoog ye. La a buud sã n zĩnda a Moiiz wakatẽ wã la pipi kiris-nebã wakatẽ, tõe n zĩnda rũndã-rũndã me. (2 Tɩm. 3:1, 5) La rat n yeelame tɩ d segd n maana sãmb-sãmb ne d tẽed-n-taasã bɩ? Ayo! D sã n pa tar kaset sẽn wilgd tɩ d tẽed-n-taag maana bũmb sẽn pa segde, d pa na n get-a kɛgr-kɛgr ye. (Karm-y Rom dãmb 14:10-12; 1 Korẽnt dãmb 13:7.) Sẽn paase, d sã n maand sãmb-sãmb ne d tẽed-n-taasã, tõe n sãama tõnd ne a Zeova zoodã.

16. a) Bõe la d tõe n maan n kell n tũ a Zeova ne d sũur fãa? b) Bõe la zĩ-gũbr ning gom-zug sẽn yaa “Feesd-y y mens n getẽ” wã zãmsd tõndo?

¹⁶ Kiris-ned fãa segd n ‘maka a meng tʋʋma.’ (Gal. 6:4) D sẽn yaa neb sẽn pa zems zãngã, d sã n pa gũusi, d tõe n wa tara tagsa sẽn pa zems n pa miẽ meng ye. (Heb. 3:12, 13) Rẽ n so tɩ d segd n feesd d mens wakat-wakate, n get d sã n tũuda a Zeova ne d sũur fãa. Yɩta sõma tɩ d ned kam fãa sok a meng woto: ‘Mam tũuda a Zeova m sẽn nong-a wã yĩnga, la m sẽn mi tɩ yẽ n yaa yĩngr la tẽng naabã yĩng bɩ, bɩ yaa m sẽn dat n wa paam bõn-sõma nins sẽn na n zĩnd arzãnã pʋgẽ wã n kɩt tɩ m tũud-a?’ (Wil. 4:11) D sã n wae n sokd d mens woto, tõe n sõng-d lame tɩ d kell n tũ Wẽnnaam ne pʋ-peelem.

WẼN-SAKR WATA NE SŨ-NOOGO

17, 18. Bõe yĩng tɩ d segd n tũ a Zeova ne pʋ-peelem?

¹⁷ D sã n modg n tũ Wẽnnaam ne d sũur fãa, d paamda barka. Yɩɩl-gʋlsdã yeela woto: “Bark bee ned ning zug Zu-soabã sẽn ka geelgd a yel-wẽnã ye, la zãmb sẽn ka be a sũur pʋgẽ ye.” (Yɩɩl 32:2) Neb nins sẽn tũud Wẽnnaam ne pʋ-peelem tɩ zãmb ka be b sũy pʋsẽ wã paamda bark rũndã, la b na n paama bark sẽn ka sɛt beoog-daare.

¹⁸ Ka la bilfu, a Zeova na n puka neb nins sẽn maand wẽngã bãongo. A na n maana woto me ne sẽn maand-b wa b tũuda yẽ n yaool n solgd n maand yel-wẽnã. A na n kɩtame tɩ nebã bãng “nin-sõng ne nin-wẽng n bake, la ned sẽn sakd [yẽ] ne ned sẽn ka sakd [yẽ] n bake.” (Mal. 3:18) La nananda, d sẽn mi tɩ “Zu-soabã geta nin-tɩrse,” la t’a ‘wʋmda bãmb pʋʋsgã,’ pa kengd d raood sɩda?—1 Pɩɛ. 3:12.