SEBRÃ GOM-ZUG SÕSGÃ | YÃMB YELL PAKA WẼNNAAM BƖ?
Wẽnnaam tagsda yãmb yell bɩ?
“Mam yaa naong soab la nimbãan-neda, la Zu-soabã tagsda mam yelle.”—YƖƖL SÕAMYÃ 40:18.—PĨND WẼNDẼ ISRAYƐLL RĨM A DAVƖƖD
“Ninsaalbã fãa yaa wa koom tosgr a ye sẽn yit yʋʋr pʋgẽ.”—EZAI 40:15.
Rẽ yĩnga, a Davɩɩd sẽn kos tɩ Wẽnnaam tags a yellã zemsame bɩ? Wẽnnaam tagsda yãmb yell bɩ? Neb wʋsg pa tẽed tɩ Wẽnnaam sẽn tõe fãa wã tagsda bãmb yell ye. Bõe yĩnga?
Bʋʋm a yembr sẽn kɩt tɩ nebã tagsd woto yaa tɩ Wẽnnaam yaa kãseng hal tɩ ninsaal pa tõe n bãng n bilg ye. D sã n sɩd tags a sẽn yaa kãseng to-to wã, dũniyã nebã fãa “yaa wa koom tosgr a ye sẽn yit yʋʋr pʋgẽ. B zemsa wa wubsg sẽn be balãns zugu.” (Ezai 40:15) Seb-gʋlsd a ye sẽn pa tẽed tɩ Wẽnd beeme pʋd n yeelame tɩ “ned sã n wa tagsdẽ tɩ Wẽnd beeme, la t’a geta a yelle, a soab wukda a meng wʋsgo.”
Neb kẽer me tagsdame tɩ bãmb tʋʋm-tʋmdɩ wã kɩtame tɩ b ka yõod Wẽnnaam nifẽ ye. Wala makre, rao a ye yʋʋr sẽn yaa a Jim yeela woto: “Mam pʋʋsda Wẽnnaam wakat fãa n kotẽ t’a kõ-m yõk-m-menga, la a sõng-m tɩ m yɩ ned sẽn nong laafɩ. La pa yãt n kaoos la m sũurã le yik ye. Woto kɩtame tɩ m wa baas n tẽed tɩ m yaa nin-wẽnga, la tɩ Wẽnnaam pa na n sõng-m ye.”
La rẽ yĩnga Wẽnnaam sɩd zãra ne ãdem-biisã tɩ kɩt t’a pa tagsd b yell bɩ? Wãn to la a get tõnd ned kam fãa sẽn pa zems zãngã? Sã n pa tũ ne Wẽnnaam sõngre, ned pa tõe n leok sogs-kãensã ye. La Biiblã sẽn yaa Wẽnnaam Gomdã yet-d lame tɩ Wẽnnaam pẽe ãdem-biisã, la t’a rata b neere. Sɩd me, Biiblã yeta woto: “Bãmb ka zãr ne tõnd fãa ye.” (Tʋʋma 17:27) Sõss a naas nins sẽn pʋgdã na n sõng-d lame tɩ d bãng Wẽnnaam tagsg ne ninsaalbã sẽn yaa to-to, la bũmb nins a sẽn maand n wilgd t’a sɩd geta yãmb yelle.