“Modg-y tɩ y yamã ket n vẽenẽ, la y yɩ gũusdba”

1. “Dũniyã saab wakat” wɛɛngẽ, bõe la a Zeezi yeel a karen-biisã, la a sagl-b lame tɩ b maan bõe?

A ZEEZI kũumã sẽn wa n ket rasem a wãna, a karen-biis a naas sok-a lame yaa: “Bõe n na n yɩ bãnd n wilg tɩ . . . yaa dũniyã saab wakate?” (Mat. 24:3) Tõe tɩ karen-bi-kãensã ra rat n bãnga Zerizalɛm la a wẽnd-doogã sãoong sẽn na n yɩ wakat ninga. A Zeezi leoorã pʋgẽ, a pa gom Zerizalɛm la a sãoongã yell bal ye. A goma “dũniyã saab wakat” me yelle, rat n yeel tɩ wakat ning d sẽn vɩ rũndã-rũndã wã. A Zeezi goma saabã wakat yell n yeel yaa: “Sã n yaa ne daar-n-kãng wall wakat kãnga, ned baa a ye pa mi ye. Malɛgsã sẽn be saasẽ wã pa mi, Biigã me pa mi ye. Yaa Ba wã n mi.” Rẽ poore, a sagla a karen-biisã fãa tɩ b ‘kell n gũ la b ra gũs ye.’—Mark 13:32-37.

2. Bõe yĩng tɩ ra yaa tɩlɛ tɩ pipi kiris-nebã kell n yɩ gũusdba?

² Pipi kiris-neb nins sẽn da yaa Zʋɩf-rãmbã ra segd n kell n yɩɩ gũusdba, bala ra yaa yõor yelle. A Zeezi wilga a karen-biisã bũmb ning b sẽn segd n ges n bãng tɩ Zerizalɛm la a wend-doogã sãoong wakat ta n saame. A yeelame: “Yãmb sã n wa yã sodaas sẽn gũbg Zerizalɛm, bɩ y bãng t’a sãoongã kolgame.” Wakat kãnga, b segd n tũu a Zeezi sẽn yeel bũmb ningã n “sɩng zoees n teesd tãensẽ wã.” (Luk 21:20, 21) Rom dãmbã sẽn wa n sãam Zerizalɛmmã, neb nins sẽn sak n tũ saglgã tõog n põsame.

3. Bõe yell la d na n gom sõs-kãngã pʋgẽ?

³ Rũndã-rũndã, d vɩɩ a Sʋɩtãan dũni-wẽngã saab wakate. Dẽnd tõnd me segd n modgame tɩ d yamã ket n vẽenẽ la d yɩ gũusdba. Sõs-kãngã pʋgẽ, d na n yãa d sẽn tõe n maan to-to n tall tagsg sẽn zems yɛlã sẽn yaa to-to dũniyã gill zugã wɛɛngẽ, d sẽn tõe n maan to-to n yɩ gũus-m-mens rãmb la d ra sãamd d sẽkã, wakatã sẽn pa le waoogã yĩnga.

D TALL TAGSG SẼN ZEMS DŨNIYÃ YƐLÃ WƐƐNGẼ

4. Bõe yĩng tɩ d segd n gũusd n get yɛl nins sẽn maand dũniyã gill zug tɩ pidsd Biiblã bãngr-goamã?

⁴ D sẽn maagd d yĩng n get dũniyã yɛlã sẽn pidsd Biiblã bãngr-goamã to-to wã, yaa bũmb sẽn zemse. Wala makre, a Zeezi sõdga yɛl toor-toor sẽn tõe n sõng-d tɩ d bãng t’a Sʋɩtãan dũniyã sãoong ta n saame. (Mat. 24:3-14) Tẽn-tʋmd a Pɩyɛɛr sagl-d lame tɩ d gũusd n get bãngr-goamã pidsgu, tɩ sõng-d tɩ d kell n tall tẽeb sẽn tar pãnga. (2 Pɩy. 1:19-21) Biiblã yaoolem sebrã sɩngr goamã yetame yaa: “Woto yaa a Zeezi Kirist vẽnegr Wẽnnaam sẽn kõ bãmba, tɩ b wilg b yembsã bũmb nins sẽn segd n maan ka la bilfã.” (Vẽn. 1:1) Rẽ n so tɩ d gũusd n get yɛl nins sẽn maand dũniyã gill zugã, la d baood n dat n bãng b sẽn pidsd Biiblã bãngr-goamã to-to wã. D ratame n gomd rẽ yell ne d taabã me.

5. Bõe la d pa segd n maane, la bõe la d segd n maane? (Ges-y fot-rãmbã me.)

⁵ D sã n wa sõsd ne ned Biiblã bãngr-gomd zugu, d pa segd n gom goam sẽn tõe n wa ne no-koɛɛm ye. Bõe yĩnga? Bala d pa rat n gom goam sẽn tõe n wa ne welgr tigingã pʋgẽ ye. Wala makre, d tõe n wa wʋmda dũniyã nanambs sẽn wilgd b sẽn na n maan to-to tɩ zabr ning sa, tɩ laafɩ la bãan zĩndi. D sã n wa wʋm woto, d segd n gũusame n da wa yeel tɩ b sẽn togs bũmb ningã pidsda 1 Tesalonik rãmb 5:3 bãngr-gomdã ye. D segd n bao n bãnga bũmb ning a Zeova siglgã sẽn yeel rẽ wɛɛngẽ tɩ nan pa kaoosã. D sẽn yet bũmb ningã sã n tika a Zeova siglgã sẽn yeelã zugu, d sõngdame tɩ tigingã neb zemsd taab sõma, n tar “yam a ye la tagsg a ye.”—1 Kor. 1:10; 4:6.

6. Bõe la 2 Pɩyɛɛr 3:11-13 sõngd tõnd tɩ d bãnge?

⁶ Karm-y 2 Pɩyɛɛr 3:11-13. Tẽn-tʋmd a Pɩyɛɛr sõng-d lame tɩ d bãng d tagsa la d manesem sẽn segd n yɩ to-to Biiblã bãngr-goamã wɛɛngẽ. A sagl-d lame tɩ d ‘gũud a Zeova daarã waoong la d ningd rẽ d yamẽ.’ Bõe yĩnga? Pa bao n bãng daarã la wakat ning takɩ a Zeova sẽn na n kɩt tɩ Armagedõn wa wã n pak ye. Yaa d sẽn na n dɩk wakatã sẽn ketã n modg n yɩ ‘neb sẽn tar yel-manesem sẽn yaa sõngo, la d tʋmd wẽn-sakr tʋʋma.’ (Mat. 24:36; Luk 12:40) Woto rat n yeelame tɩ d segd n modgame tɩ d tʋʋm-tʋmdɩ wã yaa sõma, la d modg tɩ d sẽn maand bũmb ning a Zeova tũubã pʋgẽ wã wilg tɩ d nong-a-la ne d sũur fãa. D sã n dat n ket n maand woto, d segd n gũusda d mense.

D SẼN SEGD N YƖ GŨUS-M-MENS RÃMBÃ VÕORE

7. Bõe la d tõe n maan tɩ wilg tɩ d gũusda d mense? (Luk 21:34)

⁷ A Zeezi yeela a karen-biisã tɩ pa dũniyã yɛl bal la b segd n getẽ ye. B segd n gũusda b mens me. Luk 21:34 sẽn yet bũmb ningã wilgda rẽ vẽenega. (Karm-y-yã.) A Zeezi yeela be yaa: “Gũus-y y mense.” Ned sẽn gũusd a meng gũusd n geta bũmb ning fãa sẽn tõe n sãam yẽ ne a Zeova zoodã, la a modgd n zãagd a meng ne bõn-kãense. Woto, a kelld n paada Wẽnnaam nonglmã pʋgẽ.—Yel. 22:3; Ziid 20, 21.

8. Bõe la a Poll yeel n keoog kiris-nebã?

⁸ Tẽn-tʋmd a Poll keooga kiris-nebã tɩ b gũus b mense. Wala makre, a yeela kiris-neb nins sẽn da be Efɛɛzã yaa: “Bɩ y kell n gũus neer ne yãmb sẽn kẽnd to-to wã tɩ ra yɩ wa neb sẽn ka yam ye. Bɩ y yɩ wa yam dãmba.” (Efɛ. 5:15, 16) A Sʋɩtãan baooda wakat fãa n na n sãam tõnd ne a Zeova zoodã. Rẽ n so tɩ Biiblã sagend tõnd tɩ d “kell n bao n bãng a Zeova raabã sẽn yaa a soaba,” sẽn na yɩl t’a Sʋɩtãan sɩlmã baa a ye ra tõog-d ye.—Efɛ. 5:17.

9. Bõe la d tõe n maane, n bãng a Zeova raabã sẽn yaa a soaba?

⁹ Biiblã pa sõdg bũmb nins fãa sẽn tõe n sãam d zoodã ne a Zeova wã ye. Wakat ninga, d segd n yãka yam n maan bũmbu, tɩ Biiblã yaool n pa gom rẽ yell vẽeneg ye. Sẽn na yɩl n bãng n yãk yam sẽn yaa sõma, d segd n bao n bãnga “a Zeova raabã sẽn yaa a soaba.” D maanda woto, d sã n karemd Wẽnnaam Gomdã wakat fãa la d bʋgsd a zugu. D sã n bãngd a Zeova raabã n paasdẽ, la d modg n tall “Kiristã yamã buudu,” na n sõng-d lame tɩ d ket n kẽnd wa “yam dãmba,” baa Biiblã sã n pa kõ noor vẽeneg-vẽeneg bũmb d sẽn dat n maan wɛɛngẽ. (1 Kor. 2:14-16) Bũmb kẽer sẽn tõe n sãam d tẽebã bãngr yaa nana, t’a taab bãngr yaa toogo.

10. D segd n zãaga d meng ne bõe?

¹⁰ Bũmb kẽer sẽn pa sõma d sẽn segd n zãag d mens ne yaa rolsem manesem, rã-tɩgre, yão-beedo, gom-põaasa, nen-kɛglem, yoob yɛl gesgo, la bũmb a taab sẽn wõnd woto. (Yɩɩn. 101:3) A Sʋɩtãan sẽn yaa d bɛyã baooda segb buud fãa n na n sãam tõnd ne a Zeova zoodã. (1 Pɩy. 5:8) D sã n pa maan gũusgu, a Sʋɩtãan tõe n bʋda sũ-kiiri, zãmbo, rat-tɩ-looge, kisgri, wuk-m-meng la sũ-kẽk bõn-buud d yamẽ wã la d sũurẽ wã. (Gal. 5:19-21) Sɩngrẽ wã, d tõe n tagsdame tɩ d pa na n tol n wa maan yel-kãensã ye. La d sã n pa yɩ tao-tao n yiis rẽ d yamẽ wã la d sũurẽ wã, b na n wa bɩɩme n lebg wa tɩɩg sẽn tar zẽnem, tɩ wa wa ne yelle.—Zak 1:14, 15.

11. Bõe la d tõe n wa getẽ tɩ pa wẽnga, tɩ yaool n tõe n wa ne yelle, la bõe yĩng tɩ d segd n zãag d meng ne rẽ?

¹¹ Bũmb a ye sẽn tõe n wa ne yelle, tɩ d segd n zãag d mens ne yaa tũud-n-ta-wẽnse. D rɩk makre. Yãmb tʋmda ne ned sẽn pa a Zeova Kaset soaba. Y ratame tɩ y tʋmd-n-taagã sũur noom ne a Zeova Kaset rãmbã. Rẽ kɩtame tɩ y maand-a neere, la y sõngd-a. Wakat kẽere, y mi n sak n tũ-a lame n tɩ rɩ. Bilf-bilfã, y wa n tũuda taab wakat fãa n tɩ rɩtẽ. Sɩngrẽ wã, a sã n da wa salg n gom yoob yɛla, y maanda wa y pa wʋm ye. La tarẽ-n-tarẽ, y wa n minimame tɩ rẽ pa le namsd yãmb ye. Daar a ye, y tʋmd-n-taagã wa n bool-y lame tɩ y wa tɩ y tɩ yũ rãam tʋʋmã sigb poore, tɩ y sake. Yãmb me wa n tagsda wa y tʋmd-n-taagã. Dẽnd pa na n kaoose, la yãmb me wa maand wa yẽnda ye. Yaa sɩd tɩ d ratame n maand nebã fãa neere, la d waoogd-ba. La d pa segd n yĩm tɩ d sã n nong n be ne neba, d wat n maanda wa bãmb ye. (1 Kor. 15:33) D sã n tũ a Zeezi saglgã n gũusd d mense, d pa na n tall tũud-n-taar ne neb sẽn pa tũud a Zeova noyã ye. (2 Kor. 6:15) D na n yãa bẽdgã, la d bãng n gil-a.

RA SÃAMD-Y Y SẼKÃ YE

12. Bõe la a Zeezi karen-biisã ra segd n maandẽ la b gũud dũniyã saabo?

¹² A Zeezi ratame t’a karen-biisã gũud dũniyã saab daare, la b tʋmd wʋsgo. A Zeezi kõ-b-la tʋʋmde. A yeel-b lame tɩ b moon koe-noogã “Zerizalɛm ne Zide soolmã fãa pʋgẽ la Samari, la hal n tãag dũniyã zĩig ning sẽn zãr n yɩɩdã.” (Tʋʋ. 1:6-8) Ad sɩd yaa tʋʋm-kãseng tɛkẽ la a Zeezi karen-biisã sẽn paamã. B sẽn maand b sẽn tõe fãa n na n moon neb buud fãa koɛɛgã, b tʋmda ne b sẽkã sõma.

13. Bõe yĩng tɩ d pa segd n sãamd d sẽkã? (Kolos rãmbã 4:5)

¹³ Karm-y Kolos rãmb 4:5. D sã n dat n yɩ neb sẽn gũusd b mense, d segd n tagsa d sẽn tʋmd ne d sẽkã to-to wã yell neere. Yel-lingdem tõe n paama d fãa. (Koɛ. 9:11) D tõe n tiig n maana kaalem.

14-15. Wãn to la d tõe n tʋm ne d sẽkã sõma? (Ebre-rãmb 6:11, 12) (Ges-y fotã me.)

¹⁴ D sã n dɩkd d sẽkã n maand a Zeova raabã, la d modgdẽ tɩ tõnd ne a zoodã pãng paasdẽ, d pa sãamd d sẽkã ye. (Zã 14:21) D ratame n “yals kãn-kãe tẽebã pʋgẽ n da vigsi, n tar tʋʋm wʋsg Zu-soabã tʋʋmdã pʋgẽ wakat fãa.” (1 Kor. 15:58) Dẽnd yaa dũniyã saabã n ta, wall d maana kaalem me, d pa na n wa maand d bãngẽ ye.—Mat. 24:13; Rom. 14:8.

¹⁵ Rũndã-rũndã, a Zeezi ket n sõngda a karen-biisã tɩ b moond Wẽnnaam Rĩungã koe-noog dũniyã gill zugu. A Zeezi pidsda a pʋlengã. A tũnugda ne a Zeova siglgã n wilgd-d d sẽn segd n moond koɛɛgã to-to, la a kõt-d tʋʋm-teed koɛɛgã mooneg yĩnga. (Mat. 28:18-20) Tõnd me sẽn segd n maan yaa d wɩngd ne koɛɛgã mooneg la nebã zãmsgã, la d ket n maand gũusgu, n gũud wakat ning a Zeova sẽn na n wa sãam dũni-wẽn-kãngã wã. D sã n tũud saglg ning sẽn be Ebre-rãmb 6:11, 12, d na n kell n kɩsa sɩd ne bũmb nins d sẽn saagd n na n wa paamã, “n tãag saabã.”—Karm-y-yã.

16. Bõe la d yãk yam n na n maane?

¹⁶ A Zeova zoe n yãka daarã, la wakat ning takɩ a sẽn na n sãam a Sʋɩtãan dũniyã. Daar-n-kãng sã n ta, a Zeova na n pidsa pʋlems nins fãa a sẽn kɩt tɩ b gʋls a Gomdã pʋgẽ wã. La wakat ninga, d tõe n wa getame tɩ dũniyã saab kaoosda waoongo. La a Zeova daarã “na n pidsa a wakatã bal kɛpɩ.” (Hab. 2:3) Woto wã, bɩ d kell n yãk yam n gũ a Zeova, n wilg tɩ d gũuda ‘Wẽnnaam sẽn yaa tõnd fãagdã.’—Mis. 7:7.