Bɩ y kell n gũ!

1, 2. Wakat buud fãa, bõe la wẽn-tũudbã gũuda?

WAKAT buud fãa, wẽn-tũudb n gũ bãngr-goam pidsgu. Wala makre, no-rɛɛs a Zeremi reng n togsame tɩ Babilond nebã na n wa sãama Zida soolmã, tɩ sɩd yɩ woto yʋʋmd 607 sẽn deng a Zeezi rogmã. (Zer. 25:8-11) A Zeova vẽnega a Ezayi t’a wilg tɩ zʋɩf-rãmbã ra na n yii yembdã n lebg n wa Zida. A Ezayi paasa woto: “Bark bee neb nins fãa sẽn tẽed bãmbã zugu!” (Eza. 30:18) A Miise me ra kɩsa sɩd t’a Zeova sẽn pʋlem bũmb ninsã na n pidsame. A yeelame: “Mam na n gũu Sẽn-Ka-Saabo.” (Mii. 7:7) Sẽn paase, yʋʋm wʋsg pʋgẽ, Wẽnnaam nin-buiidã ra gũuda bãngr-goam nins sẽn gomd Mesi wã bɩ Kirisã yellã pidsgu.—Luk 3:15; 1 Pɩy. 1:10-12.a

² Rũndã-rũndã, tõnd me gũuda bãngr-goam kẽer sẽn gomd a Zeova Rĩungã yell pidsgu. Ka la bilfu, a Zeezi sẽn yaa Wẽnnaam Rĩungã Rĩmã na n sãama nin-wẽnsã la a kɩt tɩ namsg buud fãa sa, tɩ wẽn-sakdbã paam b mens ne dũni-kãngã sẽn be a Sʋɩtãan nugẽ wã. (1 Zã 5:19) Bɩ d kell n gũ, d sẽn mi tɩ dũniyã sãoong ta n saame wã yĩnga.

3. D sã n sɩng n gũuda dũniyã sɛɛb hal sẽn kaoose, sok-bʋg la d tõe n wa sok d menga?

³ Tõnd fãa gũuda wakat ning Wẽnnaam daabã sẽn na n maan tẽngã zug wa sẽn maand saasẽ wã ne d sũur fãa. (Mat. 6:10) La d sã n sɩng n gũuda dũniyã sɛɛb hal sẽn kaoose, d tõe n wa sokda d meng woto: ‘Bõe yĩng tɩ d segd n kell n tẽ tɩ dũniyã na n saa ka la bilfu?’

BÕE YĨNG TƖ D SEGD N KELL N GŨ?

4. Bõe yĩng tɩ d segd n kell n gũ?

⁴ A Zeezi yeela a karen-biisã tɩ b gũusi, la tɩ b kell n gũ. A sẽn yeel woto wã seka d na kell n gũ dũniyã sɛɛbo, n ning d yamẽ tɩ ta n saame. (Mat. 24:42; Luk 21:34-36) A Zeova siglgã kõta tõnd mak-sõng zĩ-kãng wɛɛngẽ. Sɛb nins a sẽn yiisdã pʋsẽ, a wae n sagend-d lame tɩ d ning “Wẽnnaam daarã” d yamẽ, n tagsd “dũni paalgã” Wẽnnaam sẽn pʋlmã yell wakat fãa.—Karm-y 2 Pɩyɛɛr 3:11-13.

5. Bõe me n kɩt tɩ d segd n kell n gũ?

⁵ Sã n mikame t’a Zeezi pipi karen-biisã ra segd n gũ a Zeova daarã, tõnd n segd n gũ n yɩɩda. Bõe yĩnga? Yaa tɩ Kirisã sɩnga a naamã rɩɩbo. Yʋʋmd 1914 tɛka, bãnd ning a Zeezi sẽn togs tɩ ra na n wilgame t’a sɩnga a naamã rɩɩbã pidsdame. Bãndã sẽn pidsdã wilgdame tɩ d vɩɩ dũniyã sɛɛb wakate. Wala makre, dũniyã yɛl tara kengre, tɩ Wẽnnaam Rĩungã koɛɛg me moond dũniyã gill zugu. (Mat. 24:3, 7-14) A Zeezi sẽn pa wilg sɛɛbã wakat sẽn na n kaoos to-to wã yĩnga, d segd n gũusame, la d kell n gũ.

6. Bõe n kɩt tɩ d miẽ tɩ sɛɛbã sã n wa kolgdẽ, dũniyã yɛl me na n zẽndame?

⁶ Biiblã reng n wilgame tɩ ‘yaoolem wakatã,’ wẽnemã na n talla paasgo. (2 Tɩm. 3:1, 13; Mat. 24:21; Vẽn. 12:12) Rẽnd baa yɛlã sẽn zoe n kengã, d miime tɩ na n maneg n zẽname. La ninã tõe n tagsdame tɩ b sã n gomd dũniyã sɛɛb yelle, yaa wakat sẽn nan wat yell la b gomda, la tɩ wakat kãnga, dũniyã yɛl na n maneg n yɩɩ kãn-kãe.

7. Matye 24:37-39 wã wilgda tõnd bõe yaoolem wakatã wɛɛngẽ?

⁷ La yãmb tagsdame tɩ dũniyã yɛl na n zẽname n ta zĩ-bʋg tɩ “to-kãsengã” yaool n sɩnge? (Vẽn. 7:14) Yãmb tẽedame tɩ zab na n zĩnda tẽnsã fãa pʋsẽ, tɩ rɩɩb ka le tõe n paame, tɩ nebã fãa la bal lʋɩt bãas bɩ? Sã n yɩ woto, nebã fãa na n yãa vẽeneg tɩ yaa Biiblã bãngr-gomd la sẽn pidsdã. Baa neb nins sẽn pa tẽed Biiblã goamã na n sak n deega rẽ. La a Zeezi yeelame tɩ yaoolem wakatã, neb wʋsg pa na n tẽ tɩ sɛɛbã kolgame ye. B na n ket n maanda wa raasenkamã, hal tɩ wa kẽ n bõoge. (Karm-y Matye 24:37-39.) Rẽnd Biiblã pa wilg tɩ dũniyã yɛl na n zẽna hal wʋsgo, tɩ wa lebg tɩlɛ tɩ nebã fãa sak n deeg tɩ dũniyã sɛɛb ta n saame ye.—Luk 17:20; 2 Pɩy. 3:3, 4.

8. Tõnd sẽn sak a Zeezi saglgã n gũudẽ wã kɩtame tɩ d kɩs sɩd ne bõe?

⁸ La sẽn na yɩl t’a Zeezi karen-biisã yã bãndã n tõog n tũ a saglgã n gũ, bãndã pidsg segd n yɩɩ vẽeneg n sek b na yã n bãng tɩ sɛɛbã wakat taame. (Mat. 24:27, 42) Yʋʋmd 1914 tɛka, bãnd ning a Zeezi sẽn wilgã pidsdame. Tõnd kɩsa sɩd tɩ d vɩɩ dũniyã yaoolem wakate, rat n yeel t’a Sʋɩtãan dũniyã sɛɛb kolgame.

9. Bõe yĩng tɩ d segd n ket n gũud dũniyã sɛɛbo?

⁹ La rũndã-rũndã, bõe yĩng tɩ d segd n ket n gũudẽ? Yaa d sẽn sakd a Zeezi Kiris goamã yĩnga. Sẽn paase, d nee bãnd ning sẽn wilgd t’a lebga Rĩm saasẽ wã sẽn pidsdi. Tõnd sẽn sak n deeg tɩ dũniyã sɛɛb kolgame wã, pa d sẽn tẽed gomd fãa d sẽn wʋm yĩng ye. D nee bũmb toor-toor sẽn wilgd tɩ Biiblã bãngr-gomdã pidsdame. Rẽ n so tɩ d segd n ket n gũusdẽ, la d gũud dũniyã sɛɛbo.

D SEGD N GŨUME N TÃAG WAKAT BƲGO?

10, 11. a) Bõe yĩng t’a Zeezi yeel a karen-biisã tɩ b segd n gũume? b) A Zeezi yeela a karen-biisã tɩ sã n wa wõnd sɛɛbã kaoosdame bɩ b maan bõe? (Ges-y sõsgã sɩngrẽ fotã.)

¹⁰ Tõnd sʋkã, wʋsg sɩnga a Zeova tũub hal sẽn kaoose. Bãmb dãmbã gũu dũniyã sɛɛb n maan yʋʋma. La baa d sẽn gũ n kaoos to-to, d pa segd n koms raood n bas ye. D segd n ket n gũuda wakat ning a Zeezi sẽn na n sãam dũni-kãngã wã. D tẽeg t’a Zeezi sagla a karen-biisã woto: “Gũus-y neere. Neend-y-yã, bala, yãmb ka mi ra-kãng sẽn na n wa wakat ning ye. A na n yɩɩ wa rao sẽn togd sore, n bas a yir ne a tʋmtʋmdba, n wilg ned kam fãa a tʋʋmde la a yeel zag-no-gũudã t’a gũ. Woto yĩnga, neend-y-yã, tɩ yãmb ka mi wakat ning yirã soab sẽn na n wa wã ye. Tõe n yɩɩ zĩ-sobdo, wall yʋn-sʋka, wall no-kɛleng wakate, wall yibeoogo. Maan-y rabeem tɩ b ra ling n wa n mik tɩ yãmb gõeeme ye. Bũmb ning mam sẽn yet yãmbã, mam yet-a-la nebã fãa: Neend-y-yã.”—Mark 13:33-37.

¹¹ Kiris-neb hakɩɩkã sẽn wa n bãng tɩ Kirisã lebga Rĩm yʋʋmd 1914, b bãngame tɩ rẽ tɛka, dũniyã tõe n saa wakat buud fãa. Woto kɩtame tɩ b maneg n wɩng ne Rĩungã koɛɛg moonego, n segend b mense. A Zeezi wilgame t’a waoongã tõe n kaoosame. A yeelame tɩ tõe n yɩɩ “no-kɛleng wakate, wall yibeoogo.” Sã n wa yaa woto, a karen-biisã manesem segd n yɩɩ wãna? A yeel-b lame tɩ b segd n kell n gũume. Rẽnd baa sã n wa wõnd kaoosdame, d pa segd n tẽ tɩ sɛɛbã ket n zãrame, wall d tolg n bas gũub ye.

12. Sok-bʋg la a Habakuk sok a Zeova, la wãn to la a leok-a?

¹² No-rɛɛs a Habakuk ra moond n yetame tɩ b na n sãama Zeruzalɛm, la a gũ sãoongã ne sũ-mare. No-rɛɛsdb a taab n deng yẽ n moon yʋʋm wʋsg pʋgẽ n gom rẽ yelle. Baasgo, a Habakuk ra neeme tɩ wẽnemã la wẽgbã paamda pãnga. A pʋʋsa a Zeova, n sok woto: “Sẽn-Ka-Saabo, mam na n kelem n boola yãmb n kos sõngr tɩ ta dabʋre”? Baa a Zeova sẽn pa wilg-a Zeruzalɛm sãoongã sẽn na n yɩ wakat ning takɩ wã, a yeel-a-la woto: “Ba a sã n kaoosdẽ, bɩ f kell n gũ-a, bala, a ka na n pa n ka paam pidsg ye.”—Karm-y Habakuk 1:1-4; 2:3.

13. A Habakuk ra tõe n yeela a meng tɩ bõe, la bõe yĩng tɩ rẽ ra tõe n wa ne yelle?

¹³ Mams-y wa a Habakuk sẽn da na n koms raoodo, n yeel a meng woto: ‘Mam sɩng n wʋmdame tɩ b gomd Zeruzalɛm sãoongã yell hal na maan yʋʋma. Tẽngã sãoong ket n zãrame. Yaa tɩlɛ tɩ m ket n moondẽ sɩda? M na n basame tɩ neb a taab moone.’ A Habakuk sã n da tags woto, bõe n da tõe n maane? Ra na n sãama yẽ ne a Zeova zoodã. Sẽn paase, a sã n da pa kell n gũ Zeruzalɛm sãoongã, a ra tõe n naaga tẽngã n sãame.

14. Bõe yĩng tɩ d sũur na n yɩ noog ne a Zeova sẽn sagl tõnd tɩ d gũ wã?

¹⁴ Mams-y wa yãmb sẽn zoe n be dũni-paalgã pʋgẽ, n neẽ tɩ bũmb nins a Zeova sẽn da yeel yaoolem wakatã wɛɛngẽ wã pidsa kɛpɩ. Rẽ na n kɩtame tɩ y maneg n kɩs sɩd ne bũmb a taabã a sẽn pʋlmã. (Karm-y Zozoe 23:14.) Y sũur na n yɩɩ noog ne a Zeova sẽn da zoe n yãk wakat takɩ dũniyã sɛɛb yĩnga, la a sagl a nin-buiidã tɩ b kell n gũ wã.—Tʋʋ. 1:7; 1 Pɩy. 4:7.

D KET N MOONDẼ LA D GŨUDẼ

15, 16. Bõe yĩng tɩ d segd n moon koɛɛgã ne yẽesem yaoolem wakatã?

¹⁵ A Zeova siglgã na n ket n sagend-d lame tɩ d modg a Zeova tʋʋmdã pʋgẽ. Sagl-kãens sõngda tõnd tɩ d ket n moond koɛɛgã ne yẽesem, d sẽn mi tɩ yaa tʋʋm-yãgdmã yĩnga. D kɩsa sɩd me tɩ bãnd ning a Zeezi sẽn yeel tɩ na n wilgame tɩ sɛɛbã ta n saame wã pidsda rũndã-rũndã. Woto wã, bɩ d modg n wilg tɩ yaa a Zeova raabã n pak-d n yɩɩda, la d ket n moond Wẽnnaam Rĩungã koe-noogã.—Mat. 6:33; Mark 13:10.

¹⁶ D sã n moond koe-noogã, d sõngda d taabã sẽn na yɩl tɩ b wa paam n põs a Sʋɩtãan dũniyã sãoong ka la bilfu. Yʋʋmd 1945 wã, koom-koglg a ye n bõr mogrã pʋgẽ, tɩ neb tusa ki. Saam-bi-poak ne a sɩd n zĩnd be, la bãmb paam n põsame. Saam-bi-poakã yeelame tɩ koom-koglgã sẽn wa n bõrdã, pag n da yãbd n yetẽ tɩ yẽ valɩɩs-rãmbã la a nag-teedã paa koglgã pʋgẽ, la tɩ yẽ bõna fãa. La neb a taab sẽn da be koom-koglgã pʋgẽ n gẽneg b yõy n fãag b taab tɩ koomã pa rɩ ye. Rũndã-rũndã, d miime tɩ yell n wate, n tõe n tũ ne neb wʋsg yõyã. Tõnd me rat n maana wa neb nins sẽn gẽneg b yõy n fãag b taabã, n moon koɛɛgã ne yẽesem. D rat n maana d sẽn tõe fãa n sõng d taabã tɩ b wa põs dũni-kãngã sãoongã sasa.

17. Bõe yĩng tɩ d segd n tẽ tɩ dũniyã sɛɛb tõe n waa sasa buud fãa?

¹⁷ Dũniyã yɛl sẽn yaa to-to wã wilgdame tɩ Biiblã bãngr-gomd n pidsdi, la tɩ dũni-kãngã sɛɛbã ta n saame. D gũuda wakat ning “yɩɩl piigã” ne “rũngã” sẽn na n wẽneg n zab ne Babilond kãsengã sẽn yaa ziri tũudmã, n sãam-a wã. (Vẽn. 17:16) D tẽeg tɩ yaa Wẽnnaam n na n ning a raabã ‘bãmb sũyã pʋsẽ’ tɩ b maan woto, la tɩ rẽ tõe n yɩɩ zĩig pʋgẽ. (Vẽn. 17:17) A Sʋɩtãan dũniyã sɛɛb sɩd keta bilfu. Rẽ n so tɩ d segd n tũ a Zeezi saglgã. A yeelame: ‘Gũus-y y mens tɩ rɩ-n-tɩk wall rã-tɩgre, la vɩɩmã yɛl yɩɩr da wa n zɩsg yãmb sũyã ye, la tɩ ra-kãng ra wa n ling yãmb wa zĩm-gãmbr’ ye. (Luk 21:34, 35; Vẽn. 16:15) Bɩ d kell n gũ, la d wɩng ne a Zeova tʋʋmdã, n kɩs sɩd t’a sõngda “neb nins sẽn tẽed bãmbã.”—Eza. 64:3, Wẽnnaam Sebre, 1983.

18. Bõe yell la d na n gom sõsg ning sẽn pʋgdã pʋgẽ?

¹⁸ D sẽn gũud dũni-kãng sãoongã, d segd n tũu karen-biig a Zʋʋd saglgã. A yeela woto: “M zo-nongdse, bɩ y kẽng taoor ne tẽ-sõngã y sẽn tarã. Pʋʋs-y ne Sɩɩg-sõng pãnga, la y kell n yals Wẽnnaam nonglmã pʋgẽ la y gũud tõnd Zu-soab a Zeezi Kiris nimbãan-zoeerã sẽn na n kɩt tɩ d paam vɩɩm sẽn kõn sa wã.” (Zʋʋ. 20, 21) La bõe la d tõe n maan wilg tɩ d gũuda dũni-paalgã Wẽnnaam sẽn pʋlem tɩ wat ka la bilfã, la tɩ d rat n vɩɩmda dũni-paalgã pʋgẽ ne d sũur fãa? Rẽ yell la d na n gom sõsg ning sẽn pʋgdã pʋgẽ.