Wẽnnaam rĩungã na n kɩtame tɩ pʋ-lik buud fãa sa

Ninsaalbã wʋsg sẽn tʋmd pʋ-lik tʋʋmã, yaa vẽeneg tɩ goosneema pa be ninsaalbã sʋk n tõe n kɩt tɩ pʋ-likã tʋʋm sa ye. Rẽnd goosneema ning sẽn na n kɩt tɩ pʋ-lik tʋʋmã sa wã pa segd n yi ninsaalbã nengẽ ye. Biiblã gomda goosneema a woto buud yelle. Goosneema kãng yaa Wẽnnaam Rĩungã, a Zezi sẽn yeel a karen-biisã tɩ b pʋʋs n kos t’a wa wã.—Matɩe 6:9, 10.

Wẽnnaam Rĩungã yaa goosneema sẽn be saasẽ. A na n ledga ninsaalbã goosneema-rãmbã fãa. (Yɩɩl Sõamyã 2:8, 9; Wilgri 16:14; 19:19-21) Rĩungã na n waa ne bark wʋsgo. Wala makre, a na n kɩtame tɩ pʋ-likã tʋʋm buud toor-toorã sa. Ad bʋʋm a yoob sẽn kɩt tɩ d tõe n kɩs sɩd ne rẽ:

1. A TÕOGÃ SẼN YƖTẼ

NINSAALBÃ SẼN PA TÕE WÃ VÕORE: Ninsaalbã goosneema-rãmb teega nin-buiidã lampo-rãmbã. Lampo wã ligd sẽn kẽed wʋsgã mi n kɩtame tɩ lampo rɛɛsdbã kẽer zuuda. Sãnda me sakd n deegda ligd nebã nengẽ, n boogd b lampo-rãmbã. Woto tõe n kɩtame tɩ yɛlã maneg n zẽne. Bala, goosneema wã na n paasa lampo-rãmbã sẽn na yɩl tɩ ligdã sek a tʋʋmã, tɩ pʋ-ligs rãmbã me maneg n zãmbdẽ. Sã n wa yaa woto, yaa pʋ-peelem dãmbã n namsde.

WẼNNAAM RĨUNGÃ SẼN NA N TÕOGÃ VÕORE: Wẽnnaam Rĩungã tõog yita a Zeova sẽn yaa Wẽnnaam sẽn tõe fãa wã nengẽ.a (Wilgri 11:15) A pa baood lampo-rãmb ye. Wẽnnaam sẽn yaa ‘pãn-kãseng’ soab la kõtã maasem yĩnga, a Rĩungã na n tõogame t’a nin-buiidã paam bũmb nins fãa sẽn yaa tɩlaeyã.—Ezai 40:26; Yɩɩl Sõamyã 145:16.

2. NANAMBSÃ

NINSAALBÃ SẼN PA TÕE WÃ VÕORE: A Susan Rose-Ackerman sẽn yaa pag ning yell d sẽn gom sõsg ning sẽn loogã pʋgẽ wã yeelame tɩ sẽn na yɩl tɩ pʋ-lik tʋʋmã sa, segd n sɩnga nanambsã nengẽ. Sɩd me, goosneema-rãmbã sã n maood sẽn na yɩl tɩ polɩɩs-rãmbã la duan-dãmbã bas pʋ-lik tʋʋmã, tɩ tẽngã taoor dãmb yaool n tʋmd pʋ-lik tʋʋma, tõe n kɩtame tɩ nin-buiidã pa le nand-b ye. Sẽn paase, baa naab ning sẽn yaa pʋ-peelem soab n yɩɩdã yaa ned sẽn pa zems zãnga. Biiblã yeelame tɩ “nin-tɩrg ka be dũniyã zug n maand tɩrg n ka kongdẽ ye.”—Koɛɛg Soaba 7:20.

WẼNNAAM RĨUNGÃ SẼN NA N TÕOGÃ VÕORE: A Zezi Kirist sẽn yaa Rĩm ning Wẽnnaam sẽn yãk t’a yaa a Rĩungã Rĩmã yaa toor ne ninsaalbã sẽn pa zems zãngã. Baa fʋɩ pa tõe n kɩt t’a maan wẽng ye. A Sʋɩtãan sẽn pʋlem a Zezi “dũniyã soolem fãa ne b naam” t’a zãgsã wilgda rẽ. B zɩ n pʋlem ned kũun sẽn ta woto ye. A Sʋɩtãan yeela a Zezi t’a sã n wõgemd n waoog yẽ vugr bala, a na n kɩtame t’a lebg dũniyã naaba. (Matɩe 4:8-10; Zã 14:30) Baa a Zezi sẽn wa n namsd n dat n ki tɩ b kõ-a rãam sẽn kalem ne tɩɩmã, a zãgsame n pa yũ ye. Yaa a sẽn da rat n kell n sak Wẽnnaam n tãag kũumã yĩnga. Bala, rãamã sẽn kalem ne tɩɩmã ra tõe n booga toogã, la ra tõe n kɩtame me t’a pa le so a meng ye. (Matɩe 27:34) Wẽnnaam vʋʋga a Zezi t’a be saasẽ rũndã-rũndã, tɩ wilgdẽ t’a tõe n yɩɩ Wẽnnaam Rĩungã Rĩm tɩ zemse.—Filip rãmba 2:8-11.

3. B SẼN YÃKD NANAMBSÃ TO-TO WÃ

NINSAALBÃ SẼN PA TÕE WÃ VÕORE: Tẽns wʋsg pʋsẽ, b maanda vot-rãmb n yãkd nanambsã. B tagsdame tɩ rẽ la nin-buiidã tõe n sik naab sẽn yaa pʋ-lik soaba. La naamã baoob sasa la vot-rãmbã sasa, nebã wae n tʋmda pʋ-lik tʋʋma. Baa tẽn-bɛdã pʋsẽ, mi n yaa woto. Ra-kãag-rãmbã tũnugda ne rẽ n kõt nanambsã la sẽn baood-b naamã ligd la bũmb a taaba, sẽn na yɩl tɩ b maan bãmb raabã.

Etazĩni bʋ-kaood a John Paul Stevens yeelame tɩ rẽ tõe n kɩtame tɩ goosneema wã pa tõe n tʋm a tʋʋmã sõma, la kɩt tɩ nebã tagsdẽ t’a yãkrã pa zemse, la kɩt me tɩ b pa kɩs sɩd ne-a ye. Rẽnd neb wʋsg sẽn tagsd tɩ dũniyã gill zugu, yaa politik sulã sʋk la pʋ-lik tʋʋmã be n yɩɩdã pa lingr ye.

WẼNNAAM RĨUNGÃ SẼN NA N TÕOGÃ VÕORE: Wẽnnaam Rĩungã sẽn na n dɩ naam wakat fãa wã yĩnga, ned pa na n le maan zãmb naam baoob wall vot-rãmb sasa ye. (Daniɛll 7:13, 14) Yaa Wẽnnaam n yãk Rĩungã Rĩmã. Rẽnd a pa teeg ninsaalbã vot-rãmb ye. B pa tõe n lub-a me ye. Woto fãa kɩtame tɩ Wẽnnaam Rĩungã sẽn na n maan bũmb ninsã fãa yaa a nin-buiidã nafr yĩnga.

4. NANAMBSÃ SẼN YIISD NOY NINSÃ

NINSAALBÃ SẼN PA TÕE WÃ VÕORE: Tõe tɩ y tagsdame tɩ tẽngã taoor dãmb sã n yiis no-paalse, tõe n sõngame tɩ pʋ-lik tʋʋmã booge. La bãngdbã wilgame tɩ naoor wʋsgo, b sã n paas noyã sõore, nebã na n bao n gila no-kãense, tɩ pʋ-likã tʋʋm me paase. Sẽn paase, b sã n yiis noor sẽn na yɩl tɩ pʋ-lik tʋʋmã booge, yɩl tɩ nebã tũ no-kãens baooda ligd wʋsg yiisgu. Rẽ me, b pa tõogd ye.

WẼNNAAM RĨUNGÃ SẼN NA N TÕOGÃ VÕORE: Wẽnnaam Rĩungã noy yaa sõma n yɩɩd ninsaalbã noy hal zĩig sẽn zãre. Wala makre, a Zezi pa kõ noy wʋsg sẽn wilgd bũmb nins d sẽn segd n maan la d sẽn pa segd n maan ye. A yeela woto: “Yãmb sẽn dat tɩ nebã maan yãmb bũmb ningã, bɩ yãmb me maan bãmb boto.” (Matɩe 7:12) Sẽn paase, Wẽnnaam Rĩungã noyã pa gomd d tʋm-tʋmdɩ wã yell bal ye. B gomda bũmb nins sẽn be d sũurẽ wã me yelle. A Zezi yeela woto: “Nong f yak wa f menga.” (Matɩe 22:39) Vẽenega, yaa Wẽnnaam sẽn tõe n bãng bũmb ning sẽn be ned sũurẽ wã bal n tõe n kõ noor a woto buudu.—1 Sãmwɛll 16:7.

5. PƲ-LIK TƲƲMÃ YẼGRE

NINSAALBÃ SẼN PA TÕE WÃ VÕORE: Bũmb ning sẽn kɩt tɩ nebã tʋmd pʋ-lik tʋʋmã yaa b sẽn yaa rat-tɩ-loog la rat-m-ye rãmbã. Goosneema wã nugẽ tʋm-tʋmdb la neb a taab wae n yaa woto. Tẽeg-y Sewull roogã lʋɩɩs yell d sẽn gom sõsg ning sẽn loogã pʋgẽ wã. Ro-metbã kõo tẽngã taoor dãmb ligdi, bala b miime tɩ b sã n maan woto, b na n paama yõod n yɩɩd b sẽn na n bao te-sõma n maag b mens n me roogã.

Rẽnd sẽn na yɩl tɩ pʋ-lik tʋʋmã sa, b segd n sõnga nin-buiidã tɩ b bas rat-tɩ-loogã la rat-m-yembrã. La ninsaalbã goosneema-rãmb pa sakd n mao wʋsg sẽn na yɩl n sõng nebã zĩ-kãng wɛɛngẽ ye. B pʋd n pa tõe n sõng nebã tɩ b toeem ye.

WẼNNAAM RĨUNGÃ SẼN NA N TÕOGÃ VÕORE: Wẽnnaam Rĩungã wilgda nebã b sẽn tõe n maan to-to n yiis rat-m-yembr la rat-tɩ-loogã b sũyẽ wã, tɩ sõngd-b tɩ b basd pʋ-lik tʋʋma.b A sẽn zãmsd-b bũmb ninsã sõngd-b lame tɩ b toeemd b tagsa wã. (Efɛɛz rãmba 4:23) Kɩtdame tɩ b bas rat-tɩ-loog la rat-m-yembre, n lebg neb sẽn maand sũ-noog ne b sẽn tar bũmb ninsã bala, la sẽn get b taabã yelle.—Filip rãmba 2:4; 1 Tɩmote 6:6.

6. NIN-BUIIDÃ

NINSAALBÃ SẼN PA TÕE WÃ VÕORE: Baa neb kẽer sã n vɩ ne pʋ-peelem dãmb tɩ b wilg-b tɩ pʋ-peelem yaa sõma, b na n yãka yam n tʋm pʋ-lik tʋʋma. Bãngdbã yetame tɩ yaa rẽ n kɩt tɩ ninsaalbã goosneema-rãmbã pa tõe n kɩt tɩ pʋ-lik tʋʋmã sa wã. B sẽn tõe bal yaa mak n boog tʋʋm-kãens tɩ ra le nams nin-buiidã wʋsg ye.

WẼNNAAM RĨUNGÃ SẼN NA N TÕOGÃ VÕORE: Nasiõzĩni wã wilgame tɩ goosneema-rãmbã sã n dat tɩ pʋ-likã tʋʋm sa, b segd n sagla b nin-buiidã tɩ b yɩ “burkĩmba, pʋ-peelem dãmb la neb b sẽn tõe n teege.” Yaa sɩd tɩ goosneema-rãmbã sã n maan woto, yaa sõma. La Wẽnnaam Rĩungã pa sagend a nebã tɩ b yɩ burkĩmba, pʋ-peelem dãmb la neb b sẽn tõe n teeg bal ye. A wilgame tɩ b segd n yɩɩ neb a woto buudu. Biiblã yeelame tɩ “zoe-bõn dãmbã” ne “ziri yagdbã” ka na n paam Wẽnnaam soolmã ye.—1 Korẽnt dãmba 6:9-11; Wilgri 21:8.

Nebã fãa tõe n modg n yɩɩ pʋ-peelem dãmb wa pipi kiris-nebã. Wala makre, karen-biig yʋʋr sẽn boond t’a Sɩmo n da bao n na n kõ tʋm-tʋmdbã ligdi, a sẽn dat tɩ b kõ-a vʋʋsem sõngã yĩnga. La tʋm-tʋmdbã zãgsame, n yeel-a woto: “Bɩ f tek yam n kos sugri, n bas f tags-wẽnsã.” A Sɩmo sẽn bãng t’a sẽn maanã yaa wẽng wʋsgã, a kosa tʋm-tʋmdbã tɩ b pʋʋs a yĩng t’a tõog n toeeme.—Tʋʋma 8:18-24.

Y SẼN TÕE N MAAN TO-TO N ZĨND RĨUNGÃ POORẼ

Yãmb sẽn yaa tẽng ning fãa neda, y tõe n zĩnda Wẽnnaam Rĩungã poorẽ. (Tʋʋma 10:34, 35) Rũndã-rũndã, Rĩungã kɩtame tɩ b moond koɛɛgã dũniyã gill zugu, n wilgd nebã b sẽn tõe n maan to-to n zĩnd a poorẽ. Y sã n data, a Zeova Kaset rãmbã tõe n wilg-y-la b sẽn zãmsd nebã Biiblã to-to b zagsẽ wã. Rẽ pa tũud ne yaood ye. Baa yaa minit piig la y tõe n paam semen fãa, y tõe n tũnuga ne rẽ n zãms Biiblã. Y na n bãnga bũmb wʋsg ‘Wẽnnaam soolem koe-noogã’ wɛɛngẽ. Wala makre, Rĩungã sẽn na n maan to-to tɩ pʋ-lik tʋʋmã sa wã. (Luk 4:43) Y tõe n kosa a Zeova Kaset rãmbã tɩ b sõng-y-yã, wall y kẽ tõnd sɩt wɛɛbã sẽn yaa jw.org pʋgẽ.