Wʋsg na n põsa sãoongã sasa: Yãmb me tõe n põsame

Biiblã wilgame tɩ dũniyã sɛɛb wakate, neb n na n sãame. A yeela woto: “To-kãseng na n zĩndame. Toog sẽn yaa woto nan ka zĩnd dũniyã zug ye. . . . La ra-kãensã sã n ka booge, ned ba a ye kõn põs ye.” (Matɩe 24:21, 22) La Wẽnnaam pʋlmame tɩ neb wʋsg n na n põse. Biiblã yeelame: “Dũniyã . . . loogdame, la ned ning sẽn maand Wẽnnaam daab paada wakat sẽn ka sɛta.”—1 Zã 2:17.

Y sã n dat n põs dũniyã sãoong n ‘pa wakat sẽn ka sɛta,’ bõe la y segd n maane? Y segd n baoa rɩɩb wʋsg n bĩngi, wall y maan bũmb toor-toor sẽn na yɩl n kogl y meng bɩ? Ayo. Biiblã sẽn yeel tɩ d maan bũmb ningã yaa toore. A yeela woto: “Bõn-kãens fãa sẽn na n yẽnegã, yãmb ka rat n yɩ neb b yel-manesem sẽn yaa sõma la sẽn sakd Wẽnnaam n gũud bãmb daarã ne datem-kãseng bɩ?” (2 Pɩɛɛr 3:10-12) A Pɩɛɛr goam a taab n wilgd tɩ ka wã, “bõn-kãens fãa” sẽn na n sãamã yaa dũniyã nanambs sẽn yaa pʋ-lik rãmbã, n paas neb nins sẽn bas Wẽnnaam n teend-bã, la bũmb a taaba. Vẽenega, d sã n bao rɩɩb la teed a taab n bĩngi, pa tõe n kɩt tɩ d põs sãoongã ye.

Rẽnd d sã n dat n wa paam n põse, d segd n bao n bãnga yel-manesem la tʋm-tʋmdɩ nins sẽn tat Wẽnnaam a Zeova yamã, la d modg n sak-a ne d sũur fãa. (Sofoni 2:3) Bɩ d ra maan wa neb wʋsg sẽn pa rat n tẽ tɩ bũmb wʋsg n wilgd tɩ tõnd wakatã n yaa yaoolem wakatã ye. D segd n gũ a Zeova daarã ne d sũur fãa. A Zeova Kaset rãmbã tõe n sõnga yãmb ne Biiblã maasem, tɩ y bãng y sẽn tõe n maan to-to n wa paam n põse.