“Bas-y tɩ d tũ yãmb n kẽnge”

1, 2. a) Bõe la a Zeova yeel tõnd wakatã wɛɛngẽ? b) Sogs-bʋs la d na n leok sõs-kãngã pʋgẽ? (Ges-y fotã sẽn be yĩngrã.)

WẼNNAAM A ZEOVA ra goma tõnd wakatã yelle, n yeel woto: “Bu-zẽms piig sẽn yaa buud toor-toor na n gãda Zʋɩf ned fuug n yeele: ‘Bas-y tɩ d tũ yãmb n kẽnge, bala, tõnd wʋmame tɩ Wẽnnaam bee ne yãmba.’” (Zak. 8:23, Wẽnnaam Sebre, 1983) Zʋɩfã makda sẽn paam-b vʋʋsem sõng zaeebã. Bãmb la b sẽn boond tɩ “Wẽnnaam Israyɛllã.” (Gal. 6:16) Neb piigã makda sẽn saagd-b n na n vɩɩmd tẽngã zug wakat sẽn kõn sa wã. B kɩsa sɩd t’a Zeova ningda sẽn paam-b vʋʋsem sõng zaeebã barka, n miẽ tɩ b sẽn paam n naag-b n tũud a Zeova wã yaa zu-zẽkre.

² A Zeezi me wilgame tɩ Wẽnnaam nin-buiidã ra na n zemsa taaba, wa no-rɛɛs a Zakari sẽn da reng n togsã. A yeelame t’a karen-biisã na n yɩɩ sul a yiibu. A boola pipi sullã tɩ “bãg-bila,” n bool yiib-n-soabã tɩ ‘piis a taaba.’ La a yeelame tɩ b fãa na n yɩɩ “bãgr a yembre,” n sakd yẽ sẽn yaa b ‘pe-kɩɩm-yɛngã.’ (Luk 12:32, MN; Zã 10:16) Sẽn mik t’a Zeezi goma sul a yiib yellã, kẽer tõe n sokda b mens woto: 1) Yaa tɩlɛ t’a Zeezi sẽn bool b rãmb tɩ piis a taabã bao n bãng sẽn paam-b vʋʋsem sõng zaeeb n ket tẽngã zugã fãa yʋy bɩ? 2) Sẽn paam-b vʋʋsem sõng zaeebã manesem segd n yɩɩ wãn ne neb a taabã? 3) Yãmb tigingã ned sã n wa sɩng a Zeezi kũumã tẽegr burã wãbr la divẽ wã yũubu, y manesem segd n yɩɩ wãn ne-a? 4) Sẽn wãbd-b burã la b yũud divẽ wã a Zeezi kũumã tẽegr sasa wã sõor sẽn paasdã segd n sãama d sũur bɩ? Sõs-kãngã pʋgẽ, d na n leoka sogs-kãensã.

YAA TƖLƐ TƖ D BÃNG SẼN PAAM-B VƲƲSEM SÕNGÃ ZAEEB N KET TẼNG ZUGÃ FÃA YƲY BƖ?

3. Bõe yĩng tɩ d pa tõe n yãk ned rũndã-rũndã n yeel tɩ d kɩsa sɩd t’a na n zĩnda neb 144000 sʋka?

³ Yaa tɩlɛ t’a Zeezi piis a taabã bao n bãng sẽn paam-b vʋʋsem sõngã zaeeb n ket tẽng zugã fãa yʋy bɩ? Ayo. Bõe yĩnga? Bala baa ned sã n paam tɩ Wẽnnaam bool-a t’a na n wa kẽng saasẽ, yaa booll bal la a paam-yã. A pa paam kaset sẽn wilgd t’a sɩd na n kẽnga saasẽ ye. Yaa rẽ la a Sʋɩtãan sẽn tũnugd ne “belgr no-rɛɛsdb” n dat n ‘tudg nin-tũusdsã.’ (Mat. 24:24) Ned sã n paam vʋʋsem sõngã zaeebo, d pa tõe n bãng a sã n na n sɩd paama a keoorã ye. Sã n pa a Zeova wa n mak-a lame n mik t’a kell n saka yẽ, a pa tõe n kɩs sɩd t’a na n kẽnga saasẽ ye. A Zeova makda sẽn paam-b vʋʋsem sõng zaeebã bilf sẽn deng b kũumã, pa rẽ bɩ nand tɩ “to-kãsengã” sɩnge, t’a sã n mik tɩ b kell n saka yẽ bɩ a kõ-b yaoolem bãndã. (Vẽn. 2:10; 7:3, 14) Rẽnd rũndã-rũndã, d pa tõe n yãk ned Wẽnnaam nin-buiidã sʋka, n yeel tɩ d kɩsa sɩd t’a na n zĩnda neb 144000 sʋk ye.^[1]

4. Sẽn mik tɩ d pa tõe n bãng sẽn paam-b vʋʋsem sõng zaeeb n ket tẽngã zugã fãa yʋyã, d maanda wãn n tũ-ba?

⁴ Sẽn mik tɩ d pa tõe n bãng sẽn paam-b vʋʋsem sõng zaeeb n ket tẽngã zugã fãa yʋyã, a Zeezi piis a taabã na n maana wãn n tũ-ba? Tẽeg-y-yã a Zakari bãngr-gomdã sẽn wilg neb piigã sẽn makd b rãmbã sẽn na n maan bũmb ningã. B ‘na n gãda Zʋɩf ned fuug n yeele: “Bas-y tɩ d tũ yãmb n kẽnge, bala, tõnd wʋmame tɩ Wẽnnaam bee ne yãmba.”’ Baa vɛrse wã sẽn gomd zʋɩf-yɛng yellã, bu-zẽmsã neb sẽn yeel tɩ ‘bas-y tɩ d tũ yãmb n kẽngã,’ wilgdame tɩ pa nin-yend yell la vɛrse wã sẽn gomdã ye. Zʋɩfã makda neb nins sẽn paam vʋʋsem sõng zaeebã fãa. Rẽnd pa tɩlɛ tɩ d bao n bãng sẽn paam-b vʋʋsem sõng zaeebã ned kam fãa, n tũ-a ye. Sẽn yaa tɩlɛ bal yaa d bao n bãng nin-kãensã sullã, n teel-ba. Biiblã pʋd n wilgame tɩ d pa segd n pʋg ninsaal ye. A Zeezi bal n yaa tõnd taoor soaba.—Mat. 23:10.

SẼN PAAM-B VƲƲSEM SÕNG ZAEEBÃ MANESEM SEGD N YƖƖ WÃN NE NEB A TAABÃ?

5. Bõe zug la sẽn paam-b vʋʋsem sõng zaeebã segd n bʋgs neere, la bõe yĩnga?

⁵ Sẽn paam-b vʋʋsem sõng zaeebã segd n bʋgsa saglg ning sẽn be 1 Korẽnt-rãmb 11:27-29 wã zug neere. (Karm-y-yã.) Tʋm-tʋmd a Poll gomdã võor yaa bõe? Kiris-ned sẽn paam vʋʋsem sõng zaeebã sã n maand bũmb sẽn tõe n sãam yẽ ne a Zeova zoodã, a sã n wãb a Zeezi kũumã tẽegr burã la a yũ divẽ wã, a maana bũmb sẽn pa zems ye. (Ebre. 6:4-6; 10:26-29) A Poll gomdã tẽegda sẽn paam-b vʋʋsem sõng zaeebã tɩ b nan pa paam b keoorã ye. B segd n kell n nanga pãnga, hal n wa paam tɩ Wẽnnaam kõ-b b keoorã Kiris Zeezi maasem yĩnga.—Fili. 3:13-16.

6. Sẽn paam-b vʋʋsem sõng zaeebã manesem segd n yɩɩ wãn ne neb a taabã?

⁶ A Poll yeela sẽn paam-b vʋʋsem sõng zaeebã woto: “Mam sẽn be bi-bees roogẽ Zu-soabã tũudum yĩngã, mam sagenda yãmb tɩ y kẽn wa sẽn zems boolg ning Wẽnnaam sẽn bool yãmbã.” Wãn to la b tõe n maan dẽ? A Poll paasame: “Kẽn-y ne sik-m-meng la sũ-bʋgsem la sũ-mare, la y sak n deeg taab ne nonglem, n mao tɩ Sɩɩg-sõng lagem-n-taar zĩndi, laafɩ ning sẽn loe-a yãmb ne taabã yĩnga.” (Efɛ. 4:1-3) A Zeova vʋʋsem sõngã sõngda a nin-buiidã tɩ b lakd b mens ne wuk-m-menga, n bɩɩsd sik-m-menga. (Kol. 3:12) Rẽ kɩtame tɩ sẽn paam-b vʋʋsem sõng zaeebã miẽ tɩ bãmb pa yɩɩd neb a taabã ye. B miime t’a Zeova pa sõngd bãmb ne a vʋʋsem sõngã n yɩɩd wẽn-tũudb a taabã ye. Sẽn paase, b pa tagsd tɩ bãmb tõe n wʋma Biiblã goam võor sõma n yɩɩd neb a taabã ye. B miime me tɩ b pa tar sor n na n yeel ned t’a segd n sɩnga a Zeezi kũumã tẽegr burã wãbre, la divẽ wã yũubu, b sẽn tagsd t’a soabã paama vʋʋsem sõngã zaeeb yĩng ye. B kɩsa sɩd tɩ yaa a Zeova bal n tõe n bool ned t’a wa kẽng saasẽ.

7, 8. Bõe la kiris-neb nins sẽn paam vʋʋsem sõng zaeebã pa baood tɩ neb a taabã maane, la bõe yĩnga?

⁷ Baa sẽn paam-b tɩ Wẽnnaam bool-b tɩ b na n wa kẽng saasẽ wã sẽn mi tɩ yaa zu-zẽkrã, b pa tagsd tɩ neb a taabã segd n waooga bãmb rẽ yĩng ye. (Efɛ. 1:18, 19; karm-y Filip-rãmb 2:2, 3.) A Zeova sẽn wa n zae-b ne a vʋʋsem sõngã, a pa maan tɩ neb a taabã bãng ye. Rẽnd kiris-ned sã n paam vʋʋsem sõngã zaeeb tɩ neb a taabã pa sak n deeg rẽ zĩig pʋgẽ, pa segd n ling-a ye. A tẽegdame meng tɩ Biiblã yeelame tɩ d pa segd n yɩ tao-tao n tẽ ned sẽn yeel tɩ Wẽnnaam bobl-a-la tʋʋmd ye. (Vẽn. 2:2) A sẽn pa rat tɩ neb a taabã tall manesem sẽn yaa toor zall ne-a wã, a pa na n yet ned ning fãa a sẽn seg tɩ yẽ paama vʋʋsem sõngã zaeeb ye. A pa na n gomd rẽ yelle, wall a wukd a meng bũmb nins a sẽn na n tɩ maan saasẽ wã yĩng ye.—1 Kor. 1:28, 29; karm-y 1 Korẽnt-rãmb 4:6-8.

⁸ Sẽn paase, kiris-neb nins sẽn paam vʋʋsem sõng zaeebã pa tagsd tɩ b segd n sõsda ne taab bal ye. B pa gẽesd neb sẽn paam vʋʋsem sõngã zaeeb wa bãmb sẽn na yɩl n yõg zoodo, wall b naagd taab n zãmsd Biiblã ye. (Gal. 1:15-17) B sã n maan woto, na n waa ne welsg tigimsã pʋsẽ. Wẽnnaam yaool n tũnugda ne a vʋʋsem sõngã n sõngd a nin-buiidã sẽn na yɩl tɩ laafɩ la zems-n-taar zĩnd b sʋka.—Karm-y Rom-dãmb 16:17, 18.

Y MANESEM SEGD N YƖƖ WÃN NE SẼN PAAM-B VƲƲSEM SÕNG ZAEEBÃ?

9. D manesem segd n yɩɩ wãn ne b rãmb nins sẽn wãbd tẽegrã burã la b yũud divẽ wã, la bõe yĩnga? (Ges-y seb-neng 27 wã.)

⁹ Y manesem segd n yɩɩ wãn ne y tẽed-n-taas nins sẽn wãbd a Zeezi kũumã tẽegr burã la b yũud divẽ wã? A Zeezi yeela a karen-biisã woto: “Yãmb fãa yaa ba-biisi.” A paasame: “Ned sã n zẽk a menga, b na n sik-a lame, la ned sã n sik a menga, b na n zẽk-a lame.” (Mat. 23:8-12) Rẽnd d pa segd n waoog ned tɩ loog noore, baa a soabã sã n paama vʋʋsem sõngã zaeeb n yaa Kirisã ba-biig ye. Biiblã goma kãsem-dãmbã yelle, n yeel tɩ d tall b tẽebã buudu, la a yeelame tɩ d pa segd n yãk ninsaal baa a ye t’a yɩ d taoor soab ye. (Ebre. 13:7) La kãsem-dãmbã segda ne waoogre. Pa b sẽn paam vʋʋsem sõng zaeeb yĩng ye. Yaa b sẽn “get wẽnd doogã tʋʋm yell neerã,” la b sẽn ‘wɩngd ne koe-moonegã, la ne zãmsgã’ yĩnga. (1 Tɩm. 5:17) D sã n waoog ned sẽn paam vʋʋsem sõngã zaeeb tɩ loog noore, tõe n sãama a sũuri. Sẽn yaa wẽng menga, tõe n kɩtame t’a lebg wuk-m-meng soaba. (Rom. 12:3) Tõnd ned baa a ye pa rat n yɩ sabab tɩ Kirisã ba-biig sãam a Zeova sũur ye.—Luk 17:2.

10. Wãn to la d tõe n wilg tɩ d nanda kiris-neb nins sẽn paam vʋʋsem sõng zaeebã?

¹⁰ Wãn to la d tõe n wilg tɩ d nanda neb nins a Zeova sẽn zae ne a vʋʋsem sõngã? D segd n gũusame, n da wa feesd-b n dat n bãng b sẽn paam vʋʋsem sõng zaeebã to-to wã ye. Woto, d pa na n kẽes d toog yell sẽn pa pak-d pʋgẽ ye. (1 Tes. 4:11; 2 Tes. 3:11) D pa na n feesdẽ me, n dat n bãng nin-kãensã pagbã wall b sɩdbã, b roagdbã, pa rẽ bɩ b zo-rãmbã sã n paama vʋʋsem sõngã zaeeb wa bãmb ye. Rẽ pa buud yell ye. (1 Tes. 2:12) D segd n gũusame me n da wa sok ned sokr sẽn tõe n sãam a sũur ye. Wala makre, ned sẽn paam vʋʋsem sõngã zaeeb pag wall a sɩd miime t’a to wã pa na n zĩnd ne-a arzãnã pʋgẽ ye. La d pa segd n sok-a a tagsg sẽn a soab ne rẽ ye. D tõe n kɩsa sɩd tɩ dũni-paalgã pʋgẽ, a Zeova na n kɩtame tɩ sẽn ‘vɩ-bã fãa paam b sẽn datã tɩ seke.’—Yɩɩn. 145:16.

11. D sã n pa waoogd neb kẽer tɩ loog nugu, zu-loe-bʋg la d na n gili?

¹¹ D sã n gũusd n pa waoogd sẽn paam-b vʋʋsem sõng zaeebã tɩ loog noore, d na n gila zu-loeese. Bõe yĩnga? Biiblã yeelame tɩ ‘neb sẽn belgd tɩ b yaa tõnd ba-biis n tõe n kẽ tõnd sʋka.’ (Gal. 2:4, 5; 1 Zã 2:19) B tõe n yetame meng tɩ b paama vʋʋsem sõngã zaeebo. Sẽn paase, ned sẽn sɩd paam vʋʋsem sõng zaeebã tõe n wa lebga wẽn-kɩɩsa. (Mat. 25:10-12; 2 Pɩy. 2:20, 21) La d sã n pa waoogd neb kẽer tɩ loog nugu, d pa na n wa pʋgd ned sẽn paam vʋʋsem sõngã zaeeb wall ned yʋʋr sẽn yi, pa rẽ bɩ sẽn sɩng n tũud a Zeova hal sẽn kaoos wʋsg ye. Woto, ned a woto sã n wa yik n kɩɩsd a Zeova, pa rẽ bɩ a sã n lak n bas tigingã, d tẽebã pa na n koms tɩ d bas a Zeova ye.

LA SẼN WÃBD-B TẼEGRÃ BURÃ LA B YŨUD DIVẼ WÃ SÕORÃ SẼN PAASDÃ YẼ?

12, 13. Bõe yĩng tɩ neb nins sẽn wãbd tẽegrã burã la b yũud divẽ wã sõor sẽn tar paasgã pa segd n sãam d sũuri?

¹² Yʋʋm wʋsg pʋgẽ, neb nins sẽn wãbd a Zeezi kũumã tẽegr burã la b yũud divẽ wã sõor ra tara boogre. La yʋʋmã noorã, b sõorã tara paasgo. Rẽ segd n sãama d sũur bɩ? Ayo. Bɩ d ges d sẽn pa segd n sãam d sũurã võore.

¹³ “Zu-soabã mii neb nins sẽn yaa bãmb dẽndã.” (2 Tɩm. 2:19) Sẽn sõt-b nebã a Zeezi kũumã tẽegr sasa wã pa wa a Zeova ye. Sẽn wãbd-b burã la b yũud divẽ wã sʋka, b pa tõe n bãng sẽn sɩd paam-b vʋʋsem sõng zaeebã ye. Rẽnd b sõta b rãmb nins sẽn tẽed tɩ b paama vʋʋsem sõngã zaeebo, n yaool n pa paamã fãa. Sẽn paase, neb n da wãbd burã la b yũud divẽ wã, n wa base. Sãnda nengẽ, yaa bãag n kɩt tɩ b tudg n tagsdẽ tɩ b na n tɩ naaga Kirisã saasẽ n dɩ naam. Vẽenega, d pa tõe n ges sẽn wãbd-b tẽegrã bur la b yũud divẽ wã sõore, n bãng sẽn paam-b vʋʋsem sõngã zaeeb n ket tẽng zugã sõor takɩ ye.

14. Bõe la Biiblã yeel sẽn paam-b vʋʋsem sõngã zaeeb n ket tẽngã zugã sõor wɛɛngẽ?

¹⁴ A Zeezi sã n wa na n tall sẽn paam-b zaeebã n kẽng saasẽ, a na n mikame tɩ b bee dũniyã ween-vɩɩs a naasã fãa. Biiblã yeelame t’a Zeezi “na n tʋma b malegs ne baor-kẽeng koe-kãsenga, tɩ b tigs bãmb nin-tũusdsã sẽn be kɩrems a naasã, hal yaang la nin-taoore.” (Mat. 24:31) Biiblã wilgame me tɩ yaoolem wakatã, na n yɩɩ sẽn paam-b vʋʋsem sõng zaeebã sõor bilf bal n na n ket tẽngã zugu. (Vẽn. 12:17) La a pa wilg to-kãsengã sẽn na n sɩng n mik b rãmbã sõor takɩ ye.

15, 16. A Zeova sẽn yãkd neb 144000 to-to wã wɛɛngẽ, bõe la d pa segd n yĩmi?

¹⁵ A Zeova n yãkd wakat ning a sẽn zaeed nebã ne a vʋʋsem sõngã. (Rom. 8:28-30) Yaa a Zeezi kũumã la a vʋʋgrã poor la a Zeova sɩng neb zaeeb ne a vʋʋsem sõngã. Wõnda pipi kiris-nebã fãa paama vʋʋsem sõngã zaeebo. La rẽ poor n tall n tãag yaoolem wakatã sɩngre, neb nins sẽn da yet tɩ b yaa kiris-nebã wʋsg ra pa kiris-neb hakɩɩk ye. La baa wakat kãnga, a Zeova ra ket n zaeeda kiris-neb hakɩɩkã ne a vʋʋsem sõngã. Nin-kãens ra yaa wa ki sẽn be nadens sʋka, wa a Zeezi sẽn yeel a yel-bũnd a ye pʋgẽ wã. (Mat. 13:24-30) La yaoolem wakatã, a Zeova ket n zaeeda neb ne a vʋʋsem sõngã sẽn na yɩl tɩ neb 144000 sõor pidi.^[2] A sã n yãk yam n na n gũ tɩ ta tõnd wakatã t’a yaool n zae neb kẽer ne a vʋʋsem sõngã, d pa segd n tags tɩ pa zems ye. (Eza. 45:9; Dãn. 4:32; karm-y Rom-dãmb 9:11, 16.)^[3] Tẽeg-y-yã a Zeezi yel-bũnd ning sẽn gomd rao sẽn dɩk neb tɩ b tʋm a pʋʋgẽ wã yelle. Raoã sẽn yao neb nins sẽn tʋm lɛɛr a ye wã sõma wã, sẽn tʋm-b wʋsgã yẽgmame. D pa segd n yɩ wa nin-kãens ye.—Karm-y Matye 20:8-15.

¹⁶ Pa sẽn saagd-b n na n kẽng saasẽ wã fãa n naag taab n yaa tʋm-tʋmd sẽn tũud sɩd la sẽn tar yamã ye. (Mat. 24:45-47) Pipi kiris-nebã wakatẽ, a Zeova la a Zeezi ra tũnugda ne neb a wãn bal n sõngd neb wʋsg tɩ b tẽebã pãng paasdẽ. Wala makre, yaa kiris-neb sẽn paam vʋʋsem sõng zaeebã bãmb b wãn bal la a Zeova kɩt tɩ b gʋls Biiblã babg ning sẽn da yaa ne gɛrkã. Rũndã-rũndã me, yaa sẽn paam-b vʋʋsem sõng zaeebã bãmb b wãn bal la b yãk tɩ b get Wẽnnaam nin-buiidã yelle.

17. Bõe la y bãng sõs-kãngã pʋgẽ?

¹⁷ Bõe la sõs-kãngã sõng tõnd tɩ d bãnge? D bãngame t’a Zeova yãka yam n na n kɩt tɩ neb nins sẽn sakd yẽ wã wa paam n vɩɩmd wakat sẽn kõn sa. B wʋsgã na n vɩɩmda tẽngã zugu, tɩ kẽerã kẽng saasẽ n tɩ rɩ naam ne a Zeezi. La noy nins a Zeova sẽn dat tɩ sul a yiibã neb fãa tũ wã yaa yembre. B fãa segd n bɩɩsda sik-m-menga. B fãa segd n naaga taab n tũ yẽ. B ned kam fãa segd n sõngame tɩ laafɩ zĩnd tigingã pʋgẽ. D sẽn mi tɩ dũni-kãngã saabã kolgdame wã, bɩ d kell n tũ a Zeova, la d sakd Kirisã sẽn yaa d Pe-kɩɩm-yɛnga.