Malɛg-wẽns n be bɩ?

N-ye. La sɩnga wãn tɩ b wa beẽ? Tẽeg-y tɩ Wẽnnaam naana malɛgsã tɩ b tõe n yãk b toorẽ yam. Wẽnnaam sẽn wa n naan d yaab a Ãdem ne a Awa wã poor bilfu, malɛk a ye n yãk yam n kɩɩs Wẽnnaam, la a tõog tɩ d yaab a Ãdem ne a Awa me kɩɩs Wẽnnaam. (Sɩngre 3:1-7; Vẽnegre 12:9) Biiblã pa togsd b sẽn da boond-a to-to nand t’a kɩɩs Wẽnnaamã ye. B pa togs tʋmd ning a sẽn da tar malɛgsã sʋkã me ye. La a kɩɩsgã tɛka, b boond-a lame tɩ Sʋɩtãana, sẽn dat n yeel tɩ “kɩɩsda.”—Matye 4:8-11.

La pa a Sʋɩtãan bal n yaa malɛk sẽn kɩɩs Wẽnnaam ye. A Nowe wakatã, malɛgs n bas b “zĩigã” saasẽ, n sig tẽngã zugu. Biiblã pa togs b sõorã ye. B tedga b mens n lebg rapa, n yo ne pagba. Woto yaa wɩɩbdo, bala pa zems ne Wẽnnaam daabã ye.—Zʋʋd 6; Sɩngre 6:1-4; 1 Pɩyɛɛre 3:19, 20.

Malɛg-kãensã sẽn kɩɩs Wẽnnaamã, baasa wãna? Wẽnnaam sẽn wa n kɩt tɩ sa-kãsengã na n ni n sãam nin-wẽnsã, b tedga b mens n le lebg malɛgs n leb saasẽ. La Wẽnnaam pa sak tɩ b leb “zĩig ning sẽn zems ne bãmbã,” n tɩ naag malɛgs a taabã ye. A kɩtame tɩ b be “lik bida pʋgẽ.” (Zʋʋd 6; 2 Pɩyɛɛre 2:4) Malɛg-kãensã n lebg zĩn-dãmbã, n be a Sʋɩtãan poorẽ, t’a yaa b naaba. Wakat fãa, a Sʋɩtãan ‘toeemda a meng n lebg wa malɛk sẽn tar vẽenem.’—Matye 12:24; 2 Korẽnt-rãmbã 11:14.

Biiblã sõngda tõnd tɩ d bãng tɩ yʋʋmd 1914, Mesi wã sẽn yaa Wẽnnaam Rĩungã Rĩmã sɩnga naam dɩɩb saasẽ.a Rẽ poor bilfu, b riga a Sʋɩtãan ne a zĩn-dãmbã saasẽ, tɩ b sig tẽngã zugu. Tʋʋm-wẽnsã la raglmã sẽn paam pãng tẽngã zug to-to wã wilgda vẽeneg tɩ b sũyã puudame, tɩ b belgd nebã tɩ b tʋmd sẽn pa segde, n wãad b mense.—Vẽnegre 12:9-12.

La tʋʋm-yoodã ne wẽnemã sẽn kengdã wilgdame me tɩ ka ne ka, a Sʋɩtãan ne a zĩn-dãmbã pa na n le so dũniyã n tar nebã n namsdẽ ye. Ka la bilfu, b pa na n le tõe n maan baa fʋɩ ye. Yaa Wẽnnaam Rĩungã Rĩm n na n soog dũniyã, n dɩ naam yʋʋm 1000, n kɩt tɩ tẽngã lebg arzãna. La rẽ poore, a Sʋɩtãan ne a zĩn-dãmbã na n paama weer bilf n mak ãdem-biisã b yaoolem makre. Rẽ poor masã la b na n sãam-b fasɩ.—Matye 25:41; Vẽnegre 20:1-3, 7-10.