A Zeova belsda tõnd d yel-pakr fãa pʋgẽ

1, 2. Ne bõe maasem la a Zeova belsd tõndo? Biiblã yeta tõnd tɩ d bas d yam ne bõe?

DAAR a ye, saam-biig sẽn yaa bi-bɩɩg n tẽeg 1 Korẽnt-rãmb 7:28 wã sẽn yet tɩ sẽn kẽ-b kãadmã na n paama yel-pakrã, n sok saam-biig sẽn kẽ kãadem hal sẽn kaoos yaa: “Kãadem pʋgẽ yel-pakrã yaa bõe? M sã n wa kẽ kãadem, bõe n na n sõng-m tɩ m mao ne rẽ?” Nand tɩ saam-biigã leoke, a yeela bi-bɩɩgã t’a tẽeg bũmb a to a Poll sẽn yeele. A ra yeelame t’a Zeova yaa “Wẽnnaam sẽn belsd nebã wakat fãa,” la t’a “belsda tõnd d yel-pakrã fãa pʋgẽ.”—2 Kor. 1:3, 4.

² A Zeova yaa tõnd Ba sẽn nong-d la a belsd tõnd d sã n wa tar zu-loeese. Tõe tɩ y tẽra yell sẽn da namsd yãmba, t’a Zeova sõng-y ne a Gomdã maasem, n wilg yãmb y sẽn tog n maanega, tɩ bels-yã. A Zeova sõnga pĩnd wẽn-sakdbã, a sẽn da rat b neerã yĩnga. Tõnd me tõe n kɩsa sɩd t’a sẽn dat d neerã, a na n sõng-d lame.—Karm-y Zeremi 29:11, 12.

3. Bõe yell la d na n gome?

³ Naoor wʋsgo, yell sã n namsd ned t’a mi bũmb ning sẽn wa ne yellã, toogã tõogr lebgda nana bilfu. Bɩ d bao n bãng bũmb ning sẽn kɩt tɩ pag ne a sɩd mi n paamd yel-pakre, la zu-loees a taab b zĩid-n-taarã pʋgẽ wã. D na n goma Biiblã kibay a wãn yelle, la rũndã-rũndã neb kẽer me kibay yelle. Na n sõng-d lame tɩ d bãng d sẽn tõe n maan to-to n paam belsgo, la d tõog n mao ne zu-loeesã.

KÃADEM PƲGẼ YEL-PAKRÃ

4, 5. Zu-loe-bʋs la sẽn kẽ-b kãadmã tõe n paame, tɩ yaa ‘yel-pakre’?

⁴ A Zeova sẽn wa n naan d yaab a Awa, n tall-a n wa d yaab a Ãdem nengẽ t’a na n lebg a pagã, a yeelame: ‘Rao na n basa a ba ne a ma, n tɩ loe a meng ne a paga. La bãmb na n lebga yĩng a yembre.’ (Sɩng. 2:24) Ninsaal fãa sẽn kongdã kɩtame tɩ pag ne rao sã n kẽ kãadem bɩ b mi vẽeneg bal tɩ zu-loees kõn kong ye. (Rom. 3:23) Wala makre, nand tɩ bi-pugl kẽ kãadem, yaa a roagdbã zu-sobend la a sakda. La Biiblã wilgame tɩ kãadmã poore, pagã zu-soab yaa a sɩdã. (1 Kor. 11:3) Sɩngrẽ wã, zu-sobendã tõe n yɩɩ toog ne rao wã. Tõe n yɩɩ toog me ne pagã t’a sak a sɩdã n yɩɩd a roagdbã masã. Pag ne rao kãadem sɩngrẽ me, mo-yõs tõe n zĩnda bãmb ne b reem-dãmbã sʋka, tɩ rẽ me yaa yel-pakre.

⁵ Naoor wʋsg me, pʋg sã n wa kẽ, pagã ne a sɩdã fãa yɩɩrã paasdame. B sẽn na n paam biigã yaa sũ-noogo, la b miime tɩ zu-loees me na n zĩndame. B maanda yɩɩr ne pʋgã zãab la rogmã. Kambã bãasã me kõta rabeem. B miime me tɩ biig zãab yaa ligdi, la tɩ rogmã poore, yɛl kẽer n na n toeeme. Pagã sẽkã fãa la bal kẽeda biigã yell gesg pʋgẽ, tɩ yẽ ne rao wã pa le tar sẽk n sõsd wa pĩndã ye. Rẽ tõe n kɩtame tɩ rao ning tagsdẽ masã t’a pagã toog pa le be ne yẽ woto ye. Sẽn paase, biig rogem paasda zakã soab zɩɩbo. Lebga pagã ne biigã fãa yell la a segd n gese, sẽn na yɩl tɩ b paam sẽn yaa tɩlɛ wã.

6-8. Neb sẽn kẽ kãadem sã n dat rogem n pa tõe n paame, hal sẽn ta zĩ-bʋg la rẽ namsd-ba?

⁶ Zu-loees a taab me n namsd neb kẽer sẽn kẽ kãadem. Nina baooda rogem n pa tõe n paam ye. Pag ning sã n wa mik t’a pa tõe n paam biiga, sãamda a sũur hal wʋsgo. Yaa sɩd tɩ kãadem la rogem tara zu-loeese, la ned sã n dat biig ne a sũur fãa n pa paamdẽ, rẽ me lebgda a ‘yel-pakre.’ (Yel. 13:12) Pĩnd wẽndẽ wã, pag sã n da yaa kiri, yaa yãnd bũmbu. Yaa rẽ yĩng la a Zakoob pʋg-nongr a Rasɛll sũur sẽn da sãamd wʋsgo, a sẽn pa tar rogem t’a kẽemã yaool n tar kambã. (Sɩng. 30:1, 2) Tẽns wʋsg pʋgẽ, nebã tagsdame tɩ f sã n kẽ kãadem, f segd n paama kamb wʋsgo. B mi n sokda misioneer-dãmbã sẽn be be wã n na n bãng b sẽn pa rogdã võore. Baa misioneer-dãmbã sẽn leok-b to-to fãa, kẽer yetame yaa: “Awaa! Mam mii ned sẽn tõe n sõng-yã.”

⁷ Ãngeletɛɛr saam-bi-poak a ye n da rat biig ne a sũur fãa. A yʋʋmã wa n yõsga rogem t’a bãng vẽeneg t’a pa tõe n le paam biig ye. A yeelame tɩ yel-kãnga sãama a sũur hal wʋsgo. Yẽ ne a sɩdã kong n tɩ reega biig n na n maan b biiga. Baa ne rẽ, saam-bi-poakã yeelame: “M mi n ket n yãbda rogmã kaalem poorẽ. M miime tɩ biig mam mengã sẽn dog pa a ye ne ned biig m sẽn deeg ye.”

⁸ Biiblã pʋgẽ, b yeelame tɩ pag sã n tar kamba, a “na n paama fãagre, a sẽn lebg ma wã yĩnga.” (1 Tɩm. 2:15) La woto pa rat n yeel tɩ pag sã n tar kamba, rẽ bal seka a na paam vɩɩm sẽn kõn sa wã ye. Gomdã võor yaa bõe? Pag sã n tar kamba, a zakã yell gesg ne a kambã zãab rɩkda a sẽkã, t’a pa le tar vɩʋʋg n gilgd n wɩt neba, wall a kẽed yɛl sẽn pa pak-a ye. (1 Tɩm. 5:13) La baa ne rẽ, tõe tɩ kãadmã pʋgẽ zu-loees a taab n be a segd n mao ne.

9. Yel-bʋg me n tõe n paam sẽn kẽ-b kãadmã?

⁹ D sã n wa gomd kãadem pʋgẽ zu-loeesã yelle, tõe tɩ zu-loɛɛg a ye la d pa mi n tẽegdẽ. Yaa nin-yend sẽn mi n wa maan kaalem n bas a to wã. Pag ne a sɩd pa rat tɩ yel-kãnga paam-b ye. Baasgo, yaa yell sẽn namsd neb wʋsgo. La kiris-nebã kɩsa sɩd t’a Zeezi sẽn yeel tɩ sẽn ki-bã na n wa vʋʋgame wã yaa sɩda, tɩ rẽ belsd-ba. (Zã 5:28, 29) Neb sã n kẽ kãadem tɩ nin-yend wa maan kaalem, bũmb nins a Zeova sẽn pʋlem tɩ be a Gomdã pʋgẽ wã tõe n belsa sẽn ket-a wã. Woto me yaa kaset tɩ tõnd saasẽ Ba wã sẽn nong-dã belsda tõnd d yel-pakr fãa pʋgẽ ne a Gomdã maasem. Bɩ d ges kibay a wãn sẽn togsd yɛl sẽn nams wẽn-sakdba, la b sẽn maan to-to n paam belsg a Zeova nengẽ, la rẽ sẽn sõng-b to-to.

BELSGO, D YEL-PAKR PƲGẼ

10. A Ana maana wãn n paam belsg a yellã pʋgẽ? (Ges-y sõsgã sɩngrẽ fotã.)

¹⁰ D gom a Ɛlkana pʋg-nongr a Ana yelle. A ra rata rogem ne a sũur fãa n pa tõe n paame, t’a pʋg-to a Penina yaool n da tar kamb wʋsgo. Yel-kãngã ra namsda a Ana wʋsgo. (Karm-y 1 Sãmwɛll 1:4-7.) A Penina ra tar-a lame n yaand wakat fãa, tɩ rẽ maneg n paasd a toogã. Kɩtame t’a Ana vɩɩmã ra lebg sũ-sãams la yɩɩre. A maana wãn n paam belsgo? A pʋʋsa a Zeova, n togs-a yellã. A kẽnga wẽnd-doogẽ wã n tɩ pʋʋs n kaoose, n kos a Zeova t’a sõng-a t’a paam bi-ribla. A ra kɩsa sɩd t’a Zeova na n sõng-a-la a yellã pʋgẽ. Biiblã yeelame t’a pʋʋsgã poore, a “nengã toeemame.” (1 Sãm. 1:12, 17, 18) A ra miime t’a Zeova na n sõng-a lame t’a paam bi-ribla, la tɩ baa a wa n pa paam me, a Zeova tara a sẽn na n maaneg n bels-a.

11. Wãn to la d tõe n paam belsg ne pʋʋsgã maasem?

¹¹ Tõnd sẽn yaa koangdbã, tɩ dũniyã leb n yaa a Sʋɩtãan n so wã, d mii vẽeneg tɩ zu-loeesã na n ket n namsda tõndo. (1 Zã 5:19) La d sũy keemame, d sẽn mi t’a Zeova yaa “Wẽnnaam sẽn belsd nebã wakat fãa” wã. Ne pʋʋsgã maasem, d tõe n kos-a lame t’a sõng-do, d yel-pakr fãa pʋgẽ. A Ana togsa a Zeova sẽn da be a sũurẽ wã fãa. Sẽn wa n yaa yell ning n namsd tõnd me, d ra pʋʋs a Zeova n togs yellã bal ye. D pelg d pʋg n togs-a sẽn be d sũurẽ wã, la d yõk a sɛɛga, n kos t’a sõng-do.—Fili. 4:6, 7.

12. Bõe n sõng a Ann t’a kell n tall sũ-noog baa ne a zu-loeesã?

¹² Yaa rogem la d pa tar tɩ yaa d ned n maan kaalem tɩ sãamd d sũur wʋsgo, d tõe n paama belsgo. Bɩ d gom Ann ning sẽn zĩnd a Zeezi wakatẽ wã yelle. A sɩdã maana kaalem b kãadmã yʋʋm a yopoe poor bala. Wõnda b pa paam biig me ye. Bõe n sõng a Ann a zu-loɛɛgã pʋgẽ? Biiblã wilgame t’a ra pa viigd wẽnd-doogẽ wã ye. Baa a sẽn wa n tar yʋʋm 84, a ra ket n kẽnda be n pʋʋsdẽ la a pẽgd a Zeova. (Luk 2:37) Yaa rẽ n da belsd-a la kõt-a sũ-noog baa ne a zu-loeesã.

13. Togs-y kibar sẽn wilgd tɩ d tõe n paama zo-rãmb hakɩɩk sẽn na n bels-do, sẽn kĩ-b ne tõndã sã n wa bas-do.

¹³ Tigingã pʋgẽ, d tõe n paama zo-rãmb hakɩɩka, tɩ d sã n wa be yel-pakr pʋgẽ bɩ b tõe n bels-do. (Yel. 18:24) D gom saam-bi-poak a Pola yelle. A sẽn wa n tar yʋʋm a nu, a ma wã basa a Zeova tũubu. Yellã sãama a sũur wʋsgo, hal tɩ ra pa nana ne-a ye. La saam-bi-poak sẽn da yaa so-pakd n keng a raoodo, la a sɩng Biiblã zãmsg ne-a. A yʋʋr la a Ann. Ad a Pola sẽn yeele: “D ra pa kĩ ne taaba, la m sẽn da ne t’a nonga maam n dat m neerã, sɩd sõng-m-la wʋsgo. Sõnga maam tɩ m pa bas a Zeova tũub ye.” A Pola ma wã wa n le sɩnga a Zeova tũubu, hal t’a Pola sũurã noom wʋsgo. A Ann me sũur noomame, a sẽn tõog n sõng a Pola t’a ket n tũud a Zeova wã.

14. D sã n nong n belsd d taabã, bark bʋs la d paamda?

¹⁴ D sã n wɩngd ne d taabã sõngre, d wae n yĩmda d zu-loeesã yelle. Saam-bi-pogs wʋsg nong n yetame tɩ b sã n taasd nebã Rĩungã koe-noogã, kõt-b-la sũ-noog wʋsgo, bala b miime tɩ kɩtame tɩ b yaa a Zeova tʋmd-n-taase, la tɩ yaa a raab la b maanda. D ned kam fãa sã n wɩngd ne moonegã zĩigẽ nebã sõngre, la d tẽed-n-taasã sõngre, kɩtdame tɩ d tigingã neb zoodã ne taab paasdẽ. (Fili. 2:4) Yaa woto la tʋm-tʋmd a Poll ra maanda. A gesa Tesalonik tigingã neb yell ne sũ-bʋgsem, wa ‘pag sẽn get a kamb yell’ to-to wã. A ra kengda b raood la a belsd-ba, wa ba sẽn maand to-to ne a kambã.—Karm-y 1 Tesalonik-rãmbã 2:7, 11, 12.

BELSGO, ZAGSÃ RÃMB YĨNGA

15. Kambã wubr la b zãmsg yaa ãnda tʋʋmde?

¹⁵ Bõe la d tõe n maan n bels zagsã rãmba? Nina sã n nan bãng a Zeova paalem, a kota tigingã neb tɩ b sõng-a t’a tõog t’a kambã me bãng a Zeova. Wakat ning menga, a na n kos-b lame tɩ b zãms a kambã Biiblã. La Biiblã wilgda vẽeneg tɩ kambã wubr la b zãmsg yaa roagdbã tʋʋmde. (Yel. 23:22; Efɛ. 6:1-4) Yaa sɩd tɩ bũmb ning mi n kɩtame tɩ roagdbã rat neb a taab sõngre, la segdame tɩ yaa bãmb b toor n zãmsd b kambã a Zeova raabã. B segd n sõsda ne b kambã, n paam n bãng-b sõma.

16. D sã n zãmsd biig Biiblã, bõe la d pa segd n yĩmi?

¹⁶ Roagd sã n kos ned t’a zãmsd a biig Biiblã, segdame t’a soab tẽegd wakat fãa t’a pa tog n deeg biigã roagdb zĩig ye. B tõe n kosa tigingã ned t’a zãms biig Biiblã, tɩ biigã roagdb yaool n pa tũud a Zeova ye. La segdame t’a ra yĩm tɩ baa a sẽn sõngd biigã sẽn na yɩl t’a tũ a Zeova wã, a pa a ba wall a ma ye. Yɩta sõma tɩ b sã n na n zãms Biiblã bɩ yɩ biigã zakẽ, t’a roagdbã bɩ d tẽed-n-taag sẽn yaa kãsem be yambẽ, wall b bao zĩig nebã sẽn ne-ba. Rẽ, ned pa na n wa tagsdẽ t’a maanda bũmb sẽn pa segd ne biigã ye. Tõe tɩ tarẽ-n-tarẽ bɩ biigã roagdb wa zãmsd-a Biiblã b toore.

17. Wãn to la biig tõe n bels a zakã neba?

¹⁷ Biig sã n bãng a Zeova la a tũud-a, belsda a roagdbã. Wãn to? Bala a na n waoogd-b lame, n sakd n tʋmd zakã tʋʋm kẽere, la a maand bũmb a taab n sõngd-ba. A sã n tũud a Zeova ne a sũur fãa, kengda zakã neb fãa raoodo. A Lamek sẽn yɩ wẽn-sakd sẽn zĩnd nand tɩ sa-kãsengã ni wã goma a biig a Nowe yelle, n yeel yaa: “Bi-kãngã na n yɩɩ belsg tõnd yĩnga, d tʋʋm-toodã yĩnga. Yaa tʋʋm nins tõnd sẽn tʋmd tẽn-gãong ning Sẽn-Ka-Saab sẽn kãab wẽngã zugã.” A gomdã pidsa sa-kãsengã poore, wakat ning a Zeova sẽn yeel t’a pa na n le kãab tẽngã wẽngã. (Sɩng. 5:29; 8:21) Rũndã-rũndã me, biig sã n tũud a Zeova, a tõe n belsa a zakã neba. Bala, a tõe n sõng-b lame tɩ b tõog toog masã menga, la b wa paam n põs yel-beed sẽn yɩɩd a Nowe wakatẽ sa-kãsengã.

18. Bõe n tõe n sõng-d tɩ d tall raood n tõog toog baa sẽn wa n yaa yell ninga?

¹⁸ Rũndã-rũndã menga, a Zeova nin-buiidã sẽn wɩngd ne pʋʋsgo, n bʋgsd wẽn-sakdbã kibay sẽn be Biiblã pʋgẽ wã zugu, la b baood zo-rãmb hakɩɩk b tẽed-n-taasã sʋkã, kɩtame tɩ b paamd belsg b yel-pakr fãa pʋgẽ. (Karm-y Yɩɩn-sõamyã 145:18, 19.) D sẽn mi t’a Zeova bee tõnd belsg yĩngã kõta tõnd raoodo, tɩ d miẽ tɩ sẽn wa n yaa yell ning fãa, d tõe n tõoga toogo.