“Maan-neer soab na n paama barka”

HAL pĩnd wẽndẽ n tãag masã, maandã yaa bũmb sẽn tar yõod wʋsg tũudum hakɩɩkã pʋgẽ. Israyɛll nebã ra kõta Wẽnnaam rũms maando. Kiris-nebã me kõta Wẽnnaam “maoong sẽn ya pẽgre.” La maand buud a taab me n be n noom Wẽnnaam. (Ebre. 13:15, 16) D sã n kõt-a maan-kãens me, d paamda sũ-noogo, la d paam t’a ning-d barka. Bɩ d ges Biiblã kibay a wãn sẽn wilgd rẽ.

A Ana yaa pag sẽn tũ Wẽnnaam pĩnd wẽndẽ. A ra rata biig ne a sũur fãa, la a ra yaa kiri. A pʋʋsa a Zeova, n yeel-a yaa: “Y sã n kõ-m bi-ribla, mam na n dɩk-a lame n kõ yãmb a Sẽn-Ka-Saab a yõor tɛka.” (1 Sãm. 1:10, 11) A sɩd wa n dɩka pʋg n dog bi-ribla, n pʋd a yʋʋr t’a Sãmwɛll. Biigã sẽn wa n bas bĩisim, a tall-a lame n kẽng sɛk-roogẽ wã wa a sẽn da pʋlmã. A Ana sẽn sak n mong a meng woto wã, a Zeova ning-a-la barka. A paama kamb a nu n paase, t’a biig a Sãmwɛll lebg no-rɛɛsa, la a paam n gʋls Biiblã sɛb kẽere.—1 Sãm. 2:21.

Rũndã-rũndã, kiris-nebã me paamame n tõe n dɩk b meng n kõ b Naandã, tɩ yaa a raabã maaneg n pak-b n yɩɩda. A Zeezi yeelame tɩ sẽn yaa bũmb ning fãa la d mong d meng sẽn na yɩl n tũ a Zeova, a na n ning-d-la bark tɩ seke.—Mark 10:28-30.

Pag a ye n da be pipi kiris-nebã wakatẽ, t’a yʋʋr boond t’a Dorkas. A ra mongda a meng a taabã neer yĩnga, n da tʋmd “tʋʋm-sõamyã wʋsgo, la a sõngd naong rãmba.” La a wa n “lʋɩɩ bãag n ki,” tɩ sãam tigingã nebã sũy wʋsgo. Karen-biisã wʋmame t’a Pɩyɛɛr bee zĩig sẽn pa zãr ne be, n tʋm neb tɩ b tɩ b bool-a t’a wa tao-tao. A Pɩyɛɛr waame, n maan yel-solemd n vʋʋg a Dorkas. Yɩɩ pipi la woto Biiblã sẽn gomd tʋm-tʋmd sẽn vʋʋg ned yelle. Tags-y n ges-y a Dorkas vʋʋgrã sẽn yɩ tigingã neb noog to-to! (Tʋʋ. 9:36-41) Wẽnnaam ra pa yĩm a Dorkas sẽn mong a meng a taabã yĩngã ye. (Ebre. 6:10) A kibarã bee Biiblã pʋgẽ, tɩ d tõe n tũ a mak-sõngã.

Tʋm-tʋmd a Poll me ra kẽesda a sẽkã la a pãngã fãa n sõngd nebã, tɩ yaa mak-sõngo. A yeela a tẽed-n-taasã sẽn da be Korẽntã yaa: “Mam na n kɩsa bũmb fãa ne yamleoogo, la m kɩs m mengã fãa yãmb mensã yĩnga.” (2 Kor. 12:15) A Poll meng bãngame t’a sã n mongd a meng a taabã yĩnga, kõta yẽ mengã sũ-noogo, la sẽn yɩɩd fãa, a Zeova sũur na n yɩɩ noog ne-a, t’a ning-a barka.—Tʋʋ. 20:24, 35.

Hakɩɩka, d sã n kẽesd d sẽkã la d pãngã n tʋmd Rĩungã tʋʋm na kẽng taoor yĩnga, la d sõngd d tẽed-n-taasã, nooma a Zeova. La bũmb a taab me n be d sẽn tõe n maan n teel Rĩungã koɛɛgã mooneg bɩ? N-ye. Tʋʋm nins d sẽn tʋmd nonglem yĩngã sẽn yãk a toogo, d tõe n kõo yamleoog kũuni, n waoog a Zeova. Tõnd kũunã sõngdame tɩ b get misioneer-dãmbã yelle, la neb a taab sẽn kẽes b mens zãng Wẽnnaam tʋʋmdã pʋgẽ me yelle, la b maand bũmb a taab sẽn na yɩl tɩ koe-moonegã paam pãng dũniyã gill zugu. Sẽn paase, yaa ligdã d sẽn kõtã n sõngd tɩ b tõogd n lebgd sɛba la video-rãmba. Sõngdame me tɩ b met Rĩungã roto, la b get d tẽed-n-taas yell sabab-wẽns sasa. D tõe n kɩsa sɩd tɩ “maan-neer soab na n paama barka.” D sã n kõt a Zeova d bõn-sõma wã, waoogd-a lame me.—Yel. 3:9; 22:9.

Kẽer Sẽn Maand To-to N Kõt Kũuni, N Teend Ri̇̃ungã Tʋʋm Dũniyã Gill Zugu

Tʋm-tʋmd a Poll wakatẽ wã, kiris-nebã ra bĩngda ligdi, n wa rɩk n kõ sẽn na yɩl n sõng ne tigingã tʋʋmã. (1 Kor. 16:2) Rũndã-rũndã me, kiris-neb wʋsg bĩngda ligd kɛɛng wall b kẽgsdẽ, sẽn na yɩl n wa rɩk n kõ tɩ sõng ne Rĩungã tʋʋmd dũniyã gill zugu. B ningda ligd kãng Rĩungã roog koglg pʋgẽ, zĩig ning b sẽn gʋls tɩ “Dũni gill tʋʋmdã yĩnga.” Kiuug fãa, tigimsã toonda ligd-kãng filiyall ning sẽn get koe-moonegã yell b tẽngẽ wã. A Zeova Kaset rãmbã sã n tara asosiyasiyõ yãmb sẽn beẽ wã, y tõeeme me n gʋls sɛk n kõ. Y sã n dat n bãng a Zeova Kaset rãmbã asosiyasiyõ ning y sẽn tõe n tool sɛkã bɩ y gʋls n sok filiyallã. Y tõe n paama filiyallã adɛrs www.jw.org pʋgẽ. Ad y sẽn tõe n maan to-to n kõ kũuni:

Y TÕE N KÕO LIGD BI ARZƐK BUUD A TO

Y tõe n tũnuga ne y bãnkã wall kart de kredi n maan tãrãnsfɛɛre. Tẽns kẽere, nebã tõe n kẽe jw.org pʋgẽ wall Betɛllã sɩt a to n kõ ligdi.
Y tõe n kõo ligd vẽenega, wall arzɛk buud a taaba. Yɩta sõma tɩ y gʋls lɛtr n wilg tɩ yaa kũuni.

Y TÕE N PENGA LIGDI

Y tõe n peng-b-la ligdi, tɩ y sã n wa rat y ligdã bɩ b lebs-yã.
Yɩta sõma tɩ y gʋls lɛtr n wilg tɩ y sã n wa rat y ligdã, y na n deegame.

KŨUN A TAABA

Bũmb a taab n be y sẽn tõe n maan n kõ ligd n teel Rĩungã koɛɛgã b sẽn moond dũniyã gill zugã. Rẽ la b sẽn sõdg tẽngrã. Sẽn yaa to-to fãa la y rat n maan n kõ kũuni, yɩta sõma tɩ y reng n sok filiyall ning sẽn get koe-moonegã yell yãmb tẽngẽ wã, n bãng y sẽn tog n maanega. Lampo-rãmbã yell pa yembr tẽnsã fãa pʋgẽ ye. Rẽ n so tɩ y segd n deng n yẽs ne ned sẽn mi laloa wã la lampo-rãmbã yɛl sõma, n paam saglse.

Kõntra dasirãns vi: Y tõe n maana kõntra dasirãns vi, n wilg tɩ y ratame t’a Zeova Kaset rãmb asosiyasiyõ sẽn be yãmb babgẽ wã reegd yãmb pãnsiyõ wã wall ligd ning asirãnsã rãmb sẽn segd n yao yãmbã.

Kõnt bãnkɛɛre: Y tõe n bĩnga ligd bãnkẽ, n bas tɩ kaoos tɩ y pa sɩɩse, n wa rɩk rẽ ne yõodã sẽn dogã n kõ a Zeova Kaset rãmbã asosiyasiyõ.

Y sã n leeb n paam yõodo: Y sã n leeb n paam yõodo, y tõe n dɩka rẽ n tɩ ning koglgã sẽn be Rĩungã roogẽ wã, wall y rɩk n tool a Zeova Kaset rãmb asosiyasiyõ.

Zak wall parsɛlle: Y sã n tara zak wall parsɛll sẽn tõe n koose, y tõe n dɩk n kõo a Zeova Kaset rãmb asosiyasiyõ. Sã n yaa zak yãmb sẽn nan ket be, yɩta sõma tɩ y gʋls sebr n wilg tɩ y na n zĩnda be y yõor tɛka.

Tɛstama: Y tõe n gʋlsa tɛstama, n wilg tɩ y rɩka y roog wall y zĩig pa rẽ bɩ y ligd n kõ a Zeova Kaset rãmb asosiyasiyõ. Tõe n yɩɩ y paoongã fãa me. La segdame tɩ avoka maan kaseto, tɩ y tik y nugu.

Yaa ne kõntra dasirãns vi wall tɛstama, pa rẽ bɩ kõnt bãnkɛɛr maasem la y rat n kõ kũuni, wall yaa y zak bɩ y parsɛlle, pa rẽ bɩ y leebg yõod la y rat n dɩk n kõ, yɩta sõma tɩ y reng n mage, n segl y menga.

Y sã n dat n paam kibay a taab n paas bɩ y kẽ tõnd sɩtã pʋgẽ, n kilik zĩig ning b sẽn gʋls tɩ “Tool-y kũun n teel tʋʋmdã d sẽn tʋmd dũniyã gill zugã.” Y sã n kẽ sɩtã pʋgẽ, bɩ y ges tɩ bee tẽngre. Y leb n tõe n boola Betɛllã sẽn Benẽ wã n soke, wall y gʋls-ba. Adɛrsã ne telefõnnã nimero la sẽn be tẽngrã. A Zeova Kaset rãmb asosiyasiyõ sã n bee yãmb tẽngẽ wã, y tõeeme me n sok-ba.