Gũusg Gasgã moonda a Zeova Rĩungã (Nebã fãa yĩnga)—2019
wp19 nimero 2 s.n. 3
Yɛlã sã n wa yɩɩd y pãnga
ZU-LOEES sã n kae, vɩɩmã bee yamleoogo. La wakat ninga, zu-loeesã tõe n kɩtame tɩ vɩɩmã ka tar yamleoog ye.
Wala makre, a Salia sẽn yit Etazĩni wã bõna a paoongã fãa la bal sob-kãseng sasa. A yeelame: “Mam wa n tagsdame tɩ m pa le tar pãng n na n mao ne m zu-loeesã ye. Ra ketẽ-la bilf bal tɩ m koms raood zãnga.”
La sã n yaa y ned n maan kaalem? A Zaniss sẽn yit Ostrali wã yeelame: “Mam kamb a yiibã sẽn maan kaalmã, m vɩɩmã sãama wa bũmb sẽn wã n lebg peese. M yõka Wẽnnaam sɛɛg n yeele: ‘Maan sugr tɩ m pa le tar pãng n na n mao ne m zu-loeesã ye. Bas-m tɩ m ki. Ra sak tɩ beoogã vẽeg-m ye.’”
A Dãniyɛll me sũurã sãama wʋsgo, a pagã sẽn wa n zãmb-a wã. A yeelame: “Mam pagã sẽn wa n togs maam t’a zãmba maamã, yɩɩ wa b sẽn dɩk sʋʋg n kõs m sũurã. Kaoosa kiis tɩ yellã ra ket n tar-m n namsd wʋsgo.”
Gũusg Gasg kãngã pʋgẽ, d na n yãa y sẽn tõe n maan to-to tɩ y vɩɩmã kell n tall yõodo, baa
Sabab-wẽng sã n paam-yã
Y ned sã n maan kaalem
Y pag bɩ y sɩd sã n zãmb-yã
Y sã n bẽed bã-kɛgenga
Yɛlã sã n wa kɩt tɩ y yam yi vɩɩmã
Bɩ d reng n ges y sẽn tõe n maan to-to sabab-wẽng sã n wa paam-yã.
