D sõng so-pakdbã
1 Neb wʋsg mii a Zeova nin-buiidã wala neb sẽn moond koe-noogã ne yẽesem. Yaa sɩd tɩ ka neba fãa yɛl n kõt-b sor tɩ b tõe n yɩ so-pakdb ye, la d tõe n modgame n tall so-pakr tʋʋmd yam, tɩ d sẽn maand bũmb ning fãa, bɩ d maan-a ne d sũurã fãa. D maanda sũ-noog ne neb wʋsg sẽn tõog n lebg so-pakdbã, la d kengd b raoodo.
2 Tõog n lebg so-pakd la kell n pa a pʋgẽ yaa tʋʋmd menga. Moonegã la zãmsgã tʋʋm wʋsg yaa so-pakdbã n maande. La rɩlla tũ ne modgr la mong-m-meng tɩ rẽ tõog n maane. Wãn to la Kaset rãmb a taabã tõe n sõng wakat fãa sõgen dãmb kãensã sẽn tar yẽesmã la b keng b raoodo?
3 B sẽn tõe n maan bũmb ninga: So-pakdbã rata kãsem dãmbã sõngre. Kãsem dãmbã sã n moond ne so-pakdbã b tõe n kenga so-pakdbã raood wʋsgo. Kãsem dãmb wʋsg modgdame n moond ne tigingã so-pakd fãa vugri, bɩ sẽn yɩɩd woto yʋʋmd fãa. Woto, kãsem dãmbã tõe n paama sor n pẽg so-pakdbã b sẽn maand bũmb ninsã yĩnga, la b sõng-b tɩ b bɩ tẽebã wɛɛngẽ n paase. Tõe n yaa tɩlae tɩ so-pakdbã maneg b sẽka n tõog n yi moonegã wakat ning kãsem dãmbã sẽn be be. Sẽn paase, kãsem dãmbã segd n modgame n paam mooneg zĩis tɩ sek sulã fãa yĩnga. B tõe n sigla segs a taab moonegã yĩng wĩnd-kaoa bɩ zaaba wã, sẽn na yɩl tɩ zems ne so-pakdbã sẽka. Sẽn yɩɩd fãa, segd n yɩɩ woto kiis nins koe-moondb wʋsg sẽn dɩk sõngr so-pakrã tʋʋmdã.—Ezai 40:11.
4 Kãsemb sõngdbã tõe n sõnga so-pakdbã sõma, n teend-b koe-moonegã pʋgẽ la b get segls nins b sẽn dɩk tigingã pʋgẽ wã yell sõma. Saam-bi-pogs nins sẽn yaa so-pakdbã sã n paamd saam-biis tɩ b lʋɩt taoor n sigind moondbã sula, b sũur yaa noog ne rẽ. Sẽn get-b sɛbã la zʋrno rãmbã yellã tõe n maana modgr n ges tɩ seb-kãens beẽ tɩ seke. B sã n get bõn-kãensã yell sõma, kɩtdame tɩ so-pakdbã tõe n tik b yamã koe-moonegã zug sõma.
5 Neba fãa tõe n kõo b sõngre: Koe-moondbã tõe n kõo b sõngre, b sã n sak n na n tʋm ne so-pakdbã naoor wʋsgo. So-pakdbã nongame tɩ koe-moondb a taabã yãagd-b koe-moonegã pʋgẽ la b teend-ba. Y tõe n maana segls n tʋm ne so-pakdbã vugr rasem a yopoe fãa, bɩ naoor a yiib kiuugu. Laogã yɛl wɛɛngẽ, y tõe n pʋɩ y sẽn tara ne so-pakdbã, la so-pakdbã tara mi-beoog wʋsg kũun a woto yĩnga.—Fil. 4:14-19.
6 Zagsã neb a taab tõe n maana yɛl wʋsg n sõng b neb nins sẽn yaa so-pakdbã. Naoor wʋsgo, b tõe n sigla zakã tʋʋm tɩ zakã ned a ye bɩ sẽn yɩɩd woto tõog n yɩ so-pakdba. Saam-bi-poak sẽn tar kamb a tãab n tʋmd rasem a yiib semen fãa. Sẽn na yɩl n sõng-a, a komdibli wã n da tʋgd n daad bũmb nins zaka neb sẽn datã la b tʋmd zakã tʋʋma, t’a bi-puglã ra pɩɩsd zakã la a segend rɩɩbã. Bipuglã kareng saab poore yẽ me sɩnga so-pakrã, tɩ yẽ ne a ma wã tʋmd semenã pʋgẽ masã n deesd taab raya. Zems-n-taar a woto zakã neb ne taab sʋk kɩtame tɩ neb wʋsg tõog n yɩ so-pakdba, la wa ne bark n kõ zakã.
7 So-pakdb nins sẽn tʋmd sõma wã yaa bark n kõ tigingã zĩis toɛy-toɛy wɛɛngẽ. B yẽesmã la b mak-sõngã kengda neb wʋsg raood tɩ b maan modgr n paas tʋʋmdã pʋgẽ. Sãmbg sẽn ka be, d segd n tʋlgame n maan d sẽn tõe fãa n sõng-ba. D sã n naag taab n maan woto, kõta tõnd fãa sũ-noogo, la waoogda a Zeova.