Bark nins so-pakrã tʋʋmd sẽn wat ne wã
1, 2. Bark bʋs la so-pakrã tʋʋmd wat ne, la bõe yĩnga?
1 So-pakd a yembr yeelame: “Tʋʋmd ba a yembr pa tõog n kõ maam sũ-noog wala sɩdã m sẽn taasd neb a taabã sẽn kõt maam sũ-noog ningã ye.” Tɩ so-pakd a to me yeel woto: “Zaabr fãa, mam gõeema yaa noogo, la m sũur yaa noog wʋsg me.” So-pakdb kãensã sẽn yeela wẽnda saam-biis la saam-bi-pogs nins fãa sẽn paam so-pakrã tʋʋmd barkã tagsgo.—Yel. 10:22.
2 Sõng neb a taab tɩ b paam Wẽnnaam Gomdã bãngr sẽn fãagd yõyã kõta sũ-noog hakɩka. (Tʋʋ. 20:35; 1 Tes. 2:19, 20) Saam-biig sẽn kaoos so-pakrã tʋʋmd pʋgẽ yeela woto: “Ad sɩd yaa bũmb sẽn kõt sũ-noog la sẽn kengd tẽebo, d sẽn ne Wẽnnaam Gomdã pãng sẽn kɩtd tɩ nebã toeemd b vɩɩmã to-to wã.” N-ye, yaa so-pakdbã sẽn sakd n sõngd nebã la b zãmsd Biiblã ne-bã n kɩt tɩ b tõe n paam bark kãensã.
3, 4. Wãn-wãn la so-pakrã tʋʋmd zãmsd ned a Zeova teegre, la wãn to la rẽ sõngd ned t’a bɩ tẽebã wɛɛngẽ?
3 A Zeova teegre: So-pakdbã sẽn teegd Wẽnnaam vʋʋsem sõngã b tʋʋmdã pʋgẽ daar fãa wã, sõngd-b lame tɩ b bɩɩsd ‘vʋʋsem sõngã biisi,’ tɩ rẽ me kogend-ba. (Gal. 5:16, 22, 23) Sẽn paase, b sẽn tʋmd ne Wẽnnaam Gomdã wakat fãa wã yĩng kɩtame tɩ naoor wʋsgo, so-pakdbã mi b sẽn tõe n tũnug ne verse rãmbã sõma to-to n gom n teel sɩdã la b keng neb a taab raoodo. (2 Tɩm. 2:15) Saam-biig sẽn maan so-pakrã tʋʋmd yʋʋm pi-gĩn yeelame: “So-pakrã tʋʋmd sõnga maam tɩ m bãng Biiblã sõma. Mam dɩka bãng-kãng n sõng neb wʋsg tɩ b bãng a Zeova la a raabã.” Ad yaa bũmb sẽn kõt sũ-noog menga!
4 Wakat fãa so-pakdbã tog n teega a Zeova ne manesem a taab me. B sẽn ne a Zeova sẽn sõngd-b to-to wakat ning b sẽn modgd n baood b noorã rɩɩbã, kengda b tẽebã. Yʋʋm 72 saam-biig sẽn yɩ wakat fãa so-pakd yʋʋm 55 pʋgẽ yeelame: “A Zeova zɩ n bas maam ye.” Sẽn paase, so-pakdbã sẽn pa gĩt b vɩɩmã ne yɛlã, rẽ kogend-b-la ne vɩɩmã zu-loees wʋsgo. Rẽ yĩnga yãmb datame n paam koglg a woto buud bɩ?—Mat. 6:22; Heb. 13:5, 6.
5. Wãn-wãn la so-pakrã tʋʋmd sõngd ned t’a pẽneg a Zeova?
5 Wẽnnaam pẽnegre: Yaa tõnd zems-n-taarã ne a Zeova n segd n tar yõod n yɩɩdã. (Yɩɩl 63:4) Tõnd sã n moond koe-noogã d sẽn nong a Zeova wã yĩnga, d zems-n-taarã ne-a pãng paasdame. (Zak 4:8) Saam-biig sẽn maan sẽn yɩɩd yʋʋm 18 so-pakrã tʋʋmd pʋgẽ yeelame: “So-pakrã tʋʋmd kɩtdame tɩ d ‘lembd n bãngdẽ t’a Zeova yaa sõma,’ la daar ne a to fãa tõnd zems-n-taarã ne d Naandã pãng tara paasg bala.”—Yɩɩl 34:9.
6. Bõe la so-pakdbã tog n talle, la so-pakdbã mens sẽn yãk b toogo, ãnda rãmb me la b tʋʋmdã nafda?
6 Tõog n yɩ so-pakdã sẽn yãk a toogo, so-pakdbã leb n togame n tall tẽeb sẽn tar pãnga, nonglem hakɩk ne Wẽnnaam la ne b taaba, la b sak n maan modgr la b mong b mens ne bõn-yood kẽere. (Mat. 16:24; 17:20; 22:37-39) La d sẽn ne tɩ so-pakdbã fãa tara sũ-noogã, wilgdame tɩ bark nins so-pakrã tʋʋmd sẽn wat ne wã yɩɩda b sẽn da tẽedã. (Mal. 3:10) Ka so-pakdbã bal n paamd bark kãensã ye, yam-sõng ning b sẽn wilgdã leb n nafda b zagsã neb la tigingã neb me wʋsgo.—Fil. 4:23.