Yaa masã la d segd n moon n yɩɩda!
1. Bõe yĩng tɩ d segd n moon masã n yɩɩda?
1 ‘Bɩ y zoe Wẽnnaam la y waoog-a.’ Malɛgsã sor-wilgr pʋgẽ, b moonda koe-kãngã neb sẽn yit “soolem fãa la buud fãa la goam toɛy-toɛya fãa la neba fãa.” Bõe yĩnga? Bala ‘Wẽnnaam bʋ-kaoorã wakat taame.’ Rũndã-rũndã, d vɩɩ “bʋʋd kaoob wakat” kãng sasa sẽn na n baas ne dũni-wẽng kãngã sãoongã. Nebã segdame n “waoog sẽn naan-a yĩngri la tẽnga ne ko-kãsenga la ko-bundsã.” Tʋʋmd pa be rũndã-rũndã tɩ b tõe n mak a yõodã ne ‘koe-noog sẽn ka sɛtã’ yõodo, bɩ tɩ b segd n tʋm-a ne yãgbo, wa b sẽn segd n moon koe-no-kãngã ne yãgb to-to wã ye. N-ye, sɩd yaa masã la d segd n moon n yɩɩda!—Wil. 14:6, 7.
2. Wãn-wãn la a Zeova sõgen dãmbã wilgd tɩ b miime tɩ masã yaa yãgb wakato?
2 Yʋʋm piig sẽn loog pʋgẽ, a Zeova Kaset rãmbã rɩka sẽn na maan lɛɛr milyaar 12 n moon Rĩungã la b maan karen-biisi. B neb kẽer toeema b vɩɩmã sẽn na yɩl n paam sẽk n paas n kẽes b mens tẽebã tigsg pʋgẽ. (Mat. 9:37, 38) Wala makre, rɩẽ, b geelame n mik tɩ kiuug fãa, yaa sẽn yɩɩd koe-moondb 850 000 n yɩ so-pakdba. Wakat fãa so-pakd segd n moona lɛɛr 70 kiuug fãa, tɩ sõngr so-pakd segd n moon lɛɛr 50.
3. Naoor wʋsgo, toeem-bʋs la koe-moondbã segd n maan n tõog n yɩ so-pakdba?
3 So-pakrã sẽn baoode: So-pakdbã sẽn mi tɩ ‘wakatã lebga bilfã’ yĩnga, b maoodame n pa gĩt b vɩɩmã ne yɛl wʋsg ye. (1 Kor. 7:29, 31) B baooda soay n boogd ligd ning b sẽn yiisdã, sẽn na yɩl n da rɩk sẽk wʋsg n tʋm nug-tʋʋmd ye. Wala makre, kẽer toeema zags n tɩ rɩk rot sẽn paoode. Sãnda basa b teed kẽer sẽn pa tɩlae ne-ba. (Mat. 6:19-21) Naoor wʋsgo, b segd n basa b tʋʋm a taab me. B maana woto fãa sẽn na yɩl n tõog n dɩk sẽk wʋsg n moon koɛɛgã sõma n paase. (Ef. 5:15, 16) Ne pẽdgre, mong-m-meng yam la ne a Zeova teegr pʋʋsg pʋgẽ, koe-moondb wʋsg tõog n sigla tʋʋm na-kẽndr sẽn zemse, sẽn na yɩl n tõog n yɩ so-pakdba.
4. Bõe la y tõe n maan n tõog n yɩ so-pakda?
4 Y tõe n yɩɩ so-pakd bɩ? Sok-y so-pakdb sẽn tʋmd b tʋʋmdã sõma n bãng b sẽn maand b so-pakrã tʋʋmd to-to. Tʋm-y ne-b koe-moonegã pʋgẽ n bãng sũ-noog ning b sẽn paamdã. Karm-y sõss tõnd sɛbã pʋsẽ sẽn gomd so-pakrã yelle. Yãk-y bõn-datɩ sẽn tõe n wa kɩt tɩ y yɩ so-pakda. Sã n mik tɩ yɛl kẽer n gɩdg-y masã tɩ y nan pa tõe n yɩ so-pakda, bɩ y wilg yel-kãens a Zeova pʋʋsg pʋgẽ la y kos-a t’a sõng-y tɩ y welg-ba.—Yel. 16:3.
5. Wãn-wãn la so-pakrã kɩtd tɩ tõnd koe-moonegã minim paasdẽ?
5 Bark la sũ-noogo: So-pakrã kɩtdame tɩ d sẽn tʋmd ne Wẽnnaam Gomdã to-to koe-moonegã pʋgẽ wã lebgd sõma n paasdẽ, tɩ kõt-d sũ-noog wʋsgo. Saam-bi-poak a ye sẽn yaa so-pakd yeela woto: “Tõog n tall Wẽnnaam Gomdã sẽn yaa sɩdã n tʋm sõma yaa bark meng-menga. Y sã n yaa so-pakda, y tʋmda ne Biiblã wʋsgo. Masã, m sã n moond zak-zaka, m tõe n tẽega verse sẽn zems ne kɛlgd fãa.”—2 Tɩm. 2:15.
6. So-pakrã kɩtdame tɩ ned paam tõod bʋse?
6 So-pakrã leb n kõt-d-la tõod toor-toor sẽn tar yõod wʋsg vɩɩmã pʋgẽ. Wala makre, a tõe n sõnga kom-bɩɩsã tɩ b bãng b sẽn tõe n dɩk b sẽkã n tʋm ne yam to-to, tɩ b bãng ligd zãabo, la b sẽn tõe n zems ne nebã to-to. So-pakrã kɩtame tɩ neb wʋsg get yɛlã ne tẽeb nin masã. (Ef. 4:13) Sẽn paase, naoor wʋsgo, so-pakdbã paama zu-no-kãseng n yã a Zeova sẽn sõng-b la a keo-b to-to. —Tʋʋ. 11:21; Fil. 4:11-13.
7. Wãn-wãn la so-pakrã sõngd tõnd tɩ d pẽneg a Zeova?
7 Tõe tɩ bark nins sẽn yaa kãsems so-pakrã sẽn kõtã a ye yaa a sẽn sõngd tõnd tɩ d pẽneg a Zeova wã. Rẽ tõe n sõng-d-la makr toɛy-toɛy pʋsẽ. Saam-bi-poak a ye sẽn da tõog n mao ne zu-loees wʋsg yeela woto: “Zood ning mam sẽn tall ne a Zeova m so-pakrã pʋgẽ wã sõng-m-la m toogã fãa pʋgẽ. Mam sũur yaa noog m sẽn balem a Zeova wakat fãa m bɩʋʋngã zugẽ wã. So-pakrã kɩtame tɩ m tõog n maan yɛl kẽer m sẽn da pa tagsd tɩ m tõe n maaname ye.” (Tʋʋ. 20:35) Bɩ tõnd me paam bark wʋsg d sẽn maand d sẽn tõe fãa n moond koe-noogã sẽn tar yõod wʋsgã.—Yel. 10:22.