“Fo toga ne yɩ so-pakda!”
1. Bõe la koe-moond a ye yeel so-pakrã wɛɛngẽ?
1 A Kathe Palm yeela woto: “Tʋʋmd kae sẽn tõe n kõ maam sũ-noog la bark wʋsg woto n ta kada ye.” A yɩɩ so-pakd Chili (Amerikdisiid) yʋʋm wʋsgo, n saag tẽngã ween-vɩɩs a naasã n moon koɛɛgã. Tõe tɩ ned zoe n tagsa so-pakdbã vɩɩmã sẽn yaa to-to wã zugu, n yeel yãmb woto: “Fo toga ne yɩ so-pakda!”
2. Bõe yĩng tɩ yaa Wẽnnaam tʋʋmdã bal n kõt sũ-noog hakɩka?
2 Tʋʋmd sẽn kõt sũ-noogo: A Zezi ra paamda sũ-noog hakɩka, a Ba wã raabã maaneg pʋgẽ. (Zã 4:34) Rẽ n so t’a sɩd ra tõe n yeel a karen-biisã tɩ yaa ned sẽn na n maand a Zeova raabã la a na n paam sũ-noog hakɩka. Tõnd paamda sũ-noogo, d sã n tʋmd tʋʋm sẽn kɩtd tɩ d tat a Zeova yam. Sẽn paase, d sã n dɩkd d sẽkã, d pãngã la d tarmã n sõngd neb a taabã, d sũ-noogã paasdame.—Tʋʋ. 20:31, 35.
3. Tõnd sã n dɩkd sẽk wʋsg n moond koɛɛgã, bark bʋs la d na n paame?
3 D sã n moond koɛɛgã wʋsgo, d na n paama neb wʋsg sẽn dat n zãms Biiblã. Baa zĩis nins tõnd sẽn tagsd tɩ nebã pa rat n kelgã, d koe-moonegã minimã sã n paasdẽ, tõe tɩ d na n yãame tɩ moonegã womda biis be. Ned sẽn yaa wakat fãa so-pakd tɩ maan yʋʋmd bɩ sẽn yɩɩd woto tõe n paam n kẽnga so-pakdbã lekolle, n tõog n dɩk bãngr ning a sẽn paam be wã n sõng nebã. (2 Tɩm. 2:15) Tõnd sã n ket n modgdẽ, tõe tɩ d tõog n bʋd sɩdã biis nebã sũyẽ, tɩ wa bul n yi n wom biis kaoosg zugẽ.—Koɛ. 11:6.
4. Kom-bɩɩs nins kareng sẽn kolg baasgã segd n tagsa bõe yelle?
4 Kom-bɩɩsã: Yãmb sẽn kolgd y karengã baasgã, rẽ yĩnga yãmb tagsda y beoog-daarã yell bɩ? Masã yaa yãmb karengã n dɩkd y sẽkã. Yãmb karengã saab poore y na n dɩka sẽg-kãng n maan bõe? Yɩta sõma tɩ y tags wakat fãa so-pakrã yelle, la y ra yɩ tao-tao n bao tʋʋmd sẽn na n dɩk y sẽkã fãa ye. So-pakrã na n kɩtame tɩ y tõog n moon neb buud toor-toore, n tõogd n welgd zu-loeese, n tõog n sigind y tʋʋmã, la y paam minim nebã zãmsg pʋgẽ. Woto fãa na n nafa yãmb y vɩɩmã tõre.
5. Wãn to la roagdbã ne tigingã tõe n kɩt tɩ so-pakrã yamleoog kẽ nebã?
5 Roagdba, yãmb modgdame n sõngd y kambã sẽn na yɩl tɩ so-pakrã yamleoog kẽ-b bɩ? Yãmb goamã ne y mak-sõngã tõe n sõng-b lame tɩ b lʋɩɩs Rĩungã yɛl taoor b vɩɩmã pʋgẽ. (Mat. 6:33) A Ray sẽn sɩng so-pakrã a sẽn wa n baas a kolɛɛsã yeela woto: “Mam ma wã ra yeta wakat fãa tɩ so-pakrã kõta sũ-noog n yɩɩd bũmb fãa.” Tigingã neb fãa tõe n wilga ne b no-goam la ne b manesem tɩ so-pakrã yaa tʋʋmd sẽn be nafr wʋsgo. A José sẽn yit Ɛspayn wã yeela woto: “Mam tigingã neb getame tɩ so-pakrã yaa tʋʋmd sẽn yaa sõma wʋsg n yɩɩd tʋʋm a taabã fãa kom-bɩɩsã yĩnga. B sẽn nong n pẽgd so-pakrã, la b sẽn sõng maamã kɩtame tɩ yɩ nana ne maam tɩ m sɩng so-pakrã.”
6. So-pakrã yamleoog sã n pa tar tõndo, bõe la d tõe n maane?
6 Y sẽn na n maan to-to n tõog n yɩ so-pakda: La so-pakrã yamleoog sã n pa tar yãmba y maanda wãna? Sã n yaa woto, bɩ y pʋʋs a Zeova n yeel-a woto: ‘Mam pa mi m sã n na n tõoga so-pakrã ye. La m dat n maana sẽn tat fo yam.’ (Yɩɩl 62:9; Yel. 23:26) Rẽ poor bɩ y modg n bao sagls Wẽnnaam Gomdã pʋgẽ la y tũ sor-wilgr ning a siglgã sẽn kõtã. Wakat fãa so-pakdb wʋsg reng n yɩɩ sõngr so-pakdba, tɩ sũ-noog ning b sẽn paam rẽ pʋgẽ wã kɩt tɩ b lebg wakat fãa so-pakdba.—Yɩɩl 34:9.
7. Tõnd sã n tagsdẽ tɩ d pa na n tõog n moon lɛɛr 70 kiuugu, d tõe n maana bõe?
7 Yãmb sã n tagsdẽ tɩ y pa tõe n moon lɛɛr 70 kiuugu y maanda wãna? Sõs-y ne so-pakdb nins yɛl sẽn wõnd yãmb rẽndã n paam saglse. (Yel. 15:22) Rẽ poor bɩ y maan magb buud toor-toore, n ges y sẽn na n moon to-to semen fãa, n gʋls rẽ sebr zugu. Tõe tɩ y sã n bas yɛl kẽer sẽn pa tɩlae wã, y na n mikame tɩ na n yɩɩ nana ne-y tɩ y moon lɛɛr 70 wã kiuugu.—Ef. 5:15, 16.
8. Bõe yĩng tɩ d segd n tagsd n get d yɛlã sẽn yaa to-to wã wakat-wakate?
8 Leb-y n tags n ges y yɛlã sẽn lebg to-to: Nebã yɛl nong n toeemdame. Yɩta sõma tɩ y tagsd n get y yɛlã sẽn yaa to-to wã wakat-wakate. Wala makre, yãmb kolga retrɛt rɩkr bɩ? A Randy sẽn dɩk retrɛt t’a yʋʋmã pa ta wã yeela woto: “Mam sẽn maan woto wã, kɩtame tɩ mam tõog n sɩng so-pakrã ne m pagã, la d tõog n tɩ moona zĩis nins b sẽn datẽ koe-moondb n yɩɩdã. Woto kɩtame tɩ mam paam bark wʋsgo, sẽn yɩɩd fãa sũur-kaset sẽn pa ningd-m taale.”
9. Bõe zug la yi-kãadbã segd n tags sõma?
9 Yi-kãadb kẽer zĩnd n tagsame n ges n mik tɩ pa tɩlae tɩ pagã ne sɩdã fãa tʋm wakat fãa ye. Yaa sɩd tɩ woto baoodame tɩ zakã rãmb sak n mong b mens yɛl kẽere, la nafa wã yɩɩda b sẽn basã. A John pagã sẽn bas a tʋʋmã n lebg so-pakdã, a John yeela woto: “Bũmb kae n kõt maam sũ-noog n yɩɩd m sẽn mi tɩ daar fãa m pagã tʋmda a Zeova tʋʋmdã ye.”
10. Bõe n kɩt tɩ kiris-nebã tagsd so-pakrã yelle?
10 D wilg tɩ d tara tẽebo, la tɩ d nonga a Zeova: A Zeova getame tɩ koɛɛgã mooneg n yaa tʋʋmd ning sẽn tar-a yõod n yɩɩd tʋʋmã fãa. Ka la bilfu, b na n sãama dũni kãngã, la yaa neb nins sẽn na n kos ne a Zeova yʋʋrã bal n na n põse. (Rom 10:13) Tõnd sẽn nong a Zeova wʋsgã, la d sẽn tar mi-beoog ne-a, a sẽn maan bũmb nins n kõ tõndã yĩng kɩtame tɩ d sakd a Biigã sẽn yet tɩ d moon ne yẽesmã. (Mat. 28:19, 20; 1 Zã 5:3) Sẽn paase, tõnd sã n sɩd kɩsa sɩd tɩ d vɩɩ yaoolem wakatã, d pa na n baood n na n dɩ dũniyã wʋsg ye. D na n maana d sẽn tõe tɛk koe-moonegã pʋgẽ tɩ nan ket n tõeyã.—1 Kor. 7:29-31.
11. Ned sã n yeel tõnd tɩ d toga ne yɩ so-pakda, wãn-wãn la d segd n ges a gomdã?
11 D pa segd n yɩ so-pakda, siglgã sẽn baood neb sẽn na n moon lɛɛr dãmb wʋsgã yĩng ye. D segd n yɩɩ so-pakda, d sẽn nong Wẽnnaamã yĩnga. Dẽnd ned sã n yeel yãmb tɩ y toga ne yɩ so-pakda, ges-y a gomdã wa pẽgre. Pʋʋs-y a Zeova la y tags n ges yãmb me sã n sɩd tõe n dɩka so-pakrã, sẽn yaa tʋʋmd sẽn kõt sũ-noog wʋsgã.
[Goam sẽn tar pãnga, seb-neng a 4]
Roagdba, yãmb modgdame n sõngd y kambã sẽn na yɩl tɩ so-pakrã yamleoog kẽ-b bɩ?
[Goam sẽn tar pãnga, seb-neng a 5]
A Zeova getame tɩ koɛɛgã mooneg n yaa tʋʋmd ning sẽn tar-a yõod n yɩɩd tʋʋmã fãa.