Yãmb ra yɩɩ wakat fãa so-pakd bɩ?
1. Bõe la neb wʋsg ra paam n maane, la yɩɩ tɩlae ne neb kẽer tɩ b maan bõe?
1 Neb wʋsg ra paam n yɩɩ so-pakdba, n ‘zãmsd nebã la b moond koe-noogã.’ (Tʋʋ. 5:42) La yɛl toɛy-toɛy wa n kɩtame tɩ yɩ tɩlae ne neb kẽer tɩ b bas so-pakrã. Yãmb sã n da yɩɩ wakat fãa so-pakda, yãmb tagsame n ges y sã n tõe n leb n yɩɩ so-pakd bɩ?
2. Bõe yĩng tɩ neb nins sẽn da yɩ so-pakdbã segd n tags n ges b yɛlã sẽn yaa to-to masã?
2 Yɛlã toeemdame: Tõe tɩ yell ning sẽn kɩt tɩ y bas so-pakrã pa le ket ye. Wala makre, sã n da yaa y sẽn da pa tõe n paam lɛɛr 90 wã yĩnga, masã la sẽn lebg 70 la! Yãmb sẽn bas so-pakrã tɛka, y tʋʋmã bɩ y zakã zɩɩb boogame bɩ? Saam-bi-poak a ye sẽn da bas so-pakrã a sẽn da ka laafɩ yĩng lebg n sɩnga so-pakrã a sẽn wa n tar yʋʋm 89. A maana yʋʋmd n pa kẽng logtor yiri, tɩ kɩt t’a tags t’a laafɩ wã seka a na yɩ so-pakd yɛsa.
3. Wãn to la zak neb tõe n sõng taab tɩ ned a ye lebg so-pakda?
3 Tõe tɩ yãmb zɩ n yɩ so-pakd ye. La tõe tɩ y zakã ned n bas so-pakrã sẽn na yɩl n ges zakã ned yelle, wala makre ned sẽn kʋʋle. (1 Tɩm. 5:4, 8) Sã n yaa woto, rẽ yĩnga yãmb bɩ zakã neb a taab pa tõe n sõng n ges nedã tɩ so-pakdã tõog n le yɩ so-pakd sɩda? Yɩta sõma tɩ y sõs ne taab rẽ zugu. (Yel. 15:22) Zakã neb sã n sõng taab tɩ ned a yembr tõog n lebg so-pakda, y fãa sũur na n yɩɩ noogo.
4. Yãmb sã n pa tõe n leb n yɩ so-pakd masã, bõe la y tõe n maane?
4 Yãmb yɛlã sã n kɩt tɩ y pa tõe n leb n yɩ so-pakda, bɩ y ra sãam y sũur ye. Bãng-y tɩ y sẽn dat n yɩ so-pakdã taa a Zeova yam. (2 Kor. 8:12) Rɩk-y minim ning y sẽn da paam so-pakrã pʋgẽ wã n tʋmd koɛɛgã mooneg pʋgẽ. Pʋʋs-y a Zeova rẽ yĩnga, la y ges tɩ yɛlã sã n wa kõt-y sor bɩ y leb n yɩ so-pakda. (1 Zã 5:14) Tõe t’a Zeova wa pak ‘kʋɩlen-kãseng yãmb taoore,’ tɩ y tõog n leb n yɩ so-pakda.—1 Kor. 16:9.