Y tõe n yɩɩ wakat fãa so-pakd bɩ?
1. Wala a Polle, zu-no-kãseng bʋg la d tara?
1 Baa ne kɩɩsdbã sẽn da yaa wʋsgã, tʋm-tʋmd a Poll sẽn paam tɩ ‘kʋɩlen-kãsengã pak a taoor tʋʋmd yĩngã,’ a baoa ne a sũur fãa n kell n sõng tɩ koɛɛgã mooneg kẽng taoore. (1 Kor. 16:9) Rũndã-rũndã, dũniyã gill zugu, koe-moondb sõor sẽn yɩɩd 642000 n lebg wakat fãa so-pakdb n kẽ ‘kʋɩlen-kãseng sẽn pak tʋʋmd yĩngã’ pʋgẽ.
2. Bõe yĩng tɩ yaa sõma tɩ d segd n ges d yɛlã wakat-wakate?
2 Yɛlã toeemdame: Baa ne yɛlã sẽn tõe n gɩdg tõnd masã tɩ d pa tõe n moon koɛɛgã wa d sẽn dat to-to wã, yɛlã tõe n wa toeemame. Woto yĩnga, yɩta sõma tɩ wakat-wakate, bɩ d ges d yɛlã sẽn yaa to-to la d ra gũ tɩ yɛlã wa zems kɛpɩ ye. (Koɛ. 11:4) Yãmb yãa bi-bɩɩg sẽn be liise n na n karem n sa ka la bilf bɩ? Yãmb yaa roagd tɩ y kamb na n sɩng lekoll kareng bɩ? Yãmb kolga y retrɛt rɩkr bɩ? Toeeng woto buud tõe n kɩtame tɩ y paam sẽk n paas n tõog n yɩ wakat fãa so-pakda. Saam-bi-poak a ye sẽn da yaa bãad n yãk yam n lebg wakat fãa so-pakd a yʋʋm 89 sasa. Bõe yĩng t’a lebg wakat fãa so-pakda? A sẽn mi tɩ yʋʋmd ne zak la woto a sẽn nan pa kẽng logtor yirã yĩngã, a tagsame t’a laafɩ wã na n kɩtame t’a tõog n yɩ wakat fãa so-pakda.
3. Neb kẽer maana wãn n tõog n lebg wakat fãa so-pakdba?
3 Sɩngrẽ wã, a Poll ra baood n na n tɩ gesa Korẽnt saam-biisã. La baa ne rẽ fãa, a manega a sẽkã koe-noogã yĩnga. Neb wʋsg sẽn yaa wakat fãa so-pakdb rũndã-rũndã manega b sẽkã sẽn na yɩl n tõog n kell yɩ wakat fãa so-pakdba. Neb sãnda basa yɛl kẽer b vɩɩmã pʋgẽ, n bao tʋʋmd b sẽn tõe n tʋmd lɛɛr bilf pʋgẽ sẽn zems b na tõog n ges b mens yell bala. B tara sũ-noog b sẽn paam n moond koɛɛgã. (1 Tɩm. 6:6-8) Neb kẽer sẽn kẽ kãadem manega b vɩɩmã n zems tɩ yaa sɩdã bal n tʋmde, tɩ kɩt tɩ pagã tõe n yɩ wakat fãa so-pakda.
4. D sã n tagsdẽ tɩ d pa tõe n moon tɩ ta lɛɛr dãmb nins b sẽn baood tɩ d moonã, bõe la d tõe n maane?
4 Ra yãg-y n yeel tɩ y pa tõe n yɩ wakat fãa so-pakd y sẽn yɛɛsd tɩ y pa na n tõog n paam lɛɛr dãmb nins b sẽn baoodã ye. Yaa sẽn zems lɛɛr a yiib la zak bal la y segd n moon daar fãa. Y sã n tẽed tɩ y pa tõe n yɩ wakat fãa so-pakda, modg-y n yɩ-y sõngr so-pakd n moon tɩ ta lɛɛr 70 kiuug a ye bɩ a yiib pʋgẽ. Rẽ na n sõnga yãmb tɩ y bãng sũ-noog ning wakat fãa so-pakd sẽn tõe n paame. (Yɩɩl 34:9) Sõs-y ne wakat fãa so-pakdbã. Tõe tɩ b tõoga yɛl sẽn wõnd yãmb yɛlã buudu. (Yel. 15:22) Kos-y-yã a Zeova t’a ning modgr ning y sẽn maand n dat n yɩ wakat fãa so-pakdã barka.—1 Zã 5:14.
5. Bõe yĩng tɩ wakat fãa so-pakrã yaa tʋʋmd sẽn tar barka?
5 Tʋʋmd sẽn tar barka: D sã n yaa wakat fãa so-pakda, d paamda bark wʋsgo. Na n sõng-d lame tɩ d yã vẽeneg tɩ ned sã n kõtẽ a su-noogã paasdame. (Tʋʋ. 20:35) D sã n yaa wakat fãa so-pakda, na n kɩtame tɩ d tõe n tʋm ne Wẽnnaam Gomdã sõma. (2 Tɩm. 2:15) So-pakrã na n le sõng-y lame tɩ y yã naoor wʋsg a Zeova sẽn sõngd-y to-to. (Tʋʋ. 11:21; Fil. 4:11-13) Na n sõng-y lame tɩ y paam zʋg sõma wala tõog-toogo, la y pẽneg a Zeova n paase. (Zak 4:8) Rẽ yĩngã y na n sak n kẽe kʋɩlen-kãseng sẽn pak yamb taoor tʋʋmd yĩnga, n lebg wakat fãa so-pakd bɩ?