D kɩt tɩ b bãng a Zeova yʋʋrã dũniyã gill zugu
1 A Zezi sẽn da wa n tʋm a karen-biisã tɩ b tɩ moon “dũniyã tɛk fãa” wã, a ra zoe n kõ-b-la makr tɩ b tũ. (Tʋʋ. 1:8) Wakat la zĩig ning fãa a sẽn da yã neba, a ra togsd-b-la Wẽnnaam daabã ne ãdem-biisã. Kɩs-sɩd yambã sull rɩka a Zezi togs-n-taar n tũnugd ne manesem toɛ-toɛ wʋsg sẽn na yɩl n kɩt tɩ “dũniyã fãa bãng” a Zeova yʋʋrã.—Ezai. 12:4, 5.
2 B sẽn da maan pĩnda: Yʋʋm sẽn loogã, b yiisa zãmsg zʋrno rãmbẽ, b maana “Photo-drame de la création” tɩ neb milyõ rãmb ges-a. B tũnuga ne mobila sẽn tar mikoro, la ne fonograf rãmbã wʋsgo, la wakat n zĩnd tɩ b tũnug ne radio. La woto fãa ra yaa sẽn na n yɩl n moon koe-noogã. Yaa vẽeneg tɩ pipi, wakat fãa b sẽn maan bũmb ning n yɩɩd ra yaa tɩ yã neba mens sẽn na yɩl n tõog n gʋʋl ratmã b sẽn yãtã. Rẽ yĩnga, zak-zak ministɛɛrã n sɩd yɩ manesem sẽn yaa sõma n yɩɩd sẽn na yɩl n kɩt tɩ b bãng a Zeova yʋʋrã zĩig fãa.—Tʋʋ. 5:42.
3 B sẽn maand bũmb ning tõnd rũndã-rũndã: Wakatã sẽn toeemda, dũniyã tara zũndgr n paasdẽ, la zĩis wʋsgo b pa nong n yãt neb wʋsg b yiy ye. Neb bilf bal n nong n dɩkd sẽk n karemdẽ la b bʋgsd tẽebã yɛl zutu. Woto yĩnga, d segd n zemsa d ministɛɛrã ne yɛlã sẽn yaa to-to wã. Sẽn paas d teritoaarã gilg-n-sog wakat fãa ne zak-zak moonegã, b sagenda tõnd fãa tɩ d kẽng nebã sẽn be zĩig ningã, n “segl wakat fãa n sa” sẽn na yɩl n gom n teel saagr ning d sẽn tarã. (1 Pɩɛ. 3: 15, NW) Woto rat n yeelame tɩ d modg n moon d tʋmd-n-taase, d karen-bi-taase, neb nins sẽn be soayã zutã la park bɩ parkĩng rãmb zĩisẽ, butigsẽ la zĩis a taab fãa d sẽn tõe n yãẽ neba. A Zeova sẽn teend-dã, d modgrã womda biis sõma. Y kẽesda y meng sẽn na yɩl n yã nebã b sẽn beẽ zĩig ning fãa bɩ?
4 Bɩ tõnd ned kam fãa tũnug ne manesem buud fãa a sẽn tõe n kɩt tɩ b bãng a Zeova yʋʋrã tõnd teritoaarẽ wã. Tõnd tõe n paama sũ-noog wʋsg d sẽn pidsd d ministɛɛrã zãnga yĩnga, wakat ning d sẽn teegd a Zeova t’a tigs sũ-tɩrs rãmbã.—Zã 6:44.