D sẽn moond koe-noogã ne manesem ninsã

A ZEEZI moona koe-noogã ne yẽesem, n kõ a karen-biisã mak-sõngo. A ra babsda nebã n taasd-b koɛɛgã, la a zãmsd-b b zagsẽ la zãma zĩisẽ. (Mat. 9:35; 13:36; Luk 8:1) A Zeezi sõsa ne neb yembr-yembre, a zãmsa a karen-biisã b yen-yen, la a sõs ne neb sula na maan tusa. (Mark 4:10-13; 6:35-44; Zã 3:2-21) A tũnuga ne segb buud fãa a sẽn paame, n gom ne nebã goam sẽn kengd raoodo, la sẽn na n kɩt tɩ b tẽ manegre. (Luk 4:16-19) Baa a sẽn wa n yɛ n dat n vʋʋsã, a pa bas segb a sẽn paam n na n moon koɛɛgã tɩ loog ye. (Mark 6:30-34; Zã 4:4-34) D sã n karemd kibay sẽn gomd a Zeezi koe-moonegã yelle, d pa tʋll n dɩk a togs-n-taar sɩda? Yaa vẽeneg tɩ d tʋll n dɩka a naoor wa tẽn-tʋmdbã.—Mat. 4:19, 20; Luk 5:27, 28; Zã 1:43-45.

² Ges-y segb nins kiris-nebã sẽn tar rũndã-rũndã, n na n tʋm tʋʋmd ning a Zeezi sẽn sɩng na maan yʋʋm tus a yiibã.

KOƐƐGÃ MOONEG ZAK-ZAKÃ

³ D sẽn yaa a Zeova Kaset rãmbã, d miime tɩ tara yõod tɩ d moon koɛɛgã zak-zaka. Tõnd sɩng n moonda koɛɛgã woto, hal tɩ nebã miẽ tɩ yaa tõnd bal n moond zak-zaka. D sẽn taasd koɛɛgã neb milyõ-rãmb wakat bilf pʋgẽ ne manesem-kãngã tɩ womd biis ninsã wilgdame t’a yaa sõma. (Mat. 11:19; 24:14) Koɛɛgã mooneg zak-zakã yaa segb d sẽn paame, n wilgdẽ tɩ d nonga a Zeova la d taabã.—Mat. 22:34-40.

⁴ Koɛɛgã mooneg zak-zakã pa yam-paall a Zeova Kaset rãmbã sẽn wa ne rũndã-rũndã ye. Tẽn-tʋmd a Poll goma yẽ sẽn da zãmsd neb Biiblã b zagsẽ yelle. A goma a koe-moonegã yell ne Efɛɛz tigingã kãsem-dãmb n yeel-b yaa: “Sẽn sɩng ne pipi daarã mam karg sẽn tag Aazi soolmẽ wã, . . . mam pa bas bũmb nins sẽn nafdã baa a ye n pa togs yãmba, wall m bas n pa zãms yãmb . . . zak-zak ye.” Ne woto la ne manesem a taaba, a Poll “kõo Zʋɩf-rãmbã ne Gɛrk-rãmbã fãa kasetã sõma, n wilg-b tɩ b segd n teka yam n bao Wẽnnaam la b tẽ tõnd Zu-soab a Zeezi.” (Tʋʋ. 20:18, 20, 21) Wakat kãng tɩ Rom nanambsã ra pirsda nebã tɩ b pʋʋs bõn-naandse, hal tɩ neb wʋsg ra “zoet wẽnnaam-dãmbã.” Ra yaa tɩlɛ tɩ nebã bao “Wẽnnaam ning sẽn naan dũniyã ne bũmb nins fãa sẽn be a pʋgẽ wã,” soab ning sẽn da ‘yet nebã fãa sẽn be zĩig zãngã tɩ b segd n teka yam n kos sugr’ masã wã.—Tʋʋ. 17:22-31.

⁵ Rũndã-rũndã, taas nebã koe-noogã maneg n lebga tʋʋm-yãgdem. Dũni-kãngã saabã ta n saame. Tõnd sẽn mi rẽ wã kɩtame tɩ d maneg n wɩngd ne tʋʋmdã. Sẽn na yɩl n paam neb nins sẽn baood sɩdã ne b sũur fãa wã, d mikame tɩ koe-moonegã manesem a to kae n yaa sõma n yɩɩd zak-zak moonegã ye.—Mark 13:10.

⁶ Fo moonda koɛɛgã zak-zak wa f sẽn tõe bɩ? Fo sã n maanda woto, bɩ f bãng t’a Zeova sũur nooma ne foom. (Eze. 9:11; Tʋʋ. 20:35) Zak-zak moonegã tõeeme n pa nana ne-f ye. Tõeeme tɩ f laafɩ wã pa waooge, wall f moonda zĩig neb wʋsg sẽn pa rat n kelge. Tõeeme meng tɩ goosneema wã kɩtame tɩ d pa tõe n moon wa d sẽn dat ye. Tõe tɩ f yaa yãn-zoɛta, tɩ yaa toog ne-f tɩ f sõs ne ned f sẽn pa mi. Rẽ kɩtame tɩ f sã n moond zak-zak fãa bɩ f yɛɛsdẽ. Ra koms raood ye. (Yik. 4:10-12) F saam-biisã sẽn be zĩis a taabã me maooda ne fo zu-loeesã buudu.

⁷ A Zeezi pʋlma a karen-biisã yaa: “Mam bee ne yãmb daar fãa, hal tɩ ta dũniyã saabo.” (Mat. 28:20) Pʋlen-kãngã kengda tõnd raood tɩ d sõngd nebã tɩ b lebgd Kiristã karen-biisi. Tõnd tagsg yaa wa tẽn-tʋmd a Polle. A ra yeelame yaa: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.” (Fili. 4:13) Modg n tũ noy nins fãa tigingã sẽn gãneg koɛɛgã mooneg zak-zakã wɛɛngẽ wã. F sã n naagd f taabã n moond koɛɛgã zak-zaka, f na n paama raood kengre, la teelgo. Pʋʋs Wẽnnaam n kos t’a sõng-f tɩ f tõog zu-loɛɛg ning fãa f sẽn tare, la f mao wʋsg n moon koe-noogã wa f sẽn tõe.—1 Zã 5:14.

⁸ Fo sã n taasd nebã koe-noogã, f na n paamda weer n wilgd-b fo “sẽn tẽed bũmb ningã.” (1 Pɩy. 3:15) F na n maneg n yãa welgr ning sẽn be neb nins sẽn saagd tɩ Rĩungã na n waa ne manegre, la sẽn pa mi-b rẽ wã sʋkã. (Eza. 65:13, 14) F sũur na n yɩɩ noogo, f sẽn na n neẽ tɩ f tũuda a Zeezi sẽn yeel tɩ d kɩt tɩ d ‘vẽenemã yãgã,’ la tõe meng tɩ f paam n sõng neb tɩ b bãng a Zeova la sɩdã sẽn kɩtd tɩ d paam vɩɩm sẽn kõn sa wã.—Mat. 5:16; Zã 17:3; 1 Tɩm. 4:16.

⁹ Tigingã gesame tɩ b tõe n moon koɛɛgã zak-zak wɩkɛn-dãmbã la raasenkãma. Zĩis nins nebã sẽn pa wae n be b zagsẽ wĩndgã, tigims kẽer sigla zaabr-zaabr koe-moonego.

D BAOODA NEB SẼN ZEMS NE KOƐƐGÃ

¹⁰ A Zeezi sagla a karen-biisã tɩ b “bao” neb sẽn zems ne koɛɛgã. (Mat. 10:11) La a sẽn da baood nin-kãensã to-to wã pa ne zak-zak moonegã maasem bal ye. Sɩd me, a ra moonda koɛɛgã zak-zaka, la segb a sẽn paam fãa sasa. (Luk 8:1; Zã 4:7-15) A tẽn-tʋmdbã me moona koɛɛgã zĩis toɛy-toɛya.—Tʋʋ. 17:17; 28:16, 23, 30, 31.

¹¹ Woto me, rũndã-rũndã, tõnd sẽn datã yaa d tõog tɩ Rĩungã koɛɛgã ta ned kam fãa. Woto baoodame tɩ d rɩk a Zeezi ne a tẽn-tʋmdbã naoor b sẽn da sõngd nebã to-to tɩ b lebgd karen-biisã pʋgẽ, la d maan rẽ tɩ zemsd ne d wakatã la nebã yɛl sẽn yaa to-to d moonegã zĩigẽ wã. (1 Kor. 7:31) Wala makre, koe-moondb kẽer moonda tʋʋm zĩisẽ tɩ yãkd nenga. Tẽns wʋsg pʋsẽ, koɛɛgã mooneg soayã noy, park-rãmbẽ, parkĩng-rãmbẽ la zĩis a taab nebã sẽn wae n beẽ womda biisi. Tigims kẽer koe-moondb rʋʋgda sɛbã taabl-dãmb zut n moondẽ, wall b moond ne perzãntoaar-dãmba. Sẽn paase, filiyallã mi n sigla koɛɛgã mooneg galʋ-tẽn-bɛdã pʋsẽ zĩis nins naoã rãmb sẽn tũud wʋsgã, tɩ tigims toɛy-toɛy koe-moond naagd taab n moond be. Woto kɩtame tɩ koe-moondbã paamd neb nins d sẽn pa mikd b zagsẽ wã zĩis a taaba, n taasd-b koe-noogã.

¹² D sã n seg ned zãma wã zĩisẽ t’a tʋll n bãng Biiblã koɛɛgã sõma n paase, d tõe n kõ-a-la sebr sẽn zemse. Yɩl n sõng-a t’a tʋlg n ket n kelgdẽ, d tõe n kõ-a-la d adɛrse, la d bao n wa lebg n tɩ kaag-a. D leb n tõe n wilg-a-la jw.org wall d wilg-a tiging sẽn pẽ ne-a t’a tõe n kẽng tigissã. Koɛɛgã mooneg zãma zĩisẽ wã tõe n sõng-f lame tɩ f maneg n moon koɛɛgã n paase.

¹³ La rũndã-rũndã, kiris-nebã tʋʋmd pa tek koe-noogã mooneg bal ye. F sã n dat n tõog n sõng nebã tɩ b sak sɩdã sẽn kɩtd tɩ d paam vɩɩm sẽn kõn sa wã, rẽndame tɩ f lebgd n tʋgd n kaagd neb nins sẽn wilg tɩ b tʋll n bãnga koɛɛgã n paasã, sẽn na yɩl tɩ b tõog n lebg kiris-neb tẽeb sẽn bɩ.

D LEBGD N TƲGD N KAAGDA NEBÃ

¹⁴ A Zeezi yeela a karen-biisã yaa: “Yãmb na n yɩɩ mam kaset rãmb . . . hal n tãag dũniyã zĩig ning sẽn zãr n yɩɩdã.” (Tʋʋ. 1:8) La a yeel-b lame me yaa: “Bɩ y kẽng n tɩ sõng buud toɛy-toɛyã fãa neb tɩ b yɩ mam karen-biisi, . . . la y zãms bãmb tɩ b tũ bũmb nins fãa mam sẽn yeel yãmbã.” (Mat. 28:19, 20) F sã n lebgd n tʋgd n kaagd nebã, tõe n kɩtame tɩ f paam sũ-noog a Zeova tʋʋmdã pʋgẽ. F sã n lebg n kẽng n tɩ kaag neb f sẽn da taas koɛɛgã pipi tɩ b kelg sõma, tõe n yɩ-b-la noogo. F sã n wilg-b bũmb a taab Biiblã pʋgẽ n paase, tõe n kɩtame tɩ b maneg n tẽ Wẽnnaam, la sõng-b tɩ b bãng tɩ b segd n sɩd baoo Wẽnnaam. (Mat. 5:3) F sã n segl f meng sõma, la f tɩ kaag a soabã wakat sẽn zemse, f tõogd n paam n sɩnga Biiblã zãmsg ne-a. F segd n wae n maanda woto, sẽn na yɩl n paam n sɩng Biiblã zãmsg ne neda. Tõnd pa send sɩdã bõn-buud bal ye. D zãgsdame me.—1 Kor. 3:6.

¹⁵ Neb nins d sẽn taas koɛɛgã tɩ b kelg sõma wã kaagr tõe n yɩɩ toog ne kẽere. Tõe tɩ masã, f mii f sẽn tõe n taas ned koe-noogã koɛɛg-koɛɛg to-to tɩ yɩ sõma, hal tɩ noom-fo. La f sã n tagsd f sẽn na n lebg n tɩ kaag ned sẽn da kelg koɛɛgã to-to tɩ y sõs Biiblã zug n paase, rabeem tõe n tar-f lame. F sã n segl f meng sõma, f tõogda f rabeemã. Tũ sagls nins b sẽn kõ koe-moonegã yĩng Kiris-nebã vɩɩm la b tʋʋma tigsg sasa wã. Sẽn paase, f tõe n boola koe-moond sẽn tar minim wʋsg t’a yãag-fo.

D ZÃMSDA NEBÃ BIIBLÃ

¹⁶ Daar a yembre, koe-moond a Filip sẽn wa n gomd ne rao sẽn da karemd Wẽnnaam Gomdã, a sok-a lame yaa: “Fo wʋmda bũmb ning fo sẽn karemdã võor sɩda?” T’a leok yaa: “Mam na n yɩɩ wãn n wʋme, tɩ ned pa wilg maam a võore?” Kibarã sẽn be Tʋʋm sebrã sak a 8 wã yetame t’a Filip sɩnga ne Gʋls-sõamyã goam nins raoã sẽn karemdã, “n moon-a a Zeezi koe-noogã.” (Tʋʋ. 8:26-36) D pa mi a Filip ne raoã sẽn sõs ne taab n kaoos to-to ye. La a bilg-a-la koe-noogã hal t’a sak n lebg tẽeda, n kos n na n deeg lisgu. A lebga a Zeezi Kirist karen-biiga.

¹⁷ Rũndã-rũndã neb wʋsg pa mi Biiblã ye. Kɩtame tɩ d segd n lebg n tɩ kaag-b n yɩlme, la d maag d yĩng n zãms-b Biiblã n maan semen-dãmba, kiis wall yʋʋmd menga, tɩ b yaool n tõog n paam tẽeb sẽn sek b na reeg lisgu. La f sã n maan sũ-mar n sõng pʋ-peelem dãmbã ne nonglem tɩ b lebg a Zeezi karen-biisi, f na n paama keoor wa a Zeezi sẽn yeelã. A yeelame yaa: “Kũun wata ne sũ-noog n yɩɩd reegre.”—Tʋʋ. 20:35.

¹⁸ Sãmbg sẽn ka be, f na n datame n zãms ned Biiblã ne sɛb nins b sẽn yiis rẽ yĩngã a yembre. F sã n tũ sagls nins d sẽn paamd Kiris-nebã vɩɩm la b tʋʋma tigsg sasa wã la f naag tigingã koe-moond sẽn tar minim nebã zãmsg wɛɛngẽ n tʋme, f na n tõog n zãmsa neb Biiblã tɩ wom biis la f sõng-b tɩ b lebg a Zeezi Kirist karen-biisi.

¹⁹ Fo sã n dat sõngr sẽn na yɩl n sɩng Biibl zãmsg ne neda, pa rẽ bɩ n tõog n zãms ned Biiblã sõma, bɩ f gom ne yel-gɛtbã nin-yende, wall f tẽed-n-taag sẽn tar minim Biiblã zãmsg wɛɛngẽ. Sagls nins sẽn be Kiris-nebã vɩɩm la b tʋʋma tigissã na-kẽndr sebrã pʋgẽ wã, n paas mak-n-wilg toor-toorã d sẽn paamd tigis-kãng sasa wã me tõe n sõnga foo. Teeg a Zeova la f pʋʋs-a n togs-a f zu-loɛɛgã. (1 Zã 3:22) Maan f sẽn tõe n paam ned n zãmsd Biiblã, baa f sã n zoe n zãmsda f zakã ned Biiblã. F sã n paam ned n zãmsd Biiblã, f na n maneg n paama sũ-noog koe-moonegã pʋgẽ.

D SÕNGDA SŨ-TƖRS RÃMBÃ TƖ B BÃNGD A ZEOVA SIGLGÃ

²⁰ D sã n sõng ned t’a bãng a Zeova n lebg a Zeezi Kirist karen-biiga, a lebga tigingã neda. Biiblã karen-biigã tẽeb na n maneg n paasame, a sã n bãng tʋʋmd ning a Zeova siglgã sẽn tarã la a tũud a saglsã. Segdame tɩ d sõng-a t’a bãng a sẽn tõe n maan dẽ to-to. B yiisa video-rãmb la borsiir ning gom-zug sẽn yaa Ãnd dãmb n maand a Zeova raabã rũndã-rũndã? wã rẽ yĩnga. La sagls kẽer sẽn be seb-kãngã sak a 4 pʋgẽ me tõe n sõng-f lame.

²¹ F sã n sɩng Biiblã zãmsg ne karen-biigã bal bɩ f sõng-a t’a bãng t’a Zeova tara siglga, la tɩ yaa ne rẽ maasem la a get koe-moonegã yell dũniyã gill zug rũndã-rũndã. Sõng-a t’a bãng sɛb nins tõnd sẽn tar n zãmsd nebã Biiblã yõodo, la f wilg-a tɩ yaa tõnd sʋkã neb sẽn dɩk b mens n kõ Wẽnnaam n sõngd ne yamleoog n tʋmdẽ tɩ b yiisd seb-kãensã dũniyã gill zugu. Mi n boond f karen-biigã t’a watẽ tɩ y kẽnd tigissã Rĩungã roogẽ. Wilg-a d sẽn maand d tigissã to-to, la f sõng-a t’a bãng tigingã saam-biisã. Sõng-a me t’a bãng d tẽed-n-taas a taab tigis-kãsemsã sasa. Tigissã la tigis-kãsemsã sasa, nin-paalã tõe n yãa a Zeova Kaset rãmbã sẽn wilgd to-to tɩ b nonga taabã, n bãng tɩ yaa bãmb la kiris-neb hakɩɩkã. (Zã 13:35) B sã n bãngd a Zeova siglgã n paasdẽ, bãmb ne a Zeova zoodã pãng na n paasdame.

D TALLDA SƐB SẼN TIK BIIBLÃ N MOOND KOƐƐGÃ

²² Pipi kiris-nebã ra sõngda nebã ne yẽesem tɩ b bãngd Wẽnnaam Gomdã. B ra geta Gʋls-sõamyã n lebsd n gʋlsd b mens rẽnda, la b sẽn na n tar n zãmsd b tigimsã pʋsẽ. B ra sagenda nebã fãa tɩ b sak Wẽnnaam Gomdã sẽn yaa sɩdã. B ra pa tar Gʋls-sõamyã sɛb nins b sẽn gʋls ne nusã wʋsgo, la b ra nand-b-la hal wʋsgo. (Kolo. 4:16; 2 Tɩm. 2:15; 3:14-17; 4:13; 1 Pɩy. 1:1) Rũndã-rũndã, a Zeova Kaset rãmbã tũnugda ne tɛknolozɩ wã te-paalã n yiisd Biibl-dãmb milyõ-rãmba, la sɛb sẽn sõngd nebã tɩ b zãmsd Biiblã, wala seb-vãado, borsiir-dãmba, la sɛb a taab ne buud-goam kobse.

²³ Fo sã n naagd f taabã n moond koe-noogã, bɩ f tʋmd ne sɛb nins a Zeova siglgã sẽn yiisã. Fo sã n mi a Zeova Kaset rãmbã sɛbã sẽn naf fo mengã to-to wã, f na n maoome tɩ nebã paam-ba.—Ebre. 13:15, 16.

²⁴ Neb wʋsg wae n baooda kibayã ẽntɛrnetã pʋgẽ masã. Rẽ n so tɩ d sẽn yiisd sɛb sẽn tik Biiblã toor sẽn ka be, d tũnugda ne jw.org sẽn yaa tõnd sɩt wɛɛbã me n taasd nebã koe-noogã hal tɩ womd biisi. Dũniyã gill zugu, neb n tõe n karem Biiblã la sɛb nins sẽn tik Biiblã ne ordinatɛɛr maasem, wall b kelg b sẽn karem dẽ n dɩk ne buud-goam kobse. Tõnd sẽn mi n dat n sõs ne neb kẽer tɩ b yam yoaada, wall b rãmb nins sẽn be zĩis b sẽn pa wae n paamd n sõsd ne a Zeova Kaset rãmbã tõe n zĩnda b zagsẽ, n bao n bãng tõnd sẽn tẽed bũmb ninsã ne jw.org sẽn yaa tõnd sɩtã maasem.

²⁵ Woto kɩtame tɩ d wilgd nebã jw.org segb d sẽn paam fãa sasa. Ned sã n sok sokr bũmb nins d sẽn tẽedã wɛɛngẽ, d tõe n talla telefõn bɩ tablɛt wall ordɩnatɛɛr n wilg-a leoorã beenẽ zĩig pʋgẽ. D sã n seg ned sẽn gomd buud-gom-zẽnga, wall mugsã goama, d tõe n wilg-a-la tõnd sɩtã t’a tɩ paam Biiblã wall sɛb sẽn tik Biiblã a buud-gomdã pʋgẽ. Koe-moondb wʋsg talla video-rãmb b sẽn paam tõnd sɩtã pʋgẽ n sɩng sõsg Biiblã zug ne neba.

D MOONDA KOƐƐGÃ SEGB D SẼN PAAM FÃA SASA

²⁶ A Zeezi yeela neb nins sẽn da reegd a goamã yaa: “Yãmb yaa dũniyã vẽenem. . . . Bɩ yãmb me vẽenemã yãg nebã sʋka, tɩ b tõog n yã yãmb tʋʋm-sõma wã, n pẽg yãmb Ba sẽn be saasẽ wã.” (Mat. 5:14-16) A Zeezi karen-bi-kãensã ra rɩka a naoor n wilgd bũmba fãa pʋgẽ tɩ b yaa Wẽnnaam neba, wa a sẽn da gom a meng yell n yeel t’a yaa “dũniyã vẽenemã.” A Zeezi kõo a karen-biisã mak-sõng n da kɩtdẽ tɩ neb nins fãa sẽn kelgd-a wã paamd “vɩɩm vẽenemã.”—Zã 8:12.

²⁷ Tẽn-tʋmd a Poll me kõo tõnd mak-sõng d sẽn segd n tũ. (1 Kor. 4:16; 11:1) A sẽn da wa n be Atɛnnã, a ra moonda koɛɛgã raagẽ wã daar fãa, n sõsd ne neb nins sẽn wat be wã. (Tʋʋ. 17:17) Filip soolmã kiris-neb rɩka a togs-n-taare. Rẽ n so t’a Poll da yeel-b tɩ b bee ‘zãmaan neb sẽn yaa wẽns la sẽn pa maand sẽn yaa tɩrg sʋka,’ la tɩ b ‘yãgda wa vẽenem dũniyã pʋgẽ.’ (Fili. 2:15) Rũndã-rũndã, tõnd me tõe n kɩtame tɩ Rĩungã vẽenem yãg ne d no-goamã la d tʋʋm-tʋmdɩ wã maasem, zĩig ning fãa d sẽn paam segb n na n taas neb koe-noogã. Yaa sɩd tɩ d sẽn wilgd tɩ d yaa pʋ-peelem dãmb la nin-tɩrsã meng tõe n kɩtame tɩ dũniyã neb yã vẽeneg tɩ d yaa toor ne-ba. La d sã n gomd koe-noogã yell ne-ba, na n sõng-b lame tɩ b bãng tõnd sẽn yaa toor ne-bã võore.

²⁸ A Zeova nin-buiidã wʋsg taasda koe-noogã neb nins b sẽn segd b tʋʋm zĩisẽ, b lekoll-dãmbẽ, biis wall tagsɩ-rãmb pʋsẽ la zĩis a taaba, la b sẽn wat n maand bũmb toor-toore. D sã n wa togd sore, d tõe n paama segb n sõs ne d sẽn naag b rãmb n togd sorã. Tõnd ned kam fãa segd n tũnugda ne segb d sẽn paam sõsg sasa n taas koɛɛgã. Bɩ d segend d meng tɩ d sã n paam segb fãa bɩ d gomd ne nebã.

²⁹ D sã n ning d yamẽ tɩ d sẽn maand woto wã, d pẽgda d Naandã la d waoogd a yʋʋrã, na n kenga d raood tɩ d tʋll n moon koɛɛgã. Leb n na n kɩtame tɩ d paam n sõng sũ-tɩrs rãmbã tɩ b bãng a Zeova n tõog n tũ-a, n paam vɩɩm hakɩɩkã saagr ned sẽn tare, a sẽn tẽed a Zeezi Kiristã yĩnga. A Zeova sũur nooma ne modgr a woto, n get rẽ wa tʋʋmd d sẽn tʋmd a yʋʋrã yĩnga.—Ebre. 12:28; Vẽn. 7:9, 10.

MOONEGÃ ZĨIGA

³⁰ A Zeova ratame tɩ d moon Rĩungã dũniyã gill zugu, tẽn-bɛd la tẽn-bõoneg pʋsẽ. Yɩl n tõog n maan dẽ, filiyallã wilgda tigimsã la d tẽed-n-taas sẽn be zĩ-zãrsẽ zĩis nins b sẽn tog n moon koɛɛgã. (1 Kor. 14:40) Woto zemsa ne Wẽnnaam sẽn da ges tɩ b sigl koe-moonegã to-to pipi kiris-nebã wakatẽ wã. (2 Kor. 10:13; Gal. 2:9) Rĩungã tʋʋmd sẽn paamd pãng zĩig zãng yaoolem wakat kãensã wã yĩnga, d sẽn sigl tigimsã sẽn segd n moon zĩis ninsã sõngdame tɩ d tõogd n maand bũmb wʋsgo.

³¹ Yaa koe-moonegã yel-gɛt n get rẽ yelle. B tõe n yãka kãsem-sõngd t’a wilgd zĩis nins tigingã sẽn segd n moonã. Koe-mooneg zĩis bugs a yiib n be. Yaa sulã koe-mooneg zĩisi, la mooneg zĩis b sẽn tõe n yãk n kõ nin-yende. Zĩis nins moonegã zĩig sẽn pa yalmã, sull yel-gɛt fãa koe-moondb na n moonda zĩig ning b sẽn kõ b sullã. La koe-moonegã zĩig sã n yalmẽ, koe-moond tõe n kosame tɩ b kõ-a mooneg zĩiga.

³² Koe-moond sã n tar mooneg zĩig b sẽn kõ-a, a tõe n moonda be, daar ning b sẽn pa sigl tɩ tigingã neb na n moone, wall a sã n pa tõe n tɩ naag sullã neb n moone. Wala makre, koe-moondb kẽer tara mooneg zĩig b sẽn kõ-b tɩ pẽ ne b tʋʋmã zĩiga, tɩ b tõe n moon be vʋʋsg sasa wall tʋʋmã sigb poore. Zags sãnda rãmb kota mooneg zĩig sẽn pẽ ne-ba, n mi n moond beenẽ zaabre. Koe-moond sã n tar mooneg zĩig b sẽn kõ-a tɩ be zĩig sẽn yaa sõma ne-a, tõe n sõng-a lame t’a paam sẽk wʋsg n moon koɛɛgã. La koe-mooneg sull tõe n tɩ moona koɛɛgã zĩig b sẽn yãk n kõ koe-moonda. Fo sã n dat tɩ b kõ-f koe-mooneg zĩiga, f tõe n tɩ yãa koe-moonegã yel-gɛta.

³³ B sã n yãk mooneg zĩig n kõ sull yel-gɛt wall koe-moonda, a segd n maana a sẽn tõe fãa tɩ koɛɛgã ta zak fãa neba. La y segd n gũusame tɩ y sẽn maand to-to n na n taas nebã fãa koɛɛgã zems ne tẽngã laloa wã. Sull yel-gɛt wall koe-moond b sẽn kõ mooneg zĩig segd n modgame n moon zĩigã fãa n sa kiis a naas pʋgẽ. Zĩig ning b sẽn kõ-bã sã n sa, b segd n togsa saam-biig ning sẽn get moonegã zĩig yellã. Sẽn zems ne yɛlã sẽn yaa to-to wã, koe-moonegã sull yel-gɛt bɩ koe-moond tõe n kell n talla a moonegã zĩig karte, n wa lebs n moon be wall a tɩ kɩs sẽn get-a moonegã zĩig yellã.

³⁴ Tigingã neb fãa sã n teend tʋʋmdã, b tõogdame tɩ koɛɛgã ta b moonegã zĩig fãa. La d segd n gũusame n da tɩ moon koɛɛgã zĩig koe-moondb a yiib wall sẽn yɩɩd rẽ sẽn zoe n moondẽ, bala tõe n yika kɛlgdbã sũyã. Woto, d wilgdame tɩ d nanda d tẽed-n-taasã la d moonegã zĩig neba.

D SÕNGDA TAAB N TAASD KOƐƐGÃ NEB SẼN GOMD BUUD-GOAM TOƐY-TOƐYA

³⁵ Ned buud fãa segd n bao n bãnga a Zeova, a Biigã la a Rĩungã. (Vẽn. 14:6, 7) D tʋll n sõnga neb sẽn gomd buud-goam toɛy-toɛy tɩ b pʋʋs ne a Zeova yʋʋrã n paam fãagre, la b yeelg nin-paalgã n lebg kiris-neba. (Rom. 10:12, 13; Kolo. 3:10, 11) Zu-loe-bʋs la d segda, d sã n moond koɛɛgã zĩig nebã sẽn gomd buud-goam toɛy-toɛya? Wãn to la d tõe n welg zu-loe-kãense, sẽn na yɩl tɩ neb wʋsg tõog n wʋm Rĩungã koɛɛgã b meng buud-gomd pʋgẽ? —Rom. 10:14.

³⁶ B kõta tiging fãa mooneg zĩig tɩ zems ne a nebã sẽn gomd buud-gomd ningã. Zĩis nins nebã sẽn gomd buud-goam wʋsgã, tigims toɛy-toɛy koe-moondb tõe n moonda zĩ-yɛnga. La sẽn segd n pak tiging fãa koe-moondb n yɩɩda, yaa b taas koɛɛgã neb nins sẽn gomd b tigingã buud-gomdã. Koe-moondbã segd n maana woto me, d sã n wa pʋɩt seb-vãad n boond nebã. La d sã n wa moond zãma zĩisẽ, pa rẽ bɩ yaa segb d sẽn paam sasa, d tõe n sõsa ne ned buud fãa la d kõ ned sebre, baa sẽn yaa ne buud-gomd ninga.

³⁷ Wakat ninga, buud-gomd a to tiging pa tõogd n moond a moonegã zĩig zãng ye. Sã n wa yaa woto, tigims nins sẽn moond zĩ-kãng koe-moonegã yel-gɛtb segd n yẽsa ne taaba, n bãng b sẽn tõe n sigl koe-moonegã to-to n tõog n moon b moonegã zĩig tõre. Rẽ na n sõngame tɩ nebã paam n wʋm Rĩungã koɛɛgã, la sõng me tɩ tigimsã neb ra sãam b sẽk zaalem ye.—Yel. 15:22.

³⁸ La d sã n moond koɛɛgã zak-zak n seg ned sẽn pa gomd tõnd tigingã buud-gomde, d maanda wãna? D ra tags tɩ koe-moondb sẽn gomd a buud-gomdã na n wa taas-a-la koɛɛgã ye. Koe-moondb kẽer zãmsa b sẽn tõe n taas ned koe-noogã koɛɛg-koɛɛg buud-gom-zẽng pʋgẽ, n paam n taas koɛɛgã b moonegã zĩigẽ neb nins sẽn gomd buud-gom-kãnga. D tõe n wilga d kɛlgdã a sẽn tõe n paam sɛb ne a buud-gomdã jw.org pʋgẽ n karem bɩ n telesarz to-to, wall d yeel-a tɩ d na n lebg n wa kõ-a-la sebr a buud-gomdã pʋgẽ.

³⁹ A sã n sɩd rat n bãng n paasame, d tog n modgame n bao ned sẽn tõe n moon-a koɛɛgã sõma ne buud-gomd a sẽn wʋmde. D tõeeme me n wilg-a zĩis b sẽn maan tigiss a babgẽ wã ne a buud-gomdã. A sã n dat tɩ ned sẽn gomd a buud-gomdã wa sõs ne-a, d tõe n wilg-a-la a sẽn tõe n gʋls n kos rẽ to-to jw.org pʋgẽ. Woto, filiyallã na n modgame n paam koe-moonda, pa rẽ bɩ sull wall tiging sẽn pẽ t’a sõng-a n paase.

⁴⁰ La nananda, d segd n ket n kẽnd n sõngd-a lame, n tãag a sẽn na n wa yeel tõnd tɩ koe-moond sẽn gomd a buud-gomdã n sɩng sõsg ne-a. Sasa ninga, filiyallã tõe n wilga kãsem-dãmbã tɩ b pa paam ned sẽn gomd a soabã buud-gomd ye. Sã n wa yaa woto, d segd n maana d sẽn tõe, n ket n sõngd-a t’a wʋmd koɛɛgã n paasdẽ. Sã n tõeyã, d tõe n zãms-a-la Biiblã ne sebr sẽn be a buud-gomdã pʋgẽ. D sã n tʋmd ne fot-rãmbã sõma, la d kɩt t’a soabã karemd vɛrse-rãmbã, a na n bãnga Biiblã sẽn yetã, baa yaa bilfu. A zakã ned sẽn wʋmd b buud-gomdã ne tẽngã buud-gomdã tõe n sõngdame n lebgd sõssã.

⁴¹ Sẽn na yɩl n sõng ned t’a bãng Wẽnnaam siglgã, d segd n bool-a lame t’a wat tigissã, baa a sã n pa na n wʋm bũmb ning fãa b sẽn yetã. B sã n wa karemd vɛrse, sã n mik tɩ Biibl sẽn yaa ne a buudã gomd beeme, d tõe n sõng-a lame t’a yã vɛrse wã. A sã n naagd nebã tigissã sasa, na n naf-a lame la sõng-a me t’a tẽebã pãng paase.

⁴² Sul-biyã: Sul-bil yaa koe-moondb sẽn na n moond koɛɛgã ne buud-gomd sẽn yaa toor ne tigingã buud-gomde, tɩ kãsem-soab wall kãsem-sõngd sẽn tar minim pa be n na n maand tigiss buud-gom-kãng pʋgẽ ye. Filiyallã tõe n kõo tiging sor t’a lugl sul-bila, sã n mik:

1. 1) Tɩ neb wʋsg n be babgẽ be n gomd buud-gomd sẽn yaa toor ne tigingã buud-gomde.

2. 2) Tɩ koe-moondb n wʋmd buud-gom-kãng wall b tʋll n zãmsame.

3. 3) Tɩ kãsem-dãmbã sull na n sakame n ges sul-bilã koe-moonegã yelle.

Kãsem-dãmbã sull sã n wa rat n lugl sul-bila, b segd n deng n goma ne tigims sull yel-gɛtã. Tõe t’a mii tigims sẽn modgd n na n moon neb nins sẽn gomd buud-gom-kãnga. A tõe n kõo kibay sẽn na n sõng tɩ b bãng tiging ning sẽn zemse, n tõe n lugl sul-bilã. B sã n bãng tiging ning sẽn zems n yɩɩdã, tiging-kãng kãsem-dãmbã na n gʋlsa lɛtre, n kos tɩ b kõ-b sor tɩ b lugl sul-bilã.

⁴³ Sulã: Filiyallã tõe n kõo sor tɩ tiging lugl sull sã n mik:

1. 1) Tɩ tigingã moonegã zĩigẽ, neb wʋsg n kelgd koɛɛgã sõma buud-gomd ning pʋgẽ, tɩ b saagdẽ tɩ fɩɩgr n na n zĩndi.

2. 2) Tɩ koe-moondb a wãn n wʋmd buud-gom-kãng wall b zãmsd-a lame.

3. 3) Tɩ kãsem-soab bɩ kãsem-sõngd sẽn tar minim beeme n tõe n lʋɩ taoor n maan baa yaa wɩkɛnnã tigsg a ye tõr bɩ a babg a ye ne buud-gom-kãnga. Wala makre, sõsg zãma wã yĩnga bɩ Gũusg Gasgã zãmsgo.

Sã n mik tɩ tigingã tõe n maan woto, kãsem-dãmbã sull na n toola filiyallã lɛtr n kõ kibayã ball-balle, la b kos tɩ b kõ-b sor tɩ b lugl sullã. B boonda kãsem-soab bɩ kãsem-sõngd sẽn lʋɩt taoor n get sull yell tɩ “sull yel-gɛta” bɩ “sull sõngda.”

⁴⁴ B sã n lugl sullã poore, tiging ning sẽn ket sullã yellã kãsem-dãmb na n gesa b sã n na n maana tigissã babs kẽer n paas ne buud-gom-kãnga, la b bao n bãng naoor a wãn la b na n maand tigissã kiuug pʋgẽ. B segd n gesame me tɩ b maand koe-moonegã tigiss ne buud-gom-kãnga. Sullã neb fãa segd n tũuda tiging ning sẽn get sullã yellã kãsem-dãmbã saglse. Kãsem-dãmbã na n kõta sagls sẽn zemse, la b mi n yãk yam n maand bũmb kẽer n sõngd sullã. Tigims sull yel-gɛtã sã n wa kaagd tiging ning sẽn get sullã yellã, a na n gʋlsa rapoor n tool filiyallã n wilg sullã tʋʋmd sẽn yaa to-to, la a sã n data sõngr takɩ zĩig ninga. Sullã tõe n wa lebga tiginga. Neb nins fãa sẽn moond zĩis nins b sẽn gomd buud-goam toɛy-toɛyã sã n tũud siglgã saglse, a Zeova sũur yɩta noogo.—1 Kor. 1:10; 3:5, 6.

KOƐƐGÃ MOONEG NE NEB A TAABÃ

⁴⁵ Kiris-nebã sẽn dɩk b meng n kõ Wẽnnaamã segd n moona neb a taabã koɛɛgã. D tõe n moona ne manesem toor-toore, la d fãa la bal sũur yaa noogo, d sã n paam n naagd neb a taabã n moondẽ. (Luk 10:1) Rẽ n so tɩ tigimsã maand koe-mooneg tigiss wɩkɛn-dãmbã la raasenkamã. Tʋʋmd sẽn kae raare, d paamda segb n naagd taab n moondẽ, bala d tẽed-n-taas wʋsg pa tʋmd raar-n-kãng ye. Tigingã sull ning sẽn get koe-moonegã yellã n yãkd b sẽn na n maand koe-moonegã tigissã wakat ning la zĩig ninga, yibeoog la zaabre.

⁴⁶ D sã n naagd taab n moondẽ, sõngdame tɩ d naag taab n tʋme, tɩ d ‘ned kam fãa tẽeb keng a to raoodo.’ (Rom. 1:12) Koe-moon-paalsã tõe n naaga koe-moondb nins sẽn tar minimã n moondẽ, sẽn na yɩl n paam minim. Zĩis kẽere, yɩta sõma tɩ koe-moondb a yiib bɩ sẽn yɩɩd rẽ naag taab n moone, nen-kɛglmã yĩnga. Baa f sã n yãka yam n na n moon f yembre, f sã n tɩ naag neb a taabã n maan koe-moonegã tigsgã, na n kenga y fãa raoodo. F sã n mi tɩ neb a taab me n moond babg ning f sẽn moondẽ wã, tõe n kɩtame tɩ f yam gãande. So-pakdbã ne koe-moondb a taab pa segd n tags tɩ yaa tɩlɛ tɩ b kẽnd koe-moonegã tigsg fãa tigingã sẽn sigl ye. Sẽn yɩɩd fãa, sã n yaa daar fãa la b maand tigis-kãngã. Baasgo, b tõe n kẽnda koe-moonegã tigsg a wãn semen pʋgẽ.

⁴⁷ Bɩ tõnd fãa rɩk a Zeezi la a tẽn-tʋmdbã naoore! D tõe n basa d yam t’a Zeova na n ning-d-la barka, d sẽn modgd n kẽesd d toog sõma Rĩungã koe-noogã mooneg sẽn yaa tʋʋmd sẽn fãagd yõyã pʋgẽ wã.—Luk 9:57-62.