D gẽes neb nins sẽn gomd d tigingã buud-gomdã, n sõng-ba
1. Tigimsã sã n yaa wʋsgo, bõe yĩng tɩ yaa neb nins sẽn gomd buud-gomd ning d sẽn gomd tigissã sasa wã la d tog n bao?
1 Yʋʋmd 33 Pãntekotã sasa, a Zezi karen-biisã sẽn paam vʋʋsem sõng zaeebã poore, “b sɩngame n gom gom-zẽna,” tɩ nebã sẽn yi tẽns toɛy-toɛyã wʋm koe-noogã b buud-goamã pʋgẽ. (Tʋʋ. 2:4) Baraarã, yɩɩ sẽn na ta neb 3000 n deeg lisgu. La tẽeg-y tɩ wõnda sãambã wʋsg ra gomda hebre bɩ gɛrk buud-gomdã. Baa ne rẽ, a Zeova yãka yam n kɩt tɩ karen-biisã tõog n taas nin-kãensã Rĩungã koɛɛgã b mensã buud-goam pʋgẽ. Tõeeme t’a Zeova sẽn maan woto wã yaa tɩ ned sã n wʋm koe-noogã a meng buud-gomd pʋgẽ, kẽed-a lame n yɩɩda. Rẽ n so tɩ rũndã-rũndã, tigims wʋsg sã n be zĩig nebã buud-goam sẽn yaa toor-toore, tiging fãa baooda neb nins sẽn gomd buud-gomd ning b sẽn gomd a tigissã sasa wã. (Organisés sebrã neng 107, sull a 1-2) Sull sã n moond sãamb buud-gomd pʋgẽ, a pa tar zĩig takɩ n moondẽ ye. A moonda zĩis nins tiging ning sẽn get a yellã sẽn moondẽ wã, la tigims nins sẽn pẽ-b be wã sẽn moondẽ wã.
2. a) D sẽn boond tɩ nebã gẽesgã yaa bõe, la wakat bʋg la d segd n maand rẽ? b) Wãn to la tigimsã tõe n sõng taaba, zĩis nins nebã sẽn gomd buud-goam toor-toorã? d) D sã n wa seg ned sẽn dat n kelge, n yaool n pa gomd tõnd tigingã buud-gomde, bõe la d tog n maane?
2 Yãmb sẽn beẽ wã, nebã fãa sã n gomd buud-gom-yɛnga, y tõe n kẽeda zak fãa n moond koɛɛgã. La sã n mikame tɩ b buud-goamã yaa toor-toore, y pa tõe n maand woto ye. Bala tõeeme tɩ tigims a taab me n moond zĩ-kãngã. Tigims a taab neb tõe n sega ned sẽn gomd y tigingã buud-gomdã n togs yãmba. La bãng-y tɩ yaa yãmb n segd n gẽes neb nins sẽn gomd y tigingã buud-gomdã, n sõng-ba. (Ges-y zĩ-gũbrã sẽn yet tɩ: “D sõng taaba.”) Woto yĩnga, y segd n deng n gilg n gẽes-b lame. Wãn to la y na n maan dẽ?
3. Bõe n sõngd tiging t’a bãng a sẽn tog n gẽes nebã zĩig ninga, la lɛɛr dãmb nins a sẽn tog n kẽes rẽ pʋgẽ wã?
3 Sigl-y nebã gẽesgã sõma: Lɛɛr dãmb nins y sẽn tog n dɩk n gẽes neb nins sẽn gomd y tigingã buud-gomdã bee ne sẽn yaa to-to yãmb babgẽ wã. Wala makre, bee ne sẽn gomd-b buud-gom-kãngã waooglem, la koe-moondbã sõore. Bee ne neb nins tigingã sẽn zoe n yã wã sõor me. Pa tɩlae tɩ tigingã neb kẽed zak fãa n sokdẽ ye. B sã n mi zĩig sẽn be bãmb babgẽ wã bɩ sẽn pa zãr wʋsgo, tɩ buud-goam toɛy-toɛy neb waoog be, b tõe n kẽnga beenẽ. La segdame tɩ b sigl nebã gẽesgã sõma, sẽn na yɩl n paam tɩ neb wʋsg bãng a Zeova.—Rom 10:13, 14.
4. a) Wãn to la b tog n sigl nebã gẽesgã? b) Bõe la y tõe n maan tɩ sõng-y tɩ y yã y sẽn gẽesd-b rãmbã?
4 Sẽn na yɩl tɩ tigims wʋsg ra wa moond zĩ-yɛng wakat yɛnga, tiging fãa kãsem-dãmb sulli, sẽn yɩɩd fãa tʋʋmdã yel-gɛtã segd n gesame tɩ tʋʋmdã sigl sõma. (1 Kor. 9:26) Sã n yaa buud-gom-zẽng sulli, tiging ning sẽn get sul-kãng yellã kãsem-dãmbã tõe n yãka saam-biig t’a lʋɩ tʋʋmdã taoore. Yaa sõma tɩ yɩ kãsem-soab bɩ kãsemb-sõngda. Tigims la sul kẽer tara b sẽn maande, n deng n paam kibay sẽn na n sõng-b nebã gẽesg pʋgẽ. Wala makre, b tõe n deng n gesa telefõnnã annuaire bɩ ẽntɛrnetẽ wã. Rẽ poore, b boonda nin-kãensã ne telefõnne, wall b kẽng b nengẽ, sẽn na yɩl n bãng b sã n tõe n dɩka a adɛrsã n naag adɛrs nins b sẽn zoe n tarẽ wã. Tiging sã n get sull sẽn gomd buud-gom-zẽng yelle, sã n tõeyã, kãsem-dãmbã tog n yãka yam tɩ tigingã nebã mi n sõng sul-kãngã, a nebã gẽesg pʋgẽ.—Ges-y zĩ-gũbr ning sẽn yet tɩ: “Y sẽn na n maan to-to n yã sẽn gomd-b yãmb tigingã buud-gomdã.”
5. a) Bõe n tõe n sõng koe-moondbã nebã gẽesg sasa? b) Bõe la d tõe n yeel gẽesgã sasa?
5 D sã n yi n na n gẽes nebã, d segd n tẽegda d sẽn yi bũmb ning yĩngã. Sẽn mik tɩ rẽ me yaa koe-moonegã, d tog n manega d mens sõma. Neb wʋsg gũus n gesame tɩ b sã n yi nebã gẽesg yĩnga, b sã n deng n zãms bũmb ning b sẽn na n yeelã n yɩlme, la b gomd b sẽn gẽesd-b rãmbã buud-gomdã, sõngdame tɩ b tar yẽesem, la paasd b buud-gomdã minimã. Baa d sã n deng n zĩnd n gẽesa d sẽn na n tɩ moon zĩig ningã, la d ges kart rãmbã, yaa lɛɛr dãmb nins d sẽn kẽes nebã gẽesgã pʋgẽ wã bal la d tog n gʋls d rapoorã zugu. D sã n yã neda, d segd n modgame n taas-a koe-noogã, la d togs tʋʋmdã yel-gɛt bɩ a sõngda tao-tao, t’a paam n gʋlse. Baa a soabã pa wilg t’a rat n bãng n paasame, d tog n togsame. Nebã gẽesg sã n tara yõod me, d pa segd n yĩm koe-moonegã buk a taabã ye.—Ges-y zĩ-gũbrã sẽn yet tɩ: “D sẽn tõe n yeel gẽesgã sasa.”
6. Bõe yĩng tɩ mugsã gẽesg yaa toogo?
6 Sẽn yaa-b mugsã gẽesgo: Yɩl n yã neb nins sẽn yaa mugsã yaa toogo. Baooda modgr wʋsg la pẽdgre. D pa tõe n yã ned sondre, a fu-yerdɩ, bɩ a yalẽ n bãng t’a yaa muk ye. Sẽn paase, d sã n sok ned sẽn yaa muk zoa bɩ a zak neda, a sẽn dat n kogl-a wã yĩnga, a tõeeme n pa sak n togs-d ye. La sagls nins b sẽn na n kõ-d sẽn yaa-b mugsã gẽesg yĩngã tõe n sõngame tɩ d bãng n gẽes sẽn gomd-b buud-goam a taabã.
7. a) D sã n wa gẽesd sẽn yaa-b mugsã, bõe la d tõe n maane? b) Ned sã n pa bas yard zãnga, bõe la d tõe n maan t’a yam gãande?
7 Mugsã goam tigissã, la b sulã sẽn kẽnd zagsã sẽn beẽ wã n gẽesd mugsã mikame tɩ woto womda biisi. D tõe n soka nina, n mik t’a yak bɩ a tʋmd-n-taag wall a karen-bi-taag n yaa muka. Tẽns kẽer pʋsẽ, zĩig sã n beẽ tɩ biig bɩ kamb sẽn yaa mugs be be, b ningda pano soayã noy n wilgdẽ. Tõe tɩ d sẽn sok a soabã mii pano kãng buud sẽn beẽ, bɩ a tara roagd sẽn yaa muka. Bãng-y tɩ pa nebã fãa n na n bas yard zãng ne-y ye. La y sã n waoog-ba, n wilg tɩ y nong-b lame, tɩ y goamã me yaa vẽenese, tõe n kɩtame tɩ b yam gãande. Neb kẽer gũus n gesame tɩ b sã n yã ned n na n soke, b sa n wilg-a tõnd DVD rãmba, sõngda wʋsgo. Rẽ poore, b togsda a soabã tɩ b gẽesda sẽn yaa-b mugsã n na n wilg-b kãab-nood sẽn be Biiblã pʋgẽ. D sẽn sok-a soabã sã n mii muk sẽn beẽ la a ket n pa rat n wilg-du, d tõe n kõ-a-la tõnd mengã adɛrse, bɩ seb-vãoog ning d sẽn kõt nebã n boond-b tɩ b wa d tigissã, t’a kõ a roagdã bɩ a zoa ning sẽn yaa mukã.
8. Wãn to la tiging a to tõe n sõng mugsã goam tiginga?
8 Yʋʋmd fãa, mugsã goam tigissã tõe n yãka daar a ye bɩ a yiibu, la b yãk mooneg zĩig sẽn yalme, n kos tiging a to sẽn pẽ tɩ b wa sõng-b ne sẽn yaa-b mugsã gẽesgo. Rẽ, koe-moonegã tigsgã sasa, b tõe n wilga koe-moondbã b sẽn tog n maan to-to, la b maan mak-n-wilgi. B tõe n pʋɩɩ nebã sull-sulli, tɩ sull fãa tar ned sẽn wʋmd mugsã goam, la kart sẽn wilgd zĩis nins b sẽn tog n kẽng n tɩ gẽesã.
9. Wãn to la d tõe n moon mugsã sẽn nong n tigimd taab zĩis ninsã?
9 Y sã n mii zĩis sẽn yaa-b mugsã sẽn nong n tigimd taab yɛl kẽer yĩnga, y tõe n kẽnda beenẽ. La y tog n manega y mens sõma. Leb n yaa sõma tɩ y sã n ta bɩ y ra bao n na n sõs ne nebã fãa ye. Y tõeeme bal n sõs ne ned a ye bɩ neb a yiibu, n da maan tɩ nebã wa gũm ye. Y sã n paam neb sẽn kelg sõma, y tõeeme n kõ-b y adɛrs la y reeg bãmb me rẽnda.
10. Wãn to la koe-moondbã tõe n maan koosmã la tʋʋmã zĩisẽ?
10 Y tõeeme me n maan kart rãmb sẽn wilgd koosmã zĩisẽ, la y yãk wakat n kẽng be. Tõe n yɩɩ kart sẽn wilgd esãens koosg zĩisi, bɩ hotɛll rãmb wall rɛstorã rãmb bɩ raase. Sẽn yaa koosem buk a ye zĩis n be kart fãa zugã yĩnga, koe-moondbã sẽn tog n yɛɛlgã pa toeemd ye. Rẽ paasda b minimã. Wala makre, sẽn mik tɩ neb sẽn yaa mugs mi n siga hotɛll dãmbẽ wã, d tõe n tɩ yãa hotɛllã rãmb n wilg-b d waoongã võore, la d kõ-b DVD ne seb-vãoog ning d sẽn kõt nebã n boond-b tɩ b wa d tigissã, tɩ b kõ sẽn yaa-b mugsã. Tʋʋm a taabã zĩisẽ, d tõeeme bal n sok n ges tʋm-tʋmdb kẽer bɩ neb sẽn wat be sã n yaa mugsi. Mugs lekoll sã n bee y babgẽ wã me, y tõe n tɩ kõ-b-la DVD rãmb kẽer tɩ b bĩng b sɛbã bĩngr zĩigẽ.
11. Bõe yĩng tɩ nebã gẽesgã tar yõod wʋsg koɛɛgã mooneg pʋgẽ?
11 Yaa tʋʋmd sẽn tar yõod wʋsgo: Yɩl n paam ned sẽn gomd tigingã buud-gomd tõe n yɩɩ toogo, la rɩkd sẽka. Nebã nong n toeemda zagse. D tõe n kẽnga ned sẽn gomd tigingã buud-gomd sẽn da beẽ, n mik tɩ yaa ned a to n be be. Woto kɩtame tɩ d pa tõe n teeg adɛrs nins d sẽn zoe n paamã bal ye. Zĩis wʋsg mengã, nebã gẽesgã lebgda tʋʋmd sẽn tar paasgo. A Zeova sẽn kõ tõnd tʋʋm-kãngã wã yaa Wẽnnaam sẽn pa tũusd neba. (Tʋʋ. 10:34) A ratame tɩ ‘neb buud fãa paam fãagre, la b bãng sẽn yaa sɩdã.’ (1 Tɩm. 2:3, 4) Woto yĩnga, bɩ d sak n tũ sagls nins a Zeova sẽn kõt-dã, la d tʋmd ne taaba, n tõog tɩ neb buud toɛy-toɛy ‘sũy sẽn yaa tɩrg la sõma’ wʋm koɛɛgã.—Luk 8:15.
[Zĩ-gũbri, seb-neng a 5]
D sõng taaba
Sull bɩ tiging sẽn gomd buud-gom-zẽng sã n dat tɩ b sõng-b tɩ b bãng zĩis b sẽn tõe n yã neb nins b sẽn baoodã, tʋʋmdã yel-gɛtã tõe n goma ne tigims a taabã sẽn be bãmb babgẽ wã kãsem-dãmbã. La yɩta sõma tɩ yɩ tigims sẽn pa zãr wʋsgo, bɩ sẽn moond zĩig b sẽn mi tɩ b sẽn baood-b rãmbã waooga be. Rẽ, tigims nins b sẽn kos sõngrã na n yeela b koe-moondbã tɩ b sã n wa moond koɛɛgã n yã bu-zẽng neda, bɩ b gʋls a adɛrsã la a buud-gomdã n kõ tʋʋmdã yel-gɛtã t’a kõ tiging bɩ sull sẽn gomd buud-gom-kãngã. Buud-goam toɛy-toɛy tigims sã n naag taab n moond babg a ye, b tʋʋmdã yel-gɛtbã na n gesa b sẽn tõe n maan to-to, n sõng taab n tõog n moon b babgã fãa, tɩ sẽn seg-a ned sẽn gomd tiging a to wã buud-gomde, bɩ a ges tɩ tiging-kãng paam adɛrsã.
Koe-moondbã sã n seg bu-zẽng ned sẽn sɩd dat n bãng n paase, wall ned sẽn yaa muka, bɩ b gʋls Veuillez suivre l’intérêt (S-43) seb-vãoogã tao-tao n kõ tigingã sekertɛɛre. Woto na n kɩtame tɩ b tõog n sõng a soabã tao-tao.—Ges-y km 5/11 seb-neng a 3.
[Zĩ-gũbri, seb-neng a 6]
Y sẽn na n maan to-to n yã sẽn gomd-b yãmb tigingã buud-gomdã
• Kos-y y Biibl karen-biisã tɩ b sok b zakã neba, b tʋmd-n-taas wall neb a taaba.
• Ges-y telefõnnã annuaire pʋgẽ tɩ soanda wã tõe n sõng-y lame tɩ y bãng nebã buud-goama. Ẽntɛrnetã pʋgẽ me, y tõe n paama neb yʋy la b soanda ne b adɛrse, wall y kẽng tʋʋm-noor sẽn get telefõnnã yellã nengẽ.
• Maand-y yam n sokd zĩis nins nebã sẽn yaa wʋsgã. Wala makre, tʋʋmã zĩisẽ, bibiliotɛk rãmbẽ wã la lekoll dãmbẽ wã.
• Get-y zʋrnall dãmbã pʋsẽ, tɩ b mi n wilgda zĩis bu-zẽms neb sẽn na n tigim taaba.
• Y tõe n kẽnda koosem bɩ tʋʋm zĩisẽ bu-zẽmsã neb sẽn nong n beẽ.
• Y tõe n baoa taable, n ning sɛb a zugu, n kos n dɩgend zĩis nins d sẽn mi tɩ d sẽn baood-b rãmbã nong n bee be. Wala tʋʋm kẽer zĩisẽ, inivɛrsite rãmbẽ wã, pa rẽ bɩ gaar dãmbẽ wã.
• Y tẽngã laloa wã sã n kõt sore, bɩ y kẽng koosmã la tʋʋm-noor toor-toorã zĩisẽ n bao sebr ning pʋgẽ b sẽn ningd nebã adɛrs rãmbã. Y tõe n kẽe ẽntɛrnetẽ wã me n paam kibay.
[Zĩ-gũbri, seb-neng a 7]
D sẽn tõe n yeel gẽesgã sasa
D sã n waoogd nebã, n wilgd tɩ d nong-b lame, tɩ d goamã me yaa vẽenese, tõe n kɩtame tɩ b yam gãande. Naoor wʋsgo, d sã n deng n wilg-b sebr sẽn be ne buud-gomdã, sõngdame.
D sã n pʋʋs a soabã n sɛ, d tõe n yeela woto: “Yãmb pa mi ned sẽn gomd ․․․․․? Tõnd baooda nin-kãensã n na n wilg-b kãab-nood sẽn be Biiblã pʋgẽ.”
Sã n yaa sẽn yaa-b mugsã la d baooda, d tõe n yeelame: “Y kibare! M bõos n wilg-y bũmb wɛ! [Y tõe n ninga Biiblã DVD wã, t’a ges vɛrse a ye b sẽn karemd mugsã yĩnga.] Yaa Biiblã vɛrse a ye la b sẽn karem ne mugsã goamã. La d tara video rãmb a taab sẽn sõngd mugsã tɩ b tõe n bãng Wẽnnaam. D pa koosd-b ye. Rẽ yĩnga yãmb pa mi ned sẽn yaa wʋng bɩ muka?” A soabã sã n pa tẽre, d tõe n sok-a lame n ges a pa tar tʋmd-n-taaga, karen-bi-taag wall yak sẽn yaa muka.