D moon neb nins sẽn gomd buud gom-zẽmsã

1. Koɛɛgã mooneg sasa d mi n segda nin-bʋse?

¹ A Zezi Kirist pĩnd n togsame tɩ koe-noogã na n moona dũniyã gill zug tɩ yɩ “kaset buud fãa yĩnga.” Koe-moondbã miime t’a Zezi sẽn yeel bũmb ningã pa reem yell ye. (Mat. 24:14; 28:19, 20) D sẽn moond koɛɛgã la d zãmsd nebã Biiblã, d tõe n sega tẽns a taab neba, la neb sẽn gomd buud gom-zẽmse. Nin-kãensã me segd n wʋma Rĩungã koɛɛg la b sak sɩdã nand t’a Zeova ra-kãsengã ta. (Mal. 3:18) Bõe la d tõe n maan n tõog n moon neb nins sẽn gomd buud gom-zẽms d moonegã zĩigẽ wã?

2. Bõe n wilgd tɩ d rɩkda a Zeova togs-n-taare, d sã n moond neb nins sẽn gomd buud gom-zẽmsã?

² D ges neb nins sẽn gomd buud gom-zẽmsã wa a Zeova sẽn get-b to-to wã: Sẽn na yɩl n wilg tɩ d nonga nebã buud fãa wala a Zeova sẽn nong-b to-to wã, d segd n modgame n sõng-b tɩ b bãng Wẽnnaam a Zeova, baa ne b sẽn gomd buud gomd ningã. (Yɩɩl 83:19; Tʋʋ. 10:34, 35) Baa sẽn yaa neb nins sẽn gomd d tigingã buud gomdã la d baood n yɩɩdã, d segd n tagsa neb nins sẽn gomd buud goam a taabã me yelle, la d bao n bãng d sẽn na n maan to-to n moon-b Wẽnnaam Rĩungã koɛɛgã. Tõnd sã n pa moond nin-kãensã, d pa tũud Wẽnnaam sẽn yeel tɩ d moon neb buud fãa wã ye. La d na n maana wãn n tõog n sõng neb nins sẽn pa gomd tõnd buud gomdã?

3. Seb-bʋg la b yiis n na n sõng tõndo, la wãn to la d tõe n segl d mens n tʋm ne-a sõma?

³ D tʋm ne Une bonne nouvelle pour des gens de toutes nations sebrã: B yiisa seb-kãngã sẽn na yɩl n sõng tõnd tɩ d sã n wa seg ned sẽn pa gomd d buudã gomd bɩ d tõog n kõ-a kasetã. Bao-y n bãng bũmb nins sẽn be sebrã pʋgẽ sõma la y suiid-a n kẽnd wakat fãa. Segl-y mens n tʋm ne-a sõma. Rẽeg-y buud goam nins nebã sẽn gomd yãmb moonegã zĩisẽ wã sebrã pʋgẽ n tõog n yãt-b tao-tao. Sɛb b sẽn yiis ne buud gom-kãens sã n beẽ, y tõe n zã-b lame. Y sã n wa seg ned sẽn gomd buud gom-kãngã, y tõe n kɩtame t’a karem Une bonne nouvelle pour des gens de toutes nations sebrã sẽn yetã, tɩ rẽ poor bɩ y kõ-a sebr ne a buudã gomdã.

4. Wãn to la d tõe n tʋm ne Toutes Nations sebrã d moonegã zĩigẽ?

⁴ Yãmb sã n seg ned sẽn gomd buud gom-zẽng n pa mi sẽn yaa gomd ninga, bɩ y reng n wilg-a bũmb ning sẽn be sebrã poorã. Rẽ poor bɩ y lak pʋgẽ wã n wilg-a kartã zug yãmb sẽn yit tẽng ningã, la y kɩt tɩ yẽ me wilg a sẽn yit tẽng ningã. Bao-y n bãng a sẽn gomd buud gomd ninga. Yãmb sã n bãng rẽ, bɩ y ges seb-neng a tãab ne a naasã zĩigẽ n bãng a buudã gomdã sẽn be seb-neng ninga, la y lak be n wilg-a gomd ning sẽn be zugẽ wã. Rẽ poor bɩ y kɩt t’a karem sebrã sẽn yet bũmb ningã. A sã n karem n sa, bɩ y kõ-a seb-vãoog b sẽn yiis ne a buudã gomde, wall y tik kibarã pʋgẽ zĩig ning b sẽn sõog sablgã, sẽn wilgd tɩ y na n baoa sebr b sẽn yiis ne a buudã gomdã n wa kõ-a wã. Rẽ poore, bɩ y tik zĩig ning b sẽn gʋls ne gʋls-bi sabl tɩ “m yʋʋrã,” la y sɩd togs-a y yʋʋrã vẽenega. Rẽ poor bɩ y tik zĩig ning b sẽn gʋls tɩ “yãmb yʋʋrã,” la y kelg-a. Rɩk-y segls sẽn na yɩl n lebg n tɩ kaag-a.

5. Ned sẽn gomd buud gom-zẽng sã n wilg t’a rat n bãng n paasame, bõe la d segd n maane?

⁵ D tʋm ne Veuillez suivre l’intérêt seb-vãoogã: D segd n modg n tɩ kaaga neb nins sẽn dat n bãng n paasã baa ne b sẽn gomd buud gomd ninga. D sã n wa mik tɩ ned n sɩd rat n bãng Wẽnnaam la Biiblã sẽn yet bũmb ninsã, d segd n pidsa Veuillez suivre l’intérêt (S-43) seb-vãoogã n kɩs d tigingã sekertɛɛr t’a tool Betɛllã, tɩ b bao ned sẽn tõe n tɩ kaag-a. Betɛllã na n toola seb-vãoogã sull sẽn gomd buud gom-kãngã. Seb-vãoogã sã n ta-ba, b na n yakã ned t’a tɩ kaag a soabã tao-tao. Sekertɛɛrã na n maana Veuillez suivre l’intérêt (S-43) wã fotokopi n kõ tʋʋmdã yel-gɛta, sẽn na yɩl tɩ b ra yĩm buud gom-kãng yell ye. B segd n maana woto sã n mik t’a soabã sɩd rata ne a sũur fãa n bãng n paase.

6. D sã n moon ned sẽn gomd buud gom-zẽng t’a rat n bãng n paase, bõe la tõnd mengã segd n kell n maane?

⁶ B sẽn na n tool S-43 wã tɩ b bao koe-moond sẽn gomd buud gom-kãngã t’a tɩ kaag ned ning sẽn dat n bãng n paasã tõe n dɩka sẽk wʋsgo. Woto yĩnga, sẽn na yɩl n kell n sõng a soabã, koe-moond ning sẽn pids S-43 wã segd n ket n kẽnda a nengẽ n tãag sasa ning b sẽn na n paam koe-moond sẽn gomd a buudã gomdã. Wakat ninga b tõe n sɩnga Biibl zãmsg ne a soabã. La nand tɩ b paam koe-moond sẽn gomd a buudã gomdã, wãn to la d tõe n paam sɛb b sẽn yiis ne a soabã buud gomde?

7. Bõe la d tõe n maan n paam sɛb n kõ neb nins sẽn gomd buud gom-zẽmsã?

⁷ Sɛb b sẽn yiis ne buud goam a taaba: Tigimsã pa segd n tar sɛb wʋsg b sẽn yiis ne buud goam a taab ye. La tʋʋmdã yel-gɛt sã n wilg tɩ buud gomd n be moonegã zĩigẽ t’a nebã sakd n kelgd koɛɛgã sõma, b sã n tara sɛb b sẽn yiis ne buud gom-kãng koe-moondbã sẽn na n tall n moon-ba, yaa sõma. La sã n mik tɩ tigingã pa tar sɛb b sẽn yiis ne buud gomd-kãngã, b tõe n kosame. B sã n kos seb-kãensã tõe n kaoosame n yaool n wa. Woto yĩnga koe-moondbã tõe n deng n tɩ gesa www.watchtower.org. n bao b sẽn datã n wa kõ-ba. Sɛb b sẽn yiis ne buud goam toɛy-toɛy bee beenẽ tɩ koe-moondã bɩ ned ning sẽn dat n bãng n paasã tõe n paam nana-nana. Yaa vẽeneg tɩ sɛb nins b sẽn na n paam beenẽ wã na n sõnga neb nins sẽn gomd buud gom-zẽmsã.

8. Bõe la tiging tõe n maan n sõng neb sẽn gomd buud goam a taab la b rat n bãng n paase?

⁸ Tigingã sẽn tõe n maan bũmb ninga: Sasa ninga, buud ning neb tõe n lebgda wʋsg zĩig ninga, tɩ tiging sẽn maand tigis ne b buudã gomd pa pẽ ye. Woto yĩnga y tõe n boola nin-kãensã sẽn dat n bãng n paasã y tigingẽ wã. Tigingã neb sẽn na n deeg-b sõma n wilg tɩ b nong-b lame wã tõe n kenga b raood tɩ b wat wakat fãa. Sɩngrẽ wã, b pa na n wʋm d goamã ne d sẽn get yɛlã to-to wã võor ye. La b na n bãngame t’a Zeova Kaset rãmbã sẽn be dũniyã gill zugã nonga taab la b nong nebã, hal tɩ bũmb pa gɩdgd rẽ ye. (Sof. 3:9; Zã 13:35) Buud gomd n be y sẽn wʋmd sõma bɩ? Y sã n dat n sõng neb nins sẽn gomd buud gom-kãngã, bɩ y togs y tigingã sekertɛɛr t’a taas Betɛllã. Woto, Betɛllã sã n wa rat koe-moond sẽn na n tɩ sõng ned sẽn gomd buud gom-kãngã, yɩta nana.

9. Wakat bʋg la b tõe n maan lekoll buud gom-zẽng yĩnga, la bõe la b segd n maane?

⁹ Buud gom-zẽng zãmsgo: Yãmb sã n sõngd neb sẽn gomd buud gom-zẽnga, yaa sõma tɩ y sagl-b tɩ b sã n tõe bɩ b kẽnd tiging ning sẽn gomd b buudã gomdã. La sã n mik tɩ b pa tõeyã, koe-moondb kẽer tõe n zãmsa buud gom-kãng n tõog n kell n sõng nin-kãensã sõma. Tiging sẽn gomd buud gom-kãng sã n ka yambẽ, tɩ nin-kãensã yaool n waoogẽ, Betɛllã tõe n maana lekoll tɩ b zãms koe-moondb kẽer buud gom-kãngã. B sã n na n maan lekollã, Betɛllã na n togsa tigims nins sẽn be-b yambẽ wã, tɩ bãmb taas koe-moondbã. Neb nins sẽn dat n kẽng lekollã segd n ninga b yamẽ tɩ b na n wa yii b tigingẽ wã n tɩ sõng sull bɩ tiging ning sẽn gomd buud gom-zẽngã.

10. Wakat bʋg la b tõe n maan buud gom-zẽng sulli?

¹⁰ D sã n wa rat n sigl sulli: Sẽn na yɩl n paam sor n maan buud gom-zẽng sulli, yɛl a naasã sẽn pʋgdã yaa tɩlae: 1) Neb nins sẽn gomd buud gom-kãngã wã sõor segd n yɩɩ wʋsgo, la b rat ne b sũy fãa n bãng n paase, tɩ d tagsdẽ tɩ d sã n sõng-ba fɩɩgr na n zĩndame. 2) Koe-moondb kẽer segd n wʋmda buud gom-kãng sõma, bɩ n ket n zãmsdẽ. 3) Kãsem soab bɩ kãsemb sõngd sẽn tar minim segd n beeme sẽn na n lʋɩt taoor tɩ b maand baa yaa tigsg a ye semen fãa ne buud gom-kãngã. 4) Kãsem dãmb sull sẽn na n sak n sõng sull kãng segd n beeme. Sã n mik tɩ b tõe n maana yel-kãensã, kãsem dãmbã sull segd n gʋlsa kibay sullã wɛɛngẽ n tool Betɛllã n kos sore sẽn na yɩl n ges sull kãng yelle. (Ges-y Organisés sebrã neng 106-107.) B sã n yãk kãsem soab t’a na n ges sullã yelle, b segd n bool-a lame tɩ “sull yel-gɛta.” La sã n yaa kãsemb sõngda, b segd n bool-a lame tɩ “sull sõngda.”

11. Bõe yĩng tɩ neb nins sẽn gomd buud gom-zẽms d moonegã zĩigẽ wã mooneg sɩd yaa zu-noogo?

¹¹ A Zezi Kirist sẽn kõ noor tɩ b moond koɛɛgã dũniyã gill zugã baoodame me tɩ d moon neb nins sẽn gomd buud gom-zẽms d moonegã zĩigẽ wã. Bɩ tõnd ned kam fãa modg n maan d sẽn tõe fãa la d get a Zeova sẽn ket n digimd buudã fãa neb tɩ pʋ-peelem dãmbã wat a nengẽ wã. (Aze 2:7) Neb nins sẽn gomd buud gom-zẽmsã sõngr sɩd kõta sũ-noog wʋsgo! Bɩ a Zeova ning modgr ning tõnd sẽn maand n na n sõng neb nins sẽn gomd buud gom-zẽms d moonegã zĩigẽ wã barka. Bɩ d kell n ning d yamẽ wakat fãa tɩ baa d pa wʋmd buud gom-zẽmse, a Zeova tõe n kɩtame tɩ koɛɛgã wom biisi!—1 Kor. 3:6-9.