D sã n seg ned sẽn pa gomd tigingã buud gomde
1. Bõe yĩng tɩ tigimsã segd n zems taaba, b sã n wa moond zĩ-yɛngã?
1 Dũniyã gill zugu, koe-moondbã mi n segda neb sẽn gomd buud goam tɩ b tigingã pa maand b tigissã ne gom-kãng ye. Sẽn na yɩl n tõog n moon nin-kãense, filiyall dãmb wʋsg yãame tɩ tara yõod tɩ b lugl sula, la tigims buud goam toɛy-toɛy pʋsẽ. Sẽn mik tɩ moonegã zĩigẽ nebã tõe n gomda buud goam wʋsgã yĩnga, tigims sẽn gomd buud goam toɛy-toɛy tõe n moona zĩ-kãngã. Bõe la tigimsã tõe n maan sẽn na yɩl n moon koɛɛgã tɩ zũnd-zãnd ra zĩndi?—1 Kor. 14:33.
2. Zak-zakã mooneg sasa, wãn to la buud goam toɛy-toɛy tigims tõe n zems taab n tõog n moon sõma?
2 D zems taab n tʋm sõma: D sã n wa moond koɛɛgã sor noor bɩ d sã n kõt kaset sẽn pa yãk wakate, d segd n moona neb buud fãa, baa neb nins sẽn pa gomd tigingã buud gomdã, la d kãab-b sɛb ne buud gomd ning b sẽn dat n karem. La d sã n wa moond zak-zaka, tɩ zĩ-kãng yaa sul bɩ tigims a taab me mooneg zĩiga, d segd n moona neb nins sẽn gomd buud gomd ning tõnd tigingã sẽn gomdã. Tigims toɛy-toɛy sã n moond zĩ-yɛnga, b segd n gʋlsa zĩis nins b sẽn zoe moonã n bĩng sõma. Tigims nins sẽn moond zĩ-yɛngã tʋʋmd yel-gɛtb segd n yãa taab n ges b sẽn tõe n maan to-to tɩ koɛɛgã mooneg tall yamleoog la naf nebã fãa. (Yel. 11:14) La d sã n wa moond zak-zak n seg ned sẽn gomd buud gom-zẽnga, tɩ buud gom-kãng tiging ka be yambẽ, d segd n modg n moona a soabã la d kẽnd n sõsd ne-a.
3. Koe-moondb sẽn pa gomd buud gom-yɛng sã n wa seg taab zĩ-yɛngã n na n moone, b manesem segd n yɩɩ wãn-wãna?
3 D tʋmda tʋʋm-yɛngã: Tigims toɛy-toɛy koe-moondb sẽn gomd buud goam toɛy-toɛy sã n wa seg taab zĩ-yɛng la wakat yɛng n na n moone, wãn to la b tõe n zems taab n moone? Saam-biir nonglmã segd n kɩtame tɩ b sẽn pa gomd buud gom-yɛngã ra yɩ zu-loɛɛg ye. Sẽn tar yõod n yɩɩd yaa b sẽn na n sõng moonegã zĩigẽ nebã tɩ b wʋm koɛɛgã. (Zã 13:34, 35) Woto yĩnga, neb nins sẽn lʋɩt taoorã segd n tʋma ne yam la nonglem, n yãk tiging ning sẽn na n tɩ moon zĩig a to wã.—Zak 3:17, 18.
4. Bãngr-gom-bʋg n paamd pidsg rũndã-rũndã?
4 Biiblã ra pĩnd n togsame tɩ neb sẽn gomd buud goam toɛy-toɛy na n wʋma koe-noogã. (Wil. 14:6, 7) D fãa sã n zemsd taab n moondẽ, na n kɩtame tɩ zũnd-zãnd ra zĩndi, tɩ kɩt tɩ d tõog n taas koɛɛgã neb wʋsgo, baa neb nins sẽn gomd buud gom-zẽmsã.—Ef. 4:16.