D paas d koe-moonegã minim: D taas koɛɛgã neb sẽn gomd buud-gomd d sẽn pa wʋmde

Bũmb ning sẽn kɩt tɩ tar yõodã: A Zeova ratame tɩ ned buud fãa paam a zoodo. (Tʋʋ. 10:34, 35) Rẽ n so t’a Zezi yeel tɩ b segd n moona koɛɛgã “dũniyã tɛk fãa,” la “buud fãa” neba. (Mat. 24:14) No-rɛɛs a Zakari pĩnd n togsame tɩ “buud toor-toor” neb n na n sak koɛɛgã. (Zak. 8:23) Sẽn paase, Wẽnnaam da vẽnega tʋm-tʋmd a Zã t’a yã tɩ neb nins sẽn na n põs to-kãsengã sasa wã yaa neb “sẽn yi soolem fãa, la buud fãa” pʋgẽ, la “neb sẽn gomd goam toɛy-toɛya.” (Wil. 7:9, 13, 14) Woto yĩnga, d sã n seg ned sẽn gomd buud-gom-zẽng koe-moonegã sasa, d tog n mao n taas-a-la koɛɛgã.