Gẽes-y wʋmsã sẽn be yãmb moonegã zĩigẽ wã
1 A Zeova maana booll kãngã: “ ‘Wa[-y-]yã.’ . . . Ned ninga sẽn data, bɩ a reeg vɩɩm koom zaalem.” (Wil. 22:17) Wʋms sõor sẽn tar paasg n be b rãmb nins sẽn sakd booll kãngã wã sʋka. Yaa rẽ yĩng la b sẽn maan wʋms tigims 27 la wʋms sul 43 Etazĩni, yʋʋm 13 sẽn loogã pʋgẽ wã. Wʋms sull n be Lome, Togo tẽngã pʋgẽ me. Sẽn zems neb 10 n wat tigissã wakat fãa, tɩ tigis-kãsemsẽ wã tɩ b sõorã yɩɩd 30.
2 Wʋmsã tigims la b sul moonda wʋms nins la neb nins sẽn ka wʋmd sõma wã sẽn be bãmb mens moonegã zĩisẽ. Baa ne rẽ, neb wʋsg a woto n be d sẽn ket n segd n yã n kõ kasetã koe-moonegã pʋgẽ.
3 Bõe la y tõe n maan n sõnge? Yɩnga, yãmb zoe n yãame tɩ neb tũnugd ne mugs goam bɩ? Yãmb mii ned y tʋʋmdã zĩigẽ bɩ y lekollẽ wã sẽn tar wʋng a zakẽ bɩ? Y daar fãa tʋʋma pʋsẽ bɩ y modg n bao neb nins sẽn yaa wʋmsã. La wãn to la y tõe n modg tɩ b paam Rĩungã kaseto?
4 D sẽn na n kõ kasetã to-to: Yɛl b sẽn vɩɩmd n yã wilgdame tɩ wʋms wʋsg bɩta tao-tao sɩdã zãmsg pʋgẽ, b sã n lagemd ne Kaset rãmb sẽn yaa wʋms Tigingã tigissẽ. Woto yĩnga, y sã n seg wʋng koe-moonegã pʋgẽ, bɩ y gʋls a adɛrsã takɩ. Y segd n gʋlsa a yʋʋrã fãa, a zakã zĩiga, sorã yʋʋr bɩ a nimero la zakã nimero, bɩ bũmb a to buud fãa sẽn na n sõng tɩ b tõog n yã nedã. Yɩtẽ-la sõma tɩ y mengã modg n bãng wʋngã sã n mii mugs goam bɩ a ka mi. D bõos tɩ y kɩs tigingã sekertɛɛr kɩba-kãensã fãa. Kiuug fãa kũumẽ, tigingã sekertɛɛr segd n togsa Lagem taabã wʋng sã n bee tigingã mooneg zĩigẽ. Dẽ Lagem taabã na n maana segls tɩ wʋms nins sẽn be yãmb moonegã zĩigẽ paam sõngre.
5 D na n wa gũume n bãng yɛlã sẽn na n yɩ to-to. La yãmb babgẽ wã, ned sã n ka be yambã n tõe n sõng wʋmsã tẽebã wɛɛngẽ, bõe la y tõe n maan n sõnge? Y tõe n maana lebg-n-tɩ-gese, n sõs ne zakã ned a to. Kãab-y tɩ y na n wilga video sẽn tũnugd ne mugs goam sẽn na yɩl n nek wʋngã tʋlsem ne sɩdã. Koe-moondb kẽer tol n zãmsa Etazĩni mugs goama sẽn na yɩl n tõog n moon wʋmsã sõma n yɩɩda. (Tʋʋ. 16:9, 10) Baood seb-bilã ne Bãngr sebrã tara video sẽn be ne Etazĩni mugs goama. B zoe n tũnuga ne bõn-kãensã n maan Biibl zãmsg ne neb tɩ wom biis sõma.
6 Y sã n modg n bao wʋmsã sẽn be yãmb babgẽ wã, y na n tõog n kɩtame tɩ b paam n deeg vɩɩm koomã zaalem.—Mat. 10:11.