Yãmb yaa nin-zoeer soab bɩ?
1 Tõnd sã n yã biig t’a solg a ma bɩ a ba poorẽ n be be n lɩkd n get tõndo, ka bũmb sẽn lingd-d ye. Nin-zoeer yãadem wakat yaa bũmb sẽn wɛ. Baa kãsemb wʋsg n be n minim n tar nin-zoeer buudu. Nin-zoeer sã n tara pãn-tusdg yãmb koe-moonegã zugu, bõe la y tõe n maane?
2 D mao ne nin-zoeerã: Tara yõod wʋsg tɩ y ges ‘sũurẽ dẽnda sẽn lillã.’ (1 Pɩɛ. 3:4) Paas-y y nonglmã ne a Zeova la ne y taabã pãnga. Kɩs-y sɩd zãng tɩ moonegã tʋʋmd pidsg yaa manesem nins sẽn yaa sõma n yɩɩdã a yembr sẽn na yɩl n wilg nonglem sẽn pukd maan-m-meng maoongã. Tall-y y meng zãmsg la tigissẽ wã kẽnd minung sẽn yaa sõma. Pʋʋsd-y wakat fãa n kot a Zeova sõngre. Tẽeb sẽn tar pãng la bas-yard ne-a na n paasa y bas-m-yamã, la kɩt tɩ y “togsd Wẽnnaam koɛɛga ne daood n yɩɩd pĩnda tɩ rabeem kaẽ ye.”—Fil. 1:14.
3 Ra tags-y tɩ y ka tar pãn-tõog ye. Yaa wa a Tɩmote ra segd n maana woto. A Poll sagla a Tɩmote t’a “ra sak tɩ ned paoog [yẽ a] yãadem yĩng ye,” n tẽeg-a tɩ “Wẽnnaam ka kõ tõnd dabeem sɩɩg [vʋʋsem, NW ] ye, yaa sɩɩg sẽn wat ne pãnga.” (1 Tɩm. 4:12; 2 Tɩm. 1:7) A Zeova tũnuga ne a Tɩmote n tʋm sõma-sõma. A leb n na n tũnuga ne yãmb me n tʋme, yãmb sã n mao n kẽng taoore, n tall bas-yard zãng-zãng ne-a.—Yɩɩl 56:12.
4 Saam-bi-poak nin-zoeer yĩng kɩtame t’a ra zoet a sɩdã sẽn da kɩɩsd-a wã. A tagsa Biibl verse zugu, wala Matɩe 10:37 wã zug tɩ sõng-a. A sẽn nang pãngã yĩngã, koe-moonegã lebga nana n yɩɩd ne-a, t’a sɩdã, a ma wã, la a ba-biis fãa wa baas n sak sɩdã!
5 Seglgã yaa tɩlae: Yãmb sã n segl koe-moonegã sõma, yãmb bas-yardã na n le paasame. Yãk-y wilgr sẽn yaa nana sẽn be Comment raisonner sebrã bɩ D Rĩungã Ministɛɛr dãmb sẽn yi tɩ loogã pʋsẽ, n zãms-a sõma, la y lebs n maan-b n minim. Ra maan-y yɩɩr zaalem ye, tall-y yam-sõngo. Tʋm-y ne koe-moondb a taabã n paam daoodo. Ning-y y yamẽ tɩ neb wʋsg yãmb sẽn na n seg zagsẽ wã yaa nin-zoeer dãmb wa yãmba. Neba fãa segd n wʋma Rĩungã koɛɛga.
6 Yãmb sã n yaa nin-zoeer soab bɩ y ra tags tɩ yellã ka tɩɩm ye. Y sã n maan modgre, a Zeova na n sõng-y lame tɩ y yɩ koe-noogã moond sẽn womd biisi. Dẽ, y na n paama sũ-noog y ministɛɛrã pʋgẽ.—Yel. 10:22.