Yãmb ket n tõogda toog bɩ?
1 “Bũmb ninga sẽn kõt maam sũ-noog n yɩɩda, yaa . . . tɩ mam kamba [ket n, NW ] kẽnda sɩd pʋgẽ.” (3 Zã 4) A Zã tẽeb kambã tõog-toogã kõ-a-la sũ-no-kãsenga. Ad sɩd tog n nooma d yĩngr Ba wã t’a neẽ tɩ neb milyõ rãmb sẽn na n wa yɩ a kambã ‘ket n kẽnda sɩdã pʋgẽ’!—Yel. 23:15, 16; 27:11.
2 Wala siglga, Wẽnnaam nin-buiidã nangda pãng ne yẽesem kiris-neb tʋʋmã pʋgẽ, la bilf-bilfã kẽer n maage. Baa nin-kãensã sẽn tõe n da tar yẽesem wʋsg b sẽn da wa n bãng sɩdã paalmã, yʋʋmã sẽn tar loogrã pʋgẽ tar-n-tarẽ b wa n minim n kẽesda b mens karen-biis maaneg tʋʋmdã pʋgẽ bilf bala, bɩ wakat-wakat bala.
3 Tõeeme tɩ yaa yĩng komslem bɩ kʋʋlmã yĩng n kɩt tɩ kẽer maage, rẽ ka b yell ye. Baasgo, b zemsa ne pẽgr b sẽn ket n tõogd toogã yĩnga. B maanda b sẽn tõe. La ned kam fãa sẽn dɩk a meng n kõ Wẽnnaam segd n sʋka a meng woto: ‘Mam basame tɩ m yama tik mam mengã bõn-datɩ zut wʋsg hal tɩ rẽ kɩt tɩ mam vɩɩmã pʋgẽ Rĩungã yɛl zĩig lebg bilf bal bɩ? Mam lebga “zalzale,” bɩ m ket n modgda “sõmb-sõmbo”? (Wil. 3:15, 16; Luk 13:24, NW ) Pʋʋsg pʋgẽ, bɩ tõnd fãa tags bũmb nins d sẽn maandã zugu, la d maneg zĩis nins d sẽn segd n manegã, n miẽ t’a Zeova kãabdame t’a na n kõo “ziiri la waoogre la laafɩ . . . neb nins sẽn maand neera yĩnga.”—Rom 2:10.
4 D sẽn na n tõog toog to-to: Bõe n sõng a Zezi t’a kell n tõog toogo? A Poll wilga woto: “Bãmb saka kũum da-pika n ka zoe yãnd ye, sũ-noog sẽn be bãmb taoora yĩnga, la b zaoo Wẽnnaam geer dɩtgo.” (Heb. 12:1-3) Sũ-noog ning sẽn da bee a Zezi taoorã yɩɩda makr wakat bilf yĩngã a sẽn da tog n yã wã hal zĩig sẽn zãre. D sã n kell n tall sũ-noog ning sẽn be tõnd taoorã d yamẽ rẽ tõe n sõng-d lame tɩ d tõog toog me. (Wil. 21:4, 7; 22:12) D sã n teeg a Zeova t’a kõ-d pãng n tũnug ne meng zãmsgo, tigissã rebr wakat fãa, la ne pẽdgr pʋʋsgã pʋgẽ, d na n tõogame n nang pãng ne tʋʋmdã a sẽn kõ-d tɩ d maanã.
5 A Zeova sũur noomame, a kɩs-sɩd dãmbã sã n tõogd toogo. Dẽ bɩ d paas a sũ-noogã n ket n ‘kẽnd sɩdã pʋgẽ.’