Pa-y-yã a Zeova siglgã pʋgẽ

A ZEEZI karen-biig a Zak yeelame: “Bɩ y kolg Wẽnnaam, la bãmb me na kolg yãmba.” (Zak 4:8) Baa d sẽn pa zems zãngã, a Zeova pa kãseng wʋsg wall a zãr wʋsg n pa tõe n wʋm bũmb ning d sẽn togsd-a wã ye. (Tʋʋ. 17:27) Wãn to la d tõe n kolg Wẽnnaam? Yaa d sẽn na n paasd tõnd ne a Zeova zoodã pãnga. Wala makre, n pʋʋsd-a ne d sũur fãa. (Yɩɩn. 39:12) D sã n zãmsd Biiblã sẽn yaa a Gomdã wakat fãa, tõe n paasa tõnd ne a zoodã pãnga. D sã n maand woto, d na n bãnga Wẽnnaam a Zeova, la a raabã sẽn yaa a soab ne ninsaalbã la tẽngã. (2 Tɩm. 3:16, 17) Woto, d na n nong-a lame la d zoet n pa rat n maan bũmb sẽn na n sãam a sũur ye.—Yɩɩn. 25:14.

² D tõe n pẽnega a Zeova, la yaa ne a Biig a Zeezi Kirist maasem bala. (Zã 17:3; Rom. 5:10) Ned baa a ye pa tõe n sõng-d tɩ d bãng a Zeova tagsg sõma, n yɩɩd a Zeezi sẽn maanã ye. A ra mii a Ba wã sõma hal tɩ kɩt t’a tõog n yeel yaa: “Ned baa a ye pa mi Biigã sẽn yaa a soab tɩ sã n pa Ba wã ye. Ned baa a ye pa mi Ba wã sẽn yaa a soaba, tɩ sã n pa Biigã, la ned ning Biigã sẽn dat n vẽnegã ye.” (Luk 10:22) Woto wã, tõnd sã n wa zãmsd evãnzil-dãmbã n na n bãng a Zeezi tagsg sẽn da yaa a soaba, yaa wa tõnd sẽn zãmsd n na n bãng a Zeova tagsg me. Bãngr a woto na n sõnga tõnd tɩ d maneg n pẽneg d Wẽnnaamã n paase.

³ D sã n tũud Wẽnnaam Biigã sẽn yaa taoor soabã, n sakd a Zeova siglgã babg ning sẽn be tẽngã zugã sẽn sõngd tõnd tɩ d bãngd a Zeova raabã, d na n tõog n paasa tõnd ne a Zeova zoodã pãnga. Wa b sẽn pĩnd n togs Matiye 24:45-47 wã, a Zeezi Kirist sẽn yaa Zu-soabã yãka “tʋm-tʋmd sẽn tũud sɩd la sẽn tar yamã,” t’a ges Wẽnnaam nin-buiidã yelle, “n kõt-b rɩɩb wakat sẽn zemse.” Rũndã-rũndã, tʋm-tʋmd sẽn tũud sɩdã sõngda tõnd tɩ d paamd bũmb wʋsg tõnd tẽebã kengr yĩnga. A Zeova tũnugda ne tʋm-tʋmd-kãng n sagend tõnd tɩ d karemd a Gomdã daar fãa, n kẽnd tigissã n pa vaandẽ, la d moond “Rĩungã koe-noogã” ne d sũur fãa. (Mat. 24:14; 28:19, 20; Zoz. 1:8; Yɩɩn. 1:1-3) D pa segd n tall tagsg sẽn pa zems baa bilf tʋm-tʋmd sẽn tũud sɩdã zug ye. D segd n kell n paa a Zeova siglgã babg ning sẽn be tẽngã zugã pʋgẽ, la d sakd a sẽn wilgd-d sor ningã. Rẽ na n kɩtame tɩ d pẽneg d Wẽnnaam a Zeova. Na n sõng-d lame me tɩ d paam raoodo, la koglg zu-loees sasa.

BŨMB NING SẼN KƖT TƖ ZU-LOEESÃ TAR PAASGÃ

⁴ Tõe tɩ y sẽn bãng sɩdã kaoosa yʋʋm wʋsgo. Sã n yaa woto, b sã n wa gomd d sẽn segd n tõog toog d tũudmã yĩngã, yaa vẽeneg tɩ y wʋmda a võore. La baa y sẽn bãng a Zeova la y be a nin-buiidã sʋkã sã n nan pa kaoose, y miime t’a Sʋɩtãan kɩɩsda neb nins fãa sẽn teend a Zeova naamã. (2 Tɩm. 3:12) Woto wã, baa y zu-loeesã sẽn yaa to-to fãa, y pa segd n zoe rabeem bɩ n koms raood ye. A Zeova pʋlmame t’a na n sõnga yãmb la a fãag-yã, n kõ-y vɩɩm beoog sẽn wate.—Ebre. 13:5, 6; Vẽn. 2:10.

⁵ Tõnd ned kam fãa tõe n paama zu-loeese, d sẽn ket n be a Sʋɩtãan dũniyã pʋgẽ wã yĩnga. Wẽnnaam Rĩungã sẽn lugl yʋʋmd 1914 tɛka, a Sʋɩtãan pa le tar sor n tõe n kẽng saasẽ, a Zeova sẽn beẽ wã ye. B lob-a-la tẽngã zugu. Yaa be la yẽ ne a malɛg-wẽnsã be. Zu-loeesã sẽn paasd tẽngã zugã, la b sẽn maneg n namsd a Zeova nin-buiidã wilgdame t’a Sʋɩtãan sẽn dɩt naam ninsaalbã zut ne wẽnemã sũur puudame, la tɩ d vɩɩ dũni-kãngã saab wakate.—Vẽn. 12:1-12.

⁶ B sẽn lob a Sʋɩtãan tẽngã zug t’a sũurã puudẽ wã, a miime t’a wakatã sẽn ketã yaa bilfu. Yẽ ne a zĩn-dãmbã maoodame n na n gɩdg Rĩungã koɛɛgã moonego, la b sãam zems-n-taar ning sẽn be a Zeova nin-buiidã sʋkã. Rẽ kɩtame tɩ d segd n zab d tẽebã yĩnga, “la pa ne ninsaalb ye. Yaa ne zĩn-dãmb sẽn be saasẽ n yaa nanambs la pãn-soaadba, n so dũniyã sẽn be lik pʋgẽ wã.” D sã n dat n zĩnd a Zeova poorẽ n tõog zabrã, d pa segd n bas zabrã ye. D segd n kell n boba zab-teed nins Wẽnnaam sẽn kõtã. D segd n “yalsa kãn-kãe Sʋɩtãanã sɩlem-tʋʋmã taoore.” (Efɛɛ. 6:10-17) Rẽ baoodame tɩ d tõog toogo.

D MAO N TÕOG TOOGO

⁷ Ned sẽn tõe toog yaa ned sẽn pa basd tɩ zu-loees wall namsg kɩt t’a koms raood ye. Tũudmã wɛɛngẽ, ned sẽn tõogd toog yaa ned sẽn maood n na n maan sẽn yaa tɩrga, baa a sã n wa segd zu-loeese, kɩɩsg wall namsg a tũudmã yĩnga, pa rẽ bɩ yell a to sẽn tõe n wa kɩt t’a kɩɩs Wẽnnaam. Kiris-nebã segd n modga wakat fãa n tõogd toogo. Rẽ maaneg pa nana ye. D sã n paasd d tẽebã pãnga, d na n maneg n tõogda toogo. D sã n tõog n mao ne zu-loees nins d sẽn paam d lisgã reegr poorã, d na n paama pãnga, n tõog toog zu-loe-kɛgems d sẽn mi tɩ d na n segame taoore. (Luk 16:10) D sã n gũ tɩ zu-loe-kɛgems wa tɩ d yaool n paas d tẽebã pãnga, d pa na n tõog ye. D segd n deng n yãka yam n maan dẽ tɩ zu-loeesã nan pa wa ye. Tẽn-tʋmd a Pɩyɛɛr wilgame tɩ d segd n tõogda toogo, la tɩ yaa tɩlɛ tɩ d bɩɩs zʋg-sõma a taaba. A yeelame: “Bɩ y mao y pãng tɛk tɩ y tẽebã naag ne sõmblem, tɩ y sõmblmã naag ne bãngre, tɩ y bãngrã naag ne yõk-m-menga, tɩ y yõk-m-mengã naag ne tõog-toogo, tɩ y tõog-toogã naag ne wẽn-sakre, tɩ y wẽn-sakrã naag ne saam-biir nonglem, tɩ y saam-biir nonglmã naag ne nebã fãa nonglem.”—2 Pɩy. 1:5-7; 1 Tɩm. 6:11.

⁸ A Zak sebrã pʋgẽ, a wilga d sẽn segd n tõog toogã yõodo. A yeelame: “M saam-biisi, yãmb sã n wa paamd zu-loees toɛy-toɛy bɩ y kɩdem sũ-noogo, y sẽn mi tɩ y tẽebã sẽn paam makr woto wã kɩtdame tɩ y tõogd toogã yĩnga. La bɩ tõog-toog tʋm a tʋʋmd n baas tɩ yãmb pid zãnga, n yɩ sõma bũmb fãa pʋgẽ, tɩ baa fʋɩ ra paoog-y ye.” (Zak 1:2-4) A Zak yeelame tɩ kiris-nebã segd n saka zu-loeesã la b kɩdem sũ-noogo, bala b sõngdame tɩ b tõogd toogo. Yãmb tagsdame tɩ yaa woto bɩ? A Zak paasame tɩ tõog-toogã tara a tʋʋmde, sẽn yaa sõng tõnd tɩ d bɩɩs zʋg-sõma nins kiris-ned sẽn segd n tallã, la a kɩt tɩ d ta Wẽnnaam yam zãnga. Sɩd me, d sã n segd zu-loees n tõogd n maood ne-ba, d manegd n tõogda toogo, tɩ rẽ kɩt tɩ d bɩɩsd zʋg-sõma a taab sẽn yaa tɩlɛ ne-do.

⁹ D sã n tõogd toogo nooma a Zeova. Na n kɩtame t’a wa kõ-d vɩɩm sẽn pa sate. A Zak paasame: “Sũ-noog soab la ned ning sẽn tõogd toog zu-loees sasa, bala a sẽn lebg ned sẽn tat Wẽnnaam yamã, a na n paama vɩɩm maanfã a Zeova sẽn pʋlem neb nins sẽn nong bãmb wakat fãa wã.” (Zak 1:12) D tõogda toog d sẽn na n wa paam vɩɩmã yĩnga. D sã n pa tõogd toogo, d pa tõe n pa sɩdã pʋgẽ ye. D sã n bas tɩ dũniyã tõog-do, na n yɩɩ tɩlɛ tɩ d leb dũniyã pʋgẽ. D sã n pa tõogd toogo, d pa na n le paam a Zeova vʋʋsem sõngã sõngr ye. Rẽ na n kɩtame tɩ d pa bɩɩsd vʋʋsem sõngã biis d vɩɩmã pʋgẽ ye.

¹⁰ Tõnd sã n dat n kell n tõog toog yaoolem wakatã sẽn pa nana wã, d segd n talla tagsg sẽn zems zu-loees nins kiris-nebã sẽn segdã wɛɛngẽ. D tẽeg t’a Zak yeelame tɩ d “kɩdem sũ-noogo.” Rẽ maaneg tõe n yɩɩ toogo, bala b tõe n wa namsd-d-la vẽeneg-vẽenega, wall yaa yɩɩr la d maanda. La tẽeg-y tɩ yaa y sẽn na n tõog toog la y na n wa paam vɩɩmã. Tẽn-tʋmdbã sẽn tall manesem ning zu-loɛɛg a ye taoorã sõngda tõnd tɩ d bãng d sẽn tõe n kɩdem sũ-noog to-to zu-loees sasa. Kibarã bee Tʋʋm sebrã pʋgẽ. Be b yetame: “B boola tẽn-tʋmdbã n pãb-b ne kalwaase, n yeel-b tɩ b ra le gom ne a Zeezi yʋʋre, la b bas-b tɩ b looge. Dẽ, tẽn-tʋmdbã yii Sãnedrẽ wã taoor n loog ne sũ-noogo, bala b paamame tɩ b nams-b a Zeezi yʋʋrã yĩnga.” (Tʋʋ. 5:40, 41) Tẽn-tʋmdbã bãngame tɩ b sẽn namsdã wilgdame tɩ b sakda a Zeezi sẽn yeelã, la tɩ b tata a Zeova yam. Kaoosg zugẽ, a Pɩyɛɛr sẽn wa n gʋlsd a pipi lɛtrã, a wilgame tɩ b sẽn namsd tõnd tɩrlem yĩngã tara yõod wʋsgo.—1 Pɩy. 4:12-16.

¹¹ A Poll ne a Sɩlaas me kõo tõnd mak-sõngo. B sẽn wa n moond koɛɛgã Filip tẽngã, b yõg-b lame n yeel tɩ b rãmbda tẽngã, la tɩ b moonda minund sẽn pa zems ne tõogã. Rẽ kɩtame tɩ b pãb-b wʋsgo, la b kẽes-b bãens roogo. Kibarã pʋgẽ, b wilgame t’a Poll ne a Sɩlaas sẽn wa n ket bãensã roogẽ ne b noadã b sẽn pa tɩpã, “yʋn-sʋkã sẽnese, a Poll ne a Sɩlaas ra pʋʋsdame la b yɩɩnd n pẽgd Wẽnnaam tɩ bi-beesã kelgdẽ.” (Tʋʋ. 16:16-25) A Poll ne a tũud-n-taagã ra getame tɩ b sẽn namsd Kiristã yĩngã pa sẽn na n wilg b burkĩnd Wẽnnaam la ninsaalbã taoor bal ye. Yaa segb b sẽn paam n na n moon neb nins sẽn tʋll n kelg koe-noogã. Neb a taab vɩɩm n da be yell pʋgẽ. Baraar yʋngo, bãensã roog gũudã ne a zakã rãmb sak n kelgame, n lebg Kiristã karen-biisi. (Tʋʋ. 16:26-34) A Poll ne a Sɩlaas teega a Zeova, a pãngã, la a sẽn tʋll n teel-b b namsgã sasa wã. B pa maan b bãngẽ ye.

¹² Rũndã-rũndã me, a Zeova kõta tõnd bũmb nins sẽn yaa tɩlɛ wã, sẽn na yɩl n teel-d zu-loees sasa. A ratame tɩ d tõog toogo. A kõo tõnd a Gomdã sẽn na yɩl n sõng tõnd tɩ d paam bãngr hakɩɩk a raabã wɛɛngẽ. Rẽ kɩtame tɩ d tẽebã pãng paasdẽ. D paamame n tõe n naag d tẽed-n-taasã n waoog a Zeova. D paamame me n tõe n pʋʋs a Zeova tɩ paasd tõnd ne yẽ zoodã pãnga. D sã n wa pẽgd-a, wall d pʋʋsd-a n kot sõngr sẽn na yɩl n kell n yɩ yɩlem a nifẽ, a kelgdame. (Fili. 4:13) D segd n tẽegame me tɩ d sã n tagsd manegrã sẽn watã yelle, d paamda pãnga.—Mat. 24:13; Ebre. 6:18; Vẽn. 21:1-4.

D TÕOG TOOG ZU-LOEES TOƐY-TOƐY PƲSẼ

¹³ Zu-loees nins d sẽn segd rũndã-rũndã wã wõnda a Zeezi pipi karen-biisã sẽn seg b rãmbã. Rũndã-rũndã, a Zeova Kaset rãmbã paamda paoogre, tʋya, la namsg buud toor-toor kɩɩsdb sẽn pa wʋmd yɛlã võor nusẽ. Wa sẽn yɩ to-to tẽn-tʋmdbã wakatẽ wã, tũudmã taoor dãmb kɩɩsda tõndo, Wẽnnaam Gomdã sẽn vẽnegd b zãmsgã sẽn yaa ziri wã, la b manesmã sẽn pa zems ne Biiblã noyã yĩnga. (Tʋʋ. 17:5-9, 13) Wakat ninga, a Zeova nin-buiidã tikda noy goosneem-dãmbã sẽn yiis n wilg tɩ b tara sor n tõe n maan bũmb ninga, n paam lohorem. (Tʋʋ. 22:25; 25:11) La taoor dãmb n yiis noy sẽn na yɩl n gɩdg d tʋʋmdã me, n dat tɩ d ra le moon koɛɛgã ye. (Yɩɩn. 2:1-3) Sã n wa yaa woto, d rɩkda tẽn-tʋmdbã togs-n-taar ne raoodo. B yeelame: “Wẽnnaam n yaa naab ning tõnd sẽn segd n sakã, pa ninsaalbã ye.”—Tʋʋ. 5:29.

¹⁴ Tẽng-n-biilmã sẽn tar paasg dũniyã gill zugã, b namsda neb nins sẽn moond koe-noogã wʋsg sẽn na yɩl tɩ b bas tʋʋmd ning Wẽnnaam sẽn kõ-bã. Wẽnnaam nin-buiidã fãa sak n deega bũmb ning b sẽn togs Vẽnegr 14:9-12 pʋgẽ “we-rũngã ne a bõn-naandgã” waoogrã wɛɛngẽ wã. D wʋmda a Zã goamã võore. A yeelame: “Woto baoodame tɩ nin-sõamyã wã sẽn yaa neb nins sẽn tũud Wẽnnaam noyã, la sẽn gãd tẽeb ning b sẽn tar ne a Zeezi kãn-kãe wã tõog toogo.”

¹⁵ Zaba, tẽn-dãmbgo, namsgo, la noy b sẽn yiis n na n gɩdg d tũudmã tõe n kɩtame tɩ y pa le tõe n tũ Wẽnnaam vẽeneg-vẽeneg ye. Tõe tɩ y pa na n le tõog n tigim ne y tẽed-n-taasã n maand tigis ye. Tõe tɩ y pa na n le paamd filiyallã kibay, tɩ yel-gɛtbã me pa le kaagd tigimsã ye. Tõe me tɩ b pa na n le toond sɛb nins siglgã sẽn yiisdã ye. Y sã n wa be yell a woto taoore, bõe la y na n maane?

¹⁶ Y segd n maana y sẽn tõe fãa yellã pʋgẽ. Y tog n tõog n zãmsda Biiblã y toore. Wakat ning me, y tõe n tigimda taab sul-bõones saam-biis kẽer zagsẽ n zãmsd Biiblã. Y tõe n tikda sɛb nins d sẽn zoe n zãms tɩ loogã, la Biiblã n maand tigissã. Ra zoe-y rabeem wall y maan yɩɩr ye. Naoor wʋsgo, Siglgã taoor lʋɩtb Sullã mi n tõog n sõsa ne saam-biis nins sẽn lʋɩt taoorã, baa yaa bilfu.

¹⁷ Baa y sã n wa yaa y yembr tɩ saam-biis pa be yambẽ, bɩ y tẽeg t’a Zeova ne a Biig a Zeezi Kirist bee ne yãmba. Y tõe n kell n tẽeme tɩ manegr n wate. A Zeova ket n tõe n kelga y pʋʋsgã, la a keng y raood ne a vʋʋsem sõngã maasem. Teeg-y-yã-a t’a wilg-y sore. Tẽeg-y tɩ y yaa a Zeova Kaset soaba, la a Zeezi Kirist karen-biiga. Woto wã, tũnug-y ne segb y sẽn paam fãa n moon koɛɛgã. A Zeova na n ninga y modgrã barka. Tõe tɩ neb a taab me na n wa naaga yãmb tũudum hakɩɩkã pʋgẽ.—Tʋʋ. 4:13-31; 5:27-42; Fili. 1:27-30; 4:6, 7; 2 Tɩm. 4:16-18.

¹⁸ La sã n mik tɩ b yeelame tɩ b na n kʋʋ yãmb wa b sẽn yeel tẽn-tʋmdbã la neb a taabã, bɩ y teeg “Wẽnnaam sẽn vʋʋgd kũumã.” (2 Kor. 1:8-10) Yãmb sẽn tẽed kũum vʋʋgrã tõe n sõng-y lame tɩ y tõog toogo, baa nams-toaag taoore. (Luk 21:19) A Zeezi Kirist kõo mak-sõngo. A ra miime t’a sẽn na n kell n maan sɩd baa makr taoorã na n sõnga neb a taabã tɩ b tõog toogo. Yãmb me mak-sõngã tõe n kenga y saam-biisã raood woto.—Zã 16:33; Ebre. 12:2, 3; 1 Pɩy. 2:21.

¹⁹ Namsgã la kɩɩsgã sẽn yãk b toogo, tõe tɩ y segd n maoo ne zu-loees a taaba. Wala makre, d tẽed-n-taas kẽer komsa raoodo, nebã sẽn pa rat n kelg koɛɛgã b moonegã zĩisẽ wã yĩnga. Sãnda me segd n maoo ne bãas b sẽn tare, wall ne b pãn-komsem kẽere. Tẽn-tʋmd a Poll me ra segd n maoo ne zu-loees sẽn da tiisd a tʋʋmdã, wall sẽn kɩt tɩ ra yaa toog ne-a wakat kẽere. (2 Kor. 12:7) Sẽn paase, a Epafordit sẽn da naag pipi kiris-nebã, n yit Filip tẽngã “sũur sãama wʋsgo, [a tẽed-n-taasã] sẽn wʋm t’a ra lʋɩɩ bãagã yĩnga.” (Fili. 2:25-27) Tõnd sẽn pa zems zãngã, la neb a taabã me sẽn pa zems zãngã tõe n yɩɩ zu-loɛɛg ne-do, tɩ yaa toog tɩ d mao ne rẽ n tõoge. D zʋgã, d manesmã la d tagsa wã sẽn pa yembrã, d tõe n wa tara yell ne d tẽed-n-taaga, wall ne d zakã ned menga. La d sã n tũud a Zeova Gomdã saglse, d tõogd n maoo ne zu-loees a woto n tõoge.—Eze. 2:3-5; 1 Kor. 9:27; 13:8; Kolo. 3:12-14; 1 Pɩy. 4:8.

YÃK-Y YAM N KELL N MAAN SƖDA

²⁰ D segd n kell n zĩnda a Zeezi Kirist poorẽ, soab ning a Zeova sẽn yãk t’a yaa tigingã Zugã. (Kolo. 2:18, 19) D segd n sakda “tʋm-tʋmd sẽn tũud sɩd la sẽn tar yamã,” la b sẽn yãk b rãmb tɩ b yaa yel-gɛtbã. (Ebre. 13:7, 17) D sã n sakd n tũud yɛlã sẽn sigl to-to a Zeova siglgã pʋgẽ wã, la d naagd sẽn lʋɩt-b taoorã n tʋmdẽ, d na n sigla sõma a Zeova raabã maaneg yĩnga. D sẽn paam n tõe n pʋʋsd Wẽnnaamã, d segd n mao n maanda woto wakat fãa. Tẽeg-y tɩ baa y bee bãens roogẽ wall y yaa y yembre, bũmb pa tõe n gɩdg-y tɩ y pa gom ne d saasẽ Ba wã sẽn nong-dã, wall n sãam yãmb ne y tẽed-n-taasã zems-n-taarã ye.

²¹ D tall raood la d tõog toogo, n maan d sẽn tõe fãa n tʋm tʋʋmd ning a Zeezi Kirist sẽn kõ a karen-biisã a vʋʋgrã poorã. A yeelame: “Bɩ y kẽng n tɩ sõng buud fãa neb tɩ b yɩ mam karen-biisi, n lis bãmb ne Ba wã la Biigã la vʋʋsem sõngã yʋʋre, la y zãms bãmb tɩ b sak bũmb nins fãa mam sẽn yeel yãmbã.” (Mat. 28:19, 20) D kell n tõog toog wa a Zeezi. Bɩ d tagsd Rĩungã sẽn na n wa ne manegr ningã, la vɩɩm sẽn kõn sa wã sẽn watã yelle. (Ebre. 12:2) D sẽn deeg lisg n yaa Kiristã karen-biisã, d paamame n tõe n naag n moon koɛɛgã n sõng tɩ gomd ning a Zeezi sẽn togs “dũniyã saab wakatã” wɛɛngẽ wã pidsi. A yeelame: “Rĩungã koe-no-kãngã na n moona dũniyã tɛk fãa tɩ yɩ kaset buud fãa yĩnga. Yaa rẽ poor la saabã na n ta.” (Mat. 24:3, 14) D sã n kell n tʋm tʋʋm-kãngã ne d sũur fãa sasa kãngã, d na n wa paam n vɩɩmda wakat sẽn kõn sa, a Zeova dũni-paalgã tɩrlem sẽn na n zĩnd a pʋgẽ wã pʋgẽ!