Sũ-mar tallg wata ne keoore
1 “Ne sũ-mare yãmb na n fãaga y mense.” (Luk 21:19) Gom-kãensã sẽn be a Zezi bãngr-gomd ning sẽn tɩ loe ne ‘dũniyã sɛɛb wakatã’ pʋgẽ wilgda vẽeneg tɩ sẽn na yɩl n tall d burkĩndã, rẽnda d segl d mens n mao ne makr toɛy-toɛya. La ne a Zeova sõngre, tõnd ned kam fãa tõe n maoome ‘tɩ [sɛɛba] wakat ta,’ n paam ‘fãagre.’—Mat. 24:3, 13; Fil. 4:13, Sebr Sõngo.
2 Namsg d tẽebã yĩnga, bãase, ligd zu-loeese, la sũ-sãams tõeeme n kɩt tɩ yɛlã yɩ toog ne-d daar fãa. La d ka tog n yĩm t’a Sʋɩtãan makdame n na n sãam tõnd burkĩndã a Zeova taoor ye. D sã n tall d burkĩndã a Zeova taoor daar tõre, leb n yaa daar a to d sẽn sõng n leok Paoogdã sẽn kɩɩsd tɩ d ka burkĩmbã. Ad yaa bũmb sẽn kõt sũ-noog menga, d sẽn mi t’a Zeova ka yĩmd ‘nintãm’ ning d sẽn daagda, d namsgã sasa wã ye! Nintãm kãng tara yõod ne a Zeova, sẽn paase tõnd burkĩndã noogda a sũuri.—Yɩɩl 56:9; Yel. 27:11.
3 Makr toɛy-toɛyã manegda tõnd zʋgã: Namsg tõe n kɩtame tɩ d bãng tɩ d tara pãn-komsem ning tẽebã wɛɛngẽ bɩ zʋg ninga. Wala makre, rẽ tõe n kɩtame tɩ d bãng tɩ d yaa tɩtaam bɩ yãg-yãg soaba. D ka segd n bao n gil makrã, bɩ n kɩt t’a sa ne manesem sẽn kɩɩsd Biiblã ye. D tog n tũu Wẽnnaam saglsã n bas “tɩ sũ-mar maan a tʋʋmd n baase.” Bõe yĩnga? Bala d sã n yals kãn-kãe makr taoore, sõngd-d lame tɩ d “bɩ n zems zãnga.” (Zak 1:2-4) Sũ-marã sõngd-d lame tɩ d tall zʋg-sõma sẽn tar yõod wʋsg wala maan-tɩ-zems la nimbãan-zoeere.—Rom 12:15.
4 Tẽeb sẽn paam makre: Tõnd sã n tall sũ-mar makr pʋgẽ, d na n talla tẽeb sẽn paam makr sõma, sẽn tar yõod wʋsg Wẽnnaam nifẽ. (1 Pɩɛ. 1:6, 7) Tẽeb a woto sõngda tõnd tɩ d yals kãn-kãe makr a taab sẽn wat pʋsẽ. Sẽn paase, d na n yãame tɩ d tata Wẽnnaam yam, tɩ rẽ na n paas tõnd saagrã pãnga, n kɩt t’a lebg vẽeneg ne-d n yɩɩda.—Rom 5:3-5.
5 Zak 1:12 pʋgẽ wã, b wilga keoor ning sẽn yaa kãseng n yɩɩd d sẽn tõe n paam d sũ-marã yĩngã. B yeela be woto: “Bark bee ned ninga zugu sẽn yalsd kãn-kãe makr wakate, tɩ bõe, a sã n paam makr n tõoge, a na n deega vɩɩm maanfo.” Bɩ d ket n sakd a Zeova wakat fãa, n tar bas-m-yam t’a na n keoo ‘neb nins sẽn ket n nong-a’ wã wʋsgo.