‘Bark bee ned ning sẽn yalsd kãn-kãe makr wakat zugu’
1 Kiris-nebã fãa paamda zu-loeese. (2 Tɩm. 3:12) Zu-loeesã tõe n yɩɩ laafɩ kaalem, talemdo, kʋɩɩbgo, namsg d tẽebã yĩnga, la yɛl a taaba. Zu-loees nins a Sʋɩtãan sẽn wat ne wã yaa sẽn na yɩl n kɩt tɩ d tẽebã booge, tɩ d bas koɛɛgã moonego, pa rẽ bɩ d pʋd n bas a Zeova tũubu. (Zoob 1:9-11) D sã n yals kãn-kãe, wãn to la rẽ kõt-d sũ-noogo?—2 Pɩɛ. 2:9.
2 D segl d mens zu-loeesã yĩnga: A Zeova kõ-d-la a Gomdã sẽn yaa sɩdã, tɩ kibay sẽn wilgd a Zezi vɩɩmã sẽn yɩ to-to, n paas a sẽn zãms nebã bũmb ninsã be be. D sã n kelgd a Zezi goamã la d tũudẽ, d segenda d mens n na n wa tõog n yals kãn-kãe zu-loees sasa. (Luk 6:47-49) D tẽed-n-taasã, tigissã, la sɛb nins tʋm-tʋmd sẽn tũud sɩd la sẽn tar yamã sẽn yiisdã sõngd-d lame tɩ d paamd pãng n yalsd kãn-kãe. D tara zu-noog me n tõe n pʋʋs Wẽnnaam wakat fãa.—Mat. 6:13.
3 A Zeova leb n kõ-d-la saagre. D sã n tẽed a Zeova kãabsã ne d sũur fãa, d saagrã na n yɩɩ wa “baar sẽn ka vigsd la sẽn ka kaoogd ye.” (Heb. 6:19) Pĩnd wẽndẽ wã, baa sebg sã n kaẽ, batayo ra pa kẽnd mogrã zug tɩ b pa zãad a baarã ye. Sebg sã n da yiki, b sã n lob baarã t’a tɩ kɩ tẽngã kɩtdame tɩ sebgã ra pem batayo wã t’a tɩ fao kug-kẽeng n sãam ye. Tõnd me sã n modg n tall tẽeb ne a Zeova kãabsã masã, d saagrã na n kɩtame tɩ d yals kãn-kãe, d sã n wa be zu-loees pʋsẽ. Zu-loees tõe n tiig n waa zĩig pʋgẽ. Yaa sɩd tɩ sɩngrẽ wã, Listr nebã kelga a Poll la a Barnabas koɛɛgã hal sõma, la Zʋɩf rãmb nins sẽn yaa wẽn-kɩɩsdbã sẽn wa wã, yɛlã fãa toeema zĩig pʋgẽ bala.—Tʋʋ. 14:8-19.
4 D sã n yalsd kãn-kãe d paamda sũ-noogo: Tõnd sã n ket n moond koɛɛgã baa nebã sã n kɩɩsd tõndo, kɩtdame tɩ d yamã gãe bãane. D sũy yaa noogo, nebã sã n paoogd tõnd d sẽn tũud Kiristã yĩnga. (Tʋʋ. 5:40, 41) D sã n yals kãn-kãe, sõngda tõnd tɩ d yɩ sik-m-mens rãmba, sakdba, la d tõogd toog n paasdẽ. (Tõo. 8:16; Heb. 5:8; Zak 1:2, 3) Leb n kɩtdame tɩ d teeg a Zeova, n tall bas-yard ne a kãabsã, la d bao koglg a nengẽ.—Yel. 18:10.
5 D miime tɩ zu-loeesã na n wa saame. (2 Kor. 4:17, 18) Zu-loeesã kɩtdame tɩ d tõe n wilg d nonglmã ne a Zeova sẽn ta zĩig ningã. D sã n yals kãn-kãe zu-loeesã pʋsẽ, d wilgdame t’a Sʋɩtãan sẽn yeel bũmb ninsã fãa yaa ziri. Woto yĩnga, bɩ d kell n yals kãn-kãe! ‘Bark bee ned ning sẽn yalsd kãn-kãe makr wakat zugu, tɩ bõe, a sã n paam makr n tõoge, a na n deega vɩɩm maanfo.’—Zak 1:12.