Karemdbã sogsgo

Tʋm-tʋmd a Poll yeelame t’a Zeova pa “na n sak tɩ yãmb paam makr sẽn yɩɩd y pãng ye.” (1 Kor. 10:13) Rẽ yĩnga, woto rat n yeelame t’a Zeova rengd n yãka tõnd sẽn tõe n mao ne zu-loɛɛg ninga, la a yãk zu-loees nins a sẽn na n bas tɩ paam tõnd bɩ?

Sã n da yaa woto, mams-y yɛlã sẽn da na n yɩ to-to. Saam-biig bi-ribl n kʋ a menga, t’a sok a meng yaa: ‘A Zeova pĩnd n gesame n mik tɩ maam ne m pagã na n tõog n maoo ne toog ning d biigã kaalem sẽn na n wa ne wã bɩ?’ D miime tɩ dũni-kãngã pʋgẽ, d pa tõe n pa paam zu-loees ye. La rẽ yĩnga, d segd n tagsame tɩ bũmb nins fãa sẽn paamd tõndã yaa a Zeova yell bɩ?

D sã n maneg n vaees a Poll sẽn yeel bũmb ning 1 Korẽnt-rãmb 10:13 wã, na n sõng-d lame tɩ d bãng tɩ Biiblã pa wilgd t’a Zeova rengd n yãka tõnd sẽn tõe n mao ne zu-loɛɛg ninga, la a yãk zu-loees nins a sẽn na n bas tɩ paam tõnd ye. Ad bũmb a naas sẽn kɩt tɩ d tõe n yeel rẽ.

Pipi, a Zeova naana ninsaal t’a tõe n yãk a toorẽ yam. A ratame tɩ ned kam fãa yãkd a sẽn date. (Tõo. 30:19, 20; Zoz. 24:15) D yam-yãkr sã n yaa sõma, d tõe n paamame t’a Zeova sõng-d tɩ d tõog n maan d sẽn datã. (Yel. 16:9) La sã n pa sõma, d na n wʋka a biisi. (Gal. 6:7) Sã n yaa a Zeova n yãkd zu-loees nins sẽn na n paam tõndã, rẽ yĩnga d tõe n yeelame t’a basa ned fãa t’a yãkd a toorẽ yam sɩda?

Yiib-n-soaba, a Zeova pa kogend tõnd tɩ “yel-lingdem” pa tõe n paam-d ye. (Koɛ. 9:11, MN) Ned tõe n wa bee zĩig ning tɩ sabab-wẽng tiig n paam-a. Daar a yembre, a Zeezi goma gasg sẽn lʋɩ n kʋ neb 18 yelle, n yeel tɩ pa Wẽnnaam n kɩt tɩ yel-beedã paam-b ye. (Luk 13:1-5) Dẽnd pa zems tɩ d tags tɩ nand tɩ yel-beed maane, Wẽnnaam zoe n yãka sẽn na n põs-bã ye.

Tãab-n-soaba, tõnd ned kam fãa segd n kell n wilgame tɩ yaa a Zeova la a sakda. D tẽeg t’a Sʋɩtãan yeelame t’a Zeova nin-buiidã sẽn maand a raabã yaa sẽn nafd-bã yĩnga, la tɩ toog sã n paam-ba, b na n basa a sakre. (Zoob 1:9-11; 2:4; Vẽn. 12:10) A Zeova sã n da kogendẽ tõnd tɩ toog buud fãa pa tõe n paam-do, kõn yɩ wa a Sʋɩtãan bee bʋʋm sɩda?

Naas-n-soaba, pa tɩlɛ t’a Zeova reng n bao n bãng bũmb ning fãa sẽn na n paam tõnd ye. Yaa sɩd t’a Zeova sã n data, a tõe n pĩnd n bãnga sẽn wat beoogo. (Eza. 46:10) La Biiblã wilgdame tɩ pa bũmba fãa la a yãkd yam n deng n bãng ye. (Sɩng. 18:20, 21; 22:12) A Zeova yaa nonglem la tɩrlem soaba. Rẽ n so t’a bas tɩ ned fãa tõe n yãk a sẽn date.—Tõo. 32:4; 2 Kor. 3:17.

La tʋm-tʋmd a Poll sẽn yeel tɩ ‘Wẽnnaam ka na n sak tɩ yãmb paam makr sẽn yɩɩd y pãngã’ võor yaa bõe? A ra gomda bũmb ning a Zeova sẽn maand makr sasa wã yelle, pa nand tɩ makr wa ye. A sẽn yeelã wilgdame tɩ toog buud fãa sasa, d sã n teeg a Zeova, a na n sõng-d lame. (Yɩɩn. 55:23) A Poll gom-kãensã sẽn kengd raoodã tika bũmb a yiib sẽn yaa sɩda.

Pipi, a yeelame tɩ yɛl nins sẽn paamd tõndã paamda nebã fãa. D sẽn nan ket a Sʋɩtãan dũniyã pʋgẽ wã, d fãa na n paamda zu-loeese, tɩ wakat ning menga, tõe n yɩ yel-beedo. La d sã n teeg a Zeova, d na n tõog n maoo ne yel-kãense, n kell n sak-a. (1 Pɩy. 5:8, 9) Pipi Korẽnt-rãmb sak 10 pʋgẽ wã, a Poll deng n goma makr nins sẽn paam Israyɛll nebã b sẽn wa n be rasempʋɩɩgẽ wã. (1 Kor. 10:6-11) La pa makr sẽn da zɩ n paam neda, pa rẽ bɩ sẽn da yɩɩd b pãng ye. A Poll yeela naoor a naas tɩ “bãmb neb kẽer” kɩɩsa Wẽnnaam. Rẽnd b sʋkã neb kẽer basame tɩ b tʋls-wẽnsã tõog-ba, b sẽn pa teeg Wẽnnaamã yĩnga.

Yiib-n-soaba, a yeelame tɩ “Wẽnnaam yaa sɩd maanda.” Woto rat n yeelame tɩ bõe? D sã n tẽeg a Zeova sẽn ges a nin-buiidã yell hal pĩnd wẽndẽ n tãag masã wã, d nee vẽeneg t’a sɩd sõngda “neb nins sẽn nong bãmb la b sakd bãmb tõogã.” (Tõo. 7:9) D yãtame me t’a Zeova pidsda a pʋlemsã fãa. (Zoz. 23:14) Woto fãa kɩtame tɩ neb nins sẽn nong-a la b sakd-a wã tõe n bas b yam tɩ b makr fãa sasa, a na n maana bũmb a yiibã a sẽn pʋlmã: 1) A pa na n bas tɩ makrã wa loog nugu, tɩ b pa le tõe n tõog toog ye. 2) A ‘na n kõ-b-la manesem b sẽn na maan n yi.’

Neb nins sẽn teeg a Zeova wã sã n be makr pʋgẽ, wãn to la a kõt-b ‘manesem b sẽn na maan n yi’? Yaa sɩd t’a sã n data, a tõe n kɩtame tɩ zu-loɛɛgã loog n bas-do. La tẽeg-y t’a Poll yeelame t’a Zeova na n ‘kõo yãmb manesem y sẽn na maan n yi, tɩ yãmb tõe n yals makrã pʋgẽ.’ Rẽnd b sẽn yeel t’a na n ‘kõ-b-la manesem b sẽn na maan n yi’ wã, yaa tɩ naoor wʋsgo, a getame tɩ b paam bũmb ning fãa sẽn na n sõng tɩ b tõog toog n kell n sak-a wã. Bɩ d ges a sẽn maand rẽ to-to.

• A ‘belsda tõnd d yel-pakr fãa pʋgẽ.’ (2 Kor. 1:3, 4) A Zeova tõe n tũnuga ne a Gomdã, a vʋʋsem sõngã la tʋm-tʋmd sẽn tũud sɩdã sɛbã n bels tõndo, la a keng d raoodo, tɩ d yam gãande.—Mat. 24:45; Zã 14:16; Rom. 15:4.

• A tõe n sõnga tõnd ne a vʋʋsem sõngã maasem. (Zã 14:26) D sã n wa maood ne zu-loɛɛga, vʋʋsem sõngã tõe n sõng-d lame tɩ d tẽeg Biiblã kibay la a saglse, tɩ sõng-d tɩ d bãng n maan sẽn segde.

• A tõe n sõng-d-la ne a malɛgsã maasem.—Ebre. 1:14.

• A tõe n tũnuga ne d tẽed-n-taasã tɩ b ‘paas d raood’ ne b no-goam la b tʋʋmã.—Kol. 4:11.

Woto wã, a Poll sẽn yeel bũmb ning 1 Korẽnt-rãmb 10:13 wã wilgda tõnd bõe? Wilgdame t’a Zeova pa rengd n yãk zu-loees nins sẽn na n paam tõndã ye. La d sã n wa maood ne zu-loɛɛga, d tõe n kɩsa sɩd tɩ d sã n teeg a Zeova, a pa na n tol n bas tɩ wa yɩɩg d pãng ye. A na n sõng-d lame tɩ d tõog n mao. Ad woto sɩd kengda raoodo!