Vɩɩmã na n yɩɩ wãn beoog-daare?

A Zeezi pĩnd n togsa yɛl kẽer sẽn na n sõng tõnd tɩ d “bãng tɩ Wẽnnaam Rĩungã kolgame.” (Luk 21:31) Wala makre, a wilgame tɩ zab-kãsems ne tẽn-digimd-kãsemse, n paas kom la bã-longds na n zĩndame. Woto fãa yaa yɛl tõnd sẽn ne vẽeneg rũndã-rũndã.—Luk 21:10-17.

Biiblã leb n wilgame tɩ nebã yel-manesem sã n wa pa lebd be, na n yɩɩ kaset tɩ d bee ninsaalbã naamã “yaoolem wakatã.” Y tõe n karma b sẽn bilg rẽ 2 Tɩmote 3:1-5 wã. Y sã n ges nebã yel-manesem la b tʋʋm-tʋmdɩ wã sẽn lebg to-to rũndã-rũndã wã, yaa vẽeneg tɩ y na n sak n deegame tɩ Biiblã gom-kãensã pidsdame.

Woto fãa wilgda bõe? Wilgdame tɩ keta bilf tɩ Wẽnnaam Rĩungã manes yɛlã fãa, tɩ ãdem-biisã vɩɩm yɩ noog tẽngã zugu. (Luk 21:36) A Zeova pĩnd n togsa Biiblã pʋgẽ tɩ bõn-sõma ka tɛk n na n zĩnd tẽngã zugu, neb nins sẽn na n vɩɩmd a zugã nafr yĩnga. Ad bõn-sõma a wãna:

NAAM SẼN YAA SÕMA

“La b kõo yẽnda [a Zeezi] ninsaalbã pãnga, waoogr la naam. La nebã buud fãa, ne soolem-dãmbã fãa, la ninsaalbã sẽn gomd goam buud toor-toorã, tʋmda yẽnda yĩnga. La yẽnda pãngã paada wakat sẽn ka sɛta, la a pãngã ka tar sɛɛb ye. La yẽnda naamã ka na n tol n sãam ye.”—DÃNIYƐLL 7:14.

Sẽn dat n yɛɛlga: Rat n yeelame tɩ yaa goosneemã sõmblem sẽn ka to la Wẽnnaam na n lugli, n kɩt t’a biigã yɩ rĩma, n ges tɩ ãdem-biisã vɩɩm yɩ noogo.

YĨNS LAAFƖ

“Tẽngã ned kõn yeel t’a ka keem ye!”—EZAYI 33:24.

Sẽn dat n yɛɛlga: Rat n yeelame tɩ yãmb pa na n le bẽ bɩ n koms ye. Yãmb na n vɩɩmdame n pa tol ki ye.

BÃAN HAKƖƖKA

“Bãmb n kɩtd tɩ zabã sẽn be dũniyã tɛk fãa wã sɛ. Bãmb kaooda tãbd ne kãna, la b yõogd saar-dãmb bugum.”—YƖƖN-SÕAMYÃ 46:10.

Sẽn dat n yɛɛlga: B pa na n le gom zab yelle, zu-loees nins fãa zabã sẽn wat ne wã me na n saame.

NIN-SÕMA BAL N NA N BE TẼNGÃ ZUGU

“Keta bilf bala, tɩ nin-wẽng ka leb n zĩnd ye! . . . Sik-m-mens rãmbã n na n soog tẽngã.” —YƖƖN-SÕAMYÃ 37:10, 11.

Sẽn dat n yɛɛlga: Nin-wẽng baa a ye ka na n le beẽ ye. Na n lebga neb sẽn dat ne b sũy fãa n sak Wẽnnaam.

TẼNGÃ GILL NA N YƖƖ ARZÃNA

“Bãmb na n mee rot n zĩnd b pʋse. B na n sela tɩɩs n dɩ b biisi.”—EZAYI 65:21, 22.

Sẽn dat n yɛɛlga: Tẽngã zĩig fãa na n lebga neere. Wẽnnaam na n kɩtame t’a raabã maan “tẽngã zugu,” wa tõnd sẽn kotã.—Matiye 6:10.