Tõnd bõn-datl yaa bõe?
1 Bõe yĩng tɩ d maand yirẽ Biibl zãmsg ne neba? Yaa sẽn na yɩl tɩ nebã paam bãngr n maneg b vɩɩmã, bɩ n kɩt tɩ b tall saagr ne beoog-daar sẽn be sũ-noog bal bɩ? Ayo. Tõnd bõn-datlã meng-meng yaa maan tɩ b lebg a Zezi Kirist karen-biisi! (Mat. 28:19; Tʋʋ. 14:21) Yaa rẽ yĩng la tõnd sẽn zãmsd Biiblã ne b rãmbã sẽn segd n tɩ lagemd ne tigingã. Yaa b sẽn na n mi kiris-neb siglgã sõma bal la b na n tõog n bɩ tẽebã wɛɛngẽ.
2 D sẽn na n maan to-to n tõog rẽ: Sɩngrẽ wã bal bɩ y sagend karen-biigã t’a rebd tigingã tigissi. (Heb. 10:24, 25) Wilg-y tigissã sẽn na n paas a tẽebã pãng la sõng-a t’a maan Wẽnnaam daabã to-to. La y leb n wilg-a rẽ sẽn na n sõng-a to-to t’a paam tũud-n-taar sẽn yaa sõma ne neb sẽn dat n pẽg a Zeova. (Yɩɩl 27:13; 32:8; 35:18) Yãmb mengã goam sã n wilgdẽ tɩ y nandame la y nong tigingã neb la tigissã, rẽ na n tus-a lame t’a me tʋll n kẽnge.
3 Nin-paalsã segd n bãngame t’a Zeova siglgã yaa dũni gill saam-biiri. Kɩt-y tɩ b ges Les Témoins de Jéhovah: Un nom, une organisation la Toute la communauté de nos frères video rãmbã. Sõng-b tɩ b bãng t’a Zeova tũnugda ne neb milyõ rãmb sẽn dɩk b mens n kõ dũniyã gill zug n pidsd a raabã. Kɩt-y tɩ nin-paals kãensã bãng tɩ b boond-b lame tɩ bãmb me wa balem a Zeova.—Ezai 2:2, 3.
4 Yaa sũ-noog sẽn yaa kãseng ne-do, tɩ d yã tɩ Biibl karen-biig lebg a Zezi karen-biig hakɩka. Sɩd yaa woto la tõnd data!—3 Zã 4.