Sõng-y neb a taabã tɩ b wa tigissã
1 “D zo-rãmb nins sẽn be saka pʋgẽ . . . n dat n wa tigissã fãa, d boond-b lame tɩ b wa.” B moona koe-kãngã yʋʋmd 1880, sɩpaolg kiuugã Gũusg Gasg (Zion’s Watch Tower) pʋgẽ. Sẽn sɩng wakat kãng tɛka a Zeova Kaset rãmbã boonda nebã tɩ b wa lagem ne bãmb n paam Biiblã zãmsgo. (Wil. 22:17) Tigissã me yaa bõn-kãseng tõnd balengã pʋgẽ.
2 Tigissã kẽnd tara yõod wʋsgo: Tõnd sã n maand tũud-n-taar ne tigingã nebã d paamda bark wʋsgo. D bãngda tõnd Wẽnnaam a Zeova sẽn yaa kãsengã sõma n paasdẽ. Tigingã pʋgẽ, d segda taab n ‘paamd zãmsg a Zeova nengẽ.’ (Ezai 54:13, NW) A siglgã kõta tõnd Biibl zãmsg wakat fãa sẽn na yɩl n pẽneg tõnd ne a Zeova n paase. A siglgã leb n kõta sagls sẽn zems sẽn na yɩl tɩ d maan ‘Wẽnnaam daabã zãnga.’ (Tʋʋ. 20:27; Luk 12:42) Tigissã kõta tõnd zãmsg sẽn na yɩl tɩ d bãng n zãms neb a taabã Wẽnnaam Gomdã. Biiblã kõt-d-la tẽegr sẽn sõngd tõnd tɩ d moorã yaa noog ne neb a taabã la ne a Zeova menga. Tõnd sã n maand tũud-n-taar ne neb nins sẽn nong a Zeova wã, rẽ paasda tõnd tẽebã pãnga.—Rom 1:11, 12.
3 Bool-y a soabã tigissẽ wã tao-tao: Biibl zãmsg sɩngrẽ fãa, bɩ y bool karen-biigã t’a wa tigissã. Kɩt-y t’a tʋlg n wa. Y tõe n maana woto, y sã n togsa bũmb yãmb sẽn wʋm yaoolem tigisgẽ wã tɩ keng y raoodo. Y leb n tõeeme n sõs bũmb b sẽn na n gom a yell tigisg ning sẽn watã pʋgẽ zugu. Bilg-y-yã-a Rĩungã Roog sẽn yaa to-to, la y bilg zĩiga sõma t’a tõog n bãng n wa.
4 Karen-biigã sã n ka sɩng tigissẽ wã kẽngr zĩig pʋgẽ, bɩ y ket n boond-a bala. Semen fãa bɩ y rɩk minit a wãn n wilg-a siglgã sẽn tʋmd to-to. Y tõe n tũnuga ne Les Témoins de Jéhovah — Unis pour faire la volonté de Dieu sur toute la terre seb-bilã, la Les Témoins de Jéhovah — un nom, une organisation video wã t’a minim tõnd la d tigissã. Tall-y koe-moondb a taab n wa tɩ karen-biigã bãng-ba. Pʋʋsgã pʋgẽ, bɩ d pʋʋs a Zeova bark a siglgã yĩnga, la d gom a pʋgẽ zĩndg sẽn tar yõod wʋsg ne karen-biigã yelle.
5 Da maan-y yam-yoog la y bool nin-paalsã tɩ b wa tigim ne tõnd ye. B nonglmã ne a Zeova sã n paasdẽ, rẽ na n tus-b lame tɩ b tũ bũmb ning b sẽn zãmsdã. Woto na n leb n tus-b lame tɩ b lebg Wẽnnaam siglgã sẽn tar zems-n-taarã neba.—1 Kor. 14:25.