Babg a 8 soaba: D sẽn na n zãms nebã Biiblã to-to tɩ b bɩ tẽebã pʋgẽ
D sõng Biiblã karen-biis tɩ b bãng siglgã sẽn yaa a soaba
1. Bõe yĩng tɩ tar yõod tɩ d sõsd a Zeova siglgã neng a ye zug semen fãa ne d Biiblã karen-biiga?
1 Tõnd pa rat n zãms nebã bũmb ning sẽn be Biiblã pʋgẽ wã bal ye, d rat n sõngd-b lame tɩ b wa lebg tigingã neb me. (Zak. 8:23) Seb-bil sẽn tõe n sõng-d tɩ d maan dẽ yaa: A Zeova Kaset rãmbã: B yaa ãnd rãmba? Yaa bõe la b tẽeda? Kõ-y Biiblã karen-bi-paals seb-bi-kãngã la y kos-b tɩ b karm-a. Sẽn paase, rɩkd-y minit a wãn semen fãa y zãmsgẽ wã n sõsd a Zeova siglgã neng a ye zugu.
2. Wãn-wãn la y tõe n sõng Biiblã karen-biis tɩ b kẽng tigingã tigissẽ?
2 Tigingã tigissi: Bũmb a ye sẽn kɩtd tɩ Biiblã karen-biis bãng Wẽnnaam siglgã n yɩɩd yaa b sẽn na n wat tõnd tigissẽ wã. (1 Kor. 14:24, 25) Rẽ n so tɩ y segd n sõng-b tɩ b bãng tigingã tigiss a nu wã fãa sẽn maand to-to semen pʋgẽ wã. Togs-y-b zãmã sõsg ning sẽn na n zĩnd semen sẽn watã gom-zugu. Wilg-y bũmb ning yell b sẽn na n gom Gũusg Gasgã la sebrã zãmsgẽ wã. Wilg-y-b Wẽnnaam Tʋʋmdã Lekoll la Tʋʋmdã Tigisg sẽn maand to-to. Y sã n tar sõsg Wẽnnaam Tʋʋmdã Lekollẽ, y tõe n kɩtame tɩ y karen-biisã reng n kelg y sõsgã. Gom-y ne-b tags-kãsems b sẽn zoe n wɛgs tigissẽ wã yelle. Wilg-y-b tõnd tigiss toɛy-toɛyã foto rãmb sẽn be d sɛbã pʋsẽ wã. Pipi daarã y sẽn sɩng Biiblã zãmsg ne-bã bɩ y bool-b tɩ b wa tigissẽ wã.
3. Siglgã nen-bʋs zut la d tõe n sõse?
3 A Zezi kũumã Tẽegre, tigis-kãsemsã la tigims sull yel-gɛta kaagr sã n wa kolgdẽ bɩ y rɩk minit a wãn n bilg-b bõn-kãensã sẽn tar yõod to-to, sẽn na yɩl tɩ b tʋlg n wa b wakatẽ wã. Leokd-y b sogsgã bilf-bilfu, wala makre, sogs-kãensã: Bõe yĩng tɩ b boond tõnd t’a Zeova Kaset rãmba? Bõe yĩng tɩ b boond tõnd tigissã zĩis tɩ Rĩungã Roto? Kãsem dãmbã la kãsemb sõngdbã tʋʋm yaa bõe? Wãn-wãn la koe-moonegã la moonegã zĩig siginda? Wãn-wãn la b yiisd tõnd sɛbã? Yɛ la siglgã paamd ligdã n tʋmdẽ? Tʋʋmdã will biru la Siglgã Taoor lʋɩtb Sull tʋʋmd yaa bõe?
4, 5. Wãn-wãn la tõnd kasɛt video rãmbã tõe n kɩt tɩ ned bãng siglgã la a tall mi-beoog ne-a.
4 Kasɛt video rãmb sẽn tar zãmsgo: D leb n tõe n wilga Biiblã karen-biig a Zeova siglgã sẽn tar dasãndã ne d kasɛt video rãmbã. Wala makre, d tõe n kɩtame tɩ b ges Jusqu’aux extrémités de la terre kasɛtã sẽn wilgd tõnd sẽn moond to-to dũniyã gill zugã, bɩ Toute la communauté de nos frères kasɛtã n kɩt tɩ b bãng tɩ d tara saam-biis dũniya gill zugu, la Unis par l’enseignement divin wã n sõng-b tɩ b bãng lagem-n-taar hakɩk ning sẽn be tõnd a Zeova Kaset rãmbã sʋkã. Pag a yembr sẽn sɩng n paamd tõnd zʋrno rãmbã la d sɛb a taabã sẽn na n maan yʋʋm a nu raaga nintãm, a sẽn ges Les Témoins de Jéhovah : Un nom, une organisation video wã. A ra tara bas-yard ne Kaset rãmbã sẽn kẽnd n kaagd-a wã, la a sẽn ges kasɛtã poore, a bãngame t’a tõe n talla bas-yard ne siglgã me. B sɩnga Biiblã zãmsg ne-a, t’a kẽng tigisgã Rĩungã Roogẽ semen ning sẽn pʋglã.
5 D sã n dɩkd minit a wãn semen fãa n tikd tʋʋm-teed nins d sẽn tarã zut n sõsd ne d Biiblã karen-biigã, bilf-bilfã, d tõogdame n sõng Biiblã karen-biis tɩ b bãng a Zeova sẽn tʋmd ne siglg ning bal rũndã-rũndã wã sẽn yaa a soaba.