Neb nins sẽn tar sũ-noog n yɩɩd tẽng zugã
1 “Neb nins Wẽnnaam sẽn ya a Zeova wã tara sũ-noogo!” (Yɩɩl 144:15, NW ) Gom-kãensã wilgdame tɩ tẽng zugu, a Zeova Kaset rãmbã la neb nins sẽn tar sũ-noog n yɩɩdã. Yaa sɩd Wẽnnaam sẽn vɩ wã, sẽn ya a Zeova wã, baleng bal n kõt sũ-noog ning sẽn yaa kãseng n yɩɩdã. Sẽn mik tɩ ‘Wẽnnaam yaa sũ-noog yẽgrã’, neb nins sẽn balemd-a wã me segd n talla sũ-noogo. (1 Tɩm. 1:11, Sebr Sõngo) Tõnd balengã nens kẽer sẽn kɩt tɩ tõnd tar sũ-noog wʋsg woto wã la bʋse?
2 Bũmb nins sẽn kɩt tɩ d tar sũ-noogã: A Zezi kõo tõnd bas-m-yam, n yeel tɩ yaa tõnd sã n ‘mi tɩ d tara tẽeb ratem’ la d paamd sũ-noogo. (Mat. 5:3, NW ) Yaa d sẽn na n zãmsd Biiblã la d rebd kiris-neb tigissã fãa wakat fãa la d raab kãng paamd pidsgu. Tõnd sẽn zãms Wẽnnaam Gomdã sɩdã kɩtame tɩ tõnd paam d mens ne ziri tũudmã zãmsgo. (Zã 8:32, NW ) Gʋlsg Sõamyã me leb n zãmsa tõnd vɩɩm manesem ning sẽn yaa sõma n yɩɩdã. (Ezai 48:17) Rẽ kɩtame tɩ tõnd tar tũud-n-taar sẽn yaa sõma d saam-biisã sʋka.—1 Tes. 2:19, 20; 1 Pɩɛ. 2:17.
3 D sẽn sakd Wẽnnaam noyã sẽn yaa sõma wʋsgã vɩɩm manesmã wɛɛngẽ wã kõta tõnd sũ-noog sẽn yaa kãsengã, bala d miime tɩ rẽ kogenda tõnd la a noogd a Zeova sũuri. (Yel. 27:11) Zʋrnall a yembr kɩba-kɩt yeela woto: “Baa ne a Zeova Kaset rãmbã sẽn tar noy sẽn ka vigsdã, ka wõnd b yaa neb sẽn ka tar sũ-noog ye. Sẽn yaa lebend ne rẽ [bãmb sʋkã] b kom-bõoneg la b kãsemb fãa tara sũ-noog sẽn ka wɛ la kɩls-tɩ-zemse.” Wãn–wãn la d tõe n sõng neb a taabã tɩ b tall vɩɩm sẽn kõt sũ-noog wa tõnd sẽn tarã?
4 D sõng neb a taabã tɩ b paam sũ-noogo: Dũniyã pida ne sũ-sãamse, la naoor wʋsgo neba ka get tɩ yɛlã na n baasa neer beoog-daar ye. La tõnd yẽ getame tɩ beoog-daare yɛla na n baasa neere, n miẽ tɩ daar n wat tɩ sũ-sãamsã fãa na n sa. (Wil. 21:3, 4) Yaa rẽ yĩng la d sẽn moond koe-noogã ne yẽesem n baood pʋ-peelem dãmbã n na n taas-b tõnd sẽn saagd la d tẽed bũmb nins a Zeova wɛɛngẽ wã.—Eze. 9:4.
5 Saam-bi-poak sẽn yaa so-pakd yeela woto: “Bũmb ka be n kõt sũ-noog n yɩɩd d sẽn na n sõng neb tɩ b bãng a Zeova la a sɩdã ye.” Bɩ d maan d sẽn tõe fãa n keng neb wʋsg sẽn yɩɩd raood tɩ b sak Biibl zãmsgo. D sã n balemd a Zeova la d kõt d mens n na n sõng neb a taab tɩ b balem-a, d paamda sũ-noog ning sẽn yaa kãseng n yɩɩdã.—Tʋʋ. 20:35, Sebr Sõngo.