Yãmb maanda modgr sẽn na yɩl n tõog n bãng kareng la gʋlsg bɩ?
1 Ned sã n zãmsd n dat n paam Wẽnnaam la a raabã bãngr hakɩka, rɩlla a bãng kareng bilfu. Neb wʋsg mikame tɩ kareng bãngr na n paka sor n kõ-b tɩ b tõog n kẽes b mens Wẽnnaam a Zeova baleng tʋʋma pʋsẽ n paase. (Wil. 1:3) Yaa ne karem-moorã b sẽn sigl tigims wʋsg pʋsẽ wã maasem la neb wʋsg zãms kareng la gʋlsgo. Zĩis nins fãa b sẽn tar Modg-y n tõog kareng la gʋlsgã seb-bilã (ay-MM), yaa rẽ la b rɩkd n maan karengã. A yɩɩ sebr b sẽn tõog n tũnug ne n zãms neb kareng la gʋlsg wakat sẽn yaa koɛɛg pʋgẽ.—1 Tɩm. 4:13; Mat. 24:45.
2 Karem-moorã sẽn sigind to-to: Ad goam a wãn d sẽn zaoos seb-bilã pʋgẽ, sẽn wilgd karem-moorã sẽn sigind to-to: ‘Wala sẽn maand Wẽnnaam tʋʋmdã lekollẽ wã, koe-moondb sẽn deeg lisg la sẽn pa reeg lisg tõe n kẽesa b mens karengã zãmsg pʋgẽ. Kãsem dãmbã sã n dɩk sard tɩ yaa tɩlae tɩ b maan kareng la gʋlsg zãmsg sull a ye bɩ sẽn yɩɩd woto, b segd n yãka ned sẽn tar tõog t’a lʋɩ karengã taoore. . . . Wala sẽn zemse, saam-biis n segd n tʋk zɩɩb ning sẽn yaa kõ zãmsgã. Baasg zãnga, sã n mik tɩ saam-biig ka be sẽn tõe n lʋɩ zãmsgã sull taoore, b tõe n yãka saam-bi-poak sẽn tar tõog t’a maan dẽ. . . . Kãsem dãmbã tõe n kosa saam-bi-poak t’a lʋɩ saam-bi-pogs kareng sull taoore la/bɩ komdibli la kompugli sẽn ka reeg lisg kareng sull taoore. Sẽn mik tɩ saam-bi-poakã ledgda saam-biig zãmsgã pʋgẽ zĩ-kãngã wã, a segd n vila peende. Ra talldẽ-la yõod wʋsg tɩ zĩig ning b sẽn tõẽ bɩ b maan karengã naoor a yiib bɩ a tãab semen fãa, sẽn na yɩl tɩ karen-biisã bɩ tao-tao. Zãmsg ne a to sʋka, b segd n kõo karen-biigã yir tʋʋmde, karen-saambã sẽn na n dems zãmsg ning sẽn pʋgdã sɩngrẽ. B segd n maana zãmsgã wakat sẽn zems ne karen-biisã wʋsg sẽn yɩɩde. Kẽer welgda karen-dotã tɩ yaa sul-bõonese, la b kõt zãmsgã sẽn deng tigingã sebr zãmsg sɩngre. A taab welgda karen-dotã toor n kõ zãmsgã Wẽnnaam Tʋʋmdã lekollã wakate. Yaa tigingã kãsem dãmb sull n yãkd wakat la zĩig ning tigingã kareng zãmsgã sẽn na n maanẽ wã.’
3 Tõnd Naandã sẽn yaa Wẽnnaam a Zeova wã naana tõnd tɩ d tõe n karem la d gʋlse. La bãngr a woto ka paamd tɩ ka tũ ne modgr ye. Karengã la gʋlsgã bãngr yõod ning sẽn yaa kãseng n yɩɩdã ya a sẽn tõe n kɩt tɩ d wʋm Wẽnnaam Gomdã võor la d tũ a noorã: “Walem-a f noorẽ wĩndg la yʋngo.”—Zoz. 1:8, Sebr Sõngo.