Tõnd tẽebã tusda tõnd tɩ d maan tʋʋm sõma
1 Tẽeb n tus a Nowe, a Moiiz, ne a Rahaab tɩ b tʋme. A Nowe mee koglgo. A Moiiz sakame n bas nafa toɛy-toɛy nins a sẽn da tõe n paam wakat bilf yĩng a Faraõ zakẽ wã n looge. A Rahaab solga tẽn-gũusdbã la a sak b noyã, n fãag a zak rãmba. (Heb. 11:7, 24-26, 31) Tʋʋm sõma bʋs la tõnd tẽebã tusd tõnd tɩ d maan rũndã-rũndã?
2 Kasetã kũuni: Tẽebã tusda tõnd tɩ d gom tõnd Wẽnnaam kãsengã la segls nins a sẽn maan tõnd wakat fãa sũ-noog yĩngã yelle. (2 Kor. 4:13) Wakat ninga, d yamã tõe n wa yooda ne kasetã kũuni. La tõnd sã n ‘get [a Zeova, NW ] daar fãa n ka basdẽ,’ d pɛlga kengdame tɩ d rabeema sa. (Yɩɩl 16:8) Dẽ, d tẽebã tusda tõnd tɩ d taas koe-noogã d roagdba, d yagse, d tʋmd-n-taase, d karen-bi-taase, la neb a taaba wakat sẽn zems fãa.—Rom 1:14-16.
3 Tigissã kẽnde: Tigissã kẽnd wakat fãa yaa tʋʋm sõng a to tẽebã sẽn tusd tõnd tɩ d maane. Bõe yĩnga? Woto wilgdame tɩ d kɩsa sɩd sõmb-sõmb tɩ d kiris-neb tigissẽ wã a Zezi bee ne tõnd ne Wẽnnaam vʋʋsem sõngã maasem. (Mat. 18:20) Rẽ wilgdame tɩ d tʋllame n “kelg Wẽnd Vʋʋsem koɛɛga ne b Tigingu!” (Wil. 3:6, Sebr Sõngo) D kelgda saglsã d sẽn paamdã, bala ne tõnd tẽebã maasem, d miimi tɩ yaa d Karensaam Kãseng a Zeova n zãmsd tõndo.—Ezai 30:20.
4 Sard nins d sẽn dɩkdã: Tõnd sẽn tar kɩs-sɩd sẽn tar pãng ne yɛl sẽn be tɩ ninsaal nif ka neẽ wã, rẽ tusda tõnd tɩ d lʋɩɩs tẽebã yɛl taoor d vɩɩmã pʋgẽ. (Heb. 11:1) Naoor wʋsgo, rẽ baoodame tɩ d tall mong-m-meng yam. Wala makre, kãsem soab zãgsa naam paasg a tʋʋma zĩigẽ, bala rẽ na n kɩtẽ lame t’a vaal tigissi, t’a ka leb n yãt a zakã rãmb tao-tao wa pĩnda, la t’a bas a so-pakrã tʋʋmde. Dẽ, bɩ tõnd me tall bas-yard zãng-zãng ne Biiblã sẽn yeel t’a Zeova na n gesa neb nins sẽn ‘dengd n baood Wẽnnaam soolem ne a tɩrlmã’ yellã.—Mat. 6:33.
5 Neb a taabã nee tẽebã sẽn toeemd tõnd vɩɩmã wʋsg to-to wã. Sɩd me, dũniyã gill zugu b mii tõnd tẽebã sõma. (Rom 1:8) Bɩ tõnd fãa wilg ne d tʋʋm sõma wã maasem tɩ d tẽebã vɩɩme.—Zak 2:26.