Kɩt-y tɩ bũmb nins y sẽn tara sek yãmba
1 Gʋlsg Sõamyã sagenda tõnd tɩ d ges d zakã neb yell laogã wɛɛngẽ, la ka rẽ n segd n pak tõnd n yɩɩd d vɩɩmã pʋgẽ ye. Yaa tẽebã yɛl n segd n pak-d n yɩɩda. (Mat. 6:33; 1 Tɩm. 5:8) Yaa toog tɩ d tõog n tall kɩls-tɩ-zems ‘wakat sẽn yaa toog wʋsg’ a woto sasa. (2 Tɩm. 3:1, Sebr Sõngo) Bõe n na n sõng tõnd tɩ d maan dẽ?
2 Sak-y Biiblã sẽn yet bũmb ningã: Wẽnnaam Gomdã keoogda tõnd tɩ laogã pʋgb tõe n sãama ned tẽebo. (Koɛ. 5:9; Mat. 13:22; 1 Tɩm. 6:9, 10) Toog wakat kãngã pʋgẽ, yɩtẽ-la wẽng wʋsg ne-do, d sã n bas tɩ tʋʋma la ligdã yɛl pak-d n yɩɩda, la d lebs tẽebã yɛl wala tigissã, zãmsgã, la koe-moonegã poorẽ d vɩɩmã pʋgẽ. (Luk 21:34-36) La Biiblã sagenda woto: “Tõnd sã n tar dɩɩb ne futu, yõ wã sekda tõndo.”—1 Tɩm. 6:7, 8.
3 Woto ka rat n yeel tɩ kiris-nebã segd n basa b mens n kẽ naong pʋgẽ ye. Sagl-kãngã sõngda tõnd tɩ d bãng bũmb nins sẽn sɩd yaa tɩlae ne-dã, sẽn yaa rɩɩbo, futu, la ro-gãadg sẽn zems sã n yaa ne tõnd sẽn vɩ zĩig ningã. Tõnd sã n tar bõn-kãensã sẽn yaa tɩlae wã vɩɩmã pʋgẽ, d ka segd wakat fãa n baood n na n paam bũmb nins sẽn são d sẽn tar pĩndã ye. D sã n dat n da bũmb bɩ n bao tʋʋmd a to n paase, bɩ d sʋk d meng woto: ‘Rẽ yĩnga sɩd yaa tɩlae tɩ m paam bõn-kãngã bɩ?’ Rẽ maaneg na n sõnga tõnd tɩ d tũ sagl-kãngã vʋʋsem sõng sẽn vẽneg tɩ b gʋlsã: “Bɩ yãmb da yɩ ligd noangdb ye, la bɩ y kɩt tɩ bũmb nins yãmb sẽn tara sek yãmba.”—Heb. 13:5.
4 D sã n teeg a Zeova, a na n sõng-d lame. (Yel. 3:5, 6) Baa d sẽn segd n tʋm daar fãa n paam d noor dɩɩbã, d ka basd tɩ yel-kãens pak tõnd tɩ loog vɩɩmã pʋgẽ ye. D tar bilf tɩ yaa wʋsg me, ya a Zeova la d teeg t’a sõng-d tɩ d paam bũmb nins sẽn yaa tɩlae ne-dã. (Fil. 4:11-13) Rẽ kɩtame tɩ d paamd sũ-noog tẽebã pʋgẽ la bark wʋsg a taaba.
5 Rɩk-y togs-n-taar ne neb a taabã tẽebo: Pag sẽn da wubd a bipugl yẽ a yembr sɩdã pʋgẽ gĩdga a vɩɩmã bilf-bilf ne yɛl wʋsgo. Ba a zakã sẽn da noom-a wã, a yika be n kẽng zak sẽn yaa bilf n yɩɩd pʋgẽ, tɩ rẽ poor t’a kẽng ro-bil pʋgẽ. Rẽ sõng-a lame t’a boog a nug-tʋʋmdã wakat sẽn na yɩl n tõog n dɩk sẽk n paas koe-moonegã pʋgẽ. Pagã bipugl sẽn bɩ n kẽ kãadmã poore, a rɩka retrɛt t’a wakat nan ka ta ye, baa rẽ sẽn da na n kɩt tɩ ligdã a sẽn paamdã boogã. Masã yaa yʋʋm a yopoe la woto tõnd saam-bi-poakã sẽn be wakat fãa so-pakrã pʋgẽ, la a ka sãamd a sũur ne laog nins a sẽn bas sẽn na yɩl n ning Rĩungã yɛl pipi zĩigẽ wã ye.
6 Yʋʋm wʋsg pʋgẽ, kãsem soab ne a pag n da maand so-pakrã tʋʋmd la b wubd b kamb a tãabo. B zakã neb fãa zãmsame n sek b mens ne bũmb nins sẽn yaa tɩlae ne-bã, la b ka bao n na n paam b sẽn tʋllã fãa ye. Saam-biigã yeelame: “Yɩɩ tɩlae ne tõnd tɩ d ra gĩd d vɩɩmã ne yɛl wʋsg n paas ye. Yaa sɩd tɩ wakat kẽere d paama zu-loeese, la wakat fãa a Zeova kõo tõnd bũmb nins sẽn yaa tɩlae ne-dã. . . . M zakã neb sẽn ningd tẽebã yɛl pipi zĩigẽ woto wã, m neeme tɩ bũmb fãa yaa wala b sẽn da segd n yɩ to-to wã, la m sũur nooma ne m sẽn tõog n pids bũmb ningã.” A pagã paasa woto: “Mam sã n ne [m sɩdã] sẽn tʋmd wʋsg tẽebã yɛl wɛɛngẽ, kõta maam sũ-noog wʋsgo.” Kambã me sũy nooma b roagdbã sẽn yãk yam n na n maan a Zeova tʋʋmdã wakat fãa wã.
7 Biiblã kãabdame tɩ neb nins sẽn yãk n na n tall wẽn-zoeer vɩɩm a woto n bas laogã pʋgbã na n paama bark wʋsg masã la vɩɩm ning sẽn watã pʋgẽ.—1 Tɩm. 4:8.