Y tõe n paama arzɛka!
1. Bõe yĩng tɩ d segd n tags wakat fãa so-pakrã yelle?
1 Yãmb baooda su-noog wʋsg y vɩɩmã pʋgẽ bɩ? Yãmb nonga nebã sõngr bɩ? Yãmb ratame n tʋm a Zeova tʋʋmdã n paas bɩ? Y sã n leok sogs-kãensã a yembr meng tɩ n-ye, dẽnd y tõe n yɩɩ wakat fãa so-pakda. La zakã pʋg zɩɩb la zɩɩb a taaba, n paas laafɩ kaalem tõe n kɩtame tɩ ned pa tõe n yɩ so-pakd ye.
2. Wilg-y bark kẽer wakat fãa so-pakdbã sẽn paamde.
2 Wẽnnaam sẽn vẽeneg a Salomo t’a gʋls bũmb ningã pʋgẽ, a wilgame t’a Zeova barkã ne arzɛkã tũuda taaba. (Yel. 10:22) Rũndã-rũndã, a Zeova ningda a nebã bark tẽebã wɛɛngẽ n yɩɩda. Wakat fãa so-pakdbã paamda bark kãng wʋsgo. Wala makre, b sẽn dɩk sẽk ning b sẽn da tõe n dɩk n maan bũmb a taabã n sõngd nebã kɩtame tɩ b paamd sũ-noog wʋsgo. (Kol. 4:5; Tʋʋ. 20:35) A Zeova nee b sẽn modgd to-to n wilgd b nonglmã, la a sũur noomame. Arzɛg-kãng b sẽn bĩng saasẽ wã yõod pa na n tol n boog ye. (Mat. 6:20; Heb. 6:10) Sẽn paase, so-pakdbã sẽn pa baood teed wʋsg n teeg a Zeova sẽn na yɩl n paam bũmb nins sẽn yaa tɩlae wã, kɩtame tɩ zood ning b sẽn tar ne a Zeova wã pãng paasdẽ.—Mat. 6:22, 25, 32; Heb. 13:5, 6.
3. Bõe n kɩt tɩ dũniyã pʋgẽ arzɛkã baoob ne tẽebã pʋgẽ arzɛkã baoob pa yembre?
3 Laogã baoob nong n kẽesda nebã makr la “ratem wʋsg sẽn yaa yalemd pʋgẽ.” (1 Tɩm. 6:9, 10; Zak 5:1-3) A Zeova barkã pa woto abada. Wakat fãa so-pakdbã sẽn dɩkd sẽk wʋsg n moond koɛɛgã, sõngd-b lame tɩ b tẽebã kell n tall pãnga, la b maand bũmb nins sẽn tar yõod n yɩɩdã. (Fil. 1:10) Saam-biig a yembr sẽn yaa ẽnzeniyẽer basa a tʋʋmd sẽn da rɩkd sẽk wʋsgo, n lebg so-pakda. A yeela woto: “M yãame tɩ m tʋʋmdã kõta yaams wʋsgo, la so-pakrã pa kõt yaams woto ye. Masã m sõngda nebã tɩ b bãngd sɩdã. Woto tara yamleoog la kõt sũ-noog n yɩɩda.”
4. Wãn to la wakat fãa so-pakdbã paamd barka, b sẽn sõngd neb a taabã yĩnga?
4 B sẽn nafd nebã to-to: Rũndã-rũndã, ned fãa tara zu-loeese. (2 Tɩm. 3:1) Sẽn yaa zĩig ning fãa, nebã baooda saagre. Koe-moondbã sũy yaa noog wʋsgo, b sẽn sõngd neb nins sẽn pa tar saagrã tɩ b wʋmd koɛɛgã la b sakdẽ wã. Wakat fãa so-pakdbã rɩkda sẽn yɩɩd lɛɛr 800 yʋʋmd pʋgẽ n moond koɛɛgã sẽn fãagd nebã. La rẽ kõt-b-la sũ-noog wʋsgo.—1 Tɩm. 4:16.
5, 6. Bõe n tõe n sõng-y tɩ y tõog n yɩ wakat fãa so-pakda?
5 Rẽ yĩnga yãmb zoe n tagsa sõma sẽn na yɩl n yɩ wakat fãa so-pakd bɩ? Tõe tɩ y segd n baoa sẽkã tʋʋm a taab sẽn pa tar yõod wʋsg pʋsẽ n tõog n yɩ so-pakda. (Ef. 5:15, 16). Neb wʋsg maana woto la b sigl b yɛlã tɩ kɩt tɩ b tõe n paam sẽk n paas sẽn na yɩl n tʋm Rĩungã tʋʋmã. Sã n tõe n bɩ yãmb me modg woto n tõog n lebg so-pakdba.
6 Kos-y a Zeova yam sẽn na yɩl n tõog n maan na-kẽndr sẽn yaa sõma. (Zak 1:5) Y sã n maan woto, bark bʋs la y na n paame? A Zeova na n ning-y-la bark wʋsg tẽebã wɛɛngẽ. A na n kõ-y-la bũmb nins sẽn yaa tɩlae wã me. (Mat. 6:33) Neb nins sẽn makd a Zeova woto wã na n paama ‘bark wʋsg tɩ seke.’—Mal. 3:10.